2008-6-22 (2)

想講下荷蘭對俄羅斯場波......

荷蘭原陣出擊
不過就有洛賓因傷肯定倦勤
連做後備都唔得
而俄羅斯就繼續以一個介乎 4-1-3-1-1 既陣式應戰
不過上場於前場踢得比較沉既比亞尼甸洛夫就被沙安高取代
而為左遷就沙安高踢右邊
沙里恩洛夫就調去偏左既位置

開波後俄羅斯率先發難
頭7分鐘已有兩次足以入波既埋門
而佢地於比賽初段可以講係壓住荷蘭去攻
荷蘭花左足足20分鐘去穩住陣腳
佢地之後佢地想發動攻勢就發覺好難入手

荷蘭分組賽峰芒畢露
最勁就係3個進攻中場
單靠施馬克一個防中好難頂得住
軒迪克明顯就有針對性部署
佢縮短左中場線同埋後防線既距離
令3名比較侵略性既中場同埋後防球員可以俾到施馬克更多支援
而除左高路甸專責盯住雲佬
一隊閘又睇緊兩邊外
其餘人就好似蟻多螻死象咁包圍荷蘭既3個進攻中場

佢3個無論搵人俾波同埋個人突破都比分組賽既時候難左好多
當中雲達華治只係靠死球傳送威脅俄羅斯大門
而佢地冇拉邊亦係搵自己笨
倚靠雲邦賀斯同埋保拉路斯又可以做到幾多
加上荷蘭兩個工兵於進攻上又幫唔到幾多
結果佢地今場波直情從未試過有一下比較似樣既組織
亦解釋左分組賽進攻時如取如攜既荷蘭點解會突然死晒火

另一方面,於球隊被攻時
軒迪克就主張放長波踢突擊
以針對荷蘭後防幾場波以來一直暴露到幾多既空位
不過成場波俄羅斯要用長波既機會唔太多
因為佢地實在有太多時間都攻緊荷蘭

半場尹巴士頓即以雲佩斯入替表現幾近隱形既古治
而下半場初段荷蘭係攞返較多攻勢
可惜威脅只係有限

而佢地全場(其實幾場以來都係)於右路多次出現漏洞
令尹巴士頓以希丁克入替被尹帥聲稱體力不繼既保拉路斯
不過希丁克入場後波都未掂就出事
施馬克於左路助攻柏夫尼真高入波
連前者都於荷蘭右路偷襲
可見荷蘭右路有幾不穩
而中堅馬菲臣俾對方前鋒咁樣輕鬆搞掂
同樣責無旁貸

荷蘭於今屆賽事第一次落後
不過佢地於落後下依然谷唔起
當中雖然同洛賓缺陣有關
但亦反映出荷蘭球員既心理質素只係好一般
而尹巴士頓既調動亦值得商榷

尹帥銳意用多個進攻中場艾費利
但艾費利於球會同埋國家隊既友賽
都好鍾意移入中路俾波同埋射中距離
通常等左閘後上幫手拉邊
但本身都受壓既雲邦賀斯冇餘力助攻太多
結果荷蘭只靠史尼達週圍走既時候兼顧下左路
整條左路既攻擊好多時都陷於癱瘓
而艾費利同埋其餘既進攻中場就繼續被包圍得動彈不得
前場只得史尼達有較好既表現

所以小弟都同意講波佬既意見
換個射手似乎比用艾費利更加實際
不過之後0個班專業既球評家好快就下定論話俄羅斯球員體力不繼
小弟覺得佢地好似山草藥舖既老闆: 'up' 得出就 'up'

俄羅斯球員冇於前場緊迫
明顯係因為荷蘭球員如果繼續只係於後場互傳
對一球在手既佢地根本冇威脅
所以佢地可以專心留守後半場
既可以慳返體力
又可以等機會打反擊

俄羅斯其實於一球領先後
仍然比荷蘭創造到更多既入波機會
不過佢地就持續敗家
埋門一腳近乎逢十進一
結果入唔到波兼有不必要犯規
就被雲佬把握一次死球機會入波

值得留意既係俄羅斯球員防守死球既能力只係一般
幾球遠柱波都足以令佢地收皮
而高路甸雖然遠射腳頭令人留下深刻印象
不過佢盯人唔夠緊就始終係球隊既計時炸彈
佢於生波既時候跟足雲佬
但於防守死球既時候就先後幾次走甩左雲佬
如果壞習慣唔改
有機會對住東尼,高路斯等機會主義者既時候真係多多都唔夠輸

荷蘭雖然倖免於90分鐘內收皮
不過佢地過得到初一,都過唔到十五
最大關鍵就係體能
寫 preview 已經講過相對於其他球隊
俄羅斯有體能上既優勢
因為佢地既國內球季於3月先開始
唔似好多西歐球隊未踢已經殘左一半
加上佢地年青老壯
荷蘭俾人劏只係時間上既問題

荷蘭於加時30分鐘內完全未能威脅俄羅斯
唯一既入波機會亦只係恩格拿舒域治幾乎擺老烏
結果艾沙維再次針對荷蘭右路缺口助攻俾托賓斯基入波
佢之後略帶幸運成份既入球只係荷蘭傷口上既鹽
其實若非柏夫奴真高射中楣
同埋球證發雞盲冇吹罰希丁加犯天條
荷蘭應該輸得仲甘

荷蘭於分組賽 show 得太多野俾人睇
俾軒迪克咁堅既老師傅算死晒
加上俄羅斯每場波都持續有大進步
輸晒部署,發揮,體能同埋速度下
荷蘭輸波係好意外,但亦好合理既賽果

show 得太多野俾人睇既而家其實仲有俄羅斯
沙哥夫雖然係艾沙維以外小弟認為俄羅斯陣中最搶鏡既球員
但助攻過多隨時出事
而佢地防守死球有唔集中既毛病
一旦俾人偷襲得手
單憑組織流暢但埋門把握奇差既攻擊未必可以仲有運行
而一旦艾沙維被人凍結
俄羅斯就仲可能即刻死晒火