2012-2-25

1)
俄超轉會市場關閉前
艾沙維以借用形式回歸辛尼特
而森巴亦跳船到安捷

Comment:
雖然雲加有時用人都幾固執
不過見艾沙維既狀態冇最差而只有更差
加上又有其他選擇
最終由踢佢出正選到踢佢出廠都好正路

換個熟識既環境再搏反彈
對佢同埋國家隊都係好事
特別係歐國盃決賽週6月就到

另一邊既森巴玩到罷工咁冇品
布力般雖然後防選擇唔多
護級路途又依舊遙遠
都無理由向咁既人屈服

雖然踢波都係打份工
人望高處或者睇錢份上都好正常
不過職業道德都係專業既一部份
何況當日仲係白紙黑字簽約

法比仔上個暑假重返巴塞
反轉豬肚既兵迷一定多
不過心存感激,默默祝福既應該更多
因為佢地都記得佢當年著住兵工廠波衫都搏盡

2)
費托5年來首次於冇傷病既情況下落選西班牙國家隊

Comment:
咁既狀態唔入選都好正路
加上韋拿就算趕及復出都唔知操得返幾多成狀態
以4-3-3陣式而言
洛蘭迪會係最佳替補之餘
兼可以打多瓣高波
不過迪保斯基仍有必要繼續測試蘇爾達杜既作用

而洛蘭迪既球會隊友蒙尼恩首度入選
這名小將雖然同洛蘭迪有默契上既優勢
不過而家既西班牙中前場實在有太多這類好波之人
加上佢又應該會代表西班牙踢奧運
歐國盃決賽週應該見唔到佢

2012-2-24

1)
告魯夫即將落實加盟瓜達加拉加
出任顧問

Comment:
佢同雲高爾同歸於盡後就咁快搵到新工
名氣既嘢真係冇得好講

不過佢自從離開夢幻一隊年代既巴塞後
做嗰咁多個唔同名目既技術性位置其實都冇好下場
當中原因或者係佢有料得來實在太臭四
好難想像佢去到墨西哥咁遠先忽然交到貨

2)
米基爾承認同安捷有接洽
而艾殊利高爾就忽然被傳成為曼城既新左閘人選

Comment:
米基爾當年同美斯同屆踢世青盃
成名前後其實都冇咩佳作
無論於車仔踢防中
抑或返到國家隊負責派牌
都覺得佢只係一個平平無奇,負責駁腳既工兵
幾咁密密腳傳波都係咁話
而發覺佢原來已經見底
邊個做'車長'都唔會重用佢

至於A高自從同波亞斯反枱後
下季擺明有你無我
不過就算波帥真係落台
有名你叫 Cashly Cole 亦絕對有可能因為曼城俾得起錢而過檔

加上高拉洛夫亦已經唔上一次被傳重返意甲
真係有理由相信文仙尼想簽佢

p.s.:
納比真係為拉素而出山?!

2012-2-22

1)
哥迪奧拿暗示可能季尾約滿走人
西班牙傳媒指安歷基,O.加西亞,甚至沙維都可能接手

Comment:
雖然傷患影響出場次數
不過巴西世界盃前
沙維都唔似會從國家隊以及球會一線退落0黎
要佢身兼教練球員兩職似乎唔多可能

加上對上一間一線球會肯俾球員兼任教頭
已係廿幾年前既利記
可見近年教頭越來越大既工作量唔容許佢地分身踢波

安歷基方面
佢雖然教巴塞B隊教得唔錯
不過今季教羅馬既表現始終只係一般
執教更高班既巴塞更難俾到人信心

而O.加西亞更加只係青訓出身
巴塞好多主力雖然同佢好熟
不過青訓做得好從來都唔係教得掂一隊既保證

2)
車路士被指想用史杜歷治向阿仙奴交換禾確特

Comment:
史杜歷治今季有明顯進步
論名氣同埋星味佢雖然仲未及禾確特
不過講埋門一腳就肯定羸晒
禾仔單刀失機既鏡頭其實唔少過廢托幾多
最終有著數怕且會係兵工廠

p.s.:
車仔積弱既防線再一次出醜人前
好彩A高護到空門
次回合仲未變成例行公事
出線機會亦仍然高過兵工廠
不過當務之急可能係先解決內訌

話時話8強就冇晒英超隊
季初真係唸都冇唸過

2012-2-20

好幾日冇講過新聞......

1)
軒迪克落實執教安捷
雙方簽約18個月

Comment:
咁多個 available 既名牌教頭當中
軒迪克肯定最熟俄羅斯球壇
安捷總算冇搵錯人

不過佢份約好似只係頭幾個月係死約
可能軒帥想睇清楚會唔會俾老細干預
萬一勢色唔對就即刻跳返去歐洲主流球壇

2)
阿仙奴被指睇中圖盧茲既突尼西亞後衛 A.Abdennour

Comment:
近幾季佢地每場平均失波都超過一球
已係英超前列球隊當中最差既一隊
雲加想搵新後衛都好正常
不過又玩青訓就難免令人失望

早年列強冇而家咁重視引入幼齒
雲加自然多選擇
不過而家嗰啲新星已經炒到貴晒
佢又要比其他買家更加睇住盤數做人
有好嘢已經好難輪得到佢

另一方面,英國傳媒話兵工廠高層想升雲加上神枱
再搵季尾約滿巴塞既哥迪奧拿過檔

不過小弟就打死都唔信
因為論地位佢同費sir邊似有高層會郁得到

3)
利物浦被指想從西甲增兵
艾菲利以及基迪拉都被指係杜sir既心水

Comment:
兩個都肯定幫到隊波

艾菲利既威力肯定大過今季買入嗰幾個名大於實既土炮
佢 top fit 既時候
一場比賽既數據可能已經好過佢地幾場既總和

傳聞價仲只係1300萬歐元
早啲識咁唸真係慳返好多

而基迪拉既級數亦肯定在盧卡斯利華之上
不過摩連奴同佢不和既傳聞未必信得過
事關近兩年同串王傳過不和既主力
其實到而家都冇一個走過

4)
波亞斯同埋雲尼亞里都被指
一旦週中歐聯有咩閃失就即刻冇得留低

而車仔同埋國米既球迷亦於早前比賽高呼摩連奴嗰名
擺明唔撐而家既教頭
意大利傳媒就指國米已唸定用G.巴里斯同埋費高聯合接手

Comment:
G.巴里斯如果真係咁掂
就唔會只係做左咁多次替工
而費高有既只係星味
退役之後做極都只係大使之類既休閒工
旨意佢忽然領軍上前線真係幾牙煙

p.s.:
近幾日病到死下死下
不過 office hr 以外都仲依然有限度睇波

印象最深係南華輸波
咁多時間打多人一個都咬唔入
明知冇咩空位都要換入只得速度既李威廉
變相讓賽踢少個
而生波既時候多數只得一個大眼仔開上前線
後防有咁多人睇波又係令人莫名其妙

晨曦既3防中陣式令利馬既威力減到最低
而佈防好深減少左高尼路既活動範圍
38歲既佢今場絕對有教材級數既表現

而利馬冇料到即係成隊南華冇料到
迪亞高冇空間俾佢走
陳7又向來錫身
高世安靠佢咁既球星同兩個大隻佬爭高波
倒不如搵其中一個中堅同佢調位踢

加上南華不出所末又輸高波
晨曦守到120分鐘都算合理戰果
當然有人又會賴廖國文臨尾犯錯唔吹極刑
不過香港球證向來都係庸哨而唔係黑哨
邊有咁多人同事去反南

如果好似兵工廠嗰晚咁
對住個好似只係識俾曼聯12碼既韋比
加埋輸嗰兩球都咁冇運
賽後呼冤都可能仲有多幾個人應同
不過佢地踢得咁屎其實都係唔抵可憐

運氣向來都係比賽既一部份
白禮頓上場多得威廉臣擺老烏
普耶點唸到一圈之後就要3倍奉還
唔講仲以為佢走左幾個月卡數

另一方面,睇波其實都唔夠賤豬唐好睇
人蠢又唔自量已經大檸樂
衰到擺老婆上台就更加抵人鄙視

修身齊家都未掂
又點俾得個天下佢
家事衰左搵得老婆孭
難保將來爆鑊要700萬人同佢孭

今日有人吹水話唔明點解咁多奸商銀行佬由始至終都死撐佢
咁難得有條死蠢將來可以俾你為所欲為
忠心程度梗係更甚於對住老婆

2012-2-15

1)
拿維斯既經理人放風利物浦有興趣羅致這名阿根廷前鋒

Comment:
佢雖然唔多識入波
不過佢既走動同埋突破能力就幫到而家既利記

大抵古治只係一隻勤力既牛
比拿美就幾乎只得一招突然加速
達寧更加不值一提
如果要謝拉特,查理阿當或者軒達臣打邊亦唔係上策

2)
英國傳媒指卡比路上星期六曾到俄羅斯同安治接洽
而佢亦被傳係馬拉加既下任故頭人選

Comment:
兩隊波係就係俾得起錢
不過人腳同冠軍級數仲有明顯距離

當年卡比路故羅馬都先要用一年時間執靚隊波
到第二年先羸到任內唯一一次意甲
問題係嗰啲有錢老闆有冇咁好耐性先

3)
比耶落實以自由身加盟唐卡士打
雙方簽約年半

Comment:
佢雖然因為傷病而肯定不復當年勇
過左維拉後仲要睇波多過踢波

不過紐記後防咁等人用
搵佢回巢其實冇壞
至少右閘同埋中堅兩個位置都可以多個替補

另一方面,唐士卡打而家係榜尾之餘
比利沙柏又俾修咸頓挖走埋
最驚下季佢地降到去英甲
睇收費電視都睇唔到佢,迪奧夫同埋前利記名宿桑達斯

4)
雲加被指想搵費文尼季尾以自由身回巢

Comment:
唔夠防中既兵工廠想搵佢回巢都唔奇
不過如果佢唔減人工
真係唔信雲加肯咁大手筆去簽佢

p.s.:
雖然怕且又係下半場中後段先落場
不過都望亨利臨尾攞個尾彩

2012-2-13

幾場波想講......

1) 曼聯對利物浦

3個入波都係來自後防失誤
成場波真係唔算精彩

利記落後兩球下竟然有超過30分鐘 hea 住去踢
唔講仲以為佢地先係領先嗰隊
坦白講真係唔覺自己睇緊雙紅會

明知曼聯一對中堅都咁唔掂
衝撞多幾次就自然會出事
換入卡路爾後都竟然繼續於外圍搓下搓下
曼聯仿佛就成為一架重型轟炸機既停機坪
如果唔係因為里奧費甸南既果然出錯而追返球
利記仲好似唔識醒咁
如果狂攻既表現唔係只維持得最後嗰幾分鐘
和波絕對唔奇

賽後招點都係嗰兩條友
真係唔覺阿蘇唔肯握手係錯
如果俾人老屈完8場冤獄後
都仲要扮大方同嗰個真正種族歧視既人渣握手
咁使唔使順便俾埋個籮柚佢插呀

不過阿蘇事前老點杜sir同埋球會就爭唔落
但真係唔信利記會好似傳聞咁講賣走佢
一來佢係中前場最交到貨既一個
二來今次既錯未致於要判佢死刑

'嚴重影響球會聲譽'不過只係費sir出既口術
當年簡東拿起飛腳踢球迷
堅尼立心不良咁踢到人收山
佢老人家咪一樣隻眼開隻眼閉

2) 熱刺對紐卡素

俾艾迪巴約咁樣助攻大四喜
佢同沙夏好似踢緊練習賽咁輕鬆咁培養默契
一對中堅固然責無旁貸
不過一條中場線更令人失望

森遜睇巴里本身已經唔夠班
有時仲俾人扯埋入中路
偏偏右路既奧巴坦成日都唔知去左邊
當艾確圖少有落到咁底
摩達歷亦曾經去過嗰邊搵食
可想而知右路有幾真空

中場嗰兩個人肉雪糕筒又係無甚作為
技術同埋效率都輸
結果紐記禁區就成為熱刺上下玩波既後花園
如果唔係佢地下半場hea去踢
紐記肯定輸多過半打

就算史堤芬泰萊未提早收咧
紐記後防已經等住要買人
偏偏1月加盟既就只有柏比斯施斯

其實買個後防有幾難
就算唔甘心俾里昂當水魚而唔買A.施素高
咁傳左好耐既烈治維最終亦只係250萬鎊
巴斯桑,尼爾遜,沙加度等人根本長期 available
既唔買又唔借都唔知佢想點

唔好以為今場大敗係特別例子
其實紐記近兩個月既後防已經幾唔掂
早前如果唔係布力般流浪既埋門一腳更得人驚
最終戰果一定係紐記輸到仆直

另外,柏度好似只係會考慮賓艾化既體能狀況
其他既可能於佢心目中都係'鐵血戰士'
例如古迪利斯12月頭已見疲態
偏偏出場時間依然高企

單靠一對強勁雙箭頭就有運行既情節
近年連足球小將都冇啦
塞內加爾本身除左紐記黑雙煞外仲有蘇維同埋尼安
如果單靠前線勁就有運行
隻獅子就唔會做左差唔多10年病貓啦

3) 天水圍飛馬對傑志

高梵先列後備
究竟係戰術定係上半場排錯陣
怕且只有陳曉明本身先知

而雅高踢得好過佐迪
偏偏早過後者被換走
究竟係咪因為前者體能唔足以應付全場
而中場最初3人全部唔太擅長截擊又係咪蝕章
亦係唔知甘巴爾唸咩

主隊羸波
不過表現唔算突出
伊達攞唔到12碼之餘仲無辜俾人話佢插水
不過入返兩個烏龍波就咩都補返數

另外想講王振鵬
佢近期整體表現其實好左
上半場救伊達既笠射亦見功架
偏偏一次低級失誤又再洗底失敗
打龍門有時就係咁慘

4) 科特迪瓦對贊比亞

咬唔入就係咬唔入
贊比亞擺明搏和射12碼
連個龍門都射得咁靚
話冇練過就打死都唔信

科特迪瓦整體發揮唔比平時差
唯獨埋門一腳唔合格
合理解釋可能只有心理壓力
零失球都係冇盃捧
印象中近年大型賽事都係第一次

2012-2-11

幾日冇交功課......

卡比路最終因為英格蘭足總干預佢任命泰利做隊長既決定
而決定劈炮
佢最後5個月既人工原本係250萬鎊
而家英格蘭足總肯俾返150萬鎊佢
不過條件係佢唔可以再同傳媒講返件事

而由於件事係哈利列納打甩逃稅官司後6個鐘頭
令人攻加相信哈利叔就係接手既頂頭大熱
賭波公司紛紛將佢接手既賠率大幅降低
更有部份索性封盤

英國傳媒指英格蘭足總願意以1000萬鎊為佢贖身
亦準備以原屬卡比路既600萬鎊年薪利誘佢
不過佢就表明現階段只想專注教好熱刺
而決定權就只會在熱刺主席利維手中

另一方面,卡比路原本講明教埋英格蘭就會退休
不過而家就有指車路士想搵佢取代保亞斯
而佢講明唔考慮重返意甲既言論就更令英格蘭傳媒有無限既想像空間

Comment:
卡比路同埋哈利列納都不愧係老江湖
處事同埋言論都果然冇失佢地高手既身份

先講卡比路
出手唔高既老闆佢向來唔理
但佢亦唔介質同俾得起錢但唔俾佢話事既老闆開火

因為最後5個月人工而要個員工徹底聽話
好似你同我此等員工甲乙丙都未必肯制
仲何況係衣食無憂既佢

更何況英格蘭今舖歐國盃都唔慌係咩真正既爭標份子
與其6月又俾全英國國民同埋傳媒重插
倒不如而家型啲咁走
加上仲有3個月補水
豪100萬鎊就可以保住面子既選擇對佢而言絕對係好路數

而家英國傳媒吹佢接手車仔
小弟始終唔多相信
一來佢既然忍唔到英格蘭足總
又何來忍得到隨時更多干預既阿巴
二來而家 available 既軒迪克同阿巴咁 fd
小弟列而家都堅信一旦保亞斯冇得撈
臨時高薪替工非軒帥莫屬

另一方面,形勢大好既哈利列納就更精
難得英超冠軍夢仲未幻滅就梗係唔會離開熱刺
唔想得失英格蘭足總同埋球迷就拋個波俾利維

但季前曼聯同車仔開個筍價買摩達歷都打動唔到利維
而家英格蘭足總既所謂1000萬鎊'誠意'
其實有幾大作用真係心照

不過英格蘭堂堂名牌
段估唔想搵個臨時工領軍踢決賽週
市面上亦唔見得有咩名牌教頭肯客串幾個月
仲要係一隊唔少內部問題既球隊

哈利叔亦當然知道英格蘭足總一旦而家搵到人全職任教
佢就肯定冇行
佢而家想先行兼職都絕對正路
況且佢話利維話事唔代表佢私底下唔同利維講數咩

更正既係哈利叔其實已經留定後路
佢同傳媒講明教一隊波已經好難
即係話教埋英格蘭就仲難
萬一接手後歐國盃仆直都唔好入佢數
因為而家只係英格蘭足總搵佢求救

p.s.:
1)
二奶台新聞部搞咩呀
唔講仲以為莫耶斯又係王征啲遠房親戚
http://www.youtube.com/watch?v=YuN1fDVvkDE&sns=fb

2)
近幾日睇到最多既除左卡比路
其實就係林書豪
加埋踢波既林志堅
阿Lam同阿Lin都真係堅正
有冇人話俾小弟知香港幾時會有後者既波衫賣呀

2012-2-8

1)
哈利列納既逃稅官司獲判無罪
佢公開感謝熱刺主席利維同埋球迷

Comment:
佢咁樣自辯都居然甩到身
唔怪得有前高官夠膽死偷步買股票後
死撐話係因為飲醉酒

2)
國米被指下季想搵保亞斯接手

Comment:
兩地油王一樣咁無耐性
打佢地工都幾無安全感

不過國米後防嚴重老化
偏偏莫拉堤而家又唔多肯俾錢買人
就算搵到摩連奴回巢都肯定惡搞
仲何況保亞斯只係著衫似佢既A貨

3)
辛尼特被指只肯出價700萬歐元收購卡錫

Comment:
雖然歐洲主流聯賽都過左轉會限期
俄超已經成為祖記近幾個月最有可能既買家
不過祖記年幾前先用左1500萬歐元收購佢
而家點肯賣得咁賤
大不了擺多幾個月後再兜售過佢

4)
蘇巴根暗示即將離開科隆

Comment:
佢同球會經理芬克已經唔妥左幾個月
後者朴槌買鄭大世前直情冇單聲佢知
德國傳媒話佢直情係靠睇帶先知北韓朗尼係邊個
無癮指數絕對爆燈

其實科隆而家雖然而家排第9
不過實情只係多尾3既凱沙羅頓6分
護級路途隨時再現暗湧

p.s.:
'存錢妥'吞左我成疊銀紙後居然hang機
仲要出張通知書話我冇入過錢
想當年仲係鐵拳無敵既時候
肯定機都打爆佢

2012-2-7

1)
英國傳媒指卡比路因為唔滿意高層未得佢同意
就禠奪泰利既隊長臂章
隨時決定提早劈炮

Comment:
卡比路於南非世界盃後用多左新血
2014年就算羸唔到世界盃
都有力成為近年最勁嗰隊
擺明係前人種樹,後人乘涼既格局

英格蘭充斥球星少爺兵
班友就算遇到摩連奴同埋軒迪克都隨時敢玩嘢
又何況係退休倒數既卡比路

佢老人家今次撐泰利雖然都好有 point
不過咁樣隨時得罪更多球員
如果嗰班高層搵到人臨危受命
佢地隨時等唔切卡比路劈炮就同佢提早解約

2)
卡比耶即將落實同紐卡素續約到2016年
而紐記就被指同曼聯爭奪水晶宮右閘 N.Clyne

Comment:
爭新星唔同爭冠軍
強隊從來冇話一定著數

特別係丹尼森遜硬係唔肯續約而隨時季尾俾紐記賣走
相反曼聯1隊印象中隨時有半打球員可以同佢爭位

3)
黑池既M.菲臘斯被傳成為利物浦既1000萬鎊新翼鋒人選

Comment:
當中前場多人到可以分A,B隊
當杜sir好似仲未試到最佳陣式同埋人腳
真係已經聽厭利記中前場既增兵傳聞

話時話如果蘇亞雷斯,卡路爾,比拿美少啲搞事
驚喜程度肯定更甚於增兵
特別係前者停賽8場後既見面禮竟然係無影腳
抽後算帳再停3至4場都抵X死

p.s.:
1)
原來韋比歷年來於英超判過54個12碼
當中曼聯就已經佔左1/6(即係9個)
而佢今季判既7次極刑
曼聯更加著數左3次
咁既數據想唔認係黑哨都幾難

2)
兵工廠有機訪港
不過訪港魔咒咁得人驚
下季英超同埋歐聯咪更加冇機

2012-2-6

1)
雷丁被指想借用夏格維斯

Comment:
佢上季尾雖然已經講明唔肯屈就英冠
不過而家就算耶耶托尼踢緊非國盃
文仙尼都唔多肯用佢就擺明唔睇佢啦
降格踢英冠已經係爭取出場機會既最佳選擇

2)
米爾頓凱恩斯領隊 K.羅賓遜透露有意搵阿倫史勿夫下季以自由身加價

Comment:
除非佢肯大幅減薪
否則真係好難成事

不過如果係咁就倒不如表明出場先有糧出
可能仲有英超球會敢搏下
雖然段估佢都會係另一個戴亞

3)
洛杉磯銀河被指睇中艾利蘭

Comment:
條友只要唔傷又唔玩嘢
其實夠料做個中型班大佬
就算過檔都唔慌踢得耐

其實類似羅比堅尼這類三十出頭但仲有卡士既球員
可能先最岩佢地

p.s.:
紐記羸到維拉唔意外
畢竟麥利殊這名當年咁硬朗既中緊
而家連維拉後防都竟然搞唔掂
有個基雲咁勁既龍門都可以至少10場keep住失波
可想而知幾咁唔掂

紐記羸波
不過表現唔算理想
當中關鍵可能係冇左近日踢到殘殘地既賓艾化
而紐迷最開心既未必係柏比斯施斯地標戰就入世界波
而係賴恩泰萊冇斷腳收場
紐記中後場已經唔多夠腳
如果再少一件都唔知點算

另一方面,車仔羸3球都可以俾曼聯逼和
韋比既執法當然係 key point
條友雖然係英格蘭首席球證
不過出晒名執法水平一般
當年見親C7跌低就老馮吹12碼已經知佢無能
不過上半場佢亦同樣放生左加利卡希爾
車仔捉到鹿都脫唔到角又唔怪得晒佢

關鍵其實係雙方領隊既臨場調動
波亞斯見球隊俾曼聯追返2:3後失勢
換多個防中無可厚非
不過換走既竟然係史杜歷治
而唔係廢到無朋友既托利斯又或者馬路達

前者而家連起腳埋門都好似冇咩信心
尋晚明明有次有位都要再扣多下就係唔夠信心既表現
一個唔敢起腳既射手
其實同一個不舉既AV男冇咩分別

相反費sir換小豆入場真係打亂晒車仔既防守部署
大衛雷斯這類唔擅長緊身盯人既中堅真係唔得佢死
朗尼亦可以有更多機會返中場幫手搶中場
追返3粒都唔係運氣兩個字就解釋得晒

當然佢地最終保得住1分都要多得迪基亞
條友原本最弱就係應付高波同埋遠射
但過左半季後佢處理遠射既能力明顯有進步
關鍵正係集中力好左

2012-2-4

1)
祖爾透露因為森莫拉半年前就已經嘈住要轉會
所以最終賣走佢
而因為巴里奧斯唔肯離開多蒙特
所以佢最終從史特加接收普格恩耶克

Comment:
普格恩耶克如果係掂
史特加就唔使買伊比斯域拉
加上東歐箭頭出名多水貨
由拉度斯奧,杜米迪斯古,列布夫,舒夫膠刀,
禾路連,柏夫奴真高到艾沙維全部冇個合格
真係好難想像祖爾點解反而覺得佢會撈得掂

成日都話季中買人可能因為唔夠時間而入錯貨
今次好可能會係另一例子
其實拜仁雷斯既表現已有改善
祖爾靠佢成為丹普西後既另一攻擊重心
可能仲有運行

2)
芝加哥火焰被指有興趣搵杜奧巴以及波歷克以自由身加盟

Comment:
唔係話美職盟球會俾唔起錢
不過佢地既質素只屬英冠
未必個個明星球員都肯屈就

如果佢兩個以收入為首要考慮條件
索性去中超同埋中東好過啦

不過杜奧巴而家又話考慮同車仔續約
究竟係真心抑或等其他潛在買家加碼
就不得天知

3)
文仙尼最終將泰維斯納入英超註冊名單
而佢仲話如果條麻煩友夠fit又肯向全隊認衰
於球隊仍會有出場機會

Comment:
條友已經唔止一次玩嘢
俾佢歸隊等同埋左個唔知幾時會爆既計時炸彈

4)
前國米隊醫透露大哨98年世界盃決賽夢遊球場
係因為扭傷頸動脈而搞到心臟出事
偏偏當時主診醫生斷錯症
以為佢癲癇症而俾錯藥佢食

Comment:
如果屬實既話
佢都算唔黑仔得晒
亂咁啪藥都仲保得住條命

p.s.:
今日下晝去左旺丁場睇銀牌決賽預演
眼前南華既進攻應係今季最好

迪亞高有速度又成日走位
利馬 key 到波之餘仲勤力緊逼對手
佢既死球能力功夫雖然及唔上強哥
不過對球隊真係有更大作用
而佢地有料到
亦進一步激活陳7同埋歐沖

如果真係要挑剔
就只有多數於左路出現既威廉王子因為冇左腳而冇咩表現
不過Edison今季表現一般
蘇沙既傳中能力亦繼續強差人意
將迪亞高移去左路可能係最好既解決辦法

天光隊既人腳及唔上少林寺
當個別球員傷停以及傷癒狀態唔夠
再加埋卓卓又玩失蹤
情況都幾濕滯

不過波係一場一場計
只要19號場決賽唔好好似今場頭段咁發夢
晨曦死守都會俾到南華一定麻煩
當然如果到時已經38歲既高尼路仲要繼續單靠路數去死頂
就肯定有隱憂

南華亦唔係毫無弱點
對廣州富力同埋尋日其實都頂輸好多高波
到時再輸高波絕對唔會令小弟意外
大抵列卡度都知巴利有機會再次偷雞
所以都提佢故意除衫慶祝攞牌洗底
但做到咁明顯其實又幾肉酸

另一方面,亨利自從省港盃後真係幾沉
佢無份入選港隊都好正路
畢竟新教練根本睇唔到佢上半季有幾勁
但如果佢仲係咁既水準
冇左佢同梁子駿四圍走搵機會
到時晨曦對南華既威脅只會局限於死球

2012-2-1

上次轉會市場關閉後
講過哈利列納於賺錢後成功增強球隊實力
熱刺今季唔講得少

而家精明既哈利叔幾個月後又重施故技
佢出庭時講到自己咁低B真係阿水都唔信佢

柏夫奴真高兜兜轉轉後都係走人對球隊影響唔大
始終佢可能一直已有離心
加上又可以收返750萬鎊
現階段睇絕對係3羸既交易

而家用派拿換沙夏對球隊仲著數
要知道佢地經常利用單箭頭為中場開路同埋做二傳
踢最前嗰個入波唔太多都唔係問題
所以就算沙夏埋門一腳既水準唔夠穩定
兼且可能養傷多過踢波
不過只要佢落場發揮到佢唔錯既二傳能力
佢對球隊既作用仲大過'柏高'

後防方面
借走有離心既哥魯加同埋巴斯桑治
而免費引入搏晒命既大隻佬尼爾遜
又係有著數
因為熱刺防線有時就係衰唔夠硬朗
唔寄望佢搏足咁多場
只要佢同京治可以輪流出場
兩個老鬼都應該可以繼續有水準表現

隨住曼城尋晚輸波
佢地又重燃爭標希望
不過始終覺得佢地唔夠曼市嗰兩隊咁疊馬
所以真係唔覺佢地可以爆到冷
不過要首度於英超成為倫敦一哥就幾審慎樂觀

2012-1-31

1)
車路士落實以900萬歐元引入迪布尼
不過隨即將佢將返去亨克

Comment:
波亞斯追左個小將幾個月終於追到手
一於繼續為長遠換血而做定準備
不過咁唔代表佢一定做得長

因為信油王有心搞青訓
不過更信佢對領隊冇咩耐性

2)
曼城被指打算以先借後買既形式羅致大衛比沙路
而布歷治就終於離隊,加盟新特蘭

Comment:
佢好波得來亦算幾有效率
又同文仙尼合作過
加上拿斯尼經過季初虛火後表現唔算好穩定
文仙尼可能旨意佢做大衛施華既替補

另一方面,曼城今個月真係勒緊褲頭帶做人
高層總算肯正視如果盤數唔掂
將來成績幾好都冇得踢歐洲賽既問題

3)
消息指伊亞昆達即將轉投錫耶納

Comment:
由阿馬利,東尼,馬高莫達,富斯圖羅斯......再輪到佢
干地由暑假等到而家
總算掃得七七八八
如果基利亞雷拉唔係傷左都怕且已經走埋

不過最搶手既卡錫反而仲留隊
原因怕且係祖記錯估轉會行情
將佢既2000萬鎊身價定得過高

4)
多蒙特同意以60萬鎊出售季尾約滿既19歲進攻中場艾斯菲特
佢只要通過體檢就落實轉戰英超,加盟阿仙奴

Comment:
馬高列奧斯加盟在即
加埋馬里奧葛斯傳左咁耐都未走
19歲仔既然冇機會上位仲唔出走咩

另一方面,兵工廠現時真係信得過既中場中球員
其實加埋只得桑治,艾迪達同埋韋舒亞3個
當中主力進攻既後兩者都係出名既玻璃腳
雲加俾60萬鎊買個希望都算搏得過

但問題係等到佢掂既時候
雲佩斯同埋禾確特可能已經過檔巴塞同埋車仔

p.s.:
今晚睇轉會市場 deadline 可能仲好睇過各地快車檔
雖然最終可能平淡告終......

2012-1-30

1)
利物浦被傳曾提出用卡路爾交換泰維斯或者丹巴巴亞

Comment:
級數更高既迪施高都要坐冷板
文仙尼又邊會肯接收狀態跌watt既卡路爾
始終佢有太多方法去踢走泰維斯

另一方面,哈利列納早前爆響口
暗示隨時唔使700萬鎊就可以挖走丹巴巴亞
如果利記咁樣換人
肯定蝕得仲慘過3年前羅比堅尼嗰鑊

其實佢近一個月既表現其實已經叫做有啲進步
上場羸曼聯既兩個入波都亦總算有間接功勞
與其現階段賤價放走佢
倒不如俾多啲時間佢

2)
雲加上星期被發現去睇熱刺對屈福特既足總盃賽事
英國傳媒指佢係親身觀察後者中堅馬里亞柏既表現
不過雲加就繼續聲稱唔會買人

而紐卡素早前亦被指打算以150萬鎊收購這名屈福特隊長
不過最終因為屈福特獅子開大口索價400萬鎊而告吹

Comment:
只係25歲既佢既可以踢中堅同埋右閘
英國傳媒話200萬鎊可以成交又好似幾抵買
不過佢既質素頂多岩踢英超中型班
對阿仙奴既幫助唔慌會大

反而另一邊比兵工廠更等人用既紐記
可能加碼後搞得掂佢
始終紐記既吸引力一定大過另一可能買家史雲斯

3)
紐卡素被指再次考慮引入艾利亞
甘崗既法國翼鋒 A.Knockaert 就自稱紐記打佢主意
而仲未搵到後衛既紐記就被指睇中丹麥新晉國腳奧高利

另一方面,阿倫史勿夫就被放逐到英甲既米爾頓凱恩斯
而出場機會不足既貝斯就可能轉投狼隊
不過究竟係借走抑或以300萬鎊賣斷就仲未知

Comment:
艾利亞勁到連利物浦同埋祖雲達斯都一直打佢主意
紐記成功機會真係唔高

最想講既係奧高利
據聞這名科特迪瓦裔19歲中堅用波唔錯
唔係嗰啲只係識大腳清波既一般貨色
過多幾年可能係另一個艾加
趁低吸納真係有得唸

不過隨住佢火速上位
佢既丹麥球會 FCN 兩個幾月前已經拿拿臨同佢續約到2016年
紐記唔俾多啲'誠意'都好難成事

2012-1-29

近幾日係咁睇波

英格蘭方面
利記接連橫掃曼徹斯特雙雄
論表現和曼城嗰場係比較好
羸唔到又係因為祖赫特好嘢

至於米卡李察士嗰下爭疑性手球就100%冇判錯
佢雖然係擋左嗰波落隻手到
但問題佢本身大字型咁舉高手
明顯有心想用手擋波
為左平衡根本唔係合理解釋

類似情況尋晚都有發生
艾加又係擋左個波落自己隻手
不過佢全程雙手垂低
球證見佢冇心手球而網開一面
當然執正既話就一定會輸12碼

講返尋晚場波
雙方整體表現都只係一般
大家都疊馬於中路搶波
令雙方多數以側擊為主
再加中距離遠射同埋死球偷雞
係好緊張但就好難話場波精彩

杜sir再次排出一個介乎3-6-1同埋5-4-1既陣式
好處係史基泰爾同埋艾加多左機會引球出擊
但後防中路人多唔代表防守有保證
分工唔好反而隨時走甩對手
尋晚又係好例子
當然左路兩條友失晒位又係抵鬧

兩隊中場既組織又係有問題
曼聯都仲算好啲
墮得最好既卡域克負責包底
前少少但都唔算上得好前既史高斯就主打控制節奏

而傑斯就當然四圍走搵機會
不過利記中路疊馬
就算移去左路又過唔到馬田基利
加上艾夫蘭助攻成日走左去啲死位
曼聯既左路明顯冇右路咁有威脅

曼聯於頭一個鐘既表現都好過利記
不過杜sir總算知錯能改
換入古治同埋查理阿當後明顯搶返個勢
雖一要彈既係佢之後換入比拿美
冇得留低既點都應該係似踢右閘多過右中場既唐寧
條友踢維拉都做唔到大佬
何況去到級數高唔止一班既利記

利記而家話就係挑戰雙冠
向好嗰方面睇就話球隊士氣好
至驚杜sir同埋班友過份集中搶盃
萬一再次返唔到前4
羸晒兩個盃仔都補唔返

西班牙方面
皇馬雖然輸左隻盃
不過今次真係輸波羸口碑
放手一縛縛得真係精彩
出局真係只因球證明顯偏幫

巴塞就算好似練左金鐘罩咁勁都總有佢既罩門
大巴士陣式可以修死佢地
好似畢爾包既前線餓狗搶屎咁對住佢地條防線又有得唸

唔好理佢地踢3個又或者4個後衛
總之隻翼唔好因為丹尼爾艾維斯既威脅而過份拉邊回防
否則最前既賓施馬又或者希古恩都變相會被孤立
要佢地人少打人多就肯定唔化算

而同巴塞鬥攻都唔係一定冇得唸
不過重點一定係兩側而唔係中路

巴塞防線始終唔算好穩
季初已經講過今季盡失西甲同埋歐聯唔係奇事
特別係西甲對手已慢慢搵到竅門對付佢地
加多少少運氣就足以令佢地唔見兩分
少數怕長計
摩連奴既頭號任務從來都只係捧盃
羸埋巴塞只係 bonus 同埋一啖氣

香港波方面
城南一和羸到嗰個另類既賀歲盃真係實至名歸
以波論波本身已經係最高
集訓亦早過其餘兩隊外隊
富力高原集訓後仲要未調整好狀態就到港

韓青雲應該上位在望
至於巴黎聖日耳門借返來嗰個山度士反而只係一般
其實眼前既城南一和仲未齊腳
加埋兩個本土主力同埋亞洲足球先生 Sasa
亞冠盃應該有料到

清水心跳方面
冇左龍格堡對佢地影響唔大
因為條友加盟以來只係踢得8場
隨時連默契都未夾到

佢地前線靠晒高原直泰同埋大前元紀
高木俊幸同埋伊藤翔就搵位後上
大腦當然係小野伸二

論組織力真係好好
真係有本事搓到入禁區
不過中前場幾乎盡係土炮就始終蝕底
所以佢地於J-League既火力只屬一般

南華今次繼續試陣
利馬初步睇來算係對辦
華人人腳其實就試無可試
佢地既人腳本身亦已經夠爭港甲有餘
上半季係咁試陣兼用少左外援
究竟係為左下季重返亞協而舖路
抑或真係高世安畫蛇添足
季尾自有定論

不過吳偉超過檔飛馬就有隱憂
祖爾同埋陳偉豪萬一有咩冬瓜豆腐
唯一可靠既替補就只有李志豪

不過既然冇得出場
小弟都同意吳偉超唔應該浪費時間
而家飛馬多左佢同埋同深水埗解約既細綽
後防既老問題真係有望解決
睇人腳同埋形勢肯定係最接近聯賽冠軍既一次

尋日下畫去左睇U-17鬥新加坡
由於對手質素一般而見唔到真章
不過謝朗軒,羅曉聰,菲臘比同埋黃駿軒都似乎唔錯
稍後有時間會再跟進多啲這班小將

而印尼仔似乎質素最高
尋日見到既羅沙同埋禾達拿幾好波既小朋友
原來星期五羸香港嗰場只係後備入替
而拿素遜既身體質素同埋埋門一腳都唔錯
唔知過多幾年會唔會成為另一個佩迪里
不過怕且佢唔會好似前輩咁來港搵食
因為當地聯賽發展而家仲好過香港

另一方面,尋日睇波最特別既係覺得自己去左印尼睇波
因為都有幾多印尼人去左睇波
仲要睇得勁投入
唸都冇唸過

2012-1-25

1)
前馬體會教練列仙奴落實接手格林納達

Comment:
格林納達既最大問題係攻力超唔掂
19場入12球既水準返西乙都唔掂
列仙奴當日教馬體會同埋華拉度列既時候
球隊既攻力都唔見得特別出色
佢可能只係格林納達高層臨急臨忙搵到既人選

2)
柏夫奴真高令人意外地同熱剌續約到下季尾

Comment:
既然冇大球會肯收留艾迪巴約
條友其實只係得返熱刺一個好選擇
季尾減人工,再被買斷似係必然結局

加上哈利列納一直都再想簽射手
以及而家柏夫奴真高又竟然續約

迪科爾就算把口話唔走
月尾前離隊既機會依然唔低
前題當然係哈利叔真係搵到替補
因為佢地雖然多數只係踢單箭頭陣式
不過依要有3個信得過既射手

3)
比耶列甸諾夫落實重返俄羅斯發展
加盟莫斯科斯巴達

另一方面,麥法頓就可能以借用形式加盟般尼

Comment:
比耶列甸洛夫當日身價高達890萬鎊
但近兩季明顯唔受重用
拖肥糖肯定蝕幾多
不過好彩莫斯科斯巴達俾得起錢
5至6折既價錢都應該收得返
隨時夠佢地為前線增兵
不過咁既價錢夠唔夠向史篤城收購堅韋尼鍾斯就係後話

事實上愛華頓今季火力一般
平均每場只係入到1球正好解釋佢地點解長期處於中下游
卡希爾踢到上場先開齋
耶高保又過檔布力般流浪後先識入波

球隊既頭號射手竟然只係入得嗰3球
仲要係巴尼斯,奧士文同埋維尼奧斯
一個係負責死球兼12碼既左閘
另一個係永遠既中場二打六
最後一個係臨時拉伕既希臘牛奶咀箭頭
點睇都唔可以下半季倚靠佢地太多

另一方面,麥法頓重創後可能真係一沉不起
莫耶斯簽左佢3個月以來都只係用過佢3次
當中仲有兩次係英超後備落場
中前場咁等人用都唔肯用佢
狀態擺明有問題

既然同佢只係簽約到季尾
佢對球隊又冇咩貢獻
放走佢鬆磅都唔出奇

2012-1-24

幾場波想講......

1) 富咸對紐卡素

格夫里雖然入左個世界波
不過論攔截
佢作為一個防中其實唔算稱職
佢既攻守水準其實只屬英冠水平
唔值得一個正選席位

其實高士寧活動範圍仲大過格夫里
加上俾波亦準過佢
係衰有時攔截會忽然過火同埋身體質素唔算太好
於迪奧迪未回巢前
柏度或者值得考慮俾佢試下

2) 阿仙奴對曼聯

由於兩邊防線都唔多穩陣
場波其實都多精彩攻門
只係雙方既埋門一腳都唔理想
當中失左較多 easy 餐士既兵工廠亦因為咁而聯賽3連敗

沙格拿斷腳已有100日
臨時拉伕既佐羅同埋史基拿斯爆鑊頻頻
雲加都唔肯去預備組搵個替工右閘
而家先終於等到佢提昇恩拿尼斯上一隊
但偏偏沙格拿原來已經復出在即
真係諷刺

講起恩拿尼斯
這名好似係中國同埋希臘既混血小將
細個既時候其實踢過中堅,右閘同埋防中3個位置
不過由於身高問題
佢近年已經專注踢右閘
今場英超地標戰雖然唔算踢得好好
不過肯定好過佐羅

場波賽後既主角始終係
換走張伯倫令球隊反勝為敗既雲加
佢明確犯左雙重錯誤
一係佢以張伯倫狀態唔足
而已有疲態為由而換人
但肉眼所見嗰刻佢當時既體能其實唔比其他球員差
而更重要係佢係當晚兵工廠踢得最好嗰個

二係換入既點解會係艾沙維
佢既狀態仲差過班拿約
既幫唔到前線既雲佩斯
亦幫唔到後面既華美倫
佢入場後球隊反而死晒火
加埋失波前只係好 hea 咁做樣追下華倫西亞
完全反映雲加今次換人有幾失敗

另一方面,韋碧克再次於大戰有波入
反映佢真係有條件同小豆爭正選
續約條件只要唔好企硬咁高
費sir點捨得唔要佢
但這亦意味奧雲更加冇定企
不過段估佢唔肯屈就白禮頓掛

3) 南華對清水心跳

狀態佔優既南華同客隊各踢半場好波
但諷刺既係反而入唔到波兼有失波

南華上半場以最擅長既陣式4-2-3-1打突擊
大把發揮空間
李威廉同埋歐陽耀沖都好活躍
而新兵利馬因為有兩個防中為佢做晒粗重嘢
專心分波亦有唔錯既表現
最終入唔到波只因基士文真係冇態

下半場南華收起白鶴而用多個箭頭C7
表現其實冇上半場咁好

一來心跳因為有小野伸二後備落場而改善左用波
二來佢地亦冇上半場壓得咁前
南華亦因而少左機會反擊
佢地下半場既主要威脅都來自死球
但利馬既死球落點冇強哥咁有威脅
最終反而入到一球已經算有交代

南華下場同廣州富力爭季軍
考慮到後者早前進行高原集訓
而家處於適應期而狀態不足
加上龍門唔穩
雞屎文雖然冇態
不過入返球波賀收山都唔係冇得唸

p.s.:
新年快樂!!!

2012-1-21

1)
盧森保高因為細哨於集訓期間帶女返集宿酒店爆房
加上近日多次以訓得唔好為理由而唔出席操練
頂佢唔順下而要求法林明高同佢解約
不過球會高層已經拒絕咁做

Comment:
南美球會簽星級球員又或者搵名宿出任管理層
好多時都要靠贊助商泵水
不過今次贊助商已經拖數5個月
已經令球會要拖糧至少160萬歐元
咁既情況下佢地又邊有條件同細哨解約

2)
利物浦再次被傳睇中高路仙尼
而狼隊就被指以正選席位吸引格夫里過檔

Comment:
紐記中後場增兵已經唔算順利
史堤芬泰萊同埋迪奧迪又因唔同原因而缺陣
萬一艾殊利再次認錢唔認人
告魯爾守得再好都冇用

話說回頭
杜sir近月咬住唔放既高路仙尼只係得返15個月合約
格夫里更加係季尾就約滿
點解一路都冇風聲紐記同佢地傾續約

3)
大連阿爾濱落實以50萬歐元從奧丹斯引入 P.烏達卡

Comment:
佢雖然冇佢阿哥咁勁
埋門一腳亦平平無奇
不過總算係一個高速既尼日利亞新晉國腳
以咁既價錢就買到都算係咁

2012-1-20 (2)

1)
洛杉磯銀河以及紐約紅牛都被指打算引入迪比亞路
而前者就承認有興趣接收林伯特

Comment:
你估而家踢表現賽咩?
使唔使咁多老嘢呀!

2)
英國傳媒指巴黎聖日耳門有望羅致泰維斯
而曼城亦準備盡快 close file
而肥安更話15日就夠條麻煩友操起狀態

Comment:
佢係就係 keep 到身型冇走樣
不過始終近幾個月打 golf 多過踢波
等到佢上力可能已經到季尾

3)
羅拔斯可能被布力般流浪外借去雷丁一個月

Comment:
條友以球員身份都居然可以有咁多時間客串講波
有幾唔受重用都真係好明顯
加上佢都已經34歲
返英冠應該已經係佢於英格蘭既最好出路

p.s.:
龍格堡果然甩底......

2012-1-20 (1)

1)
報導指曼城雖然加尼祖迪莊1/3人工
週薪由7萬5000鎊加到10萬鎊
不過佢依然滿意
消息指文仙尼覺得佢太貪而決定季尾賣走佢

Comment:
只係做耶耶托尼同埋巴利既替工都有10萬鎊週薪
咁既條件仲可以去邊到搵呀?

2)
昆士伯流浪已經落實以300萬鎊接收奧奴夏
而佢地亦被指就泰禾既轉會費同AC米蘭傾掂數

Comment:
加埋應該會成事既阿歷士
成條防線忽然間多左3個新兵
質素問題係降決左
不過默契又係另一個問題

3)
英國傳媒指莫耶斯要求愛華頓董事局籌旗500鎊
令佢可以於月尾引入堅韋尼鍾斯

Comment:
自從佩利斯簽左哥治
堅韋尼鍾斯就多數只係有份睇波
就算佩利斯把口講到佢有幾重要都係假
離隊只係時間問題

不過拖肥糖高層如果係撲到水既話
就一早撲左啦
除非當時人仲想踢英超
否則佢地點同中東球會爭呀

p.s.:
雖然香港嗰邊公布既名單包括龍格堡
不過直至前晚
佢應該仍然以養傷為由而仲未返清水心跳報到
除非佢出人意表咁直飛香港同球隊會合
否則真係要有心理準備睇唔到佢
兩個字:失望!