想講下尋晚既紐卡素對曼城......
主隊有馬田斯同埋比耶趕及復出
亦有巴斯桑治取代尼索比亞踢左閘
而客隊就有艾蘭奴退居後備
可能知道堅尼亞首次領軍,而比耶就傷癒復出
英超近年其中一個出名好廢既球証史泰利斯(Styles)就決心增慶
比耶明顯掂到個波先
而羅賓奴就擺明插水
好有 Style 既 Styles 都可以即判12碼兼趕埋比耶出場
最令人扯火既係基雲叫佢問下旁証先
因為旁証根本冇舉旗示意犯規
但佢知道自己個底咁花都夠吉士拒絕咁做
就整定佢又一次誤判
堅尼亞真係識激勵球員士氣
落後一球兼踢少個既紐記依然頂得住
右中場謝列美移後踢右閘
一人走多步就唔見得好蝕底
對比之下,前晚熱刺前晚輸俾史篤城就抵死得多
而曼城自己又攞0黎衰
胡禮菲臘斯移入中路搵食
結果同墮後既羅賓奴一齊塞車
而米卡李察士又助攻不足
偏左搵食既艾利蘭又唔擅長側擊
佢於中路後上埋門同埋遠射既能力亦因此被浪費
加拉度既助攻又只限於死球
曼城自己廢晒兩邊就令紐記更加容易死守
曼城上場輸俾利記既側擊
曉士咁都學唔到野真係抵鬧
上半場過左30分鐘既時候
仲開始組織到比較似樣既攻勢
馬田斯狀態不足
艾美奧比就反而令人意外地成為紐記前線最搶眼既球員
佢先俾直線杜夫埋門
再把握鄧尼解圍失誤門前撻入平手既一球
如果李察臣同埋富拿睇到佢咁都入到波
只可以奈何好波不如好運
之後形勢膠著到63分鐘
岩岩用年青射手伊雲斯入替防中夏文既曼城
未開始加強攻力就俾鄧尼既烏龍波打窒條氣
之後曼城依然故我
只靠浪射同埋死球根本難以考驗基雲
紐記睇落反而仲有機會擴大比數
只可惜艾美奧比既入波 quota 已經用盡
艾利蘭於比賽後段開始移入中路搵食
佢先以一記中距離射門同基雲打個招呼
但紐記防線仍未醒覺
中場冇人跟死佢之餘
後衛又掌握唔到佢入涉既時間
之後終於俾佢接應羅賓奴既斜傳為客隊返平
及後客隊食住個勢
再次成功入涉既艾利蘭仲幾乎為客隊戲劇性反勝
如果曉士唔係自廢兩邊側擊
又咁遲先解放艾利蘭既攻擊力
打少個既紐記應該唔會有分落袋
紐記有幸有不幸
曼城就捉到鹿唔識脫角
和波不失合理戰果
p.s.:
講波佬提及紐記技術成份不足
小弟就認為紐記球迷唔使太過擔心
一來堅尼亞而家限米煮限飯
搵到11個健康既球員落場已經算係咁
二來當年佢教溫布頓
陣中雖然充斥好多打仔格球員
但佢總會俾技術型球員有發揮空間
當年李安赫臣同埋米高曉士都踢得幾搶眼
杜夫同埋古迪利斯(甚至乎干沙里斯)都應該會係佢杯茶
Subscribe to:
Post Comments (Atom)
4 comments:
最蝕就係開波早段已經輸球十二碼加打少件，唔係我地未必打得咁辛苦。不過和波其實已經唔錯，特別係曼城雖然暫時成績只係普通，但係人腳確係幾強。
艾美奧比終於打破入球荒，只係近年已經好少見到佢d入球係有質素，大部份都係好彩-.-不過入總好過唔入既。
近幾埸終於睇到隊波有番少少士氣，上埸落後兩球追番平手，今埸仲一度反勝。雖然仲有好多地方要改，不過最緊要有番氣勢先。堅尼亞果然有一手。
而馬田斯雖然唔夠態，但係佢及時復出，總算對前面唔夠人用既我地係好消息。
To: 舒利亞
1)
紐記今場波有幸有不幸
雖然俾史泰利斯累死
不過入兩球波都係靠運
2)
如果艾美奧比可以招來運氣
小弟寧願用佢都唔用悉斯高
無錯，反正悉斯高做到既野唔比艾美奧比多
To: 舒利亞
悉斯高埋門唔見得比艾美奧比好
活動範圍仲唔夠後者咁大
前者於西甲既表現只係不過不失
都唔明點解韋斯仔會覺得佢值570萬鎊
Post a Comment