小弟冇唸到自己咁有耐性睇晒成晚既盛裝舞步
搞到遲左出 post
請見諒
時間關係,今日只講早前 Big 4 既賽後感
1) 阿仙奴對西布朗
主隊雖然近乎半力出擊
不過班新仔用活力同埋質素搭夠
整體演出依然流暢
只嫌埋門把握依舊一般兼防守能力唔算強
西布朗就明顯唔夠班
不過作客兵工廠只輸一球已算有交代
如果做好防務
特別係右閘
絕對有力護級成功
2) 新特蘭對利物浦
愛隊利記只能靠對手一時睇漏左托利斯而羸波
表演冇說服力
狀態連7成都未有
不過小弟最擔心既都唔係佢地未上力
而係球隊既陣式問題
賓尼迪斯究竟of3因為冇左巴布而其他射手又唔 fit
而暫時唔用4-3-3?
抑或因為遷就羅比堅尼而改用 4-4-2?
如果係因為後者,咁上季先砌得靚既組合咪又要再夾過?
似乎不利於爭標
多一套戰術同埋陣式唔係壞事
不過小弟認為賓帥應該多倚靠4-3-3陣式
畢竟陣中絕大部份球員自上季季中開始
踢4-3-3都開始有化學作用
3) 車路士對樸茨茅夫
大菲明顯想向其餘3強施以下馬威
亦要向球員同埋球迷證明自己既功力絕不下於犘連奴
佢最抵讚在於用晒3大名牌中場都冇塞車
當中迪高走位最多
波歷克就略後於林伯特
負責俾波多0的
林伯特就主力後上
就算入唔到波都引左樸茅防守球員
就咁樣佢地就技術性擊倒左對手一條冇左蒙達利就廢左5成既中場線
4) 曼聯對紐卡素
兩隊都唔齊腳
不過曼聯既情況比紐卡素更嚴重
紐記嚴格來講只係冇左一對戰頭
不過有馬田斯押陣都廢唔晒
但曼聯冇左養傷既C7同埋返祖家奔喪既迪維斯
再加埋停賽既蘭尼
前線真係廢左好多
而卡域克同埋傑斯先後傷出就更加係雪上加霜
雖然佢地羸唔到波
都可以賴冇運中楣同埋基雲守得勁好
但小弟認為佢地組織到既攻勢唔多先係真正原因
而這就係中前場唔齊腳既必然後果
紐記方面
佢地今場亦算守得唔錯
3個新兵亦睇落唔錯
而今場既4-4-2陣式同埋人腳都接近小弟心目中既最佳陣容
只要同馬田斯搵到個好拍檔
紐記於英超絕對可以排中上
P.S.:
1)
巴西同埋比利時今晚輸波唔係奇事
但唸都唸唔到佢地輸得咁大鑊
等小弟搵多0的料之後有機會再講
2)
小弟將於星期四上北京
想搵人幫手寫今個星期紐記對保頓既賽後感
(米堡迷CK已答應幫手寫利記對米堡0個場......)
有冇人幫到小弟?
9 comments:
你上京????
睇咩呀？
雖然埸波man u係讓哂車馬架啦，不過我地作客，上季又俾佢地炒哂兩埸，所以今埸1:1已經收哂貨。
新兵方面，三位都打得幾好。古迪利斯係左面完全玩哂，連尼索比亞時不時露出既空位都成日補番，助攻助守無得頂。只係可能太搏，所以尾段都無咩氣。
古費列又係平靚正，雖然今埸未係太搶鏡，不過分波方面真係做得幾好，又幾勤力。
高洛仙尼早段有少少蝦6野，不過由上半埸中段開始已經上哂力，佢拍住泰萊真係近年來叫做最穩既防線。
全埸表現最好既緊係基雲啦，失果球唔關佢事。全埸有唔少有威脅既埋門都俾佢化解左七七八八，我地今季防守真係幾有保證。
馬田斯入果球攝位真係幾靚，不過對面都係犯左錯，走空左馬田斯。呢個情況下半埸都有一次，不過馬田斯就唔為意下頂唔中。今埸佢又係好似以往咁落力，又真係比佢搶到唔少機會，不過拍住佢既杜夫就失色少少啦，好多時都係一攞到波就搵人傳，無咩信心。
畢特防守做得唔錯，不過傳波仍然驚嚇，開波無耐已經差d送個大禮俾舊東家。完埸前既魯莽犯規亦都差d累死紐記。KK真係要搵多個防中。
p.s.
(1)細哨持續無表現應該係其中一個原因。
(2)小弟應該得，不過網主最好搵sammysir比較有保證，況且一埸波有兩篇賽後感都唔錯。
To: 死佬
1)
小弟搵到女子藝術體操決賽既飛
所以決定起程
如果小弟頂得順黃牛炒價既話
仲想入鳥巢睇男足決賽同埋馬拉松
(當然太貴就寧願唔睇啦)
2)
得唔得閒幫手寫利記對米堡既賽後感呀?
To: 舒利亞
1)
紐記3件新兵都真係唔錯
真係貴精不貴多
2)
基雲直情上晒身啦
3)
場波兩個入球都係因為防守失誤引起
4)
畢特未必可以捱足一季
謝列美其實係可考慮既防中人選
5)
巴西雖然一開波就已經身處下風
不過上半場防守失誤唔多
都仲叫頂多住
但被阿古路既幸運入球打破缺口後
成條防線就散散地
而巴西今次賽事進攻唔掂
明顯同細哨同埋迪亞高唔 fit 有直接關
鄧加已經用埋蘇比斯去補救
不過佢質素所限冇貨交
巴西對比利時同埋喀麥隆就算人多打人少
都已有老鼠拉龜既情況
小弟唸住佢地對阿根廷會打爭氣波
點知都係冇料到
細哨中柱既罰球已經係唯一一下有威脅既攻門
邊有可能唔輸
而佢地於比賽尾段仲國奧隊上身
連球品都輸埋
6)
sammysir 冇表態得唔得
睇來都係麻煩你啦
如果你有興趣既話
仲可以客串講幾日新聞
今次都係舒利亞操刀了
因為要預備學校既開會
唔會好似米堡迷CK寫得咁詳細同完整
我最多留幾行字CM在網頁就算了^-^
TO:舒利亞
你寫這篇曼聯vs紐卡素..都已經係一篇好好既賽後感了
其實小弟只係對紐記球員有所留意，好少睇man u 班球員=.=
點都好啦，小弟都會盡力寫番篇好既賽後感架~
不過新聞就勉強少少啦，小弟知道既消息多數係全世界都知道既消息-_-
p.s.點交貨俾網主你?
To: sammysir & 舒利亞
小弟都覺得舒利亞係好人選
可以 send 去小弟既 e-mail
blackyho@hotmail.com
小弟希望可以於星期一晚
收晒舒利亞同埋ck既稿
(可能加埋自己講奧運決賽既稿)
再總結過去幾日既新聞
希望可以於一晚內交晒所有功課
謝!舒利亞!
唔洗唔洗，多謝你俾個機會我tim啦a_a
To: 舒利亞
你咁細細講野咁婆媽既?
事實證明你同死佬都寫得好好
以後有需要時
又有多兩個人可以搵來幫下手
因為寫 blog 都要用幾多時間
Post a Comment