1)
李斯特城被指希望於1月借用碧咸6星期
報導指佢地仲準備用20萬鎊週薪利誘佢
Comment:
既然肯俾120萬鎊簽佢個半月
不如預多少少錢同佢額外買多份保險
否則肯定同上季既熱刺一樣徒勞無功
2)
雲加承認可能會買人
但就一定唔係買中堅
Comment:
佢睇來已經選定華美倫加上哥斯尼踢中堅
意味應該真係會買新左閘
3)
桑馬達既老豆兼經理人透露華倫西亞已拒絕阿仙奴對佢嗰仔既出價
Comment:
買佢應該係為左取代拿斯尼
而收購列卡度艾維利斯以及辛迪卡蘇拿都食白果
雲加隨時要靠艾朗藍斯去替補法比仔既離隊空缺
4)
辛尼特被指準備向祖雲達斯出價700萬鎊收購邦路斯
Comment:
佢雖然於祖記既發展未如理想
不過除左人工以外
唸唔到有唸嘢打動到佢貿然轉去俄羅斯搵食
5)
富咸被指睇中哥治
仲願意用森莫拉作為交易條件
Comment:
以祖爾接手以來出奇地慳家
就知增兵資金唔慌多得去邊
哈利列納唔似會為少少錢而換走個箭頭
6)
隨住巴頓公開批評紐卡素既轉會制度
紐記隨即宣佈佢可以自由離隊
Comment:
由幾個月前有價有市既幾百萬鎊身價
搞到而家抖零都收唔返
紐記今舖真係捉蟲
唯一安慰就係慳返佢既6萬鎊週薪
另一方面,除非古迪利斯重彈舊調
否則紐記而家陣中其實再冇其他算係唔錯既右路人選
7)
消息指白治為左爭取更多出場機會
而考慮以借用形式加盟李斯特城
Comment:
佢雖然可以踢中後場好多位置
不過仲慢過當年加利仔既速度就令發展平平
重返岩佢水準既英冠都不失係正確決定
8)
士砵亭即將落實引入謝法倫
Comment:
佢無法於巴塞得到更多出場機會
大抵只因同柏度洛迪古斯同期
轉戰葡超肯定多波佢踢
另一方面,考慮到太多人同佢爭大國腳席位
選擇代表出生地委內瑞拉可能先對佢既國際賽生涯有利
4 comments:
對管理層早已失望
只希望艾殊利快d走
唔係既話
紐記唔可能重見天日
To: 舒利亞
英國已有球評家預期紐記今季降班收場
冇眼睇,
捧一間負面新聞多多既悲情球會,
真的很難頂,
希望今屆又係大步檻過,
對比3年前巴頓所作既壞事,
今次只係多口批評球會既用錢同轉會市場策略
就慘食冇情雞,
而家想問既就係,
而家是不是當作雙方同意下,
球會不用賠錢的解約?
還是真的炒左佢?
如果巴頓在31/8前仍然忍到唔肯轉會,
紐記係咪要繼續出糧俾佢?
To: sammysir
紐記唔係同巴頓解約
而係將佢免費掛牌
如果佢於轉會市場關閉後仍然留隊
紐記就算唔用佢都要繼續出糧俾佢
Post a Comment