2008-6-7 (1)

今日想寫歐國盃......

先講A組
葡萄牙因為C7而勁紅
但佢地既人氣同實力唔成正比
佢地其實有好多弱點
防守未算好穩陣

而中前場好多好波之人
但偏偏配合一般
(希望維路素有正選踢可以幫得到截擊同埋搏腳)
C7於外圍賽起腳次數冠絕全歐洲
原因除左佢出名獨食之外
好多時組織唔到攻勢而要靠遠射(實情係浪射)搏一搏
加上前線又冇一個可靠既殺手

雖然佢地抽到好籤
上線只有德國算係歐洲一線
但如果冇大改善既話都依然唔使唸捧盃
捧盃如果靠C7
倒不如靠史高拉利
因為足球真係越來越靠戰術
而今個賽事當中亦猜幾多個教練有佢咁老謀深算

捷克方面
後防近年人才輩出
前線既真高拿同埋巴路士冇狀態
亦有質素搭夠
最大問題係中場
年老力衰既加拉錫仲可以為防線提供幾多保護
而施安高做唔做到尼維特或者路斯基既7成水準亦係疑問
布克拿如果繼續主張進攻足球
好可能吃力不討好
改踢穩守突擊又驚隊波唔慣

土耳其方面
佢地02年世界盃之後就再冇佳作
今次仲唔用爾迪雷同埋哈根蘇古
泰林明顯靠班新人既活力
雖然聲稱有能力成為黑馬
但踢法唔夠硬朗兼防守漏洞多
最終可以走得幾遠真係好難講

瑞士方面
防守冇06年做得咁好
傷癒既梅拿同埋冇晒信心既辛達路斯幾難令人放心
不過中前場表現好左又係事實
起碼進攻比前有紋路,有時亦更夠膽去搶攻
瑞士借主場之利最終出到線真係唔奇
因為捷克同埋土耳其名氣雖然比佢地大
不過真係各有隱憂

B組方面
小弟既至愛德國明顯係出線大熱
不過只因對手弱

列文自從06年後持續走下坡
最大原因係佢冇左簡尼做佢既假想敵
而佢能否適應個新波亦係隱憂
(不過其實今屆近乎所有龍門都有咁既隱憂......)
而中場既側擊亦令人唔放心
冇左史尼達
舒韋恩史迪加同埋奧當高又態沉
靠普度斯基或者費斯客串始終爭0的

但講到令人唔放心
其實教練路維孭唔孭到飛亦係疑問
佢教波咁耐其實未試過一條友去應付大場面
06年世界盃
冇經驗既奇連士文一對住納比即刻被比下去
而尹巴士頓對住史高拉利既陰濕招亦即刻收皮
萬一德國對住葡萄牙
路維隨時俾大菲陰到

不過還好其他方面唔錯
有力彌補前文所講既不足
入4強(甚至決賽)應該係最低要求

克羅地亞方面
冇左伊度亞度
都仲有柏達歷頂住
中場更有摩達歷,卡蘭積卡同埋施拿支撐
只稍嫌唔夠硬朗
佢地最大問題係後防重心太老
高華兄弟同埋史米所組成既防守老3角
加埋原來已經102歲
係這隊黑馬既最大弱點

波蘭方面
佢地最大既本錢唔係球員
而係教練比赫加
佢地四六波未必輸硬俾克羅地亞
至於對住德國格食格就真係好難偷雞

奧地利就明顯唔夠班
不提也罷

(因為太多野想講,所以要分兩 part)