今晚講既一定係紐卡素對利物浦
利記頭35分鐘既表現簡直係今季既代表作
如果唔係基雲守到上左身
利記羸半打都嫌得少
紐記雙防中加上4個紙板後衛根本冇做好本份去保護個好龍門
佢地頂唔住超水準既利記攻勢冇人會埋怨太多
但連防守死球既時候都發夢就好令人扯火
好似俾釘鑿左0係地下咁郁都唔郁
希比亞助攻都可以有3次機會攻門
問你死未?
如果小弟係堅尼亞
見到上半場不設防既情景
一定跟菲爾布朗學野唔俾班廢柴守衛半場返更衣室
不過利記防線相對下亦只係五十步笑百步
球隊完半場前稍為收油
佢地防守死球唔集中就要輸返一球
失波小弟一定唔會怨拉爾拿
畢竟好似基雲咁上晒身既表現從來只係 bonus
以加歷查為首既防守球員明顯先應該為失波負責
這個失球令小弟忍唔住要為球隊上半場既評分由95減到70
下半場初段紐記係有一段好短暫既虛火
不過利記一個具爭議性既入球就打窒晒紐記
不過話說回頭
雖然就算盧卡斯利華被吹罰手球
小弟都唔會有異議
不過佢既右手全程向下垂
球證唔吹手球你都吹佢唔脤
最終輸波只好怨紐記守衛唔夠集中
而其後入替畢特既謝列美有腳靚罰球中楣
就整定佢地今日冇運行
而對上3段講既野
就令小弟感到今場大勝得來都有瑕疵
因為紐記如果下半場初段順風順水
利記應該要好辛苦先可以袋到3分
不過以紐記防線下半場冇咁恐怖,但仲算中門大開既表現
又或者利記今場整體上瑕不掩瑜既高水準
利記羸波依然具一定說服力
謝拉特之後既單刀波
同埋尼哥搏到既12碼
最終令利記徹底技術性擊倒紐記
如果唔係基雲持續有高水準表現
利記應該可以羸夠半打
p.s.:
1)
幾年前德國有個半紅不黑既龍門贊斯
一場失左3球都令小弟覺得佢勇冠全場
小弟邊睇就邊覺得眼前既基雲比當年既贊斯更勁
基雲好可能前無古人
成為第一個失夠5球都依然當選最佳球員既龍門
但一個咁好既龍門
係唔係值得有班更可靠既隊友呢?
小弟以前睇過一篇評論形容龍門或多或少都有做救世主既心態
不過萬一冇好後衛幫手
就算四師兄上身都只有等死
所以如果基雲有得選擇
佢既心態可能寧願似個冇火但唔使捉賊既老差骨
因為至少天下太平......
2)
車仔失分......yeah!
8 comments:
To Blacky 網主:
你就開心啦...
間直無眼睇...
勁失望勁心痛
睇著愛隊比人..."強姦"(搵唔到一個條切d詞語)
除左喊"救命"
真係唔知講咩
如果唔係基雲
我諗我地會輸10球
我諗堅尼亞半場一定向班仔爆粗
罵醒佢地
全場更加飛鞋...打人
續個續個去照肺
我覺得球隊
係前面超容易失波
傳左唔夠幾球就失
人地一攞到就攻
兩個防中完全無防守既功能
人地一攻就攻到禁區
班後衛好似收左錢咁
俾人話射就射 話過就過
我覺得紐記真係超需要買個中場中...
今場基雲真係神
咁忠心咁好既球員去邊到搵呢??
低能，不知所謂，成班後衛簡直連英冠水準都不如。上半埸利記攻門中目標已經有九次，姐係基雲撲到六次(一球護空門)。估唔到有個咁好既龍門，我地結果要失成五球。而如果呢埸把關唔係基雲，我諗隨時破埋最大比數。成班後衛，無一個合格。艾加都算啦，一來臨危受命，二來都入番球。其餘果班，佢地好唔好意思攞咁多人工?利記次次傳中，角球我就驚一驚，因為佢地次次都可以free header。高洛仙尼，史堤芬泰萊唔係唔頂得，但係次次都任人頂。班中埸又係，完全搶輸哂。加上上半埸佢地攻勢竟然集中哂係左邊，係黑洞帶領下，點樣會有似樣既攻門?右面有古迪利斯，但係佢完全無機會進攻，因為根本無隊友會傳去右邊。最攞命係班友完全唔識傳波，面對面傳失簡直成日見。
下半埸的確有改善，但係換來既結果係輸得更多。第三球又係抵罵，成班紐記(最少五個)球員竟然係龍門前搵唔到個波，俾巴布補射得手。就係第三球令到原本下半埸一開波果陣既氣勢無哂。假如謝列美唔係咁唔好彩，追番成二比三，或者仲有少少機會。最後輸多球突擊(高洛仙尼食哂塵)同埋十二碼(又係誤判)，其實已經無咩所謂。
呢埸真係睇到我發哂火，之前作客man utd同車仔，我地班後衛可以咁集中。就算作客阿記輸三粒，其實都唔係打得太差。點知今季第一次主埸對big 4，竟然可以踢成咁。真係唔怪得奧雲唔續約，根本唔知係呢隊野到做咩，供應都無，踢條毛咩。尾段史堤芬泰萊同基雲都發火。基雲都話有理由發火，史堤芬泰萊你又有咩資格?自己隨時都係全埸打得最差既球員，仲係度做埋d無意義既野。
唔知堅尼亞係點諗，但係舊黑洞咁樣都打足全埸。佢呢埸唔算打得特別差，係因為佢之前打得更差。獨食，唔識傳波。講真，佢年紀仲細，仲有得進步。但係成日喊走，咁既球員留來做咩?
假如基雲當年唔係來紐卡素，假如佢呢十幾年揀轉去大球會，我諗佢成就唔會比保方，卡斯拿斯低。一個咁好既隊友肯十幾年一路留係度，班後衛唔該打醒十二分精神啦。紐記後防廢講左好多年，但係年年都無進步。以前話有巴布爾等炸彈，宜家呢?
To: 馬田斯 & 舒利亞
1)
'被技術性擊倒'
似乎比'強姦'一詞更貼切
2)
基雲咁堅
唔怪得查伯東尼話要將佢推薦俾意甲球隊
之前紐記有為舒利亞同埋波比sir起銅像
基雲怕且都應該有一個
3)
基雲係今場波全隊最有資格發脾四既球員
4)
而家既後衛同埋防中
應該冇一個係基雲想要既隊友
小弟覺得從今日起
紐記如果再買任何防守球員
唔該先俾基雲過目
因為如果將來新既防守球員交唔到功課
基雲條氣應該都會順0的
5)
馬田斯寫左超過200字
舒利亞更加破紀念寫左超過800字
可想而知你地幾火
小弟都好明白你地
6)
小弟唔同意尼哥既12碼係插水
7)
小弟好想睇 sammysir 既高見
畢竟佢係小弟眼中最識波既紐記球迷
Sammysir 外遊唔知歸隊未呢? 如果佢睇到場波一定寧願玩耐D!
我怎會係最識波既紐記球迷呢?
好多紐迷包括舒利亞同馬田斯咪仲有高見,
不過我6歲都開始睇波,
都睇左近30年,年資就一定最耐咁解啦!
我去左張家界,星期日早上11:00已回港,
不過晚上要吃飯,只睇左最令人失望既下半場.
場波輸成咁,
明顯同之前兩日輸比WIGAN有關
隊波輸左波又冇左幾個重要既主力
同埋疲態呈現
就算返到主場又如何
其實場波大敗既情況是可以避免的,
因為今場既然冇左巴斯桑同比耶,
同埋上場對WIGAN時既防中已經隱左形
今場仲要面對堅韌度咁強既利記中場
堅尼亞何不索性踢多個防中
以3個防中既4-5-1
起碼中間兩個防中唔會咁易比人地兩下one two就破左先,
同埋有謝列美幫手hold下波同分波,
又可以有助早D控制番中場節奏,
總好過昨晚因劣勢而變左個踢成咁既疑似4-5-1陣式
如果昨晚蜘蛛人,古費里及杜夫不斷走位去幫波
我估對利記中場既攻勢組織會起到抗衡作用,
不過全場就只得蜘蛛人一個勤力,
而昨晚又只得佢同基雲兩個冇跌watt
所謂主場優勢咁又有鬼用咩-.-
基雲咁多年都經常要面對自己4個好似無間道既前鋒(後衛)
加埋人地既3個攻擊球員
即是佢既前面變相要面對差不多6-7個前鋒,
佢打到曉飛又如何-.-
而家睇番紐記
原來冇左martins,BEYE,BARTON同BASSONG四人,
對隊波既影响真係好大囉
昨晚就好似讓左4隻車馬炮象一樣
睇人地富咸面對車仔既強攻
真係覺得人地好有鬥志
紐記作客對車仔及曼聯既鬥志唔知去左哪裡?
而利記既戰鬥力真係被我低估左
佢地既攻勢真係變化多端
球員既走位配合比起車仔同兵工廠真是有過之餘無不及
我睇左車仔同兵工廠既幾場波
都覺得佢地兩隊雖然攻得好厲害
不過就唔能夠咁易攪亂人地既防守隊形
但利記既造波同埋球員既高速入契既能力
加上有時又識善用球場闊度
好多時入到人地既三閘線就已經好危險
我估而只有曼聯既板凳同攻擊力
可以同利記有得比
而家希望堅尼亞既蜜月期過左後
球隊能痛定思痛
深切反省
對侯城踢得好D
唔好令偉大既球迷在聖占士球場及電視機前失望啦
To: 死佬 & sammysir
1)
小弟同意後場既傷疲問題
係紐記大敗既其中一個原因
不過小弟認為以利記當晚既超水準
紐記就算夫添兼 top fit 都未必頂得住
相比之下
防守唔集中先係佢地既真正死因
佢地連防守死球都唔集中
俾希比亞一個上半場就3次埋門
如果唔係基雲同埋尼索比亞各擋左一招
這名芬蘭中堅已經歷史性連中三元
2)
畢特咁沉
堅尼亞其實可以考慮俾機會謝列美
而如果用這名喀麥隆防中
畢特可以被安置於禁區頂死守
3)
與其話4個紐記後衛係無間道
不如話佢地係辦事不力既二打六保鑣
或者係球場上既紙板警察
4)
堅尼亞上任以來
今場係紐記最冇鬥志既一場
當中關鍵係下半場初段
虛火過後既失球
5)
利記今場冇托利斯
亦冇羅比堅尼
否則有能力入更多波
6)
而家既侯城同樣好沉
唔知菲爾布朗既奇招可唔可以鬧醒班球員
首循環對壘前
侯城於主場俾韋根狂數5:1
不過及時陣作
就於聖占士偷雞擊敗當時冇人帶隊既紐記
自此成隊波旺左個幾月
而家次循環兩隻落水狗再度聚頭
侯城就算趕及回勇都唔慌似返隻老虎
紐記如果可以及時振作
就算作客依然有本錢攞分
對侯城唔係足總盃咩??
To: 舒利亞
小弟搞錯左
sorry!
Post a Comment