2008-6-20

想講下尋晚德國對葡萄牙既首場8強賽事......

大菲繼續選用頭兩場分組賽羸波既人腳
而路維雖然要坐波監
但就事先作好針對性部署

為左ko以迪高為首既3人中場
同埋攻擊葡萄牙兩閘既弱點
所以路維令人意外地排出一條5人中場線
由於芬寧斯因為肋骨傷患而倦勤
路維決定用路菲斯同埋希斯貝加踢雙防中
加上發電機波歷克
普度斯基同埋波監刑滿既舒韋恩史迪加分別出任左右中場
就形成左德國史上罕見,但攻守兼備既5人中場線

而路菲斯同埋希斯貝加憑活力彌補經驗既不足
將有莫天奴早段傷出既葡萄牙中場線比下去
雖然未至於令葡萄牙斷開三截
亦至少令佢地前線得到既供應冇分組賽咁多
同埋迪高亦冇機會後上攻門
而葡萄牙球員多次浪射
就係佢地未能如常組織攻勢下既錯誤選擇

而由於葡萄牙兩閘都有弱點
左邊要由保羅費拉拿客串
右路既保辛華有時因助攻而暴露空位俾人打突擊
所以路維重點兩邊側擊
而其他中場就把握機會後上
小弟之前已經解釋過防守對手既後上攻門係好倚靠中場回防
不過比堤同埋美尼拉斯始終唔係一流防中既料子
所以德國球員後上攻門亦係入波招數

攻入第一球就係靠普度斯基打突擊
先同隊友做兩次靚撞牆
再以速度壓倒谷得太上既保辛華
然後傳中予後上既舒韋恩史迪加攻門
這個入球亦係暫時德國於今次賽事最精彩既入球

另一方面,由於葡萄牙出名驚高波
抖唔夠但體能上依然冇蝕底既德國佬當然唔會客氣
小豬既兩個靚助攻
就協助高路斯同埋有犯規嫌疑既波歷克兩次成功屈機

其中衰俾波歷克既一球好抵死
波歷克輕輕一推保羅費拉拿之下
其實球波可吹可唔吹
但所有葡萄牙守衛都一心等球磴吹雞
你估而家小學生踢波咩
而列卡度出迎打空就當然更加衰多幾錢重

路維今場成功反底兼響朵
德國中前場夠晒效率
一對閘亦尚算稱職
連門將列文亦充滿自信冇
表面前途突然一片光明

但中路既梅斯達同埋梅迪薩卡既表現就幾得人驚
前者今季於皇馬抖多過踢
返到國家隊亦一直未上力
後者上場表現回穩
但今場又回復對克羅地亞時既低水準
今場輸兩球都係因為佢失位所致
如果佢兩個繼續發瘟
就算路維神來之筆多幾次
有隱憂既德國依然未許樂觀

p.s.:
路維威返次
舒韋恩史迪加又再做葡萄牙尅星
前者既白恤衫加黑西褲
同埋上個月先買既小豬戰衣
順理成章成為小弟今明數天返工放假既衣著首選