再講餘下3場波......
5) 國米對祖雲達斯
親愛的阿祖安奴:
睇國米踢波好多時都似去茶餐廳食常餐
皆因無甚驚喜
而今場波摩連奴同埋雲尼亞里比賽前後都冇炒大鑊
仲令小弟覺得個餐好似冇左餐湯同埋凍檸啡
多得有你先令碟頭飯突然變成巴西燒烤
你出名紀律奇差
飲酒仲多過飲水
竟然肯賽前自發加操
對摩連奴同埋小弟而言都好似提早收到你派既聖誕禮物
而摩連奴肯再俾機會你係佢對你發憤既回應
其實在公在私佢都應該重用你
因為只有你既力量先可以撞散祖記條防線
否則國米即使羸中場效率都唔足以羸波
而佢亦唔可以再次俾顏色雲尼亞里睇
祝你球場內外都生活愉快
6) 米堡對保頓 (謝米堡迷 ck!)
今次以對話形式評價:
記者:今場又主場輸波,有何看法?
領隊:先睇下條防線,全部都唔用腦既,下下亂標波；
奧尼爾更攪笑,你駛唔駛咁大動作去標泰來,人地唔知幾冷靜過左你........
記者:咁中場呢,好像成日斷纜?
領隊:你睇下人地個梅安巴, 一個打你兩個,甚至三個；
加利同迪迪爾就真係得過望字,佢地已經不止一場係成日斷纜
記者:艾維斯於天空電視的評分只有兩分,係咪真係咁一無是處?
領隊:你睇下佢果兩球搶住射的罰球炒到十八樓咁高,你話呢?(越來越火滾)
記者:多謝你接受訪問(突被搶咪)
領隊:下場打比,你班友再唔振作,真係死硬.......(下刪數個粗口)
(To ck:
唔知既話仲以為係堅尼亞輸波後既 comment
修夫基從來都唔夠'火'
而班後衛經常都有唔集中既問題
中場靠奧尼爾踢防中(或者工兵)亦係敗筆
艾維斯就越睇越似貴價水貨
前面冇殺手,後面冇防守就解釋左點解米堡踢得咁差同近年一事無成)
7) 哥倫布機員對紐約紅牛
以下係舒洛圖既得獎感受......
我真係好感謝一班隊友
因為如果佢地屎波
我幾好波都唔可能一季有25個助攻
更加唔可以成為第一個踢 final 都有3次助攻既球員
常規賽同埋季後賽都羸 MVP 同埋總冠軍就更加唔使唸
覺得我個人太謙虛?
踢波真係踢11個人架
你地唔使唸以前比利同埋碧根鮑華去美國搵食既經歷
只要睇下而家碧咸效力既銀河就會明架啦
不過佢地既老闆安舒侯斯同埋前任總經理拉拿斯只係對盤數上心
食得鹹魚無錯係要抵得渴
我 top fit 既時候踢小保加冇咩人識
35歲踢美職盟先有得做主角
講真都要多得碧咸令美職盟咁受注目
幾年後冇左碧咸既美職盟好可能打回原形
所以都係趁而家大家都未收山再威多兩季
Subscribe to:
Post Comments (Atom)
4 comments:
今次ｄ賽後感很攪笑，真的很像睇英超精華既球員同領隊既專訪
To: sammysir
其實以前都試過寫另類既野
因為唔想睇既人覺得太悶
只不過冇今次寫得咁長
小弟知道阿祖安奴轉死性加操
真係有種佢大派禮物俾球迷既感覺
所以睇完波就唸住寫封信感謝佢
而小弟逼ck兄唔好寫長篇既'讀書報告'
佢老兄就交左篇另類既'賽後訪問'
內容精簡扼要
另外,小弟睇直播見到舒洛圖既賽後專訪
就唸到為舒洛圖作一段自白
真係幾攪野@_@
有時一篇咁既賽後感，隨時比長篇大論更好a_a
阿祖安奴唔通今次真係改過??
To: 舒利亞
1)
阿祖安奴雖然有改過跡象
即管又睇下點?
不過傳聞摩連奴其實想用佢
作為交易杜奧巴或者賓施馬既條件
2)
有時都唔想你地睇得咁悶
但創作始終係要靈感同埋時間
Post a Comment