2008-6-10 (3)

想講下意大利對荷蘭場波......

荷蘭既表現被評為開賽3日以來最若人好感
先講進攻
之前佢地踢熱身賽有埋洛賓
已經踢得好流暢
雖然對手只係烏克蘭,丹麥同埋威爾斯之流
不過已經睇得出好得人驚
足以摧毀任何防線

今場尹達華治,史尼達同埋古治負責支援雲佬
佢地全場令意大利既後衛疲於奔命
其實真係唔係出奇事

至於小弟講過好關鍵既防中位置
尼祖迪莊代替迪斯奧踢正選
令人有少少意外
不過其實尋晚佢兩個出場都冇所謂
因為一個安格拿已經幾乎殺晒
佢將以加度素為首既AC三防中徹底比下去
既令意大利全場好多時間都處於下風
亦源源不絕咁為前線提供子彈

後防方面
保拉路斯踢正選
仲要係右閘令人摸不著頭腦
而奧查移入中路取代希丁加更令人擔心雲達沙可以頂得幾多

不過戰局發展落去
意大利前線苦無彈藥
小弟扯火兼擔心既同時
荷蘭 fans 應該幾放心

意大利既東尼絕對係當今其中一個最好既中鋒
不過今場唔算 fit 既佢都係要靠隊友供應
當佢發覺甘莫蘭尼斯同埋迪拿達利失準既時候
佢又可以做0的咩
迪拿達利上半場都有兩腳似樣既攻門睇下
到下半場佢就真係不敢恭維
不過佢已經比甘莫蘭尼斯好
小弟睇完上半場
直情想佢同馬達拉斯去沖個靚涼兼唔好再出場

而講荷蘭後防
一定要讚雲達沙同埋雲邦賀斯
意大利下半場中段變招
曾一度俾左幾大壓力荷蘭
不過唔係佢地唔爭氣把握唔到
就係被雲達沙拒緒門外
如果意大利當時入返一粒
比賽結局隨時全盤改寫
而長人擋出派路既罰球
造就球隊入埋埋齋既第三球
場波先可以正式放入雪櫃

而意大利兩度由入波變為失波
都同雲邦賀斯有關
第一球雖然輸得咁不明不白
但對意大利既打擊
都唔夠之後0個兩球咁大
小弟認為佢係今場波既最關鍵球員
亦係最佳球員

之後想講下兩隊陣容既變動空間
先講荷蘭
前線如果有洛賓當然用佢比用古治更具侵略性
而用雲佩斯就反而唔使太急
小弟覺得尋晚尹巴士頓用佢替雲佬
好有練兵 feel
睇得出尹巴士頓對場波幾有信心

而後防方面
保拉路斯始終唔岩踢右閘
否則對住馬路達,普度斯基,大衛施華同埋C7真係等住爆鑊
而奧查踢中堅就點睇都唔夠希丁加穩陣

意大利方面
換入3個後備哥羅素,迪比亞路同埋卡斯辛奴後
只要再以迪羅斯代替加度素或者岩布仙尼
或者以基亞連尼取代埋彭路基
已經可以重新砌出一個幾唔錯既 4-3-3 陣式

南美聰尋晚賽後提議意大利改用 4-4-2 陣式
搵波里路去拍住東尼攻堅
小弟認為唔實際
因為突然用冇經驗既球員同埋陣式去踢生死戰
通常都冇好下場

P.S.:
有講波佬同埋球迷睇左尋晚場波
評價荷蘭最有皇考風範
不過以小弟愚見
咁快就峰芒畢露未必係好事
反而好似德國咁勒住勒住去踢
隨時可以走得更遠
咁亦解釋左點解德國係大賽球隊