三場波想講......
1) 阿仙奴對紐卡素
紐記未失波前既防守部署其實唔錯
至少基瑾識得重點加強左兩閘既防務
不過一球小弟認為唔應該判既12碼
就幫輕左兵工廠好多
亦令佢地可以踢得更放
加上紐記連運都輸埋
畢特既頭槌又中楣唔入
令主隊最終得以輕勝
兵工廠重新上力
走位同埋組織能力都正常返
有晒隊型既佢地羸波合理
而對比之下
紐記今場既反守為攻同埋控球方面都做得唔算好
就算有人攞到波
其他既都散得唔夠開
亦唔夠快
(當中只有蜘蛛俠一個比較似樣)
而有波在腳既又心急搵人俾波
最終就只會有失去控球權既下場
兵工廠本身已經羸技術
紐記班友仲要咁易失波
就只會形成惡性循環
有更多時間俾人搓住踢
如果唔係兵工廠半場就有兩球在手
下半場可以開始行行企企
紐記既控球指數應該連44%都冇
2) 侯城對韋根
主隊突然打回原形
當中關鍵一定係比賽初段就輸左烏龍波
遇上向來唔識入波,但突然神勇既客隊
result 就係一個發夢都唸唔到既賽果......0:5!
主隊如果唔改善後防
都唔知佢地點護級
而客隊領隊布魯士同埋班球探既眼光真係好
從埃及借到件好野薩基
睇來季尾0個至少500萬鎊既轉會費都應該走唔甩
3) 車路士對熱刺
1:1既最後賽果
如果有人只睇上半場
就會覺得車仔好唔抵
因為林伯特既笠射過唔到身高手長既高美斯
艾辛既衝力射球過到佢又過唔到門楣
而難得比列堤有波入
又更難得林伯特竟然意外幫對手做助攻
但睇埋下半場之後
車仔越踢越急
整體演出絕對在水準以下
後備落場既馬路達同埋沙洛文卡奴絕對冇作用
而大菲亦太遲換入迪卡度搏殺
就算全場爭取到60%控球時間都冇用
真係有威脅就只有林伯特想將功贖罪,但運滯既一腳
而今場好有鬥心既熱刺下半場越踢越有信心
拉莫斯換入艾朗連儂打突擊亦算正路
而侯度史東後備落場亦令中場既截擊能力好左少少
所以佢地最終攞到今季第1分
避免3連敗亦算合理
p.s.:
轉會消息容後再講
9 comments:
又係以往既問題，一輸就散哂。未輸十二碼前我地都已經被人禁住打，但至少唔會有咁多空位。球十二碼尼索比亞係幾明顯手球，不過小弟都認為佢無心，其實唔多應該判。
當然，我地係抵輸。上半埸打左一半，我地射門次數竟然係零，連少少威脅都俾唔到對面。控球指數仲去到得廿幾個巴仙。失第一球仲可以話輸十二碼，第二、三球就完全被人地搓到空哂，我個人認為後防默契都幾差下。失果三球坦白講基雲都幾無奈，唔係佢演出穩定，我地應該唔止輸三球。
前面無左馬田斯，本身已經無咩期望。KK竟然仲擺件艾美奧比落去。上半埸奧雲本來有黃金機會追成1:1，呢條友竟然擋左個波出街。如果我地追番1:1，埸波隨時唔係咁講。而且控波又控甩。我唔明KK點解會用佢。奧雲都算係咁，雖然無咩建樹，但係都頻頻回防攞波。
埸波難打遇左，打得咁差又真係估唔到。讚既只有基雲同古迪利斯。後者真係無得頂，連講波佬都話有得揀會揀佢做mvp。
最後想講下完埸前單野。本來我幾欣賞拿斯利，不過琴晚扣左少少分。雖然後備落埸既祖爾巴頓球摌波係過左少少火，不過係完全摌到個波，況且旁證又係附近，睇落都無咩問題。不過估唔到拿斯利竟然會係一分鐘後報復咁kick跌祖爾巴頓。唔係話嚴重，不過咁無體育精神既事竟然會發生係佢身上，真係驚訝左少少。
下埸波已經係兩個星期後主埸對侯城，雖然贏既機會幾大，不過我真係想要一埸漂亮既勝仗，而唔係險勝。
測試
咦... 奀V ...你轉o左做 testing 咩?
隊長同王子一齊傷2個星期, 都唔知可唔可以趕及對 Man U 上陣!
To: 舒利亞
1)
小弟覺得拿斯尼同埋巴頓兩個都爭唔落
2)
侯城如果唔執返好條防線
都幾令人擔心
3)
侯城雖然弱
不過如果紐記掉以輕心
隨時重蹈上季兩對打呲耶只得1分既覆轍
To: 奀V
妳玩野呀?
testing?
comment 都唔漏一個之餘
仲招呼都唔打?
To: 死佬
我信謝拉特得
不過一定冇夠狀態
而托利斯拉傷左
佢於場上又要經常高速跑動
如果佢到時唔夠8成狀態
倒不如唔好用佢
以免佢傷上加傷
嘩 好惡啫
唔服氣輸兩分啊
To: 奀V
唔係惡
亦唔係因為利記失左兩分而發窮惡
只係覺得妳好搞鬼
搵小弟個 blog 來做 testing
好似唔聽到你北京之行後
我們會收到北京特產
To: 奀V
小弟一條友一個大背囊就起行
上到去小弟都冇買野俾自己
只有買左0的chop左印既首日封同 postcard
去派俾街坊
但因為數量唔多
已經好快派晒
小弟因為知道自己冇可能帶到紀念品返香港
所以未出發前就搵人幫手買左領獎0個件風褸
雖然要680蚊人仔
但真係好靚
Post a Comment