想講歐聯......
最估唔到都係A組既祖記主場仆直
同幾日前羸國米簡直係兩隊波
主場都俾拜仁搓住踢
當中一對巴西中場屎到阿媽都唔應得
不過費拉拿都要負好大責任
半場和波使咩用保臣入替迪比亞路轉踢 4-5-1
係換都搵兩個巴西仔開刀啦
而今時今日既祖記根本冇死守本錢
防線畏高對住勁多高佬既拜仁就更加係等死
B組方面
禾堡組織攻勢唔差但埋門把握幾差
遇上再有料到既古斯錫以及唔識判12碼既球証
只得1個入球唔能夠真實反應禾堡既攻力
而後面失頭兩球又好離譜咁走空晒奧雲
令全場只得4次攻門中框既曼聯都可以靠奧雲既大三元羸波
亦令得到歐洲足協額外開恩既中央陸軍成為最終得益者
C組方面
AC米蘭真係吹到你啤一聲
兩鬥皇馬以及作客馬賽既3場硬仗可以有7分落袋
其餘3場易食既竟然反而只係攞得兩分
最終獲贈4分既魚腩蘇黎世仲係佢地劫富濟貧既得益者
抵佢地冇得首名出線
不過海鮮波既佢地又唔知幾時嚇你一驚
而皇馬雖然首名出線
不過後防咁雞遲早出事
D組方面
最想講只係車仔既用人策略
好耐之前已經同同事吹水話車仔可能唸縮數
打算用殘非洲兵主力
等佢地1月唔可以踢太公波
結果而家艾辛真係要抖1個月
風水佬呃係十年八年
即管睇下杜奧巴俾肥安用得咁盡
仲有冇得全身而退返國家隊報到
E組利記真係送佛送到西
補時輸埋俾費倫天拿幫對手首名出線
而家紫百合既可以避晒首名出線強隊之餘
有機會同佢地對壘既次名出線球隊又只得拜仁比較難搞
入8強機會都幾高
可憐里昂其實攻守更加平均
不過而家16強對手肯定來自上季西甲前3或者英超3強
洛里斯到時肯定好唔得閒
F組國米有驚無險出線
多得魯賓卡山冇本錢對攻之外
史尼達復出可能先係最關鍵
而佢地雖然次名出線
不過只要抽籤順利仍有力爭入8強
而巴塞近兩場表現回勇
不過防守水準唔穩定可能令佢地往後負上衛冕失敗既代價
最後兩組有史特加以及奧林比亞高斯趕上尾班車
不過都只係踢多兩場16強
而西維爾以及阿仙奴一早出線只因同組對手太弱
佢地16強如果對住幾隊次名出線既名牌
隨時因為本身隱憂而提早下馬
p.s.:
香港搏晒命兼有少少運入到決賽
記得星期六去捧場兼見證傳奇一刻
4 comments:
小弟有入場睇頭場
時間關係，尾場真係睇唔到了
太夜，訓教先
聽晚再交功課
To: 舒利亞
小弟同你相反
因為返工而冇得睇頭場
但就返屋企睇左尾場
好，講下首次入大球場睇波感受
入場時已經就開波
一開始睇到唔係太多人入場
不過到半場已經好多
但估唔到最後都係得九千幾人(有d懷疑)
講番場波
就算唔識波既
都會睇到日本球員個人質素
高過南韓唔少
小弟完全唔知佢地咩名
所以就記號碼算
日本20號較比到小弟印象
唔記得有無入波
不過見到幾次個人突破殺入禁區
頭幾分鐘已經睇到日本佔優
果然九分鐘到就已經入波
印象中人地解圍失誤
但解圍前日本組織既攻勢又真係幾靚
其實成場日本組織都真係唔錯
可能南韓法定時間逼和到日本
靠既只係拼搏
不過我個人真係唔多like日本
成場波真係見到佢地唔少係無體育精神表現
開波無耐已經有一次見到對面球員訓左係地
都唔踢出界，仲進攻
要球證吹停比賽
又成日鬆爭、插水
現場球迷都試過一齊噓日本佬
南韓好彩無耐就憑罰球吹番
現場睇其實有少少運
龍門判斷錯誤加俾人阻阻視線
加上射果條友其實有d半傳半射感覺
及時追番既南韓唔洗俾人禁住打
雖然唔算五五波
總算互有攻守
一直到完場90分鐘都無咩大改變
呢個時候講講龍門
兩面龍門開死球都唔算太好
特別係南韓果位
生波死波都成日送俾人
不過撲救真係合格有多
特別係南韓門將金敏圭
南韓法定時間唔洗輸佢有好大功勞
不過到加時抽筋後
佢明顯受到影響
加時最後失果球出迎慢左亦反映呢個事實
不過講真
球波要小既
應該係南韓個後衛
明明食住哂身位
可以被人輕鬆爆過再攞波
仲想講南韓班球員
搏真係搏
有球反擊
個球員真係由自己半場搏哂命帶個波一路跑
只係最後獨食少少
不過佢地好多時唔識大腳解圍
甚至係心臟地帶慢慢控定個波先傳俾隊友
幾次俾到日本偷波
講完場波再講感受
第一次入場真係好興奮
雖然無港隊
但果種氣氛真係難以解釋
最感動係南韓輸左後
依然成場球迷起立比掌聲
當港隊入場
更加唔洗講
聽日決賽
未必買到飛
不過都想搏下有無臨時飛
To: 舒利亞
1)
詳細既賽後報告
謝!
2)
日本小朋友印象中質素係高過A貨南韓仔
活力亦羸晒
不過南韓仔對日本同埋北韓
永遠比平時更搏命
3)
你講既20號叫永井謙佑
而21號既大迫勇也就似乎名氣最大
4)
南韓個龍門算不過不失
不過其實點衰都好過陣中另一個龍門
條友對香港既時候兜口兜面交個波俾C7
5)
尋晚既入場人數真係唔夠9500人
不過原來票房係賣左16000張飛
即係有6500張飛浪費左
應該係馬會或者李x基同賽會包左飛
路邊社消息話聽日有更多波飛俾人包左底
偏偏而家超多人撲緊飛
真係吹到啤一聲
6)
決賽波飛已經賣晒
不過依然有些微機會撲飛
方法1:
有於紅館同埋大球場做兼職既善心人教路
賣俾傷殘人士既飛其實可能未賣晒
這種門票之前係唔會咁樣賣俾我地
不過比賽或者活動當日(即係今日)
十點開始就可能有得當正價飛咁買
你即管試下打29228285
或者親身去票務處
睇下有冇運行
平時如果演唱會或者文娛活動撲唔到飛
識門路既人都係靠咁樣先有得睇
方法2:
當然係買黃牛
不過去正門搵未必有
因為太多差佬令佢地好難賣飛
反而你走去南華會附近可能有運行
小弟以前睇回歸盃都係咁樣買飛
之後仲幫個澳洲遊客搵多張
小弟聽日有事入唔到場
祝你好運!
Post a Comment