(拖得太耐......)
3場波想講......
1) 曼聯對利加大學
曼聯如願捧盃
錢作怪絕對係主因
令高層同埋費 sir 忽然認真
而球員就算上機前繼續爛蒲爛滾
過到日本都依然交足功課
至於另一個原因就似乎係對手太弱
相對於05年因為球證判左利記3次詐糊而捧盃既聖保羅
或者上年既小保加
利加大學無疑係比較弱
更加係近年最弱既南美代表
睇佢地全場只得一次趁初段深入曼聯防線埋門外
比賽既餘下時間既兩腳有威脅攻門都只係中距離遠射
當中有差唔多半場時間踢多件都創造唔到機會就更加抵死
2) 紐卡素對熱刺
如果只以目標為本
紐記尋晚絕對完成任務
但如果對佢地有要求既話
就應該好難收貨
紐記入既第一球要多謝伊確圖解圍搞到拖泥帶水
奠定勝局既入波雖然有杜夫同埋維度卡既美妙配合
不過前題都係熱刺既防守離晒譜
至於紐記失既一球
艾美奧比控球失誤固然衰
不過成條防線佈越位失敗就仲抵鬧
而佢地完場前幾乎因為發夢而俾熱刺迫和
否則場波就會變成對韋根比賽既翩版
尼索比亞被選為最佳球員
小弟就覺得只因佢有波入
講表現佢唔算好突出
反而維度卡就令小弟有少少驚喜
助攻既靚好踭更加係神來之筆
3) 阿仙奴對利物浦
賽前估和波係因為唔認為雙方有能力置對方於死地
而家中賽果
不過過程就估都估唔到
法比加斯傷韌帶認真無陰公
艾迪巴約既第二張黃牌亦係過嚴
雲加話羸唔到波只因踢少個
小弟就唔多同意
因為佢地有法比加斯既時候都冇本事搞掂利記
何來好意思話最終值得羸波
不過小弟都同意佢地踢少個既時候踢得唔錯
而利記冇趁踢多個而羸波就明顯係捉到鹿唔識脫角
除左兩次攻門貼柱出界
同埋艾蒙尼亞全場都有好表現之外
冇賓帥督軍既佢地唔識得拉邊去踢似乎亦係最終只能和波既原因
而家利記只俾曼聯失少1分
形勢絕對唔樂觀
如果再繼續送分俾弱隊
最終隨時只得一席英超季軍
Subscribe to:
Post Comments (Atom)
3 comments:
成功贏波，排名升上十二，絕對值得高興。只係主埸出擊，對住暫時仍然唔算強既熱刺，都佔唔到任何優勢，講真係幾失望。尼索比亞早段入球，曾經令紐記幾有勢。但係由被追和開始，我地同熱刺頂多都只係五五波。最終贏到，杜夫同維度卡固然係最大功勞，但亦到要拜熱刺後防同我地一樣咁差所賜。而最後唔洗再次被人追成平手，亦都要唔該費沙甘寶空哂都頂唔到。
堅尼亞要讚既，係一失波已經換維度卡入替艾美奧比。好多人都認為呢個調動係因為呢球失波係艾美奧比直接造成。但係小弟認為，更大既原因係艾美奧比係換出前完全無任何建樹，毫無威脅，而換入既維度卡，控球好，成埸波更加做到唔少二傳既功夫。而杜夫，小弟認為堅尼亞只係諗住盡下人事，佢自己都未必估到杜夫會建奇功。
後防佈越位失敗，呢樣已經要罵。而成埸波多次被對手係左右兩路突破傳中，亦係幾抵罵。(特別係左閘。)安歷基上埸唔錯，今埸就成日俾艾朗連儂突破，唔係費沙甘寶一入替接應傳中頂果球撻左，我地已經輸得。
小弟聽講堅尼亞換維度卡入替艾美奧比
係因為艾美奧比有傷...
網主查唔查到有關資料??
To: 舒利亞 & 馬田斯
1)
艾美奧比被調走
應該唔係因為冇表現
而係因為拉傷腿筋
2)
要荷西安歷基去頂住 top fit 既艾朗連儂
似乎強人所難
艾朗許儂最近既表現絕對值得重返代表隊
3)
維度卡既表現絕對係驚喜
佢可以有60分鐘體力已經估佢唔到
同埋真係多左二傳能力
佢既制空權亦係奧雲同埋馬田斯所缺乏
Post a Comment