想講幾場英超以及英冠東北部6分波打呲
先講英超 Big 4
預左利記作客樸茅會失分而回
畢竟成隊波都死氣沉沉
而後防根本輸到失失慌
4人防線既最後一個正常人格連莊臣亦連續爆鑊
或多或少同上場輸俾兵工廠之後失左信心有關
馬斯查蘭奴既停賽兼受傷就絕對係雪上加霜
令球隊連1分都保唔住
而曼聯作客輸0-3俾富咸
小弟覺得既然後防咁唔齊腳
費sir應該執靚中前場以攻為守
邊可能用年老力衰既史高斯
兩年前就算一腳射死巴塞
小弟都依然認為佢係球隊既負資產
活力嚴重不足既之前就經常明知故犯 late tackle 補數
今次俾梅菲偷波就衰到連犯規都趕唔切
而球隊既集中力亦好有問題
下半場由開始到失波既廿幾秒
睇直播見到有部份球員連位都未企好
車路士既表現就已經有改善
不過遇上表現更好既韋斯咸
失分都係非戰之罪
槌仔幫今場既表現可以話係本季 so far 最好既一場
攞唔晒3分只因球証罰錯左厄遜
而柏加更係今場最搶鏡既球員
600萬鎊既身價絕對值得賓帥考慮佢
阿仙奴主場打虎
因為對手質素低唔止一班兼中場攔截不足
不過施維斯達幾乎次次都爆鑊
雲加都依然咁重用佢
就好令小弟費解
另一方面,小弟雖然冇睇狼隊
不過都撐佢地羸般尼攞3分
以前亦有護級球隊選擇某些場次重點出擊
不過就冇麥卡菲做得咁徹底
侯城,史篤城以及般尼亦有兵源不足既問題
或可以考慮效法狼隊
而狼隊選擇性出擊既策略就可能係佢地護級既最大本錢
最後想講英冠東北部打呲
紐記係羸波而回
數據亦顯示佢地形勢比較佔優
不過其實遇上唔少阻力
而紐記羸波既另一收穫就係艾美奧比復出踢正選
佢夾希活既火力應該會唔差
兩個既二傳能力都唔錯
不過前題當然係兩邊側擊仲要做得更好
而平時冇特別留意米堡
只知史特根接手之後戰績仲衰過修夫基
不過季中接手確係有難度
不過佢幾次借人既決定好正路
只要之後成功收購聖列加或者搵到替補
戰鬥力依然不容忽視
頭兩名直接升班雖然一定唔關佢地事
不過佢地而家雖然衰到去14位
不過同第6位既李斯特城其實只係差4分
附加賽資格最終應該走唔甩
Subscribe to:
Post Comments (Atom)
4 comments:
小弟都睇左車仔同利記兩場波
見到利記踢成咁真係幾失望
加歷查已經唔止一次醫院波同埋係後場失波
另一中路守將亦唔見得好(應該唔係史基泰爾，係咪艾加??)
隊長又持續態沉
王子一個又真係無力做到救世主
好少睇車仔
可能今場咁岩對手打出水準
小弟特別留意柏加
無見一排
仍然搏命
加上又護到空門
倒戈總算俾到舊東家一個下馬威
應該算係今場既mvp
始終車仔成隊無個突出
雖然佔優但攻勢無咩睇頭
十二碼亦只係呃番來
不過今場球證就好有問題
判錯十二碼唔再講
林柏特射三次就更加離譜
第一、二次你要話有車仔球員衝入禁區先無問題
不過第三次照有人一早衝入禁區
點解你又唔吹?
所以小弟覺得何輝講得岩
至於紐記東北打比
因為番左大陸加出街
到番到大陸屋企只能睇到車仔
因為大陸都好似無直播英冠??
不過贏波當然開心
雖然又係帶少少運
不過三分比一切都重要
希望希亞活至少可續借到季尾
因為佢拍艾美奧比真係幾大威脅
今場就係兩人入哂兩球
同時都唔該比多d機會Ranger
行過7-11成日見到成報頭版大字標題關於楊生既伯明翰九場不敗,
自己好少睇伯明翰既比賽,
佢地突然咁順風順水,
自己都有些好奇,
究竟佢地隊波既戰鬥力為何突然升呢?
我都有睇曼聯及利記兩場波
基本上兩隊都踢唔出水準,
曼聯防中幫唔到後防
用史高斯及安達臣等如不設防
相反傑遜叫做幾勤力
而家曼聯過份倚賴傑斯既後遺症終於顯現出來
利記既恩梳亞係比較弱既一環,
謝拉特都仲係好沈,
盧卡斯利華又係好似隱形,
班拿約後備入替都係冇表現
成場波最勤力及比較好既球員可能只係古治
難道利記真係要等阿古蘭尼去拯救球隊?
二千萬磅既佢究竟仲要傷幾耐真係好似冇人知
而家利記仲有邊d後備殺手可用得著?
曼聯後防缺人
令我比較擔心係佢地1月會召回simpson,
而家我地後防都係唔夠人用
紐記vs米堡場波,
明顯係靠質素取勝
基本上紐記掌控左整場比賽既節奏
見到米堡仲有半隊英超班底
但就力有不逮
見到紐記VS米堡場波叫英冠直播
相反隔離台既狼隊VS般尼場波就叫英超直播
心想只要看入場人數是4萬9千幾人
應該掉番轉就差唔多....
紐記而家想用古迪利斯/安歷基及古費里/森遜做兩翼側擊基本上係無效,
古迪利斯依舊底線傳底
佢既作用可能只係同人地後衛鬥快跑去底線,
然後等安歷基及NOLAN後上助攻及傳中,
但安歷基D傳中準繩度依舊得啖笑
右面既古費里助攻就唔錯,
但好似唔係翼鋒既材料,
森遜既防守能力好過以前既BEYE,
但後上助攻就好一般
而R.TAYLOR,與及已經冇在後備名單出現好耐既謝列美,
打法同古費里都差不多,
正如小黑所言
曉頓真係不妨多重用彭卡迪,
等佢同隊友夾熟D..
因此紐記兩翼既問題在可見既今季
我估應該係解決唔到了....
睇左差不多10場紐記在英冠既直播賽事,
基本上英冠球隊既比賽節奏,身體對抗性及壓迫性,
都同英超有一段距離,
紐記憑質素較高英超班底去踢英冠,
就算好幾場在主場及作客比賽踢得唔好,
都仍然可以WIN及和,
以致紐記從隊型,打汰及個別位置上缺人,
由上季至今遺留下來既問題在英冠浮現出來
記憶中好似只係有一場作客對森林既比賽
森林用比較快速及壓迫性既打法去應付紐記
紐記就完全處於被動及下風,
組織唔到攻勢
立刻就把紐記變回同上在英超既一樣
所以真係好期待1月份足總盃WIN左普利茅夫
然後抽籤對英超球隊
去重新檢視球隊既問題...
更正以下幾句
以致紐記無論從隊型,進攻組織上的單調及個別位置上缺人等,
由上季至今遺留下來既問題均好少在英冠既賽事上浮現出來...
To: 舒利亞 & sammysir
1)
對樸茅場波
加歷查既拍檔係艾加
而防線既主要弱點又豈止恩梳亞一個
而 sammysir 提及既古治真係可能只係一支太陽能電筒
要有其他人發光發熱佢先會著
基本上成隊波只有拉爾拿係最有狀態
皆因成日俾人練靶
想唔 fit 都難
2)
如果只係600萬鎊就買到柏加
賓尼迪斯真係應該唸唸佢
因為盧卡斯利華繼續隱形
而玻璃王子阿古蘭尼又有新傷患
另外,利記陣中短期內唔似有新星可以乘機上位
都係等謝拉特,托利斯,班拿約以及尼亞拿回勇
3)
球証係罰錯槌仔幫12碼
不過印象中佢要林伯特射3次12碼就冇做錯
印象中頭兩次射入都有車仔球員早左衝左入禁區
所以入都要重射
如果唔入仲冇得重射
(不過如果係槌仔幫球員早左衝左入禁區
咁就唔入都有得重射)
第3次主射既時候
由於再冇車仔球員犯規
所以林伯特入既12碼係唔使重射
4)
成報既名譽主席就係楊先生
所以佢地重點報導伯明翰
不過只係永遠有讚冇彈既喉舌
5)
伯明翰9場不敗既原因有幾個:
一係對賽球隊只有態沉既利記係強隊
二係佢地防守好好
除左左閘位有隱憂外
由防中到龍門以及其他後衛全部都將勤補拙
令佢地成日都可以滾魚生粥
三係中前場幾個球員輪流交功課
當中保耶既表現仲可能係繼00-01年球季後最高既水準
6)
費sir有時既排陣真係好有問題
今場又係好例子
而老早睇死過份倚賴傑斯只係死路一條
7)
曼聯既傷兵問題應該會於1月有好轉
加上就算森遜回歸
佢既排名一定後過布朗,加利佬同埋森巴細孖
小弟估費sir唔似會收返佢
8)
小弟唔否認紐記主場羸波係因為質素比較高
事實上紐記主要冇左奧雲,馬田斯以及比耶
對戰鬥力既影響邊有米堡冇左端基,唐寧以及侯夫咁大鑊
不過小弟始終覺得紐記羸得有少少運
畢竟兩個關鍵判決都係有利於主隊紐記
9)
小弟上年已經講
一對球隊冇創造力或者冇本錢中路靠質素硬闖唔使死
簡單分到兩邊再傳中已經有威力
紐記側擊比上季已算有進步
不過仲未算好理想
小弟 prefer 古迪利斯於左路同荷西安歷基合作
因為同聲同氣默契亦唔差
而右路可以既話就唔好用古費里
對強隊用佢多個跑腿冇所謂
不過佢本身助攻能力好一般
無論傳送以及埋門都唔係佢既強項
同佢倒不如用賴恩泰萊踢右中場
佢雖然冇速度但斬波落點幾靚
亦可以開條私家路俾森遜後上
事實上速度唔差既森遜擅長後上助攻
佢於紐記冇咩機會發揮專長
可能因為曉頓要佢專注防守
或者同中場既配合有問題
10)
蘭加一定有出場機會
因為陣中其餘5個前鋒冇一個特別少傷患
11)
紐記既表現其實係好過上季
或多或少因為士氣好左而每人走多步
sammysir 提及可能只係因為英冠比賽質素比較低
令紐記冇暴露咁多弱點
小弟某程度同意
小弟都同意英冠球隊無論於技術,戰術,速度以及體力都有不足既地方
當中最大分別係埋門一腳
這或多或少同英冠球員控球能力比較差有關
佢地第一控球做得唔好
自然影響之後攻門既動作
紐記今季好多場由輸變和,甚至袋晒3分
唔應該話全係好運
而應該話係羸在埋門一腳
p.s.:
今次大家都好多 comment
Post a Comment