想講尋晚場波......
古治賽前話唔想步德國後塵就唔可以驚左西班牙
荷蘭明顯攻強於守
死守當然冇著數
不過西班牙實力畢竟高少少
'荷''西'互攻下既攻勢算係四六(甚至三七)之比都好正路
荷蘭雖然唔係死守
不過防線總要有針對性佈署
一對閘固然唔可能經常助攻
而隨住沙治奧拉莫斯初段比柏度洛迪古斯更似右前鋒
防守型前鋒古治亦被迫好多時間回防幫拖
而雲邦美繼續佢帶有抽水成份既攔截之餘
就連氣袋尼祖迪莊既攔截都變得硬朗得有少少過火
就係針對鬥牛國幾個似書生多過戰士既技術型球員
西班牙就當然樂得對手肯同佢地鬥攻
不過柏度洛迪古斯可能因為緊張而明顯失準
所以當荷蘭捱過沙治奧拉莫斯初段既狂攻後
西班牙有一段時間算係折翼
佢地中場既重點當然係幾個技術型球員靠效率凍結史尼達
荷蘭人今場發揮空間好少
上半場既遠距離直射死球同埋下半場俾洛賓既一腳妙傳
已經係僅有既代表作
亦令荷蘭只有下半場一段時間比較有殺傷力
史尼達死火
荷蘭既希望就只有洛賓
不過卡迪維拿根本睇通佢條路
結果兩腳必殺射球都因為冇時間拉弓而威力有限
之後仲因為右路搵唔到食而唯有走入中路
鬥牛國有得對攻都要搞到加時打多個先搞得掂
就只有怨自己埋門一腳唔掂
如果唔係卡斯拿斯失左位都用腳尖封到洛賓既單刀
佢地好可能未到加時已經爆冷收皮
場波雖然只得一個入球
不過值得欣賞既係雙方都冇唸過死守
迪保斯基換入捷西斯拿華斯算係遲左
不過之後用法比加斯取代沙比艾朗素
變陣 4-1-4-1 算係進取
雲馬維克用雲達華治入替尼祖迪莊亦係類似既調動
而佢再之前用艾利亞入替古治
亦係進攻主義既例子
場波比較失色既地方或者算係球證韋比
條友執法英超出名成日騰雞而枉判12碼
尋晚又爆鑊咁破紀錄俾左14張黃牌都控制唔到場面
而個別判決亦幾值得商榷
世界盃決賽其實真係應該俾最好既球證執法
p.s.:
心水最佳11人:
卡斯拿斯
拿姆 碧基 高甸 卡迪維拿
舒韋恩史迪加
湯馬士梅拿 沙維 史尼達
科蘭 韋拿
4 comments:
以為又一次要十二碼分冠軍
結果雲達華治既半解圍半助攻
就令小弟番到屋企仲有一個鐘訓
賽前西班牙壓倒性獲睇好
但係事實上場波又未去到咁壓倒性
荷蘭同西班牙對攻唔奇
不過西班牙有一段時間咬荷蘭唔入就估唔到
韋拿自己唔爭氣無左神射手又怨得邊個
捷西斯拿華斯入替可能係怯場既柏度
邊線即刻生哂
迪保斯基果然有料到
洛賓兩次單刀哂料
或者係荷蘭未能爆冷既原因
卡斯拿斯再有好表現亦係關鍵
球證既問題
的確係令人失望
應罰唔罰
少少hi親就俾牌
基本上網主果十一個人都正路
只係覺得以下既球員
亦係唔錯
佩奧爾、史迪基倫堡、蘇亞雷斯、田中鬥莉王、日本門將、李青龍、朴智星、當路雲、奧斯爾
而有d球員，係小弟會係世界盃後特別留意
例如係基迪拉、蘇亞雷斯、鄭大世
暫時就係目前為止對世界盃既感覺
To: 舒利亞
1)
西班牙今場既攻守表現
都冇4強對德國咁好
2)
柏度洛迪古斯最遲半場就好消失啦
迪保斯基用捷西斯拿華斯替佢
明顯係繼續針對雲邦賀斯唔夠速度既弱點
3)
洛賓把握唔到兩次黃金機會
就梗係爆冷失敗既主因
4)
對韋比冇希望
所以冇失望
條友出名超廢
5)
唸最佳中堅有唸過佩奧爾
不過佢整體既表現冇碧基咁好
同08歐國盃相比係有少少退步
當中原因可能係速度進一步下滑
6)
龍門係最多選擇既一個位置
不過小弟從來冇唸過史迪基倫保同埋川島永嗣
反而唸過伊度亞度,比拿里奧,安耶馬周埋紐亞
特別係前兩者
7)
田中鬥莉王最出名既係顏面擋球
8)
朴智星同埋當路雲既表現係預期內好
9)
李青龍同埋奧斯爾都好 sharp
特別係後者
只嫌佢最後兩場表現回落
當中體能比技術係更有可能既原因
而本田圭佑,杜斯山度士,鄭大世
同埋幾個加納球員都唔錯
不過最搶眼既新仔一定係湯馬士梅拿
荷蘭攔截太兇狠
是西班牙發揮得冇對德國嗰場好既關鍵
我覺得韋比算控制得宜
雖然俾牌真係多咗D
但荷蘭咁既踢法都應該預咗
尼祖迪莊更應該早早出場啦
Tp: wtssoccer
1)
洛賓之前已經講明唔介意羸得醜陋
不過冇理過茅到咁誇
抵告魯夫插佢地茅
2)
尼祖迪莊嗰腳穿心腿都唔使見紅
可能性有兩個
一係韋比視線受阻
二係佢覺得尼祖迪莊只係收唔到腳
Post a Comment