因為報左考試而入唔到場睇波
最終趕到去茶餐廳睇波兼食飯已經係加時階段
從未見過香港隊咁有鬥心
筋疲力竭都咬住對手唔放
從來冇唸過自己會一條友坐茶餐廳眼濕濕睇波
香港再次羸12碼就又係靠晒葉鴻輝
佢雖然冇C7咁紅咁多人識
但佢先係今次賽事香港隊既最大發現
神貓如果再唔生性
隨時俾佢搶埋香港隊既正選席位
睇返錄影覺得對手日本U-20既質素唔算太高
不過平均技術依然比香港好
香港靠既除左主場之利
就只有靠鬥志搭夠
香港上半場發揮只係一般
前線冇左C7就好似冇左進攻重心
連郭建邦都好似隱左形
而神之子既表現又持續低沉
中前場只有徐德帥比較似樣
當然下半場C7後備落場又係另一種情況
條友雖然串串貢
不過威力又係而家本地波最好
希望佢之後可以做得更好
香港今次反高潮羸左東亞運
含金量更勝其他項目
雖然有人又會話其他4隊主要對手都貨不對辦
不過如果香港班友唔搏命
人地派少年隊或者業餘隊我哋都唔使旨意羸
從來對本地波冇特別高既期望
畢竟同亞洲一線球隊既差距幾大
唔可能要佢地一覺醒來就追到人地嘔心瀝血先去到既級數
只係希望佢地搏盡去踢
睇波既見佢地輸都會唔開心
佢地千祈唔好輸左都覺得冇咩所謂
早前知道有人俾日本大炒都覺得冇咩所謂就梗係失望
聽到有人集宿同埋操練唔認真亦會好扯火
小弟信班友今次之後會意識到
只要佢地肯拼肯搏就會有人繼續支持佢地
本地波只要有 heart 就唔係垃圾
成班狗官撐場攞彩後
唔該真係憑良心增加資源
訓練場地以及具體發展計劃絕對唔少得
香港可能n年後都羸唔到世界盃
不過都應該得到重視
畢竟足球仍然係本地最多人留意既體育運動
10 comments:
小弟都只能趕番屋企睇
只能睇下半場
仲要睇唔到入球
不過依然好興奮
好耐未試過睇港隊咁緊張
因為真係同人地有得打
又見到班球員有heart
唔單止贏十二碼靠葉鴻輝
法定時間內佢表現都係無得頂
當然C7下半場入替後又係掂
連帶其他球員都生哂
最明顯就係郭建邦
至於神之子
睇到佢係有料有天份
不過做左隊長明顯壓力大
水準真係唔多穩定
希望佢心理質素會做得更好
小弟最想講既係
如果香港人平時都可以咁支持香港足球
真係咩都唔洗憂了
琴晚黃展鴻入埋最後一球十二碼
小弟真係聽到小弟住果條line既人全部大喊
當然包括小弟
小弟相信
經過今次揚威後
香港足球發展應該會有改善
始終班高官都要向市民交代
p.s.
即使紐記琴晚被終止八連勝
都掩蓋唔到小弟既興奮!!!
終於碰頭
鹿死誰手
To: 舒利亞 & 路斯基
1)
小弟睇電視見證香港羸波都好 high
睇住歐沖射失12碼
小弟好大聲嗌F字頭粗口
到最終靠12碼羸波
小弟又自己同自己慶祝
身邊既女侍應可能以為小弟唔多正常
2)
雙紅會各踢半場好波
不過小弟今次見利記輸波
就有少少唔服氣
寫賽後感先再詳談
香港隊吐氣揚眉,
令人振奮,
羅生同霍生唔知加左幾多獎金落去刺激班球員呢?
以日本,南韓及北韓既民族風格,
相信沒有打假波既成份^-^
當晚我要在電視城替歡樂滿東華聽電話,
都見到羅生同港隊捐獎金
因前晚捱通頂,
利記vs兵工廠只睇左新聞
見到利記所失兩球都同格連莊臣有關...
To: sammysir
1)
梗係令人振奮
2)
加獎金好似唔止佢兩個
仲有胡先生同埋羅生好多fd
3)
根本唔係打假波
不過4個主要對手冇用一線球員就係事實
當中南韓仲只係用乙組聯賽既球員
4)
捐獎金?
睇報紙好似話係佢地捐件簽名波衫籌到30萬
而又有個總理以慶祝香港羸冠軍為名
再捐多50萬俾東華
5)
唔應該怪晒格連莊臣
加歷查同埋奧拿里奧都有一定責任
真係好替香港足球高興
小弟雖然去左台灣20年
都仲幾記掛住香港足球
希望將來有一日台灣的足球都可以好D
而家就真係爛泥扶唔上壁
連參加都不敢參加
真係俾佢吹脹
To: wtssoccer
1)
對台灣既足球
仍然處於鳳山盃既記憶
2)
台灣似乎棒球同埋籃球比較受歡迎吧?
To Blacky
的確是如此
台灣以棒籃球球迷最多
其次是撞球(香港叫桌球)
再來可能是網球,排球,乒乓球
仲有跆拳道
但台灣唔係冇人踢波
上次東亞錦標賽預賽
台灣都差D逼和無心戀戰的北韓
(因為香港得失球差遙遙領先北韓)
To: wtssoccer
1)
台灣幾乎迫和北韓就當然記得
香港某程度要多謝台灣冇放水
2)
記得當年通宵行誠品書店
成晚都好似冇見過一本同足球有關既書
相反同籃球有關既書就有幾多
反應足球於台灣唔慌好普及
不過返酒店都總算仲有得睇英超直播
3)
跆拳道於台灣普及真係唔奇
畢竟連奧運都好似攞過金牌?
而網球於台灣流行亦好似有少少印象
近期男女子好似各有一個唔錯既球手
桌球,排球以及乒乓球就真係冇聽過
p.s.:
曲棍球於台灣亦有人注意掛?
女子隊好似上年都攞到奧運資格?
Post a Comment