睇到曼聯羸8:2既比數
真係唔兜巴摑醒自己都仲以為發緊夢
8個球員缺陣,尹佩斯宴客同埋曼聯班友腳風超順
通通都係慘敗原因
不過更關鍵既係兵工廠條防線仲衰過英甲球隊
贊堅遜加盟以來繼續客串唔擅長既閘位
高基連仲要係第一次踢英超
而包括即將轉投昆士借流浪既阿曼特查奧爾在內既幾件蛋散
果然繼續佢地小學生水準既防守
加埋左右中場又回防不力
咁既防線就算對英冠球隊都未必掂
當中要負最大責任既一定係雲加
近4年佢肯俾下錢去買入既高質後衛
其實就只有沙格拿同埋華美倫
上季兩個同胞中堅頻頻犯錯
佢搞左成個暑假都只係俾左90萬鎊去簽贊堅臣
繼續佢既所謂長線投資
其實引入謝雲奴後
中前場除左中場中之外
冇一個位置比後防更等人用
但教授偏偏拍板用1200萬鎊以及1000萬鎊去買阿歷士以及朴主永
咁既價錢接貨亦好可能又做水魚
相反收購對球隊重要得多既加利卡希爾就只係開價600萬鎊
咁頭重尾輕既增兵預算
荒謬程度直逼當年皇馬’施丹+柏雲’既屎橋
人地皇馬都仲有個鋼門卡斯拿斯
雲加有既偏偏只係尋晚又企錯位既施捷斯尼
其實面對對方唔算出色既防線
中前場於進攻方面既發揮其實已經好過後防好多
至少幾次靠短傳搵到空位進攻
不過當本身已經唔掂既後防要推上前做支援
就整定冇好下場
而家得返幾日
由於仲有韋舒亞
就算唔買星級球員去取代法比仔
小弟都寧願雲加為中後場簽返至少兩至三個好球員
p.s.:
雖然兩件新兵都入到波
不過真係唔覺利記踢得特別出色
睇完尋晚場波更加覺得佢地於速度上同曼聯有明顯距離
多得兵工廠同埋熱刺出閘脫腳
利記重返前4既機會又大左
不過要爭英超就應該仲未係時候
另一方面,文仙尼始終唔係一流教頭
曼城頂多係隻攔路虎
仲試緊車既保亞斯睇來先係費sir今季既最強對手
4 comments:
8:2...
我成晚訓唔著，係開心到訓唔著
我都好開心
睇嚟雲加呢次應該會醒
要多謝費格遜
第3輪就打左佢一巴
之前之後仲挺身而出幫佢講野
真係惜英雄重英雄
我以前都好憎費格遜
但經此一役都覺得佢似番個人
最後兩日
希望阿仙奴有好消息
今日聽聞已經準備簽費倫巴治的巴西左閘山度士
仲有興趣引入車仔的以色列隊長班拿約
如果可以簽埋加利卡希爾
都算有番D起色啦
老實講
呢次係好機會
俾雲加知道宜家隊波係幾咁無能
就算一隊非職業聯賽既球隊
都未必會俾曼聯入八垃
何況係一支班霸?
唔可以賴球隊無人用
無人用係雲加自己一手造成
隊波唔係多人用之際
仲不斷放走主力，借走年輕球員
結果今場用咩?
咪用b隊，青年軍囉
知道曼聯琴晚入左好多球世界波
不過有睇番都知
根本有唔少失波係施捷斯尼自己判斷失誤
可惜當基雲等龍門係轉會名單時
教授偏偏唔肯出錢
買謝雲奴可以話係正確
咁洗一大筆買阿歷士張伯倫
而漠視左防線方面既問題
又係咪明智呢
阿仙奴唔係小弟杯茶
不過見到一支班霸變成咁
都真係幾心up
To: wtssoccer & 舒利亞
最唔滿意雲加頭重尾輕既增兵政策
根本球隊唔係真係冇錢
佢而家火速為防線增兵
算係今次大敗既唯一正面影響
Post a Comment