荷蘭一如外界預料踢走烏'圭'
不過過程比預期辛苦
整體表現亦一如8場外圍賽同埋決賽週頭5場比賽有欠突出
就算而家14場全勝都唔見得有咩霸氣
同之前對斯洛伐克以及巴西話咁易就俾人劏穿防線
荷蘭今場算係有進步
不過史迪基倫保,希丁加同埋後防替工保拿奴斯都先後犯錯
就幾乎搞到佢地唔可以準時收工
同即將退休,但依然有前有後既雲邦賀斯相比
直頭相形見拙
事實上荷蘭近年人腳攻強守弱
而青黃不接就令防線人腳仲差過早幾年
決實無論對德國或者西班牙都應該好受壓
雲邦美同埋尼祖迪莊既截擊可能先係捧盃關鍵
前線方面
洛賓對住串演左閘既馬田卡斯利斯其實好易食
相對於換入雲達華治
俾洛賓更多發揮空間會對攻力較有幫助
史尼達其實今場唔係特別搶
不過再入符碌波就真係吹佢唔脹
由傳媒選既世界盃最佳球員好似係決賽前截止投票
考慮到最佳球員通常來自決賽球隊
小豬輸蝕在踢防中通常冇攻擊球員咁受注意
韋拿應該係史尼達攞獎既最大障礙
烏拉圭方面
實力本身已經較弱
冇埋3件正選兼上場要踢多30分鐘
牌面明顯更蝕底
不過下半場頭20分鐘仲踢得好過荷蘭
尾段又逼到荷蘭有氣冇頂抖
已經算有交代
科蘭入唔到禁區都有遠射同埋死球可以出賣
係衰冇左蘇亞雷斯而孤掌難嗚
而更衰既當然係泰巴里斯提早換走佢
卡雲尼就越睇越似名大於實
熱刺如果高價入貨就多數再次損手
大舊衰艾比奧落場後又搞事多過踢波
反而兩個彭利拿每人有腳妙射仲幫到手
遲早跳出葡超
p.s.:
保羅既選擇竟然係西班牙
Oh! My God!
4 comments:
琴晚再戰廣場
雖然只有三丁友
不過去到廣場睇波
仍然有唔少其他觀眾
氣氛真係一流
其實場波唔係太精彩
兩隊全場都有唔少交失波既情況
不過兩腳世界波就足以令小弟醒哂
洛賓的確踢得比較輕鬆
不過條友無右腳就真係死穴
唔係既話應該一早拉開比數
依舊獨食就難免惹來成場觀眾媽媽聲
烏拉圭其實唔係輸太多
最少我覺得荷蘭無明顯優勢
而且尾段已經落後兩球加得番最後幾分鐘
仍然搏盡，仲真係追到2:3
出局依然值得讚賞
最後幾十秒成場觀眾幫佢地打氣就更加壯觀
To: 舒利亞
1)
你其實去左邊個廣場?
2)
小弟反而覺得
既然馬田卡斯利斯咁易食
應該俾更多機會洛賓去搵佢著數
不過要改既係
既然佢同古治都可以忽左忽右
不如試下輪流轉邊搵食
3)
其實科蘭嗰球唔係好靚
個波係飄
不過史迪基倫保失手係因為佢失位
同埋希丁加解圍失敗兼阻礙佢既視線
p.s.:
唔知點解
你尋日既 comment
而家睇唔到兼回唔到......
小弟住北區
所以多數係去上水廣場
悶悶地無啦啦有球遠射
算係咁啦~~
琴日果場好似洛賓同古治真係有段時間換位
p.s.
小弟自己都見唔番.....
不過又顯示有....
由佢啦~
To: 舒利亞
1)
洛賓同埋古治既然兩邊都可以踢
梗係玩移形換影著數啦
下場更加應該咁做
至少可以牽制沙治奧拉莫斯既助攻
2)
更正少少嘢
原來金球獎係可以決賽後先投票
不過記者們多數因為賽後太忙
而習慣賽前投票
p.s.:
岩岩見到你原本既 comment
回覆完之後竟然又唔見左
Post a Comment