2009-12-31 (2)

1)
幾段利物浦既消息......

利記方面證實格連莊臣右膝韌帶撕裂
但仲未知要抖幾耐
養傷期可能長達3個月
就算最少亦要6星期

而謝拉特被傳成為國米5000萬歐元既增兵對象

利記亦再次被傳將會借用雲佬半季
不過人工就成為轉會障礙

另一方面,利物浦市委會預期利記最快可於4月興建新球場

2)
保頓決定解僱加利麥臣
曉士,祖維爾,奧雲高尼以及戴倫費格遜都先後同佢地扯上關係
不過前3者已經表明唔會接手

3)
柏夫奴真高公開炮轟哈利列納
而佢既經理人透露有3間球會想於1月收購佢

4)
哥度巴已向國米提出離隊要求
曼城將以500萬歐元收購佢

5)
土耳其兩隊班霸比錫達斯以及加拉塔沙雷都有興趣引入古迪
不過當時人表明希望轉戰英超
但未知麥臣離任會唔會影響佢既加盟機會

6)
祖雲達斯即將以500萬歐元從拉素引入列迪斯馬
雙方簽約3年半

而祖記既新右閘人選拉菲爾未有如期於聖誕假期後向史浩克04報到
仲表明要1月離隊

另一方面,沙地球會伊蒂哈德有意羅致查斯古特

7)
加納足總艾辛既傷患而俾佢延期歸隊

8)
沙洛加入聖伊天
出任教練加迪爾既副手

9)
熱那亞準備以400萬鎊既價錢從波爾多收購文歷加素

10)
愛華頓打算以借用形式羅致雷耶斯
而佢地準備外借禾漢去打呲郡

11)
同皇馬季尾約滿既梅斯達決定留隊
而唔返德甲落班亦意味好可能冇份踢世界盃

12)
卡比路透露里奧費甸南可於1月中復出

13)
阿仙奴再次被傳有興趣引入比拿美

14)
繼續增兵既賓菲加從明尼路引入24歲巴西射手艾達路易斯

15)
麥卡菲以及古蘭爾都再次同伯明翰扯上關係
當中前者向傳媒透露離隊原因係覺得 Big Sam 以及球迷都針對佢
而佢地亦準備同狼隊爭奪維拉中場加特拿

另一方面,米堡就希望向佢地續借M.賓特

16)
鶴臣同富咸延長合約1年
而消息指佢將會得到1000萬鎊增兵資金

17)
弗賴堡從梅斯以130萬歐元引入塞內加爾射手柏比斯施斯

18)
米基爾打算於1月離開華倫西亞以尋求出場機會

19)
般尼被傳以100萬鎊從羅連安特引入阿爾及利亞中場曼蘇里

20)
稻本潤一由於於南特欠缺出場機會
所以準備回流 J-League

21)
馬賽被指當年非法斟酌列貝利
國際仲裁法庭邀請當時人1月作供

p.s.:
1)
車仔公佈09年財政報告
當中油王用自己錢為佢地還清3億4000萬鎊街數

相反樸茅就苦命得多
由於佢地欠稅以及冇供國民保險
英國當局向法庭申請清盤令

如果佢地唔能夠於2月頭聆訊展開前籌旗
可能會成為首間宣佈破產兼被接管既英超球會

而唔知係唔係因為球隊咁大鑊兼連續3個月拖糧
尋晚佢地既主場表現係格蘭接手以來最屎既一場
好難想像佢地之前連炒般尼以及利記
唔計輸壞第一球冤枉波
其餘3球有兩球都係輸盯人唔緊

不過小弟都唔會否認迪亞比既表現好搶鏡
而作為法比加斯替工既艾朗藍斯亦表現稱職

2)
鬼佬新年快樂!

2009-12-31 (1)

近日各地傳媒都選好多所謂既十年最佳陣容
不過小弟覺得 time gap 可能令部份好波之人冇得入選
近兩年踢到曉飛既美斯就係好例子
儘管小弟打死都唔信美斯下個十年冇得入選
所以小弟都係傾向每年或者每季唸一次類似既陣容

09年最佳陣容(4-3-3陣式):
卡斯拿斯,丹尼爾艾維斯,佩奧爾,維迪,艾殊利高爾,
沙維,艾辛,恩尼斯達,
美斯,杜奧巴,C7

p.s.:
講真維迪09年既整體表現比08年下半年退步
而就算今季上半季英超最佳兩個中堅都唔輪到佢
選佢只係考慮埋佢09年頭幾個月既表現
亦可見好中堅難求

今季英超上半季最佳陣容(4-2-2-2陣式):
基雲,格連莊臣,鄧尼,華美倫,艾殊利高爾
艾辛,柏拉斯奧斯,法比加斯,傑斯
杜奧巴,朗尼

p.s.:
泰利同埋維迪只係羸名氣
不過計表現唔及鄧尼以及華美倫咁搶
決心爭氣既前者踢出繼05-06年後既最高水準
而後者雖然近況回落
不過季初多次助攻得手加上出色既搶點已經足以入選

2009-12-30 (2)

1)
利物浦被傳又多兩名增兵人選
分別係艾達杜倫以及米列夫斯基
報導指利記打算向加拉塔沙雷出價1000萬鎊收購前者
而現時效力基輔戴拿模既後者就係烏克蘭最出色既新人
曼城亦對這名身價高達1200萬歐元既射手有一定興趣

另一方面,杜辛拿表態希望轉投羅馬
而佢被指成為辛尼特既增兵對象

2)
傳聞軒迪克已同祖雲達斯達成協議
將於短期內取代費拉利

3)
由於雲達沙既老婆腦出血
費sir准佢無限期請事假照顧老婆以及一對仔女
更有消息指佢考慮1月即刻從里昂引入洛里斯作為替補

另一方面,有報導指維迪唔滿意曼聯早前向般奴艾維斯招手
覺得球會唔信任佢而有離心
加上佢老婆唔鍾意英國既生活
一早就令佢離隊既傳聞傳得幾熱

而家再有報導指曼聯原來仲未同佢傾續約
原因係曼聯考慮接受皇馬既3000萬鎊天價
亦有分析指曼聯其實視般奴艾維斯戚維迪既替代品
而勢必季尾離開巴勒莫既卡積亞亦被指係費sir既考慮人選

4)
賓菲加成功從法林明高引入19歲巴西中場艾頓
不過佢地就面對列強挖角
既有曼聯加碼以1000萬鎊再加上蘭尼去收購迪馬利亞
亦有皇馬向佢地既後衛大衛雷斯招手

5)
莫斯科中央陸軍被傳打算向曼城以1100萬鎊回購祖奧

6)
士砵亭成為最新一間同柏夫奴真高扯上關係既球會
而佢地決定外借塞爾維亞龍門 V.史杜高域到韋根至季尾

7)
本田圭佑即將落實以900萬歐元轉投莫斯科中央陸軍

8)
羅馬可能將年青射手奧卡卡外借到富咸吸收經驗

9)
波爾多表明唔會於1月放走查馬克
報導指兵工廠可能改為羅致基格納
而法比加斯就再次被傳將於季尾離隊

10)
國米從拉素接收彭迪夫後
將蘇亞素外借到熱那亞
令佢地願意俾費路卡利以借用形式加盟拉素
算係還返個人情俾拉素

另一方面,阿拿奧杜域被指可能成為收購高拉洛夫既籌碼
不過佢既經理人已經作出否認

11)
波歷克可能延遲掛靴而同車路士續約兩年

另外,報導指車仔同阿古路傾唔掂人工而擱置收購
而柏仙尼就再次被指將以2500萬歐元上車

12)
史卡朗尼否認返祖家加盟紐維爾舊生隊既報導

13)
菲臘斯被指成為米堡既增兵對象

14)
韋斯咸方面否認接收梅度
而史篤城以及熱刺就繼利物浦後同柏加扯上關係

15)
拉科既菲臘路爾斯被指成為皇馬既另一新後衛人選

另一方面,早前有報導指曼城油王老闆想出價11億鎊收購
不過佩雷斯表明唔會出售球會

16)
哈化柏林再次面對防線被挖角既難題
禾堡被指準備出價1200萬鎊引入22歲塞爾維亞中後場球員哥高加卡

17)
樸迪路被奧沙辛拿放棄後
落實轉戰西乙,加盟靴高斯

18)
辛尼特忽然被指有興趣引入哥治

而雖然占士表態希望轉投熱刺
不過有報導指哈利列納既真正目標其實係占士既副手比高域

19)
內地傳媒報導成都謝菲聯既教練張偉哲因涉嫌打假波被捕
而球會既董事長以及副總經理之前亦分別被捕

20)
燕豪芬一如外界所料唔同周海濱續約

21)
普雷斯頓決定同領隊 A.Irvine 終止合約

22)
韋根以及樸茅都被指有興趣從些路迪引入史葛麥當奴

23)
消息指尼科西亞考慮搵前博洛尼亞教練阿拉干尼接手

24)
卡森李察士表示唔會離開費倫巴治

25)
西布朗成為最新一間同摩西斯扯上關係既球會

2009-12-30 (1)

想講近兩晚既英國波......

紐記倒水咁倒連續兩場失兩分俾護級球隊
偏偏利記連續兩場發揮一般就袋晒6分
真係估佢地唔到

先講紐記
再次失分既原因一定包括好冇運咁兩次中楣
不過曉頓亦要負上一定責任

針對對手冇晒正選左右閘
紐記比平時更重點側擊係正確既戰術思路
不過如果用頭槌較好既艾美奧比取代盧雲卡蘭斯踢正選會更上算
曉頓應該唔想將傷癒既老味用得太盡
不過小弟寧願速戰速決後先俾佢休息

而紐記上半場多次機會都把握唔到亦係唔抵爭
下風波死守好多時都係靠士氣
一旦失守就會即刻散晒
遲遲開唔到紀錄根本早就埋左失分伏線
而下半場尼祖哥洛夫針對性封死兩邊就令紐記更加難入波

不過亦再次睇到曉頓既臨場調動仲未夠班
既然咬唔入對手
點解唔索性收起一隻閘而踢多個古費里
而彭卡迪入替既應該係助攻仍然不足既森遜
而唔係可以轉踢右閘兼擅長斬波既賴恩泰萊

利記方面
尋晚只有古治代替奧拿里奧
幾乎原陣出擊意味賓帥準備等到足總盃先俾主力休息
不過部份球員明顯有疲態
當中最明顯係格連莊臣以及班拿約
後者下半場部份時間仲好似隱左形
謝拉特全場亦只得一腳靚波
太陽能電筒古治既表現當然亦暗淡無光
整體表現只係一般

維拉既表現就有好轉
冇左艾殊利楊格以及比利記抖少一日都仍然俾到利記一定麻煩
反映利記既防線持續不穩
利記最終唔使失波應該多謝全隊最好狀態既拉爾拿

利記接連冇表現都袋足6分
連同只係連嬴護級部隊既曼城
快車檔期賺到既或多或少包括埋比賽信心
維拉就由小弟寫 preview 既時候已經唔睇好佢地入前4,甚至前6
畢竟兵源不足以及跑狗踢法係佢地再進一步既障礙

想講既其實仲有車路士以及史篤城既比賽

車仔幾乎衰俾舊波士睇
不過摩連奴暗笑之餘
亦應該會煩惱點樣凍結杜奧巴
佢入球能力超強之餘亦異常強壯
彭素同佢幾度過招之後竟然搞到膝傷而可能提早收咧
聽到都得人驚

而史篤城對伯明翰既賽事
想睇客隊創下今季英超最強11場不敗紀錄既嘢
可以睇楊先生既喉舌報章

小弟反而比較留意主隊既隱憂
佢地上季靠主場超勁戰績先可以提早逃離降班
不過今季主場戰績稍為跌 watt
新加入既端基又遲遲未能融入球隊

更大鑊既係佩利斯早前因為加操事件而影響球隊士氣
要知道史篤城既爛仔踢法特別講士氣
結果球隊表現持續低 watt
再咁搞落去將有一定既降班壓力

p.s.:
1)
兵工廠兩年前 Boxing Day 作客俾樸茅悶和
今晚冇法比加斯隨時歷史重現
不過小弟仍然希望佢地唔好俾費sir睇死

2)
睇新聞見香港羸廣東好似冇咩說服力
與其話阿古沙勁就不如話李偉軍屎
好坦心佢地星期六輸返轉頭

2009-12-29

近兩日既新聞......

1)
禾路連可能以300萬鎊既價錢轉投彭拿典奈高斯
而馬體會就被指準備出賤價200萬鎊收購杜辛拿

而利記繼續同希斯基扯上關係
其他新箭頭人選包括辛達告魯斯,卡頓高爾,堅韋尼鐘斯以及摩西斯

另外,有報導指如果利物浦下季冇歐聯踢
托利斯將會要求離隊
而車路士以及曼城都有興趣接貨

2)
肥安闢謠表示冇唸過搵新龍門取代施治
保方,卡斯拿斯以及艾堅菲夫近日都先後同車路士扯上關係
而佢雖然講過入貨就會裸跑
但英國傳媒依然估計阿古路或者列貝利會上車
而佢地亦被指準備同利記爭奪希斯基

另一方面,迪辛度將繼續外借到布力般流浪

3)
同阿古路扯上關係既仲有皇馬
佢地亦被傳打算季尾收購朗尼以及韋拿

而唔夠中堅用既佢地繼續同維迪以及伊雲奴域扯上關係好正常
不過竟然傳到想接收高路仙尼就比較離譜

另一方面,保頓就被傳考慮接收古迪

4)
希活表態希望繼續以借用身份效力紐卡素至季尾

5)
阿仙奴被指考慮借用亨特拉爾半季

而雲加透露再次受傷既法比加斯可能要休息3星期
加上桑治以及伊保爾要踢非洲國家盃
令佢考慮為中場增兵

另一方面,基達菲就考慮向佢地收購辛達路斯
而韋舒亞透露考慮以借用形式加盟韋斯咸

6)
麥斯洛迪古斯可能由馬體會轉投小保加

7)
財困既樸茨茅夫連續3個月唔能夠準時出糧
消息指佢地將要繼續賣人還債
所以比基安尼希望樸茅向里昂買斷佢既希望都好難實現
而佢地亦應該冇本事同富咸爭奪麥卡菲

而占士已率先表態希望跳船到熱刺
以提升踢世界盃既機會

另一方面,般尼希望延續借用紐根特

8)
史高拉利透露由於滿意現狀而拒絕接手祖雲達斯
另一方面,老婦人就表明基亞雲尼係非賣品

9)
幾段曼城既消息......

雖然有報導指比拿美可能轉投熱刺或者阿仙奴
不過當時人已經否認離隊

而有消息指如果艾迪巴約以及羅賓奴麻煩友之後搞事
文仙尼唔排除踢走佢兩個

而仲未落班既蘇甘保就忽然被傳可能加盟曼城
不過現時最有可能加盟既係哥度巴

另一方面,西班牙傳媒指佢地既油王老闆
其實有意思出價11億鎊收購皇馬

10)
維拉被指打算以800萬鎊既價錢引入馬素舒希化
而森林就再次被指將於1月向佢地出價300萬鎊買斷索尼

11)
愛華頓忽然被指考慮引入賓納特以及麥基迪

12)
幾段曼聯既消息......

賓菲加拒絕佢地對迪馬利亞既1000萬鎊出價

而佢地亦被指有興趣引入法比安奴
不過消息指佢地既出價仍未足以打動西維爾

另外,薩拉戈薩以及卡迪夫城就分別想借用馬捷達同埋吉遜

另一方面,摩連奴傳聞2012年約滿國米後接手代替退休既費 sir

13)
彼德斯古被指最有可能加盟魯賓卡山

14)
黑池中場查理阿當被指成為保頓以及森林既150萬鎊增兵對象

15)
熱那亞射手費路卡利被指可能以1200萬歐元既價錢轉投費倫天拿

16)
華倫西亞方面表示解決財困問題後會籌備興建新球場
而佢地亦打算從基達菲引入射手蘇爾達度

17)
國米被指準備向拉素出價720萬鎊收購塞爾維亞後衛高拉洛夫
而有報導指國米早前從佢地接收彭迪夫後
為左還人情而外借年青球員畀拉素

另一方面,有消息指佢地可能會從羅馬接收巴迪斯達

18)
哈利列納暗示會賣走柏夫奴真高
這名俄羅斯射手先後同利物浦,阿仙奴,AC米蘭,辛尼特以及羅馬都扯上關係

而熱刺被指準備同史篤城爭奪賴恩巴布
後者同時亦考慮引入希斯基
(加埋之前提及既另外幾隊英超隊
大隻妙真係搶手......)

19)
芬洛即將引入從鯨魚引入吉田麻也
這名可踢中堅以及防中既球員被認為係芬洛鞏固日本市場既工具

20)
士砵亭方面宣佈將以 600萬歐元既價錢從馬體會接收龐高尼冼拿馬

21)
尼索比亞被指成為伯明翰800萬鎊既增兵對象

22)
費倫天拿宣佈菲臘比達貝路即將由烏甸尼斯來投
這名25歲巴西中堅身價高達900萬歐元

23)
史杜亞借用期滿由打呲郡重返富咸
前者因為財政問題而唔能夠買斷佢
這名瑞典右閘表示希望可以於1月離隊以尋求出場機會

而捷克U-19射手 J.Hora 近日於富咸跟操
鶴臣可能向 FK Banik Most 出價收購
比較大機會加盟既有斯洛文尼亞中場高倫
佢想離開西布朗以尋求更多既出場機會

24)
費格遜0個仔達倫費格遜早前同彼德堡解約
而家可能會接手雷丁

25)
毛劍卿可能成為最新一個外流球員
這名23歲翼鋒可能由上海申花轉投彭拿路

26)
阿根廷小國腳翼鋒保拿洛迪開快車炒車收場
右手斷左要養傷超過半年之餘
仲因為睇住3個fd當場死晒而要接受心理輔導

2009-12-28

想講下Big 4以及紐卡素既比賽......

1) 伯明翰對車路士

就算繼巴塞後令車仔34場以來首次冇波入
大陸網同埋楊先生既喉舌報都唔使咁誇話伯明翰比美巴塞
真正內容應該係祖赫特'煞'車先岩
佢應該係基雲之外近期英超最堅既龍門
如果 keep 到咁既狀態
卡比路應該冇咩理由世界盃唔用佢踢正選

另一方面,車仔冇波入唔止因為阿歷士冇運罰球中楣
中場推進冇咁暢順亦係原因
或多或少同球員既傷疲問題有關
而右路冇左保辛華令邊線陣擊失色唔少
對手亦可以更集中於中路塞死佢地

而車仔近5場已經第4次失分
當佢地冇趁曼聯後防傷兵潮而盡量放甩對手
之後因為非洲國家盃而陣容不陣
曼聯一定唔會同佢地客氣
萬一之後真係俾人地後上捧盃
這段時期既多次失分可能就係當中關鍵

2) 利物浦對狼隊

面對麥卡菲反口幾乎盡出主力既狼隊
利記有主場之利都只係略佔優勢
如果唔係奇雲杜里離門幾碼失機
利記隨時先失波而陷於苦戰

羸波關鍵一定係對手踢少個
狼隊連失兩球睇到都係中後場執位而漏招
由右閘,中堅以及防中都一齊犯錯

另一方面,阿古蘭尼今場首次踢正選既表現不過不失
初步印象傳送成功率好高
相反謝拉特雖然入波打破悶局
不過多次兜口兜面都俾失波
似乎仲要等佢一段時間去克服信心問題

3) 阿仙奴對維拉

之前幾乎殺盡 Big 4 既維拉下半場忽然跌 watt 連輸3球
可能原因應該有3個:
一係兵工廠中場多左法比加斯即刻踢高一皮波
二係維拉上半場搏得太盡
三係維拉比上季更快出現疲態
小弟但願今場波係維拉整季命運既縮影

講波佬講得冇錯
維拉既正選陣容係最少變化
或多或少同球隊冇咁疊馬有關
不過佢講漏左其實維拉係英超用得最多長波既球隊
跑狗踢法根本就唔可能用足成季
柏度夫領軍後為球隊帶來踢少左長波既變化
不過中場幾個年青拍檔既優勢都係來自速度而唔係技術
奧尼爾要徹底降決問題唯有繼續引入唔同類型既攻擊球員

4) 侯城對曼聯

曼聯開始見到後防傷兵潮完結既曙光
而朗尼亦繼續勇態
不過小弟真正想講既係侯城

上季老虎好快就變返做病貓
球員當眾俾菲爾布朗鬧到失晒信心
以及底牌俾人睇穿晒都係原因之一
不過更關鍵既其實係佢地永遠一往直前既踢法

佢地中前場係有幾個唔錯既球員
不過整體都唔算好有攻擊力
更攞命既係佢地冇穩健防守作為球隊既根基
冒死進攻往往為自己造成致命傷

5) 鍚週三對紐卡素

避免主場6連敗既錫週三明顯搏命過紐記
更大鑊既係曉頓居然搵畢特代替辣椒仔
又邊可能搶得羸對手
似乎搵古費里正式移入中路
再用多個正宗右翼會比較上算

紐記陣中最令小弟有好感既就係艾美老味
如果唔係對手既龍門眼明手快
紐記隨時有機會連雞都偷埋

講返今晚對打呲郡場波
有辣椒仔復出既紐記迎戰可能有多達5個主力缺陣既客隊
只要針對對手冇晒一對閘而做好側擊
應該有力打落水狗兼重回正軌

2009-12-27

近幾日既新聞......

1)
列高巴最終以自由身重返 Danubio FC

2)
熱刺再次同查馬克以及雲佬扯上關係
而哈利列納就暗示可能從曼城引入比拿美
不過曉士就透露已說服這名威爾斯射手唔好為一時之氣而離隊

3)
甘比亞素,史坦高域,柏仙尼以及卡積亞都被指係曼城最新既羅致對象

4)
利物浦被指準備引入新箭頭
傳聞人選包括辛達告魯斯,希斯基以及簡韋恩鍾斯
史篤城亦同後者扯上關係

5)
早前搵經理人物色新球隊下季加盟既美路
由於同費拉利反面而可能提前於1月離隊
消息指阿仙奴可能會接收這名巴西防中

6)
細哨既阿哥兼經理人證實保地花高準備於1月帶細哨返巴甲
而標準烈治方面透露M.米蘭奴域最有可能於季尾加盟AC米蘭

7)
馬體會被指為失去阿古路作好準備
消息指佢地向拉魯斯既小將 E.沙維奧招手

8)
國米落實接收彭迪夫
另一方面,巴洛迪利以及蘇亞素都被傳成為愛斯賓奴既增兵目標
皇馬亦再次被指有興趣引入馬干

9)
幾段曼聯既消息......

雖然有幾名後衛可以逐漸康復可以紮住上陣
不過貝碧托夫以及里奧費甸南既情況就幾唔樂觀
前者可能要抖3個月之餘
後者就可能要提早收咧兼唔可以踢世界盃

而消息指費sir為免入錯貨
可能打算先借用賓艾化半季

另一方面,小將杜錫於加盟後冇機會出場令佢心灰意冷
有報導指佢考慮於短期內離隊

10)
基爾繼續執教薩拉戈薩到季尾

11)
尼科西亞宣佈同比德斯古解約

12)
費倫巴治被指向國內新星 S.Yildirim 招手
這名19歲射手早前亦同曼聯扯上關係

13)
祖雲達斯以及拿玻里成為最新兩間同蘇亞雷斯扯上關係既球會
而前者被指準備向史浩克04出5折價錢600萬歐元
收購身價高達1200萬歐元既拉菲爾

14)
車路士忽然被指準備接收東尼
不過佢最有可能減人工加盟羅馬
而車仔就被傳可能收購賓施馬
不過這名1個月兩度炒車既法國射手表明唔準備離隊

而伊雲洛域即將同車仔續約
粉碎佢轉投皇馬既傳聞

另一方面,有吹水小報指肥安落 order 收購卡斯拿斯
不過當時人既贖身費其實高達1億5000萬鎊
但佢於另一場合表示球隊唔會於1月增兵
仲講笑話如果佢食言就去冰天雪地裸跑示眾

15)
達托羅希望離開拿玻里以爭取更多出場機會
西維爾以及維拉利爾被傳打算合資收購佢
而利禾奴亦有興趣借用這名阿根廷中場

16)
愛華頓被傳準備於1月從米堡引入艾利亞迪里

17)
卡利亞里可能於1月失去巴西射手捷達
消息指兩間意甲以及一間德甲球會都希望引入即將成為歐聯球員既佢

18)
消息指禾堡準備於1月從哈化柏林出價800萬歐元收購費特歷治

19)
史特加可能引入希特布蘭或者雲昇以取代列文

20)
狼隊被指準備向維拉收購中場加特拿

p.s.:
1)
聖誕普天同慶既時候
劉曉波就再次俾狠毒祖國加害而面臨又要坐多11年

發表私人見解促進民主進程就叫煽動顛覆國家政權?
講穿左只係蛇鼠狗官擔心失勢而再搵唔到錢
掛穩定國家既羊頭
賣打壓異見既狗肉

天下烏鴉一樣黑
放諸足球世界都應該有人對人唔對事
路人甲乙丙都知高科技有助公平執法
點解國際足協偏偏遲遲唔肯落實使用?

2)
賽後感等埋今晚兩場波先講

2009-12-24

1)
傳聞哥迪奧拿將來會加盟曼聯取代退休既費sir
佢亦再次被指可能會接手國米

2)
阿仙奴成為最新一間同彭迪夫扯上關係既球會

3)
利物浦再次同柏夫奴真高扯上關係

4)
繼巴洛迪利以及馬干後
意大利傳媒指文仙尼亦打算從國米搵多幾名舊部屬
當中包括捷禾,哥度巴以及森美爾
而佢當年教國米期間球會未能成功引入既森多利亞師弟卡斯辛奴
亦係佢既增兵對象
另外,卡保爾以及亨利都同曼城扯上關係

另一方面,有報導指如果曼城今季入唔到前4
會方有權即刻同文仙尼解約
所以文仙尼冇帶屋企人去英國之餘
仲連屋都冇搵只係長住酒店

5)
阿根廷再傳內訌
貝拉度公開勁插肥馬既副手

6)
紐卡素被指打算從格流羅致基斯保特
而希活就表態希望繼續留隊

另一方面,麥卡菲表示曾經打算引入卡路爾
不過被紐卡素拒絕後已經打消念頭

7)
薩拉戈薩被傳準備接收梅斯達

8)
中村俊輔否認1月離隊既報導

9
夏京接手紐倫堡

10)
利夫連決定離開登地聯以接手蘇格蘭
佢同蘇格蘭足總簽約兩年半

11)
尋日講過費爾成為曼聯既新龍門人選
傳聞費倫天拿就視艾堅菲夫為替補對象

12)
維拉被指有興趣向新特蘭收購簡韋恩鐘斯

13)
前曼聯名宿史根倫病
享年74歲

p.s.:
1)
前文提到文仙尼可能季尾就冇得撈
中東油王連曉士都忍到年幾
竟然只係忍到文仙尼半季?
莫非曼城一心季尾搵摩連奴過檔?

2)
近幾日真係好似發夢
舒密加復出既堅料之後
又有金判坤教國足既傳聞
雖然覺得唔會係真
不過都好興奮

3)
Merry X'mas!

2009-12-23 (2)

近幾日既新聞......

1)
文仙尼表示以前4為今季目標
下季就展望可以羸埋英超

而多名星級球員隨即同曼城扯上關係
當中包括:韋拿,費蘭度托利斯,列貝利,亨利,阿古路,巴洛迪利,迪馬利亞,
馬斯查蘭奴,拿姆,基亞連尼,耶耶托尼,馬干,加利卡希爾以及厄遜

有入有出......
祖赫特,米卡李察士,米高莊遜,馬華路禾尼,賓積洛夫,
尼史葛,布歷治,辛達告魯斯,基雲以及比拿美都被傳可能離隊
消息指後三人最唔滿意曼城高層既安排好唔尊重曉士
當中比拿美第一課操練就同文仙尼發生衝突

另外由於巴塞唔能夠同曼城於轉會費方面達成協議
而決定擱置收購羅賓奴
文仙尼隨即表示準備重用這名巴西球星

另一方面,文仙尼亦澄清曼城係12月頭先開始斟酌佢
曼城高層亦表示佢地係於球隊和左侯城之後考慮易帥

2)
曼聯新兵B.迪奧夫獲發工作証
費sir決定於1月為這名塞內加爾前鋒註冊

而曼聯亦被指將於1月以750萬鎊既價錢引入賓艾化
之後再將佢外借到伯明翰或者愛華頓

另一方面,紅魔亦被傳可能同曼城爭奪韋拿以及加利卡希爾
費sir亦被指可能考慮引入費爾作為新龍門

3)
車路士亦被傳打算羅致韋拿
英國同埋西班牙兩地傳媒都指佢可能改變主意轉戰英超

而伊雲奴域(仲有伊雲斯)被傳成為皇馬新中堅既最新人選

4)
雲加表示睇淡雲佩斯於季尾復出既機會
但就有把握佢可以趕及世界盃

而消息指雲加決定將韋舒亞外借到般尼
辛達路斯亦有機會外借到愛華頓

另外,雲加仲未成功遊說加拿斯續約
消息指費倫天拿以及AC米蘭都想羅致季尾自由身既佢

另一方面,大股東美國富豪高安基既持股量已經增至29.97%
只差0.03%就可以提出全面收購

5)
財困既屈福特勢必要賣走史葛路治
兵工廠以及熱刺被傳準備同熱刺爭奪這名前英格蘭U-21龍門

6)
摩連奴再次否認季尾離隊既傳聞

7)
侯城早前宣佈放棄部份球員以減輕財政壓力
消息指佢地之後打算引入畢特

8)
迪保斯基同西班牙足總續約到2012年

9)
費拉拿雖然暫時保得住飯碗至季尾
但亦有消息指如果未來兩場波再出事
祖記高層會改變主意

而家有傳聞指納比,軒迪克,尼維特或者史高拉利準備接棒
不過前兩者就已經作出否認
令尼維特成為接任既大熱

另一方面,祖記被指有興趣引入雲拜頓以及彭迪夫
而國米以及熱刺亦對這名岩岩同拉素解約既射手好有興趣

10)
利物浦忽然被傳向東尼以及麥基達招手
而賓帥可能俾禾路連以借用形式加盟哈化柏林
另一方面,利記成為最新一間同摩西斯扯上關係既球會

11)
同樣對東尼有興趣既仲有巴勒莫

12)
紐卡素以及保頓都被指向基加隆招手
鍚菲聯方面表明要收到合理出價先肯放人

13)
細哨被指早前連續3晚夜蒲
消息指李安納度會罰佢內部停賽

14)
格連莊臣涉嫌醉酒鬧事

15)
樸茅積極搵財團注資
當中包括香港財團
另一方面,比夏積被指可能轉投熱刺

16)
哈利列納被告逃稅
將於1月11號出席應訊
雖然熱刺發言人表示件事係佢既私事
唔會影響佢既職位
不過已有賭波公司將佢列為下個被炒領隊既第5熱門

另外,維拉被傳可能接收羅比堅尼
哈利列納已經表明冇得傾之餘
亦表示羅比仔唔會因為集體開P一事而冇得做隊長

17)
薩拉戈薩準備於1月踢走賓納特,艾華頓,艾耶拉以及華拿祖
而普耶否認離開白禮頓以接手母會

18)
烏甸尼斯決定搵迪巴亞斯取代馬連尼

19)
史篤城被傳打算收購卡路爾

20)
烏克蘭足總宣佈冇同米加列真高續約
佢地將會向薩克達挖角盧錫斯古

21)
羅馬有興趣引入施積
而佢地既財政能力就成為交易關鍵

22)
田中鬥莉王最終決定轉投名古屋鯨魚

23)
韋斯咸被指準備引入基士文以及比亞堤

24)
消息指愛華頓準備再次以借用形式引入文奴費蘭迪斯

25)
泰利接連鬧出醜聞
先係被指為左1萬鎊而賣黃牛飛
再被指私自利用英格蘭隊長既名義搵錢

26)
般尼被指有興趣以借用形式羅致巴里

27)
富咸被指準備借用安東費甸南以及出價300萬鎊收購碧福特

p.s.:
1)
美斯一如外界所料當選世界足球先生
而瑪達就破紀錄連續4年當選世界足球小姐
波比 sir 死左先攞公平大獎就係借機會向佢老人家政敬
而C7攞最佳入球獎就似係安慰獎
不過小弟覺得以色列球員既教材式倒掛以及墨西哥球員既虎尾腳入波仲精彩

最估唔到既都係中國足協攞發展大獎
話中國足協近年積極向新一代推廣足運
但諷刺既係早前睇過一段 article
提及近年各個年齡級別搵球員都難左
因為家長傾向唔多想俾小朋友繼續踢波
小弟既結論係:一日唔搞好自己
幾積極同人 hard sell 都只係白費心機

2)
前日先講山齊士等住上位
實幹派既佢教波唔使太多球星
就算艾美利亞因為近期6場聯賽都贏唔到而炒佢
小弟對佢既評價依然不變

2009-12-23 (1)

想講幾場英超以及英冠東北部6分波打呲

先講英超 Big 4
預左利記作客樸茅會失分而回
畢竟成隊波都死氣沉沉
而後防根本輸到失失慌
4人防線既最後一個正常人格連莊臣亦連續爆鑊
或多或少同上場輸俾兵工廠之後失左信心有關
馬斯查蘭奴既停賽兼受傷就絕對係雪上加霜
令球隊連1分都保唔住

而曼聯作客輸0-3俾富咸
小弟覺得既然後防咁唔齊腳
費sir應該執靚中前場以攻為守
邊可能用年老力衰既史高斯
兩年前就算一腳射死巴塞
小弟都依然認為佢係球隊既負資產
活力嚴重不足既之前就經常明知故犯 late tackle 補數
今次俾梅菲偷波就衰到連犯規都趕唔切
而球隊既集中力亦好有問題
下半場由開始到失波既廿幾秒
睇直播見到有部份球員連位都未企好

車路士既表現就已經有改善
不過遇上表現更好既韋斯咸
失分都係非戰之罪
槌仔幫今場既表現可以話係本季 so far 最好既一場
攞唔晒3分只因球証罰錯左厄遜
而柏加更係今場最搶鏡既球員
600萬鎊既身價絕對值得賓帥考慮佢

阿仙奴主場打虎
因為對手質素低唔止一班兼中場攔截不足
不過施維斯達幾乎次次都爆鑊
雲加都依然咁重用佢
就好令小弟費解

另一方面,小弟雖然冇睇狼隊
不過都撐佢地羸般尼攞3分
以前亦有護級球隊選擇某些場次重點出擊
不過就冇麥卡菲做得咁徹底
侯城,史篤城以及般尼亦有兵源不足既問題
或可以考慮效法狼隊
而狼隊選擇性出擊既策略就可能係佢地護級既最大本錢

最後想講英冠東北部打呲
紐記係羸波而回
數據亦顯示佢地形勢比較佔優
不過其實遇上唔少阻力

而紐記羸波既另一收穫就係艾美奧比復出踢正選
佢夾希活既火力應該會唔差
兩個既二傳能力都唔錯
不過前題當然係兩邊側擊仲要做得更好

而平時冇特別留意米堡
只知史特根接手之後戰績仲衰過修夫基
不過季中接手確係有難度
不過佢幾次借人既決定好正路
只要之後成功收購聖列加或者搵到替補
戰鬥力依然不容忽視

頭兩名直接升班雖然一定唔關佢地事
不過佢地而家雖然衰到去14位
不過同第6位既李斯特城其實只係差4分
附加賽資格最終應該走唔甩

2009-12-21

想講西班牙幾隊名牌既表現......

1) 巴塞隆納對學生隊

巴塞俾人形容為地上最強絕不為過
不過唔代表封殺唔到佢地既進攻

上季既馬略卡以及車仔都曾經作出類似既示範
後者仲幾乎成功完成 'mission impossible'
前晚既學生隊就係繼車仔後踢出近來最高水準既防守足球

學生隊基本上以4-5-1陣式抗敵
前線只靠保斯利等運到
幾個具攻擊力既中場全部變晒截擊型既工兵
加上美斯身邊永遠都有球員輪流跟實佢
令已經冇左恩尼斯達拍檔既沙維更難組織攻勢
佢地邊線亦至少有兩名球員封住對手傳中
加上一對既集中又硬朗既中堅
嚴密既佈陣加上令人驚喜既防守紀律
令巴塞上半場既攻勢幾近死火

巴塞上半場只得兩次來自沙維既進攻能夠威脅對手
不過佢先係死火倫上身玩單刀橫傳
之後俾對手龍門 late tackle 踢跌又因球証犯上思想上錯誤而冇左個12碼
最慘既係巴塞之後仲俾保斯利偷襲得手

半場哥迪奧拿即刻用柏度洛迪古斯入替受傷既基達
靠佢於右路發難以及解放美斯踢自由人
不過佢地只算係有攻勢而冇實際

事緣美斯去到邊都當然發覺身邊有敵人之餘
左路既亨利亦繼續夢遊球場
條友 hea 住去踢之餘
佢每次上腳都令小弟覺得場波忽然停頓左
之後只係識扮嘢搏罰球或者靠佢既'慢速'去突破
睇佢既步頭仲以為佢拖狗去花園散步
後面既艾比度好少助攻都可能因為唔知點去配合佢
如果教波既係摩連奴
二段手球王未到半場已經可以返更衣室沖涼

哥迪奧拿之後唯有再變招
先有丹尼爾以右翼資態出現
令柏度洛迪古斯同美斯一樣四處搵機會
碧基亦被推上前線搏殺
以及用新仔謝芬倫入替毫無作為既亨利
最終靠碧基把握華朗失誤而二傳柏度洛迪古斯見功

學生隊之後唔知係滯氣抑或體力下降
加時既防守冇頭90分鐘咁緊密
先後幾次走漏巴塞既攻擊球員
最終仲俾美斯靠心口入波反先
其後垂死掙扎既學生隊先後錯失幾次入波機會
整定返魂乏術

幾個月前當哥迪奧拿第一季教波就做3冠王
話咁快就去到軒迪克以及費sir當年既顛峰已經令人相當驚訝
到今日再贏多3個盃仔成為前無古人既6冠王
佢自然俾人捧到上天

不過佢而家係唔係真係仲堅
小弟倒唔敢過份跟紅頂白
講戰術既運用以及臨場應變
小弟覺得佢仲未有摩連奴或者軒迪克咁勁

不過佢夠吉士用新仔
賽後透過傳媒感謝幾個舊部屬亦反應佢好識做人
他日累積更多臨場經驗
佢一定會成為西班牙球壇歷來最堅既教練

2) 西維爾對基達菲

主隊羸形勢輸波
既係輸自己埋門把握力差
亦因為對手中後場夠緊密兼突擊夠勁
絕對係以彼之道還施彼身

基達菲教練米高比哥迪奧拿早幾年出道
踢波年代係中前場攻擊球員
佢教波既強項反而係中後場佈陣

而佢向來主張青訓
上季就因為唔滿意皇馬唔俾機會年青球員而劈炮
西甲少帥除左哥迪奧拿之外
等住上位既其實仲有佢以及山齊士

3) 皇馬對薩拉戈薩

對手死氣沉沉兼防守鬆散
加上皇馬冇左卡卡依然有雲達華治做替補
中前場分工清晰
計表現係印象中皇馬今季最好既一場

另一方面,雲達華治咁高水準都要成日坐冷板
1月唔轉會真係對佢自己唔住
而華丹奴早前透露可能買新中堅
不過加雷既水準其實仲穩定過比比
絕對值得一席正選

p.s.:
之後再講英超以及英冠東北部打呲

2009-12-20

1)
曼城宣佈搵文仙尼取代曉士執教
早前有報導話雲加,奇連士文或者軒迪克會接手

另一方面,由於尼史葛要養傷兩個月以及高路托尼要踢非洲國家盃
曼城被指想向保頓收購加利卡希爾作為替補

2)
賓尼迪斯再次被傳將要被迫下台
報導話如果皇馬季尾決定解僱柏歷堅尼
雙方可能會亙換領隊
而利記亦被指有可能搵奧尼爾接手

3)
中村俊輔希望於1月離開愛斯賓奴以尋求出場機會

4)
由於前球會主席羅素願意償還部分債項
屈福特有望避免破產

5)
賓菲加準備借用東尼到季尾

6)
多蒙特被指有興趣從皇馬回購梅斯達

7)
當尼,巴迪斯達以及施仙奴被指會於1月離開羅馬
不過後者已經作出否認

8)
美路由於於祖雲達斯發展未如理想
消息指佢想於季尾離隊轉戰英超或者西甲

9)
雲加表示如果條件適合就會出售辛達路斯
而紐卡素亦被指有興趣借用韋舒亞

10)
本田圭佑被指即將轉投莫斯科中央陸軍

11)
伯明翰準備向史浩克04出價700萬鎊收購古蘭爾
而佢地亦同賓特尼扯上關係

12)
拉素成為最新一間同韋拉扯上關係既球會
佢地被指打算以借用形式引入這名法國防中
而佢地亦準備引入前巴塞阿根廷箭頭麥斯盧比斯

13)
熱刺成為最新一間同柏加扯上關係既球會
而佢地亦被指有興趣收購彭迪夫

另一方面,施積既經理人就否認收到熱刺既斟酌

14)
盧錫斯古被指可能離開薩克達以接手烏克蘭國家隊
早前土耳其足總亦被指向佢招手

15)
洛頓將以借用形式轉投巴黎聖日耳門

16)
賓艾化勢必離開馬賽
消息指佢既經理人主動聯絡曼聯

17)
艾美利亞以及費古羅亞都被指可能於1月離開熱那亞
前者同教練加斯伯連尼不和後可能以借用形式加盟AC米蘭
而後者雖然想離隊爭取出場機會
不過可能買家小保加因為財政問題而冇本事完成交易

18)
蘇甘保向樸茅追債100萬鎊獎金

2009-12-19

近兩日既新聞......

1)
歐聯進行16強抽籤
最矚目既一定係摩連奴領軍國米倒戈車路士
串王同油王,泰利以及肥安都咁多牙齒印
牙臼味十足

肥安雖然好熟國米
但段估點都唔夠串王咁熟舊部屬
相信這方面可以為國米彌補球隊速度輸蝕既弱點
加上杜奧巴以及伊度奧都有本事置對方不穩防線於死地
明乎其實係一場五五波

而碧咸以AC米蘭球員身份倒戈曼聯亦同樣吸引
咸哥係比賽焦點
不過未必做到比賽關鍵

如果平均技術佔優既AC米蘭繼續遇強越強
加上細哨既有限度既回勇以及柏圖既速度
對曼聯威脅真係好大
不過紅魔鬼效率上既優勢以及費sir既經驗
足以令佢地牌面上稱先少少

另一隊英超隊阿仙奴既抽籤結果就較好
不過考慮到波圖近年主場對兵工廠既往績幾好
其實都唔太易食

而來自E組既兩隊就唔多好彩
費倫天拿根據賽例可以避開兩間米蘭球會以及里昂
偏偏佢地抽到餘下幾隊次名出線球隊當中最強既拜仁
紫百合雖然今季主場歐聯戰績好勁
不過拜仁有力靠高波屈機過關

而里昂未抽籤已經知對手不出英超以及西甲既3甲
結果而家要硬食皇馬
唯有搏對手後防再爆鑊而偷雞

其餘既巴塞,波爾多以及西維爾都抽到好籤
前兩者既隊手史特加同埋奧林比亞高斯
實力仲弱過佢地分組賽既對手

而西維爾鬥莫斯科中央陸軍雖然表面唔易食
不過考慮到東歐球隊歇冬期間好難有料到
以及對手首回合主場有兩名主力因為誤服禁蘇而停賽
西維爾有力爭取首次殺入歐聯8強

2)
歐霸亦有抽籤結果
比較吸引既戲碼有幾場
分別係馬體會對加拉塔沙雷,阿積士對祖雲達斯,利物浦對烏尼雷亞,
漢堡對燕豪芬,維拉利爾對禾堡以及川迪對雲達不來梅

3)
當奴雲落實以借用形式加盟愛華頓

4)
消息指北韓想搵杜斯亞領軍踢世界盃

5)
軒迪克既經理人表示這名荷蘭教練已拒絕曼城同埋祖雲達斯既邀請
而佢可能選擇同俄羅斯足總續約到2012年

6)
日本球星繼續搶手
森本貴幸以及內田篤人可能有機出國搵食加盟費倫天拿以及史浩克04

7)
列文否認可能被迫提早退休既報導

8)
車路士被指打算向拜仁收購舒韋恩史迪加

9)
AC米蘭成為最新一間同東尼扯上關係既球會
不過佢地已經作出否認
佢地亦表示唔會俾恩沙基季中離隊

10)
拿玻里被指準備接收列迪斯馬

11)
般尼成為最新一間打算借用韋舒亞既球會

12)
巴塞令人意外地同高路托尼扯上關係
皆因佢接受訪問時透露想同耶耶托尼合作

13)
侯城被指準備同伯明翰爭奪基斯保迪
這名仲未續約既射手可能被格流以100萬鎊既價錢賤賣

14)
羅馬以及森多利亞都被指有興趣向國米借用文仙尼

15)
打呲郡中場甘文斯被指成為保頓既增兵對象

16)
智利射手H.蘇亞素以及施積都指成為熱刺新箭頭既人選
佢地亦被傳同伯明翰爭奪麥基迪

17)
列高巴可能以自由身加盟阿特蘭大

18)
梅度因為紀律問題可能被費倫天拿放棄
佢最有機會轉投辛尼特

p.s.:
加斯居尼又醉酒搞事被捕
......

2009-12-18

想講週中既英超快車檔期

曼聯,車仔,利記同埋熱刺一齊反彈
當中表現最有信服力既只有熱刺
曼城空有3個好射手
輸中後場就始終冇運行
而熱刺如果上場既埋門把握有今場既水準
就唔使輸俾護級狼咁慘

而車仔以及利記羸波就依然難以令人好滿意
兩隊防線依然不穩
而前者冇杜奧巴既前線即刻冇晒重心
後者最終有3分落袋
就要多謝旁証第一個入波睇唔到史基泰爾越位

曼聯羸狼隊好正路
不過對手狼隊為左留力鬥般尼而換左10個球員就惹起爭議

小弟就覺得麥卡菲冇做錯
隊波實力唔夠強又唔疊馬
雖然換10個正選係好誇
不過用咩人係人地既事
既然夫添作客奧脫福九死一生
倒不如留力對般尼既6分波
而當晚落場既都搏晒命踢兼頭段守得幾好
賽會同埋球迷有咩好不滿
而賽例只係話要用最強陣容
但'最強'既定義根本就冇得去界定

強隊留力經常發生
上季尾曼聯對侯城明知關乎護級結果
都為左歐聯決賽而收起所有正選
而上星期阿仙奴對奧林比亞高斯亦明知關乎小組次名出線席位
一樣為左對利記既6分波大戰而用晒全隊後備
而球會為左踢盃賽而留力亦好常見
又唔見有英超賽會或者歐洲足協要求解釋
擺明有人扮公正而恰弱勢狼隊

最後想講既係般尼對阿仙奴
相同風格對壘原本就好似中學生對大學生
戰局亦真係以兵工廠佔上風
不過最終劫富濟貧就有兩個疑似原因
一係華美倫失準以及左路多左豬維豬達令防線不穩
而般尼有比基改踢中場亦帶俾兵工廠幾名技術型球員一定麻煩

2009-12-17

1)
摩連奴表示希望1月弓有新箭頭替補伊度奧
東尼以及勢必離開拉素既彭迪夫最有機會加盟
而佢地亦被指考慮向巴勒莫收購卡雲尼

2)
拜仁慕尼黑方面透露如果列貝利唔肯續約
將於季尾以6000萬歐元既價錢將佢出售

而高路斯以及泰摩斯卓克都被指可能為左出場機會離開拜仁
當中漢堡已表態有興趣羅致這名06年世界盃神射手

3)
路維同德國足總續約到2012年

4)
曼聯被指睇中莫斯科中央陸軍中堅 Uroš Ćosić
以及卡迪夫城中場A.馬菲士
巧合既係兩名球員都係17歲

而AC米蘭就再次被指想以1000萬鎊既價錢接收蘭尼

5)
韋斯咸被指有興趣從赫德斯菲爾德引入年青龍門A.史密斯
而阿祖安奴決定同法林明高續約半年
令槌仔幫羅致佢既希望幻滅

6)
昆士伯流浪最終決定搵保羅赫特取代麥基頓

7)
尼史葛因為膝傷而要養傷兩個月
而曼城被指打算向費倫天拿借用梅度

8)
當奴雲原則上同意以借用形式加盟愛華頓

9)
列文最終要為佢上場蓄意侵犯艾斯泰迪賓斯既惡行
而付上被停賽3場既代價

10)
維拉被指打算向高雲地利出價300萬鎊收購年青龍門韋斯活特
而古拿就令人意外地被傳成為皇馬既新中堅人選

11)
新特蘭再次被傳將於1月向韋根收購費古羅亞

12)
施維斯達希望季尾約滿離隊以尋求更多出場機會
而雲加表態想挽留佢
亦會同佢於3月會面

而韋舒亞被指成為借明翰既借用對象
基拔就可能於1月以75萬鎊既價錢轉投李斯特城

另一方面,摩納哥後衛 C.Mongongu 再次同兵工廠扯上關係
這名法國U-21國腳既經理人表示佢希望轉戰英超

13)
中央陸軍兩名誤服禁藥球員被罰停賽1場

14)
屈福特面臨破產
球會正副主席亦已經請辭
前領隊格拉咸泰萊就回巢出任臨時主席

15)
侯城新主席皮雅臣透露球隊準備於1月放走部份球員以減輕財政壓力

16)
托迪正式同羅馬續約到2014年

17)
巴塞令人意外地同水晶宮年青射手摩西斯扯上關係
傳聞轉會費約350萬鎊

18)
紐卡素被指有興趣向曼城借用韋斯爾
曼城被指準備外借這名出場機會唔多既20歲斯洛伐克翼鋒

19)
C.Levein 成為蘇格蘭新教練既大熱
登地聯已經准佢同蘇格蘭足總會面

2009-12-16

近兩日既新聞......

1)
祖雲達斯以及北韓足總都被指向軒迪克招手
不過消息指當時人已經拒絕接手後者
亦已去左都靈同祖記高層會面

而當地報章仲吹水如果佢落實接手
祖記將於季尾收購艾沙維,比耶列甸洛夫以及施哥夫
而包括謝拉特同埋費蘭度托利斯等球星亦係可能既增兵目標

另一方面,現時祖記再次被指準備借用加高至季尾

2)
雲達華治再次同阿仙奴扯上關係
而兵工廠既另一傳聞增兵目標卡頓高爾亦表示唔會於1月離隊

3)
拜仁準備同畢特續約兼俾佢繼續做正選
令雲昇離隊既機會更大

4)
卡華路被傳成為皇馬新中堅既人選
而車路士就再次被指有興趣羅致迪施高

5)
加度素落實同AC米蘭續約至2012年
粉碎佢既離隊傳聞

而紅黑兵團被指已經放棄羅致迪施高
佢地被指打算於1月從拉素接收彭迪夫
以及向烏迪尼斯收購迪拿達利

另一方面,卡拉迪斯準備於季尾離隊以尋求出場機會
報導指佢多數轉投基輔戴拿模或者辛尼特

6)
曼聯被指準備各以1000萬鎊既價錢收購紐亞以及亨特拉爾
當中報導仲話財困既史浩克04已經同意放走前者
而財政狀況一般既川迪就以出場機會吸引前後者回流

另一方面,夏格維斯被指因為長期傷患而有心理病
令佢既復出要一再延期

7)
早前提到格蘭打算打關係牌向車路士借用球員
點知而家借人失敗之餘
樸茅仲俾車仔追收當年收購格連莊臣既75萬鎊尾數

8)
華倫西亞落實從魯賓卡山引入阿根廷前鋒杜明基斯
雙方簽約3年半
轉會費不詳

9)
拉傑錫一直被指會被史浩克04賣走套現
佢既傳可能以600萬鎊既價錢轉投愛華頓

10)
拿玻里打算於1月再次向烏甸尼斯斟酌G.迪亞哥斯天尼
佢地亦準備向國米以先借後買既形式引入韋拉
而里昂亦再次同這名防中扯上關係

11)
羅賓奴日前再次因為紀律問題而激嬲高層
消息指佢可能會於1月被賣走

12)
蘇利雲出價5000萬鎊收購韋斯咸
而槌仔幫再次被指向阿祖安奴招手
另一方面,柏加就被指成為利物浦600萬鎊既新防中人選

13)
費古羅亞一球成名後令佢1月離隊既報導越傳越熱
不過馬天尼斯就表示雖然估計球隊最終留佢唔住
不過都唔會俾佢於1月離隊

而仲未續約既舒亞拿就再次同富咸扯上關係

14)
利物浦同巴塞既巴西中堅傑利臣扯上關係
不過佢既經理人已經否認有關報導

15)
消息指巴勒莫高層原本希望從拉素接收洛基
不過考慮到現任教練D.羅斯同佢當年於拉素不和而決定擱置收購

16)
博洛尼亞被指準備同奧斯華度同拖連奴交換迪米捷利

17)
維拉被指有興趣以400萬鎊既價錢從西布朗引入蘇格蘭箭頭當蘭斯

18)
賀芬咸成為最新一間受豬流感侵襲既球會

19)
拿臣決定出任瑞典乙組球隊蘭斯干拿既教練

20)
哈利列納表示唔會俾賓特利以及柏夫奴真高以唔合理既價錢離隊

p.s.
1)
列文近幾日騎呢連續衰左兩鑊
而家1月有冇得繼續留隊都未知
當日死敵簡尼即刻乘機抽水叫佢即時退休
佢兩個當年國家隊爭位既恩怨隔左幾年都仲未化解
真係唔化

2)
國際足協選上季金球:
http://www.fifa.com/classicfootball/awards/puskasaward/index.html

2009-12-15

他媽的貝老

小弟知你遇襲而頓覺心涼
懦夫偷襲行為確實可惡
不過佢掟你唔死就仲可惡

今次條友因為嘈吵聲而發脾四搵你出氣
不過你過得到初一都可能過唔得到十五
雖然生意以及政壇既敵人有大把方法對付你而唔使買起你
不過一眾球迷真係唔知可以忍你忍到幾時

你好似用你食左偉哥之後既持久力
同球迷對球隊成績停滯不前既忍耐力
作冇意義既競賽

如果你肯用行年72都仲要勁啪偉哥去玩0靚模既雄心以及興致去搞波
AC米蘭既戰績一定可以時光倒流20年

而家西甲兩大豪門唔羸戰績都羸吸金能力
想當年巴塞只係AC米蘭歐聯決賽技術性擊倒羸4:0既炮灰
而當年半隊意大利國家隊再加荷蘭3劍俠既陣容
出半力都勁過而家既殘陣
意甲龍頭亦豈會係表現無甚霸氣既國米

球隊而家既班費遠不及宿敵國米
李安納度既年薪仲只係摩連奴既十份一
怕且你唔係宿皮幫補生意
就應該係留返幾個臭錢繼續玩0靚妹
兼每年俾老婆天文數字既贍養費

祝你老當益壯咪即係鼓勵你繼續瘟女
想AC米蘭有運行都係要祝你早登極樂

2009-12-14 (2)

想講英超......

過去兩日應該係開季以來最意想唔到既一個比賽週

費古羅亞61碼既超遠程笠射真係估佢唔到
蘇連遜亦於90分鐘內嘗到苦樂參半
佢人笠死前輸既第一球又俾保斯撞到仆街
黑到咁又估佢唔到攞個尾彩
洛達列加射12碼咁穩陣都會宴客

而如果上星期見曼城羸車路士叫反底
睇埋今個星期佢地又和保頓
就應該更正佢地(或者曉士)其實只係迥光反照
不過場波另一意外就係比拿美俾卡頓保屈佢插手而罰佢第二面黃牌

車路士雖然失3球
不過同其他比賽相比都唔算令小弟好意外
因為一早講過非洲國家盃以及防守集中力係佢地今季最大隱憂
意外既就係立下不少汗馬功勞既施治竟然俾球迷柴台

計戰果最估唔到既一定係曼聯以及熱刺
當中曼聯近年主場對維拉近年幾乎全勝
不過運滯之餘
唔夠後衛既影響已經慢慢浮現
對韋斯咸以及禾堡加埋只係失1球
全因兩者進攻方面都各有弱點
費sir雖然否認向蘇甘保招手
不過曼聯依然同史堤芬泰萊以及麥薩斯扯上關係

另一方面,季前又有邊個估到真正既 Big 4 殺手竟然會係維拉
當中有兩次仲係成功踢館

而熱刺輸俾護級狼固然大鑊
不過更大既一定係艾確圖出頸鎖同球迷過招

最後要講既一定係尋晚既雙紅會
多得好多前列球隊都失分
令尋晚場波更加重要
雙方各踢半場好波

上半場表現較好既利記靠古治把握艾蒙尼亞出錯而先開紀錄
不過只係羸得一球就幾唔抵
要怪就怪托利斯既單刀處理得太求其
而加拿斯於禁區內 late tackle 謝拉特
出名騰雞見人跌就吹12碼既韋比今次見到犯規就竟然當睇唔到
而之前講過同佢同樣風格既卡頓保於曼城既比賽亦矯枉過正
真係俾佢地吹到啤一聲
外國既月光特別圓
肯定唔適合形容球証問題

同樣激到小弟跳起既仲有下半場走晒樣既利記
攻不稅而守亦不穩
相反阿仙奴班友俾雲加狂插之後表現明顯好轉

結果加歷查兩次漏頂就累死格連莊臣
格連莊臣輸完兩球波後既表現明顯冇晒信心
事實佢唔使咁自責
輸第一球擺老烏係可憐
係亦場波既轉捩點
不過相對於遠在德國既漢諾威一場輸左三球烏龍波
佢其實已經唔算慘

而輸第二球艾沙維忽然小志強上身
平復心情既沙皇同當年柏金一樣唔使點拉弓都射到球波咁勁
失波都係非戰之罪

之後見到既阿仙奴高度集中防守
專注程度仲係今季少見
技窮既賓尼迪斯冇本事變招
阿古蘭尼入場後推得太前之餘亦同隊友唔夠默契
尼哥治入場後又苦無供應
注定全失3分

其實大家既整體表現都只係平平
亦欠缺強攻既本錢
雙方有得入波都只係多得對方出錯在先

阿仙奴而家追到同曼聯一樣只差車路士3分
不過長遠而言佢地既爭標籌碼仍然少過其餘兩強
雲加1月增兵成功就另當別論

而利記狀態雖然持續低迷
不過肯定唔係桑拿士形容既 meltdown
條友當年教利記教到 pat 屎咁
而家好意思出來乘機抽水
真係要幾 cheap 有幾 cheap

p.s.:
意甲同樣估佢地唔到
Big 4 全部失分
國米有1分落袋已經係最叻仔
不過更估唔到既係荒淫貝老終於俾人打
聽日再講

2009-12-14 (1)

1)
幾段曼聯既新聞......
傳聞有亞洲財團計劃出價10億鎊收購曼聯
不過格拉沙已經澄清冇興趣賣盤

而史高斯,傑斯以及韋碧克都落實續約
前者早前曾經暗示季尾離隊以爭取出場機會

而鬧後衛荒既佢地同史堤芬泰萊以及麥薩斯都扯上關係
當中佢地被指可能用馬捷達同紐卡素以借用形式亙換球員
而費sir就否認有興趣引入蘇甘保
侯城

另一方面,賓施馬於皇馬既正選機會唔算好多
曼聯令人意外地被傳將於1月提出收購

2)
費拉利於祖雲達斯既前途亮起紅燈
既有傳聞指可能於短期內被文仙尼取代
亦有報導指高層已打算季尾搵納比回巢或者向熱那亞教練加斯伯連尼招手

另一方面,巴里兩名後衛蘭洛基亞以及邦洛治再次同祖記扯上關係
阿仙奴以及曼城都好想羅致屬於熱那亞既前者

3)
寄誠庸落實由FC首爾轉投些路迪
雙方簽約4年
而摩頓柏達臣亦表態希望加盟
一嘗參加歐聯既心願

4)
柏洛迪落實同西維爾續約到2015年
粉碎佢轉投皇馬既傳聞

5)
基格納表態希望出國比賽
祖雲達斯以及阿仙奴係佢最有可能既落腳地

6)
阿仙奴以及韋斯咸都打算向英格蘭足總索償
前者既雲佩斯於熱身賽受傷而要休息幾個月
後者既艾殊頓更加於國家隊操練期間受傷而要提前掛靴

7)
加度素,艾比亞迪以及恩沙基都被指因為出場機會不足而對李安納度不滿
前者一直同曼城以2車路士扯上關係
後兩者就被指考慮季尾離隊

而標準烈治既法國18歲後衛文加拉即將加盟既同時
細哨亦即將續約到2013年

另一方面,阿曼特查奧爾忽然被傳成為佢地既增兵對象

8)
車路士被指打算出價300萬鎊羅致卡路爾以作為杜奧巴既替補

9)
哈索賓基可能接手昆士伯流浪
而白賴仁羅斯就同錫週三解約

10)
史巴利堤落實接手辛尼特
雙方簽約3年

11)
巴拉斯域星期六向波斯尼亞足總請辭
消息指佢即將以1100萬人民幣年薪既條件加盟上海申花

12)
羅馬表示冇錢羅致雲尼斯特萊

13)
消息指南非中場迪加哥伊準備於1月離開富咸以爭取出場機會

14)
比比於對華倫西亞既比賽傷左膝頭韌帶要抖半年
華丹奴透露球隊可能於1月買新中堅

15)
賓艾化因為紀律問題而同迪甘斯不和
消息指佢可能於1月被賣走
不過佢就表態希望留隊

16)
費倫天拿準備同柏蘭迪利續約

17)
辛達路斯可能以100萬鎊既價錢轉投拜仁
而兵工廠忽然被指想出價3000萬鎊收購韋拿

18)
伯金透露將來只會出任前鋒訓練員

19)
薩拉戈薩決定開除馬些連奴加西亞

20)
維拉成為最新一間同史葛路治扯上關係既球會

21)
愛華頓被指有興趣羅致保查拉
不過這名阿爾及利亞中堅表明唔會於季內離隊開格流

22)
布魯士就球隊近期表現不濟而警告可能於1月換血
佢地被指有興趣同布力般流浪以及侯城爭奪卡森李察士
這名土耳其箭頭因為帶隊同隊友去酒店開性派對而被掛牌

23)
熱刺就被傳打算向格流借用麥基哥同高美斯爭正選
而韋斯咸被指想向佢地借用柏夫奴真高

24)
小野伸二即將重返J-League
加盟清水心跳

25)
曼城再次同蘇保迪扯上關係
傳聞轉會費高達2200萬歐元

而財大氣粗既佢地被指希望引入畢爾包年青射手梅拿恩
不過這名16歲小將已被定價3000萬鎊

26)
保頓成為最新一間球會願意接收比亞堤

p.s.:
夜少少再講賽後感

2009-12-12

因為報左考試而入唔到場睇波
最終趕到去茶餐廳睇波兼食飯已經係加時階段
從未見過香港隊咁有鬥心
筋疲力竭都咬住對手唔放
從來冇唸過自己會一條友坐茶餐廳眼濕濕睇波

香港再次羸12碼就又係靠晒葉鴻輝
佢雖然冇C7咁紅咁多人識
但佢先係今次賽事香港隊既最大發現
神貓如果再唔生性
隨時俾佢搶埋香港隊既正選席位

睇返錄影覺得對手日本U-20既質素唔算太高
不過平均技術依然比香港好
香港靠既除左主場之利
就只有靠鬥志搭夠

香港上半場發揮只係一般
前線冇左C7就好似冇左進攻重心
連郭建邦都好似隱左形
而神之子既表現又持續低沉
中前場只有徐德帥比較似樣

當然下半場C7後備落場又係另一種情況
條友雖然串串貢
不過威力又係而家本地波最好
希望佢之後可以做得更好

香港今次反高潮羸左東亞運
含金量更勝其他項目
雖然有人又會話其他4隊主要對手都貨不對辦
不過如果香港班友唔搏命
人地派少年隊或者業餘隊我哋都唔使旨意羸

從來對本地波冇特別高既期望
畢竟同亞洲一線球隊既差距幾大
唔可能要佢地一覺醒來就追到人地嘔心瀝血先去到既級數
只係希望佢地搏盡去踢
睇波既見佢地輸都會唔開心
佢地千祈唔好輸左都覺得冇咩所謂

早前知道有人俾日本大炒都覺得冇咩所謂就梗係失望
聽到有人集宿同埋操練唔認真亦會好扯火
小弟信班友今次之後會意識到
只要佢地肯拼肯搏就會有人繼續支持佢地
本地波只要有 heart 就唔係垃圾

成班狗官撐場攞彩後
唔該真係憑良心增加資源
訓練場地以及具體發展計劃絕對唔少得
香港可能n年後都羸唔到世界盃
不過都應該得到重視
畢竟足球仍然係本地最多人留意既體育運動

2009-12-11

近幾日既新聞......

1)
莫斯科中央陸軍兩名球員早前對曼聯後藥檢失敗
佢地解釋係軍醫用藥出錯
歐洲足協最終決定唔會對佢地禁賽

2)
非洲足球先生已有最後5強:
當中包括艾辛,杜奧巴,伊度奧,耶耶托尼以及基達

3)
杜辛拿,菲臘迪根,巴布以及禾路連再次被指將於1月被放棄
杜辛拿就被傳返意甲加盟羅馬
而巴布就被指會用來交換柏夫奴真高

另外,利記爭羸曼聯,格流以及哥登堡而成功羅致冰島小將艾美臣
這名16歲中堅已經入選冰島U-19代表隊

4)
幾段阿仙奴既消息......

路斯基以及卡路士韋拿即將續約

而兵工廠就被傳同利記爭奪柏夫奴真高
而馬體會就被傳向伊保爾招手

另一方面,柏金證實雲格搵佢回巢出任助教

5)
艾禾卡特以臨時教練身份接手阿爾克馬爾直至季尾
而比利時足總將會向阿爾克馬爾索償

6)
皇馬再次同華加斯扯上關係
傳聞轉會費高達1600萬鎊
而杜迪克以及加雷就係最新兩個被傳於1月會被放棄既球員

7)
前伯明翰班主蘇利雲以及高特將於短期內正式出價收購韋斯咸

另一方面,艾殊頓最終被迫因傷掛靴
槌仔幫亦同多名前鋒扯上關係
當中包括巴拉圭射手卡巴拿斯,阿祖安奴以及同領隊不和既比亞堤
不過佢地已經否認會羅致前者

8)
防線好多傷兵既曼聯被傳想同蘇甘保簽短期合約
而當時人亦表態有興趣
另外,雲達沙就計劃再踢多一季

9)
羅比堅尼被傳將於1月被外借到些路迪

10)
聖保羅以及哥連泰斯都希望以借用形式羅致比連奴
當中前者仲係佢既母會
而費倫天拿亦再次被指打算帶佢去意甲

11)
諾士郡可能於短期內易主

12)
消息指祖雲達斯歐聯出局後因為收入減少而擱置增兵
不過佢地仍然同柏仙尼以及馬達扯上關係
老婦人亦被指希望向巴塞買斷馬田卡沙利斯

13)
伊巴謙莫域決定暫時退出國家隊

14)
曼城證實有部份職球員感染豬流感
包括比拿美以及韋爾斯

而佢地被指準備出價1200萬鎊於1月收購拿姆
摩連拿路亦係另一左閘人選

另一方面,米高莊遜好可能因為膝傷而提早收咧

15)
布力般流浪亦係另一間同比亞堤扯上關係既球會

16)
魯賓卡山既阿根廷射手杜明古斯透露即將加盟華倫西亞

17)
保頓被指準備於1月借用保贊

18)
富咸為左減輕財政負擔而決定放棄幾名球員
當中包括砧薜奇玹

而佢地就可能從格流接收美國翼鋒比士利

19)
費倫巴治可能於1月1出價500萬鎊收購卡維

20)
而水晶宮被指財政出現問題
域陀摩西斯可能會被出售套現
維拉就成為最新一間同佢扯上關係既球會

21)
樸茅方面否認即將被接管既傳聞
另一方面,派密斯宣佈退休兼轉任親善大使
而耶巴達表態想樸茅買斷佢

22)
前帕爾馬教練史加拉表態希望接手蘇格蘭

23)
米路出山做塞爾維亞球探

24)
國米被指向東尼招手

25)
新特蘭再次打算用安東費迪南同熱刺交換侯頓
上次轉會窗兩間球會已同意有關交易
只係安東費甸南擔心於熱刺冇出場機會而反對轉會

另一方面,黑貓既年青翼鋒 J.軒達臣被指成為車路士既羅致目標

26)
麥利殊否認伯明翰會引入雲尼斯特萊
不過佢就表示有意羅致正在試腳既斯洛伐克前鋒路華克
而佢亦透露球會希望可以於1月買斷祖赫特

27)
卡路爾日前夜蒲既時候同人開拖
條友個頭俾佢打傷而要入院
警方已拘捕佢同埋告佢傷害他人身體

另一方面, 紐卡素再次同查爾頓翼鋒 L.Sam 扯上關係
不過當時人已經作出否認

28)
愛華頓方面證實想借用當路雲3個月
而佢地被指有興趣出價750萬鎊收購加高
仲可能為左咁而願意以高價出售洛維爾

另一方面,馬體會被指準備向沙夏招手

29)
車路士再次被指向蘇亞雷斯招手

p.s.:
1)
丘忠航將會出任四海流浪既新足主
由於佢同楊家誠有交情
季尾仲可以會搵幾名年青球員去伯明翰受訓

四海流浪近年既老闆多數虎頭蛇尾
希望今次會係例外

2)
拿鐵斯請纓教英格蘭班大哥射12碼
佢係超好波但查實冇咩機會見過大場面
根本未體會過咩係超大既壓力
搵佢教就不如搵個德國名宿教

3)
有時間既記得聽日去大球場撐場
唔止支持香港
仲要話俾跛腳當奴同埋中間分界知道本地波冇死過

2009-12-10

想講歐聯......

最估唔到都係A組既祖記主場仆直
同幾日前羸國米簡直係兩隊波
主場都俾拜仁搓住踢
當中一對巴西中場屎到阿媽都唔應得

不過費拉拿都要負好大責任
半場和波使咩用保臣入替迪比亞路轉踢 4-5-1
係換都搵兩個巴西仔開刀啦
而今時今日既祖記根本冇死守本錢
防線畏高對住勁多高佬既拜仁就更加係等死

B組方面
禾堡組織攻勢唔差但埋門把握幾差
遇上再有料到既古斯錫以及唔識判12碼既球証
只得1個入球唔能夠真實反應禾堡既攻力

而後面失頭兩球又好離譜咁走空晒奧雲
令全場只得4次攻門中框既曼聯都可以靠奧雲既大三元羸波
亦令得到歐洲足協額外開恩既中央陸軍成為最終得益者

C組方面
AC米蘭真係吹到你啤一聲
兩鬥皇馬以及作客馬賽既3場硬仗可以有7分落袋
其餘3場易食既竟然反而只係攞得兩分
最終獲贈4分既魚腩蘇黎世仲係佢地劫富濟貧既得益者
抵佢地冇得首名出線
不過海鮮波既佢地又唔知幾時嚇你一驚
而皇馬雖然首名出線
不過後防咁雞遲早出事

D組方面
最想講只係車仔既用人策略
好耐之前已經同同事吹水話車仔可能唸縮數
打算用殘非洲兵主力
等佢地1月唔可以踢太公波
結果而家艾辛真係要抖1個月

風水佬呃係十年八年
即管睇下杜奧巴俾肥安用得咁盡
仲有冇得全身而退返國家隊報到

E組利記真係送佛送到西
補時輸埋俾費倫天拿幫對手首名出線
而家紫百合既可以避晒首名出線強隊之餘
有機會同佢地對壘既次名出線球隊又只得拜仁比較難搞
入8強機會都幾高

可憐里昂其實攻守更加平均
不過而家16強對手肯定來自上季西甲前3或者英超3強
洛里斯到時肯定好唔得閒

F組國米有驚無險出線
多得魯賓卡山冇本錢對攻之外
史尼達復出可能先係最關鍵
而佢地雖然次名出線
不過只要抽籤順利仍有力爭入8強
而巴塞近兩場表現回勇
不過防守水準唔穩定可能令佢地往後負上衛冕失敗既代價

最後兩組有史特加以及奧林比亞高斯趕上尾班車
不過都只係踢多兩場16強
而西維爾以及阿仙奴一早出線只因同組對手太弱
佢地16強如果對住幾隊次名出線既名牌
隨時因為本身隱憂而提早下馬

p.s.:
香港搏晒命兼有少少運入到決賽
記得星期六去捧場兼見證傳奇一刻

2009-12-8

近兩日既新聞......

1)
5名西甲球星候選世界足球先生
當中包括美斯,沙維,恩尼斯達,C7
以及因為鼠蹊傷患而提早放聖誕既卡卡

2)
比真歷以及高禾都被傳可能離開里昂
擅長死球既前者成為車路士1500萬鎊既羅致人選
而後者同里昂季尾約滿但仲未達成協議
消息指巴黎聖日耳門準備1月出價搶人

3)
保拿特左膝既傷勢冇預期咁嚴重
不過都要缺陣6至8個星期

4)
格蘭被指想打人情牌向車仔借用比列堤以及史杜歷治
而樸茅亦同保頓爭奪舊將馬華路禾尼
不過當時人表明寧願留隊爭正選

5)
曼聯成為最新一間同蘭洛基亞扯上關係既球會
阿仙奴之前已派球探觀察這名被熱那亞外借去巴里既後衛

而費sir否認羅致迪施高既同時
副手費蘭偏偏暗示曼聯可能引入這名波斯尼亞射手

另一方面,紐卡素準備向佢地續借森遜到季尾

6)
洪都拉斯中堅 O.Chavez 最近到些路迪以及布力般流浪試腳
佢表示希望申請到工作證以加盟後者

7)
幾段阿仙奴既消息......

雲加透露因為雲尼斯特萊以前踢曼聯時同兵工廠積怨好深
所以唔會好似報導咁講向佢招手

而佢亦透露希望1月既增兵目標可以隨即代表球隊出戰歐聯
同日卡頓卡頓高爾以及保贊都同兵工廠扯上關係
似乎前者既傳聞比較可信

而韋舒亞被指係些路迪,格流以及米堡既借用對象
佢就表示只考慮被外借到其他英超球隊

另一方面,路斯基因為鼠蹊傷患而要至少抖1個月

8)
盧森貝高向山度士請辭
佢被指可能接手國際隊

9)
阿祖安奴為法林明高羸得聯賽後暗示可能再去歐洲搵食

10)
比亞堤同普利斯因為加操問題嘈交兼郁手
佢好可能於1月離隊

而L.確特亦再次被傳為爭取出場機會而轉投紐卡素

11)
祖雲達斯準備向巴塞買斷馬田卡斯利斯
佢地亦睇中兩名烏拉圭球員
包括備受利物浦注意既蒙特維多國民隊20歲中場 N.Lodeiro
以及彭拿路20歲右閘 M.Aguirregaray
當中維拉利爾以及國米早前已派球探觀察被稱為新卡富既後者

12)
史特加搵哥羅斯取代巴布

13)
安古路加盟士砵亭後未能適應新環境
只係試過3次正選上陣既佢最終被即時解約
而佢亦隨即宣佈退休

14)
熱刺邀請皇家蘇斯達既龍門列斯高去試腳
而佢地亦考慮羅致贊古保域治去出任高美斯既副手
另外,佢地被指仲想繼續引入前鋒
當中包括洛達列加以及伯爾尼年青人既科特迪瓦年青射手塔比亞

15)
比連奴即將於1月離開拜仁

16)
莫耶斯表示有興趣引入科蘭
而佢地亦打算向韋根出賤價收購季尾約滿既舒亞拿

而派拿仲有年半就同愛華頓約滿
曼城被指想趁佢仲未續約而於1月出價搶人

另一方面,佢地既新星洛維爾令人意外地被指成為皇馬既羅致對象

17)
森多利亞成為最新一間同古迪扯上關係既球會

18)
洛基被指可能於1月離開拉素
不過原因未明

19)
卡坦尼亞準備搵米赫洛域取代 G.Atzori 執教

20)
格流準備同射手保夫萊特續約

21)
車路士再次被指準備於1月收購韋拉作為艾辛以及米基爾既替補

22)
高捷斯基以及甘文斯成為最新兩個同伯明翰扯上關係既球員

23)
富咸被指準備於1月從米堡引入奧尼爾

p.s.:
有中超球隊斟介香港C7以及另一南華隊友
佢地有冇吳偉超當年肯捱既決心先?

2009-12-7

幾場波想講......

1) 曼城對車路士
有邊個會唸到曼城(曉士)竟然會搵車路士反底
雖然所有入波都不明不白
仲要靠基雲神勇撲到林伯既12碼
不過曼城今場波羸在盡量截斷車仔既進攻路線
佢地唔止封住中路
連邊線亦唔放過
令艾殊利高爾以及後備落場既比列堤冇咩機會傳中

而杜奧巴以及安歷卡搞到被迫不時墮後搵波踢
不過前者全場都俾人迫得好緊
而後者上腳太多之餘
亦冇遠射能力
有段時間直情覺得佢隱左形
肥安其中應該一早搵馬路達入替佢加強側擊

車仔今季成日羅賓漢上身
劫富濟貧後聯賽榜形勢又緊張晒
曼聯而家只係追到2分差距
阿仙奴亦數字上重燃爭標希望
令佢地下星期對利記既大戰更加重要

2) 祖雲達斯對國米
雙方都以 4-3-1-2 陣式出擊
不過兩閘都因專心防守而少有助攻
加上雙方重點搶中場
令上半場所有具威脅既攻門幾乎都來自死球
而兩隊都能夠把握對手一次犯錯而各一扯平

下半場國米俾馬治斯奧偷襲得手後
被逐離場既摩連奴應該指示G.巴里斯
先後以巴洛迪利以及文仙尼入替兩名工兵
擺大個頭不過效果一般
就算祖記之後有美路兩黃一紅被逐
都唔見佢地搶到個勢
最後仲技窮到搵久疏戰陣既馬達拉斯落場客串箭頭
咁既進攻模式就算對史篤城都唔慌有運行

3) 拉科魯尼亞對巴塞
整場其實都係中前場幾個進攻球員既表演時間
美斯同埋伊巴都 fit 到爆燈
只係入得3球就因為對手龍門有料到

偏偏佢地羸得算有少少驚險
就明顯同布斯基斯上半場既低級錯誤有關
這個小朋友有技術同埋制空力之餘
亦可踢多個位置而好使好用
不過佢今季上陣時間偏多
冇咩休息既情況下最近表現開始下滑
當而家馬基斯以及耶耶托尼 available
哥迪奧拿應該俾佢稍為休息
對巴塞以及西班牙國家隊都係好事

p.s.:
希望英超以及NBA兩個苦命既實幹派球員保拿特以及奧頓早日康復

2009-12-6

近幾日既新聞......

1)
國際足協公佈世界盃冠軍得主將可獲得超過1800萬英鎊獎金
而佢地亦決定唔會於決賽周增設禁區旁證以及引入高科技幫助執法

2)
艾歷臣由於收唔足人工
所以可能劈炮唔撈

另外,職業球員協會方面證實蘇甘保已經同諾士郡解決合約問題
佢可以於1月自由轉會
消息指佢最有機會加盟紐卡素

3)
利物浦被指打算於1月出價500萬鎊收購厄遜
而拜仁方面否認布興趣引入巴布

4)
幾段曼聯既消息......

柏迪遜方面透露曼聯決定放棄以1000萬鎊既價錢收購18歲小將拿積治
令佢地既財政壓力大增

而曼聯亦再次同迪施高以及紐亞扯上關係
佢地被指同阿仙奴都打算出價收購前者
仲願意用塞爾維亞中場杜錫作為交易條件
而兵工廠就否認這名波斯尼亞箭頭

而佢地亦被指同兩間米蘭球會爭奪莫斯科中央陸軍中場克拉西奇

另一方面,央高斯暗示可能於季尾離隊以爭取出場機會
而馬捷達就續約到2014年

5)
幾段阿仙奴既消息......

雲佩斯手術成功

而辛達路斯表態希望離開阿仙奴
而馬體會就被指願意接貨
韋舒亞就被指成為些路迪既借用對象

另外,佢地收購17歲巴西進攻中場薜斯奴就唔多順利
巴西乙組球會祖雲達斯先後拒絕150萬鎊以及275萬鎊既出價
表明要有500萬鎊先肯放人

另一方面,亨利以及韋拉再次被傳可能重返兵工廠
不過曼城以及里昂都被指係前者既可能落腳地
而馬賽亦有興趣接收後者

6)
加納考慮從未代表意大利出賽既巴洛迪利踢南非世界盃

7)
幾段車路士既消息......

佢地忽然同巴洛迪利扯上關係
而車仔準備繼續吸納年青球員
人選包括安德列治既16歲'新杜奧巴'拉卡古
以及摩納哥既17歲剛果箭頭 T.Makengo

另外,馬體會表示已經再次拒絕另一個收購阿古路既出價
一般估計出價既又係車路士
而國米亦被傳有意接收阿古路
仲願意於1月借用哥利斯馬作為甜頭

而拿玻里,西維爾,華倫西亞以及莫斯科斯巴達都被指有興趣接收施哥夫
不過前者已經否認有關報導

8)
哥迪奧拿被指成為國米以及曼城下季既新教練人選
而傳聞仲話國米會放摩連奴過檔巴塞
不過曼城亦同樣對串王有興趣

9)
拉素被指準備換教練
當中傳聞人選包括米赫洛域,鄧納東尼,文仙尼以及簡連尼

不過文仙尼現時同曼城以及尼日利亞都扯上關係
而簡連尼又因為以前係羅馬球員而唔肯接手
所以現時以米赫洛域既呼聲最高

另一方面,列迪斯馬勢必離隊
佢可能轉投費倫天拿或者兩間米蘭球會

10)
雲達華治被指可能轉投加拉塔沙雷或者漢堡

11)
AC米蘭被指打算向森比斯奧以及加高招手
不過佢地已經否認羅致前者

12)
蘇格蘭足總由於有太多選擇
所以遲遲未決定俾邊個接手
最新一個候選人就係而家教緊烏尼雷亞既彼德斯古

13)
贊高以及卡路爾再次被指成為伯明翰既新箭頭人選
而佢地被指準備同拜仁以及西維爾爭奪麥基迪

14)
幾段紐卡素既消息......

紐卡素被指準備於1月向曼聯收購20歲中場克萊維利
這名英格蘭U-21代表現時以借用形式效力屈福特

而羅拔被指希望以自由身回巢紐記

之前同紐記扯上關係既基加倫就可能轉投侯城或者布力般流浪

另一方面,荷西安歷基以及高路仙尼都表態留隊

15)
同京治續約兩年既熱刺被指打算出價700萬鎊收購國際隊中場辛祖
而佢地繼續同幾名本土龍門扯上關係
當中包括占士,賓科士打以及史葛連治

16)
韋斯咸被指有優先權引入東尼

17)
樸茨茅夫再有球員欠薪醜聞
不過己於尋晚鬥般尼之前解決
而格蘭亦會要求資金俾佢1月增兵以及續借奧哈拉到季尾

另一方面,烏達卡可能以借用形式加盟些路迪
不過卡保爾就否認轉投里爾既傳聞

18)
森林被指準備買斷索尼以及從熱刺回購戴臣

19)
艾列頓加盟德國第6級聯賽球會烏汀根

20)
米堡被指打算買斷傑臣

21)
李察胡禮因傷要休息4個月

22)
狼隊被指打算於1月引入碧福特或者侯斯去改善攻力

23)
朗奴高文被阿爾克馬爾開除

24)
蘇斯達被指有興趣重返薩雷斯
佢於01-03年曾經執教這支升班馬

25)
森多利亞以及熱那亞都被傳準備從費倫天拿接收辛坦拿

26)
基沙哥夫可能重返辛尼特

27)
卡路士落實加盟哥連泰斯
雙方簽約兩年

28)
阿士東維拉被傳打算於1月出價250萬鎊收購賓納特
不過當時人就表示唔唸住離開薩拉戈薩

而希斯基就可能轉投新特蘭

2009-12-5

想初步講下世界盃既分組形勢

未抽籤已爆出陰謀論
有傳聞法國唔被列入種子係柏天尼出招
條件係法國唔會被編入死亡之組之餘
明目張膽二段手球既亨利最終亦唔會俾國際足協抽後算帳
而家傳聞過左頭關
即管睇下cheap精會有咩下場

法蘭西人渣雖然好命過葡萄牙
不過唔代表身處A組既佢地會有好日子過

南非雖然牌面最弱
但有主場之利兼有彭利拿領軍
只要維持到洲際國家盃時既防守水準
再改善埋入球能力
入16強有咩咁奇

墨西哥近年都可以衝出分組賽
艾古爾重返國家隊後亦於短時間內撥亂返正
不容忽視

法國既命運就要睇列貝利
不過近季持續傷患
如果佢有咩冬瓜豆腐
法國隨時步02年因為冇左施丹而首圈出局既後塵
當然隊波俾杜明尼治話事就仲衰多幾錢重

烏拉圭係小弟最睇淡既A組球隊
人腳唔差既佢地攻強守弱
不過入波多亦只因南美對手好少死守
佢地破密集既能力其實亦只係一般

而泰巴里斯越教越沉又係令人失望
如果佢地踢唔返07年美洲國家盃既水準
應該會首圈出局

B組阿根廷既運氣就比上不足,比下有餘
不過最重要都係睇老馬教成點
如果佢又忽然亂點鴛鴦就對邊隊都死

同組最強對手應該係同文仙尼扯上關係既尼日利亞
不過超霸鷹整體戰鬥力同球星數目唔成正比
仲要驚佢地因財失義兼玩內訌
不過初步睇出線16強應該冇咩問題

而南韓冇左軒迪克已經同奇蹟絕緣
另一隊希臘識守唔識攻亦好難偷雞

C組既英格蘭就抽到上上籤
美國於洲際國家盃既表現亦令人對佢地刮目相看
初步睇有力出線

小弟對阿爾及利亞認識好少
只知佢地陣中有幾個氣袋
佢地有半個主場之利
不過人腳就靠比夏積,保查拉,卡斯奧,麥尼以及耶巴達等二流外流球員撐場
未必可以同美國爭次名
當中後兩者係法國當年羸U-17既成員
似乎係球隊中場攻守既主力

斯洛交尼亞雖然爆冷ko俄羅斯
不過或多或少係因為對手自毀長城
論實力佢地只係一般

D組德國就幾難踢
同組加納,塞爾維亞以及澳洲都幾硬淨
只要後防唔好發瘟
日耳曼應該可以靠經驗同埋穩定性出線
不過可唔可以首名就要問過加納

加納吸取06年既經驗後
以佢地現時於非洲僅次於科突迪瓦既實力
今次目標隨時係直指8強

同黑山拆夥後首次參賽既塞爾維亞以及冇左軒迪克既澳洲
本身人腳唔差但抽籤唔好彩
不過前者應該冇06年出局得咁肉酸

E組方面既荷蘭就抽到好籤
同組對手只係喀麥隆,丹麥以及日本
首名出線機會幾高
而前線可能冇殺手既影響應該唔會咁快於分組賽浮現
不過雲馬維克鎮唔鎮得住班球員就令小弟懷疑

喀麥隆既情況同尼日利亞相若
而半個主場之利有助佢地壓過丹麥出線

丹麥本身實而不華
要羸防守唔差既佢地絕對唔易
不過計牌面始終唔似入到16強

而備戰超積極既日本又係衰抽籤
不過佢地已經係亞洲4隊球隊當中最有機會帶來驚喜既一隊

F組既意大利又係抽到好籤
同組只有巴拉圭俾到佢地少少威脅
斯洛戈克去到南非已係超額完成
單靠史基泰爾以及咸錫唔足以創造奇蹟
而新西蘭就更加係強隊點心
唔好話要佢地攞分
入到波都算佢地叻

G組既森巴兵出線難度唔大
而鄧加提前宣佈世界盃後離隊唔會影響佢地出線分組賽
但應該對佢地既爭標機會有負面影響
而佢地可唔可以首名出線就真係要問過科突迪瓦

大象繼06年後再次身陷死亡之組
不過累積經驗後既佢地近年實力勁左好多
今次又有半個主場之利
單靠杜奧巴屈機都已經勁過好多名牌球隊
入8強相信會係佢地既最低要求
點睇佢地都強過名大於實既葡萄牙

而之前聽過金正日落左 order 只可以報喜不報憂
睇怕北韓國民都冇可能聽到南非世界盃既任何消息

H組既西班牙條籤同英格蘭一樣咁正
出線十拿九穩
吸引小弟既係迪保基斯點樣同比爾沙以及迪保基斯過招
以及另一個席位花落誰家

外圍賽表現不俗既智利應該最有機會爭次名
幾個07年世青盃代表俾比爾沙徵召入國家隊後
佢地而家既攻擊力雖然及唔上98年既一隊
不過防守有改善令整體戰鬥力更勝當年
當中維迪同埋H.蘇亞素仲等住上位

而軒斯菲特接手瑞士一段時間後
球隊既表現終於似返樣
不過入球能力始終一般
而後面又有佐羅長抖
計牌面略為不及智利

至於洪都拉斯雖然被外界形容為另一魚腩
不過佢地衰極都有柏拉斯奧斯以及蘇亞素兩件星級球員
想唔俾人睇死就要靠費古羅亞,里安,J.柏拉斯奧斯,柏雲以及哥士利幫下手
不過後兩者去到世界盃大舞台仲可唔可以入咁多波就好成疑問

2009-12-3

想講下近兩晚既聯賽盃8強
曼城,維拉以及熱刺都強陣出擊
皆因入前4好高難度
就算前6都唔係坐定粒六
搏聯賽盃換歐霸盃參賽資格既心態唔難理解
當中熱刺踢得唔算踢得特別差而輸俾吉遜兩腳中距離射門
又難怪哈利烈納嬲到唔肯去記招

至於樸茅同埋布力般流浪
兩隊掛住護級都依然有唔失禮既人腳
大抵只係因為板凳深度不足
爭勝決心有幾強真係心照
但後者咁都搞掂車仔
就多得車仔防線讓齊車馬炮兼踢少個

其實最想講既係3隊 Big 4 既牛奶仔
曼聯方面近年再次重視青訓
吉遜俾人捧佢係新堅尼既同時
更快跑出既其實可能係奧巴坦或者馬捷達

而向來都好難留意到車仔既青訓成果
泰利之後近10年都冇一個新仔上到位
稍有名氣既幾個都只係知佢地被外借吸取經驗
而家車仔為左羅致古度達搞到一身蟻
而肥安同埋泰利都先後開聲撐佢
段估佢唔係名大於實既二打六
希望之後睇到尋晚射失12碼既佢會有特別 sharp 既表現

而兵工廠用左半隊小兵
命運就同幾日前輸俾車仔相似
又係輸在搓唔入對手腹地之餘
跟手俾人幾次攻勢就搞掂
近3場就咁食左7隻蛋
雲加賽後仲嬲到好冇風度咁唔肯同曉士握手

兵工廠由大人到細路既風格都一脈相承
致命傷當然亦類同
雲加如果唔想再咁激心
真係有必要搵個可以開路既箭頭之餘
亦可能要花更多時間為中後場增兵

雲加賽前透露考慮1月增兵
不過大抵傳媒已經知佢增兵向來頭重尾輕
今日既生果報列左5個可能替補雲佩斯既人選
包括查馬克,巴洛迪利,柏仙尼,雲佬以及基格納

不過小弟認為各有難度
波爾多同埋國米好難放走前者
柏仙尼於世界盃前唔似會願意轉戰英超
雲佬其實係小弟覺得以上5人之中最好既選擇
偏偏佢又表態心儀利記
而基格納聽落最有機會
不過都有祖雲達斯同兵工廠爭過

其實英超前列對手有好多岩用既貨色
包括杜奧巴,卡維,希斯基,迪辛圖,祖奧以及辛達告魯斯
不過當然唔會有人蠢到俾把刀搵人插死自己

而法比安奴同埋侯克兩名巴西射手聽落亦岩用
但價錢亦好貴
後者冇咩名氣都要4000萬歐元就更加好過去搶

不過唔好失望
因為小弟依然有幾個誠意推介:
亨特拉爾同埋東尼既然唔受AC米蘭以及拜仁重用
不如轉戰英超搏多次以保住國家隊席位
而普格恩洛克同埋古爾沙轉會後都死晒火
前者去兵工廠可以同艾沙維再次合作
後者亦可以搏表現打動保斯基斯
最後一個推介係上季踢韋根既臭馬薩基
佢上季季初踢到曉飛
算係有往績支持

另一方面,小弟覺得雲加仲有幾樣嘢可以做
一係與其要艾沙維心事重重咁踢波
不如俾佢放假散心

二係唔好將所以增兵資源撥俾前線
因為桑治同埋迪亞比既進步比預期差
中堅替補又只得辛達路斯以及豬維豬達
加高,梅斯達,保臣,費文尼,韋拉,馬真拿同埋馬杜奴都應該有得唸
就算買唔到人都不妨考慮俾機會伊保爾
佢以前踢比華倫既時候都先後踢過中堅以及防中

三係雲加幾季前靠 4-5-1 陣式玩殘 Big 4 隊手
而今季就多用 4-3-3 陣式
兩個陣式只係數字遊戲
不過前者有利防守之餘
亦令兵工廠有較多空位打突擊
雲加大可考慮調整陣式

p.s.:
港隊反底好驚喜咁羸左水貨高麗兵4:1
yeah!

2009-12-2

近幾日既新聞......

1)
美斯成為今年歐洲足球先生
得分率仲破埋柏天尼1984年當選時閎紀錄
第2至第10就有C7,沙維,思尼斯達,伊度奧,
卡卡,伊巴謙莫域,朗尼,杜奧巴以及謝拉特

2)
白禮達表示唔會俾愛爾蘭以外咭參加踢世盃
佢亦透露可能於世界盃期間增設禁區旁證
另一方面,佢為左同亨利辯護而話球証先係最錯

3)
消息指阿古路即將於1月加盟車路士
轉會費連 add on 高達5000萬鎊
而車仔預算球王準女婿既合約總值5000萬鎊
當中最後一年既週薪仲高達25萬鎊
不過當時人就表態願意留隊

另一方面,車仔就否認斟酌柏辛尼

4)
消息指一旦國米分組賽出局
莫拉堤寧願俾4200萬歐元解約金都要同摩連奴解約
而賓尼迪斯以及白蘭斯就被傳成為新教練人選

同時間串王亦同利物浦以及曼城扯上關係
同上月利記以及國米互換教頭既傳聞吻合

5)
曼城7連和後曉士下台壓力超大
除左摩連奴外
文仙尼以及軒迪克都被指可能接手

而曉士表明唔會於1月放棄米卡李察士
曼聯,熱刺以及維拉都被指有興趣引入這名本土後衛
而曼城就被指準備於1月收購托利斯,雲達韋爾,柏洛迪,列貝利以及加度素
當中車路士亦同後兩者扯上關係
(所有轉會到時應該唔會關佢事!......)

6)
幾段利物浦既新聞......

奇連士文暗示有興趣接手利記

而賓尼迪斯表示奧利里奧拒絕續約
對於羅致科蘭既傳聞
佢只表示球會要賣人套現先有本事增兵
同日拜仁就被指可能以先借後買既形式引入巴布
轉會費約900萬鎊

7)
雲佩斯因為足踝韌帶斷左而要再抖多4至5個月
而阿仙奴隨即再次同查馬克扯上關係
不過波爾多已經表明唔會放人

8)
祖雲達斯表明唔會炒費拉拿

9)
紐卡素再有球員被傳成為英超球會既挖角對象
保頓,韋根以及布力般流浪先後同路蘭扯上關係
而莫耶斯就繼續被指打算引入辣椒仔

至於一直搵唔岩左閘既新特蘭就被傳想收購荷西安歷基
仲願意用李察遜作為交易籌碼

另一方面,維杜卡離開紐記後終於決定加盟墨爾本夏德

10)
AC米蘭被指可能以亨特拉爾加現金同禾堡交換迪施高

11)
華倫西亞再次被傳賣韋拿減債

12)
恩尼斯達以及馬基斯分別同巴塞續約到2015以及2012年
前者既贖身費仲高達2億歐元

13)
費sir否認出售蘭尼既同時
曼聯亦忽然同古迪以及森本貴幸扯上關係

14)
漢尼斯接替碧根鮑華擔任拜仁主席
而後者就轉任球會名譽會長
拜仁出年8月仲會將同皇馬既友賽作為佢既卸任紀念賽

另一方面,佢地下季會從利華古遜回收卻奧斯

15)
隨住鶴臣落實留隊
漢基蘭亦決定同富咸續約3年半
另一方面,高捷斯基被指成為新特蘭既新左閘人選

16)
熱刺被指考慮於1月收購厄遜以及科特迪瓦射手杜比亞
當中曉頓會成為前者既交易條件

而柏夫奴真高視羅馬為轉會首選
另外,巴塞忽然令人意外地同迪科爾扯上關係

17)
韋斯咸方面表明唔會以低於500萬鎊既價錢出售格連
而卡頓高爾就要養傷4個月

18)
消息指德乙以及更低級別既60場聯賽涉嫌有球員打假波

19)
上海申花被指想搵巴拉斯域執教

20)
加高可能以借用身份重返小保加

21)
普雷斯頓既愛爾蘭後衛艾迪路蘭被指成為狼隊1月既增兵對象

2009-12-1

想講下英超 Big 4 既比賽......

格蘭兩次接手英超球會既第一場都係對曼聯
都算佢黑仔

樸茅表現有改善
計攻門同埋中框次數都多過曼聯
上半場仲針對加利仔既右路重點出擊
亦睇得出格蘭有花過心思
最終都要大敗就由於實力上始終有差距
以及古斯錫有超水準演出

雖然而家分數仲係個位數
不過同其他護級對手既距離其實唔遠
今季英超護級形勢同上季一樣咁亂

一早搞掂歐聯分組賽既曼聯已經開左 turbo 搶分
歷史話俾我地知由12月頭到2月中既歐聯休賽期間
係曼聯爭聯賽既最關鍵時間
不過後防既傷兵問題就係佢地既最中隱憂

而利物浦市打呲
就再次係好波不及好運好既例子
耶保一次唔好彩加一次失誤就令愛華頓輸左兩球
講表現愛華頓明顯好過利記
幾個中場除左比耶烈甸洛夫外個個都好有好表現
利記根本搶唔羸中場
如果唔係拉爾拿有運兼反應快
利記唔可能攞晒3分

而一心唸住阿仙奴為已為人會令車路士失分
點知6分波大戰既結果衰到貼地
車路士仲零失球完成橫掃 Big 4 首循環小聯賽既創舉

雲加怨艾沙維被罰詐糊係比賽關鍵只係轉移視線
場波令小弟唸起早前巴林點樣輸俾新西蘭
兵工廠就好似巴林咁只係不斷傳來傳去
去到危險地帶就俾對手成功解圍
全場於車仔禁區內既攻門少之又少

另一方面,雲加本身都要負上一定責任
之前講過佢過份集中用班正選
結果正選踢到殘晒之餘
後備就雪到硬晒

眼前所見車路士既體力優勢比平時更大
而無論伊度亞度達施華抑或卡路士韋拿
都令小弟覺得佢地冇表現係狀態問題大於質素問題

另一方面,兵工廠今季改踢 4-5-1 陣式
左右兩邊既球員有時過份進取
令中場有少少唔夠人用既感覺
偏偏艾沙維以及拿斯尼都唔夠狀態
前者仲未從俄羅斯絕緣南非世界盃既陰影走返出來
長抖後既後者就根本未上晒力
而佢俾到艾殊利高爾既威脅有限
造就倒戈既 Cashley 有兩次助攻

p.s.:
車路士冇錯係英超頂頭大熱
不過佢地有非洲國家盃既不利因素
而曼聯以及阿仙奴失多車路士5分以及8分
如果'雙紅'於歐聯淘汰賽前既聯賽有料到
依然有力威脅車仔
而1月既雙紅會應該係雙方繼03/04年球季後近年聯賽最重要既對壘