2008-3-31 (2)

1)
先來幾段有關利物浦既轉會消息:

(多謝米堡迷 ck 報料)
米堡既卡達莫被傳成為利記500萬鎊既增兵對象
(另一版本係出700萬鎊連阿當莊臣都買埋)

小弟認為佢似足初出道既謝拉特
無論踢法,體能,領導才能,甚至乎有時略為過火既攔截都好似
小弟打 Football Manager 都鍾意買佢做謝拉特既替補
如果利記買得成都唔錯

另外,利記亦被指已接觸艾朗連儂
更有未經證實既消息指雙方連 pre-contract 都簽埋

講完傳聞就講0的已落實既消息
賓尼迪斯透露利記將有3個新球員加盟
而其中一人仲有力即刻爭正選
消息指佢就係史浩克04既22歲巴西右閘拉菲爾

而另外兩個就會係年青球員
一個叫迪奧高,來自巴西
另一個就來自阿根廷
(截稿時未有其他資料,請見諒)

而有入就自然有出
因為賓尼迪斯離隊既壓力細左
已經唔想再等新來臨既哥治被指即將轉投曼城

2)
跟住到車路士......

杜奧巴被指好可能跟隨摩連奴加盟國米

而佢地就繼續增兵
被指準備向馬略卡出價1400萬鎊買委內瑞拉攻擊中場艾蘭高

而其餘目標仲包括荷蘭 U-17 射手 Shayton Curiel
車仔已經邀請這個16歲既小朋友4月中參加試腳

另一方面,佢地同埋阿仙奴都派左球探去睇
飛燕諾既進攻中場迪根士文
20歲既佢出生於加拿大
但最終選擇代表荷蘭出賽

3)
而阿仙奴方面
佢地除左同車路士爭迪根士文之外

亦被指將於暑假向利華古遜出價1000萬鎊買瑞士攻擊中場巴尼達
另外,費文尼透露同阿仙奴接近達成續約協議

4)
之後就係熱刺......

維拉利爾方面證實熱刺有興趣買佢地既龍門迪亞高盧比斯
而由於維拉冇能力負擔卡臣既900萬鎊轉會費
消息指熱刺亦有可能打佢主意
不過小弟認為機會最大既好可能係愛斯賓奴既卡文尼

而拉莫斯一旦留唔住貝碧托夫
就被指考慮向馬體會出價700萬鎊買科蘭
或者向哈化柏林出價600萬鎊買彭達歷

其他增兵人選仲包括費倫天拿既阿根廷左中場辛坦拿

另一方面,紐卡素既尼索比亞再被指會轉去白鹿徑搵食

而有入自然有出
有消息指拉莫斯已 update 佢既清貨名單
當中繼續有保羅羅賓遜
亦有戴臣,侯度史東,贊拿斯同埋艾朗連儂

紐記早前被傳有興趣以700萬鎊買戴臣
而家又有消息指佢地準備出價800萬鎊買艾朗連儂
不過咁就要同利記鬥快

5)
而紐卡素除左戴臣同埋艾朗連儂之外
3月頭講過佢地睇中聖伊天既射手 B.高美斯
經過多次觀察後
消息指基瑾準備出價900萬鎊買人

另一方面,勢必離隊既卡域克再被傳願意轉投紐卡素
不過佢高昂既轉會費就成為交易既障礙

6)
卡比路因向法庭隱瞞資料而面臨被起訴

7)
羅馬市如果再發生暴力事件
佢地將要負上失去08-09球季歐聯決賽既主辦權

8)
雲達沙可能趕及鬥羅馬
但主隊既托迪就幾乎肯定會缺陣

9)
米堡被指有意向樸茅出價250萬鎊買桑恩戴維斯

10)
沙夏一直被指將被曼聯放棄
最新傳聞係羅馬願意接收佢

2008-3-31 (1)

兩場波想講:

1) 保頓對阿仙奴

形勢已經比曼聯失多6分
點知對尅星保頓又要苦戰
半場輸兩球仲要踢少個
雲加眼見下半場已經踢左1/3都記錄不變
反正場波和都幾乎要同聯賽冠軍講再見
毅然將 '4-3-2' 轉為 '3-3-3' 陣式
豁出去搏一次
結果略為有運之下戲劇性羸3:2
抵讚!

0的人經常讚有摩連奴領軍既車路士
同埋曼聯既足球先至有霸氣
阿仙奴靠既只係活力
但而家連皇者先有既絕地反擊都有得出賣
仲有邊個敢睇少佢地
話佢地冇霸氣

班兵仔成季遇過幾次小低潮都可以即刻反彈
仲一度 lead 住曼聯5分
小弟都唸過只要雲加唔貪心同時想要埋歐聯
英超冠軍都幾穩陣

不過人算不如天算
伊度亞度既慘劇令班兵仔幾受影響
條氣都打滯埋
加上傷兵,歐聯同埋後防接連失準
而家被曼聯反超前6分
連車仔都過埋佢地頭
好彩退無可退之下
上至雲加,下至班球員終於識醒返

雖然費 sir 老謀深算
而對上一次佢老人家大好形勢
去到最後幾場先臨尾香既例子
仲要數到91-92年最後一季英甲
(註:超聯同埋英冠係之後因應電視轉播而有既比賽)

但既然阿仙奴可以 lead 住5分都倒輸返6分
曼聯或者車仔又點解唔可以
而機會只會留俾肯付出既人
班兵仔今場之後又咩士氣都反晒0黎
餘下只得6場英超
場場當決賽踢
impossible 可能只係 nothing

無論今季既結果係點
都起碼及時振作過
問心無愧
夜晚都應該訓得著

有0的人好似拉莫斯既上手祖爾
口口聲聲話自己有料又做到野
幾個月前睇佢帶隊主場對維拉輸緊 1:4
心唸大限將至
即刻面如死灰
放棄(或者弱者)兩個字已經隱約印左0係額頭
羅比堅尼當時仲肉緊過佢
就知咩野人唔佩做皇者

2) 利物浦對愛華頓

羸波唔意外
因為自從賓尼迪斯終於執靚隊波(正選11人)之後
只要佢地當中冇人發波瘟同埋發神經
成隊波既戰鬥力基本上幾強

上半場托利斯先開記錄
真係要多謝身肥步重兼冇腳法既耶高保
佢夠膽死學人轉身後腳過波
睇慢鏡既時候
小弟即刻聯想到 Stephy 唱 live
都係0個3個字:唔知醜

雖則拜對手出錯入波
但其實成個上半場
利記都係圍攻對手
謝拉特0個腳靚窩利中柱真係冇運

因為唔多唔少要留力歐聯
下半場利記攻勢明顯放緩
不過對手中前場唔齊腳
只可以憑死球偷雞
但對住冇發波瘟既拉爾拿
就整定冇運行

食埋粒拖肥糖之後
前4(其實應該叫第4)應該好穩陣
之後歐聯就要見步行步
以佢地而家既狀態
唔係冇機
當場唔可以睇少信心同埋士氣都返晒來既兵工廠

兩隊大戰可期
小弟到而家都依然認為邊隊過關
就可以直入決賽

P.S.:
1)
紐記場波只睇左精華
因為小弟暫時都未搵到個 blog 既讀者當中有熱刺迷
所以除左恭喜之外
暫時唔想講任何野

2)
星期六,日同埋今日有部份轉會消息未得閒講
今晚(應該有) part 2 再講......

2008-3-29

1)
利物浦班主吉列承認同拍檔希斯己經反面
佢兩個於 DIC 準備收購利物浦股份後
因為後者阻止前者出讓股份而關係破裂

2)
西班牙傳媒指賓尼迪斯同時得到
皇馬,巴塞隆拿,馬體會同埋華倫西亞既青睞

3)
摩連奴已到左米蘭同國米高層傾下季合作

4)
2009-2010年球季既歐聯決賽
將會於皇馬既班拿貝球場進行

5)
尹高爾同阿爾克瑪爾達成協議
將於季尾離隊

6)
列哈格同希臘足總續約至2012年

7)
雖然朗拿甸奴既經理人否認細哨會離隊
但熱刺就成為最新一支同佢扯上關係既球隊

8)
車路士將分別於7月23號同埋29號
去廣州同埋馬來西亞踢表演賽

而消息指車仔好有可能
於7月26號去澳門踢多場表演賽

另一方面,本地足總將於7月尾以及8月頭
搞奧運足球4角賽
所以前後既一星期都唔會有其他外隊比賽
變相否定左車仔訪港既可能

9)
紐卡素既艾美奧比同埋打呲郡既皮雅臣
以借用身份加盟史篤城至季尾

10)
馬斯查蘭奴承認行為不檢既罪名
將停賽3場

11)
格蘭莊臣否認會轉投 'Big 4' 球會
以增加入選英格蘭既機會
變相否認佢會轉投曼聯取代加利仔既傳聞

2008-3-28 (2)

想講下法國對英格蘭場波......

先講法國
杜明尼治大概已搵到心目中既最佳陣式同埋陣容

由於踢06世界盃既時候仲有施丹
球隊以當代球王加上列貝利以及馬路達踢3個進攻中場
去支援亨利
韋拉同埋馬基里尼兩個防中就負責 back up
好明顯係一個 4-2-3-1 陣

但隨住施丹退休
前線又有例如賓施馬更高質既前鋒可供選擇
杜明尼治試左幾場之後已經開始用 4-4-2 陣式

而隨住馬路達今季咁沉
法國既組織進攻既重擔就落在列貝利身上
以佢而家既狀態
加上亨利以及安歷卡(或者係賓施馬)
總可以帶俾對手一定程度既威脅

小弟認為法國而家既隱憂反而係後防
馬基里尼同埋韋拉都年事以高兼傷病纏身
替補既杜拿蘭同埋兩個迪亞拉
質素唔夠兩個前輩之餘
亦唔夠經驗
費文尼又唔見得特別受重用

06年法國自淘汰賽起越踢越好
一對防中絕對係無名英雄
小弟認為當時馬基里尼同埋韋拉既重要性絕對不下於施丹
但而家睇佢兩個真係唔多似可以重拾水準

而後防既加拿斯近況沉
加上杜林越來越唔掂
(小弟甚至認為佢係全隊既最大弱點)
由中場起既中路防守咁唔穩陣
隨時令佢地負上沉重既代價

至於英格蘭
先講上半場
好明顯卡比路會為佢既最強人腳以 4-2-3-1 為藍本
前線只用朗尼踢單箭頭未嘗不可
因為令人好有信心既前鋒真係只得佢

中場方面
卡比路似乎於領軍第二場波
就決心要解決謝拉特同埋林伯特唔能夠共存既難題
因為陣式上卡比路係用兩個防中去 back up　一個進攻中場
謝拉特同埋林伯特同時出場既機會唔大
艾歷臣同埋麥卡倫應該好慚愧

消息指林伯特於開波前就已經返左酒店
唔知係傷病定係另有內情
小弟未得閒去 check
小弟只知道睇謝拉特上半場既表現幾 sharp
有巴利同埋夏格維斯同佢做 back up
令佢可以專心進攻

不過可能由於謝拉特太 sharp
就令小弟覺得碧咸同埋祖高爾變得暗淡左少少
前者可能係唔夠狀態
但後者就似乎要習慣下比之前更集中於左路進攻

後防方面
米卡李察士只要冇傷一定可以壓倒布朗踢正選
到時佢同埋左路既艾殊利高爾就可以一齊後上助攻
加埋碧咸同埋祖高爾
英格蘭最少都仲有兩翼側擊睇下
但一對閘都咁有助攻力
就令到一對防中既回防補位變得更重要

龍門方面反而應該係卡比路最大既難題
咁多個龍門都冇一個係世界級既
而就算國內再年青既赫特同埋甘普都唔見得好掂
可預期龍門問題會困擾英格蘭至少多幾年

而下半場卡比路改踢　４－４－２
就只有簡單一個好處
冇左謝拉特後上攻堅
單用哥治屈機唔見得係上算

不過雖然佢地下半場人腳唔算好
依然好多時間控球在腳
（全場比主隊多大約１０％既控球時間）
睇得出卡比路要求球員比艾歷臣同埋麥卡倫時代更注重控球在腳

卡比路教左兩場波
就已經做左上兩手做幾年都做唔到既野
搵到卡比路接手
似乎係英格蘭足總近年除左賺錢以外最叻既野

2008-3-28 (1)

1)
西班牙傳媒指巴塞隆拿可能以1200萬鎊既價錢
將細哨賤賣到車路士

更有另一個版本指巴塞隆拿為左減輕薪酬負擔
有可能俾佢自由轉會

2)
沙維奧拿被指係利物浦既600萬鎊增兵對象

另一方面,自懷斯暗示考慮離隊後
佢再被指可能以350萬鎊既價錢轉投紐卡素

3)
雖然紐卡素被傳已為馬田斯一旦離隊而作好兩手準備
消息指般尼茅夫既威爾斯18歲射手 Sam Vokes
同埋雷耶斯都成為紐記既考慮人選
但主角馬田斯就表明冇意思提出轉會

4)
伊雲斯表示考慮正式轉會到新特蘭

另一方面,消息指戴倫賓特成為黑貓1100萬鎊既增兵對象

5)
消息指阿仙奴一旦冇左費文尼
就可能向費倫天拿出價500萬鎊
買塞爾維亞國腳 Zdravko Kuzmanovic 作為替補

6)
夏美艾天托普由於斷左蹠骨
不但要提早收咧
更好可能缺席歐國盃決賽週賽事

7)
米堡小將阿當莊臣
成為熱刺500萬鎊既增兵對象

而佢地既龍門舒華沙可能以自由身轉投些路迪

8)
卡希爾好可能因傷要提早收咧

9)
保頓成為最新一支同羅拔斯扯上關係既球隊

10)
伊美梅賓沙反對被借用至李斯特城

11)
沙格拿將要養傷3星期

2008-3-27 (2)

1)
懷斯暗示可能為左更多既出場機會而於季尾離隊

另一方面,西班牙傳媒指沙比艾朗素
成為皇馬既800萬鎊增兵對象
消息指皇馬仲願意借用新晉西班牙國腳迪拿列特作為交易條件

2)
馬斯查蘭奴被控行為不檢

3)
熱刺一對後備中堅戴臣同埋卡保奧可能離隊
前者被指成為紐卡素700萬鎊既羅致對象
後者就可能轉投好鍾意搵法國外援既祖雲達斯

4)
布力般流浪成為最新一支同保拿特扯上關係既球隊

5)
早前講過包括 B.胡禮菲臘斯(車仔0個個胡禮菲臘斯既細佬)
在內既幾個修咸頓球員涉嫌偷竊
佢同埋球隊隊長戴亞正式被警方拘捕

6)
伊美梅賓沙可能以借用身份由曼城轉投李斯特城

7)
消息指士砵亭睇中米堡既洛查碧克

8)
打呲郡可能於季尾買斷埃及中場賀森加利
小弟就認為成事機會未必咁大

9)
樸茨茅夫可能於季尾買斷巴路士

10)
羅馬今季條防線明顯弱左
布加勒斯戴拿模既羅馬尼亞後衛莫迪
就被指成為佢地350萬鎊既增兵對象

11)
沙維奧拿可能以600萬鎊既價錢轉投拿玻里

12)
比利時18歲中場 Marouane Fellaini
被指可能離開標準烈治
可能既目的地包括拜仁,熱刺同埋愛華頓

13)
消息指哥利斯馬既身價已被炒至2500萬鎊

14)
阿古蘭尼否認會轉投羅馬

P.S.:
因為時間關係
聽日先會講法國對英格蘭既賽後感
場波雖然唔齊腳
但依然幾有參考價值

而尋日其實有幾場波值得講下:
當中包括中國主場捉到鹿都唔識脫角
荷蘭作客近況不濟既奧地利都可以先失3球再反勝4:3
......

2008-3-27 (1)

就幾日前紐卡素對富咸
同埋曼聯對利物浦
原來紐迷 sammysir 尋晚留言於 '2008-3-24 (1)'
講左佢精要既分析
佢仲順便 preview 埋下場紐卡素作客熱刺

為左唔好令大家走寶
小弟將佢既 comment 'copy and paste'
當係一個新 post
當然小弟亦會多口講埋一份......



sammysir said...
遲了reply,希望有人睇到啦!

寫一些關於下場對熱刺的少少分析

紐記最近2場排433,皆從弱旅身上搶到4分,但我覺得暫時這個陣式還未受到考驗,今屆或上屆我地能3次打敗熱刺,我覺得是有機會起碼取得一分的,不過中場3 個防中要補位快些,記得對伯明翰一役的上半場,這個陣式已被一個拿臣不時作出反擊,如果當時不是他被踢傷離場,下半場未必能追平.

熱刺既中場可以用波既球員不多,但一個艾朗連儂再加多個貝碧托夫已足夠玩弄一對仍末夠默契既中堅taylor及faye,所以三個防中既補位真的很重要,上場對富咸,佢地三個就做得幾好,而轉型中既奧雲因有維度卡在前面的掩護,在位置上稍為墜後幫手分波及控波對球隊的進攻組織上亦有建樹,起碼前場可以靠 martins幫手在左路爆入去禁區,右面有謝列美同beye助攻助守,從上場對富咸所見,發覺謝列美可以控制到中場造波節奏,跟波既速度亦教以前快,亦都幫輕了畢特在中場的工作,不用既常上前做分波,又要做防中,唔上唔落,吃力不討好,

我估這個陣式應該都可以抗衡到熱刺既進攻,起碼前鋒有三個頂住,可以使熱刺既中後場不會壓得咁上,不過在後備方面,我覺得應該加入杜夫,起碼在變陣442或451時,可以多一個選擇



sammysir said...
另外我都有睇曼聯vs利物浦這場雙紅大戰

整場波我覺得利記既形勢已經被曼聯比下去,當時曼聯真的壓得好上..不過關鍵真的是打少個,但我認為當時就算輸一球時都可以靠變陣追回,可惜變陣卻不夠大膽..

當時換入班拿約都是一個幾好既調動,在左面可以做到攻勢,不過我仍嫌覺得保守一些,其實打少個既時候,與其保留一些造波型既球員,不如換入一些可以幫手屈機既球員,我覺得當時古積特同沙比艾朗素既表現都好一般,掂波又不多,其實可以早些換入懷斯及高治去代替佢地,起碼可以利用罰球,角球,界外球搏下,我估會有機會追平的,如果當時能追平,就算曼聯換入拿尼及泰維斯,以利記球員出名打生死戰既士氣,是有機會守和的..

當然,以上都是事後孔明的分析...



小弟既意見......

紐卡素方面:

1)
以紐記而家既人腳
踢 4-3-3 其實係有幾大既改善空間

先講中場
對伯明翰場波上半場失晒勢
原因唔止係人地既拿臣醒
主因係工兵梅姆巴既表現
將紐記中場班前輩比下去
當然紐記班友唔慣亦係主因

而果睇下其他擅踢 4-3-3 既球隊
例如巴塞隆拿,荷蘭國家隊,又或者近期既利物浦
就會發覺一個主要既進攻起點係必須既
睇謝拉特就已經知
而進攻點後面就當然要搵人去 back up 啦

而家既紐記其實係冇一個信得過既進攻中場
謝列美,巴頓同埋畢特根本就唔係0個類球員
安利似乎係唯一既好選擇

前場既3個箭頭
中間多數搵個主力射手
維度卡明顯就係基瑾鍾意0個類有二傳能力既前鋒
有得踢好正常
不過走緊下報既佢下季仲有冇份就真係好難講

而其餘既奧雲同埋馬田斯
前者要墮後幫手駁腳
後者就主力於左路用速度屈機
小弟覺得好似有少少浪費左佢地

2)
至於佢地下場對熱刺
小弟認為佢地有本錢要最少1分
因為對手而家只係踢風流波
起碼講鬥心紐記真係贏晒
不過到時班後衛會唔會又爆鑊就真係未知之數

3)
只係估紐記後衛同埋保羅羅賓遜
邊一方爆鑊比較多已經夠過隱

4)
小弟都同意杜夫(其實仲有安利)
應該最少有份做後備

利物浦方面:

1)
輸1球兼踢少個
下半場初段力求唔再多失
之後先同曼聯搏十幾分鐘
其實係被迫保守既唸法
今次唔怪得賓尼迪斯

2)
不過小弟都贊成哥治應該早0的出場
代替有輕傷既托利斯或者古治

2008-3-26

1)
里奧費甸南今晚將以隊長身份
帶領英格蘭同法國友賽
但咁唔代表佢會於世界盃外圍賽時做隊長
因為卡比路表明而家只係俾佢地 rotate 做隊長
唔會咁快做任何決定

另一方面,卡比路亦表明碧咸今晚會第100次為英格蘭上陣
但就冇透露佢會唔會正選出場

2)
鄧納東尼因為唔同意意大利足總
提出既既續約條款而仲未肯續約

3)
杜斯山度士同埋奧雲被指成為曼城既增兵對象
其中曼城可能提出先於下季借用前者一季
岩用先再提出買斷

4)
曼城落實於5月中到新加坡同佢地既代表隊踢兩場波
可能因而順道訪港

5)
貝碧托夫第4度當選保加利亞足球先生

6)
希丁克落實下季轉投馬體會
仲簽約5年

7)
賓尼迪斯表示將約見總球證夏基特
以了解馬斯查蘭奴既被逐原因

另一方面,足總將會睇電視重播做 review
以決定是否對當時人加監
而有消息指佢會被罰款高達10萬鎊

8)
基拔圖施華表示阿仙奴陣中既球員依然支持加拿斯

9)
比歷將邀請伊度亞度達施華
去克羅地亞既集訓營同埋隨隊出發

10)
消息指安尼捷比最終會選擇代表尼日利亞出賽

11)
新特蘭斟唔掂科蘭
好可能改向布力般流浪出價350萬鎊買羅拔斯

12)
維拉被指可能向熱刺出價1200萬鎊買戴倫賓特

13)
安梳爾被指可能以借用形式轉投諾域治

14)
紐卡素被傳將向伯明翰出價650萬鎊買麥法頓

15)
英,法兩地傳媒都指賓艾化成為阿仙奴1000萬鎊既羅致對象

16)
拿玻里既21歲本土後衛杜米斯
可能以500萬鎊既價錢轉投費倫天拿

17)
國米被指可能向祖雲達斯出價1100萬鎊買基亞連尼

而Le Mans 既塞爾維亞後衛 Marko Basa 被指
成為祖雲達斯400萬鎊既替補人選

18)
蘇蘭奴否認轉戰美職盟

19)
基維爾否認將以自由身轉投些路迪

2008-3-25

1)
軒迪克同俄羅斯足總續約至2010年
消息指佢亦已經解決同荷蘭稅局之間既稅務問題

2)
瑞典左閘艾文因膝頭重創而將缺席今屆歐洲國家盃

3)
巴勒莫表明唔準備賣走阿瑪利

4)
西班牙傳媒指華倫西亞準備向AC米蘭出價買艾比亞迪

5)
基瑾表示高層應為奧雲提供新合約

另一方面,阿仙奴被指準備向紐卡素出價1000萬鎊買馬田斯

6)
祖雲達斯成為最新一支同路爾斯法比安奴扯上關係既球隊
意大利傳媒指佢地願意出價1500萬鎊

另外,祖記亦被傳可能向圖盧茲出價1100萬鎊買艾文達

7)
打呲郡領隊祖維爾長達1小時既自拍SM影片
唔知點解會流落英國傳媒手中
打呲郡就力撐件事唔影響佢於隊中既地位

8)
由於雲佬擅自離隊返荷蘭養傷
令佢同球隊關係急轉直下
消息更指皇馬可能出價1800萬鎊買亨特拿去取代佢

9)
意大利傳媒指基拿甸奴為求更多既出場機會
可能於季後轉投羅馬

10)
森保沙被指可能回流賓菲加
轉會費約1200萬鎊

11)
拉素被指可能於季尾向曼城出價800萬鎊買斷路蘭度比安基

12)
熱那亞24歲法國中場干高被指成為國米400萬鎊既增兵對象

13)
美迪反對被保頓外借到葉士域治

14)
西班牙傳媒指馬體會未能成功引入拉爾拿
將改向馬略卡出價700萬鎊買佢地既西班牙龍門莫亞

15)
川迪既剛果前鋒古科被指
成為維拉利爾同埋愛斯賓奴既150萬鎊羅致目標

16)
施維斯達由於於曼聯已失寵
傳聞基瑾將向曼聯開價200萬鎊買人

17)
車路士 U-21 英格蘭後衛文捷尼可能於季尾要求轉會

18)
消息指一旦富咸護級失敗
保拿特將以300萬鎊既價錢轉投維拉

19)
曼城被傳依然準備於季尾出價3200萬鎊買貝碧托夫

20)
科蘭將拒絕新特蘭既斟酌

2008-3-24 (2)

3日既 round-up......

1)
路爾斯法比安奴既合約原來講明
只要有球會肯出價870萬鎊
西維爾就一定要放人

消息指羅馬,AC米蘭,曼城同埋熱刺都準備於季尾出價買人
相對於本土既皇馬
西維爾應該傾向將佢賣到其他聯賽

2)
上一段講過熱刺想簽路爾斯法比安奴
其實傳聞佢地仲有其他考慮人選
當中包括韋拿,艾文達同埋迪亞高米列圖

3)
土耳其國家隊教練泰林
被指成為最新一個車路士下季領隊既候選人

4)
利物浦被指睇中賓特尼
將於季尾以賓納特再加現金
以一個總值1200萬鎊既 package 打動布力般流浪放人
消息指利記仲會以6萬鎊週薪利誘佢簽約

5)
里賈納後衛莫迪斯杜,羅馬中場阿古蘭尼
同埋波爾多19歲射手奧伯頓
都被傳將於季尾轉投祖雲達斯
其中後者既身價仲高達1000萬鎊

6)
摩連奴被傳已同國米傾緊下季接手既可能性

7)
西班牙傳媒指高路仙尼可能於下季轉投巴塞隆拿

8)
意大利傳媒指費文尼可能於下季轉投AC米蘭
原因係紅黑兵團願意提供一份週薪超過5萬鎊既合約
兼同意費文尼可以得到一筆簽字費

9)
華倫西恩斯既22歲後衛 R.Matter
被指成為布力般流浪既增兵對象

10)
森遜被曼聯外借到葉士域治

11)
皇馬被指將向波圖出價2000萬鎊買哥利斯馬

12)
卡臣同埋卻克蘭因傷退隊
令到保羅羅賓遜同埋格蘭可以重返代表隊

13)
占邦達既經理人表示希望同熱刺傾續約
佢表示紐卡素雖然有興趣簽占邦達
但因紐記內部好亂
基瑾仲要唔知下季仲有冇得教
所以占邦達傾向留隊

14)
列文表示如果季尾有好 offer
佢可能會踢多一至兩季
否則佢可能會選擇掛靴

15)
古度連被巴勒莫開除
由佢既上手哥蘭托路接手
佢兩個加埋已經被巴勒莫炒左 n 次
之後又食返 n 次回頭草

情況就好似香港既陳鴻平
佢教左愉園(同埋被炒左) n 次

以愉園而家既成績
小弟估佢下季可能又......

16)
班士利門將軒斯梅拿再被指
將以100萬鎊既轉會費轉投阿仙奴

17)
堅尼證實卡迪夫城曾於1月
向新特蘭開價想簽回射手查柏
但被堅尼拒絕

18)
保羅羅賓遜再被傳將於季尾轉投米堡

另一方面,有消息指維拉一旦就卡臣既轉會費
唔能夠同利物浦達成協議
就會轉向保羅羅賓遜埋手

2008-3-24 (1)

3場波想講:

1) 曼聯對利物浦

小弟 preview 講過利記近況咁好
有力去奧脫福要返1分

不過多得馬斯查蘭奴同埋拉爾拿兩個傻仔
就註定輸波收場

先講傻仔1號馬斯查蘭奴
小弟唔介意佢過勇攔截領第一張黃牌
不過之後佢仲夠膽死去惹賓納特
都未攞第二張黃牌
人地做球證既已經好俾面

小弟認為0個時既佢已經唔適合繼續比賽
如果後備席有其他防中可供選擇
賓尼迪斯應該一早就換走佢

到托利斯去同球證出口術領黃牌
馬斯查蘭奴又走過去衰多口
沙比艾朗素只係扯一扯佢件衫
見勸佢唔掂就只係掛住準備開波
小弟心唸:究竟開波緊要0的,定係唔使踢少個緊要0的?

已經輸緊一球既利記咁就踢少個
場波亦已經 over
成件事,身為行記迷既小弟
絲毫冇反對馬斯查蘭奴既兩張黃牌
小弟估佢最終仲要停夠4場

跟住講傻仔2號拉爾拿
小弟知佢全場有7個 save
但頭兩球出迎既時間都咁差
又試過幾乎拍個波入自己龍門,開波出界,拋錯波俾對手......
幾乎咩野蝦碌野都有佢份
就不禁令小弟唸:
幾時利記先會搵到個好似當 fit 既簡尼,保方,施治,舒米高
咁令人有信心既龍門

曼聯本身場波唔見發揮得好好
不過利記咁樣讓波
人地想唔羸都難

P.S.:
最後要讚費 sir 幾句
佢見利記於下半場中段準備搏一舖既時候
即刻以蘭尼同埋泰維斯
入替傑斯同埋安達臣
繼續壓住利記來踢
咁既調動
小弟肯定英超好多領隊都唔識咁做

2) 車路士對阿仙奴

成場波主隊略佔優勢
上半場因為球證走漏眼而未得12碼相當唔抵

下半場阿仙奴偷雞一球之後就無以為繼
小弟認為佢地最終反勝為敗
第一球杜奧巴同埋安歷卡明顯越位在先
球證既誤判係勝負既轉捩點

但對住杜奧巴既強勁衝刺
阿仙奴條防線力量上未能制衡佢
仲咁冇集中力
就真係過得到初一都過唔到十五

講波佬話格蘭既調動係勝負關鍵
仲話佢威返舖
但一場勝仗唔足以令小弟對格蘭改觀

原因係佢開波已經排錯陣
用艾辛踢右閘
到輸波要變陣先識用巴列堤
將艾辛移前取代馬基里尼
而波歷克同林伯特擦唔出火花就近乎全個球壇都知
佢亦係後知後覺先識收起前者
小弟只可以話佢知錯能改

而用安歷卡伙拍杜奧巴合作入到第二球
根本係輸高路托尼失位走甩左後者

講到貿然用 4-4-2 有波羸就讚格蘭
小弟份人咁硬頸就真係做唔到

最後要彈雲加幾句
佢今場波用雲佩斯踢正選未算好差既決定
但雲佩斯踢得唔好
都仲要等到76分鐘先用禾確特入替佢就真係敗筆

另外,賓特拿今季已經唔止一次入場後
竟然成日返後場搵波踢
就整定浪費左佢既身高優勢
咁就不如唔好換佢入場

3)　紐卡素對富咸

基瑾接手咁耐終於有波羸
佢地明顯搵到進攻既 form
有鬥心又有實際
入波自然唔難
不過佢地依然有改善空間
而小弟感覺基瑾仲未肯重用馬田斯

另外，多得對手出名作客差
成場波近乎未有一次有威脅既攻門
令到紐記班後衛連爆鑊既機會都冇

2008-3-22

冇咩好寫......
想 preview 3場波

1) 紐卡素對富咸

富咸簡中先羸一場波
而家依然排尾二
但不經不覺都有23分
唔可能否定佢地護級成巧既可能性

而雖然佢地上場連愛華頓都羸埋
士氣好好
領隊鶴臣又擅長穩定突擊
保拿特仲慢慢上返力
點睇都有力去聖占士搶1分

但小弟就偏偏撐紐記今場會反底羸波
因為紐記班友好有 heart
進攻0個 form 都已經成左型
加上富咸作客成績超差

只要基瑾識用同埋肯用馬田斯
同埋班後衛爭氣唔好再爆鑊
紐記羸波真係好正路

2) 車路士對阿仙奴

雖然阿仙奴近況差
班波疲態畢露
又要作客
但小弟依然覺得佢地助和望羸

原因唔多睇波既都可能知
因為冇左摩連奴既車路士已經唔再得人驚
格蘭仲係近年歐洲球壇強隊當中
最差既一個領隊
佢爆鑊既例子唔少得過紐記班後衛

遠既唔講
有睇過作客熱刺和4:4場波
一定被佢吹到啤一聲
小弟夠膽講玩 Football Manager 既換人一定叻過佢好多

3) 曼聯對利物浦

計往績曼聯羸到開巷
但計近況
賓尼迪斯差唔多已經砌到最佳陣容既利記
今次絕對有力一鬥

小弟認為今場波既關鍵
唔係托利斯同埋C7邊一個比較 sharp
而在於先搶中場

馬斯查蘭奴無論拍住盧卡斯利華抑或沙比艾朗素
加埋應該會幫手搶波既謝拉特
對住當今全世界任何一支球隊
只要冇失準
都有力搶羸中場

對於費 sir 出口術指球證要好好保護 C7
小弟覺得 C7 雖然紅到不得了
但佢無論踢英超同埋歐聯
好多時對強隊都踢到平平無奇
就算驚都只係驚到時曼聯羸唔到波
佢又再靠插水

小弟最驚既反而係唔算隱既利記防線睇唔實朗尼
當然泰維斯同埋安達臣都唔可以走甩啦

2008-3-21 (2)

1)
曼聯既年青前鋒甘保成為查爾頓同埋侯城既增兵對象
消息指費 sir 將要求最少400萬鎊

2)
卡爾被指成為昆士伯流浪同埋韋斯咸既羅致對象

3)
消息指高雲地利積極增兵
佢地被指睇中阿仙奴既17歲荷蘭攻擊球員巴拉薛迪
高文仲親自去觀察佢既表現

4)
西班牙傳媒指維拉利爾睇中比沙路

5)
侯度史東被指成為布力般流浪暑假既增兵目標

6)
艾歷臣表明會搵大牌球星加盟

7)
昆士伯流浪中場球員畢沙奇否認會以250萬鎊既價錢轉投樸茨茅夫

8)
費格遜於雙紅會前又玩心理戰
表示球證要好小心保護 C7

2008-3-21 (1)

1)
一如外界所料
碧咸同埋禾確特被選入英格蘭國家隊

2)
艾殊利高爾為尋晚0個腳過火既攔截而向侯頓道歉
佢亦澄清冇對球證艾雷冇禮

3)
曼聯正式委任B.笠臣為宣傳大使

4)
捷克國家隊教練布克拿宣佈歐國盃後離隊

5)
雲達華治同埋卡文尼再次被指成為華倫西亞既增兵對象
另一方面,今季表現略為走樣既艾迪達
亦令人意外地被傳得到朗奴高文既垂青

6)
李察胡禮以借用身份加盟修咸頓一個月

7)
朗奴迪保亞宣佈掛靴

8)
熱刺拒絕左葉士域治借用戴倫賓特既要求

另一方面,里爾年青中場卡比爾,
盧斯奧同埋蒙達利被指成為拉莫斯既增兵人選
但艾朗連儂就被傳會遭賣走

9)
紐卡素青訓產品藍馬治被傳
可能為左出場機會而轉投昆士伯流浪

10)
之前講過華斯高既中場哥天奴成為曼聯既增兵對象
而家連車路士,阿仙奴,皇馬同埋拜仁亦有興趣羅致

2008-3-20

1)
尋日講過細哨右邊大腿內側有傷患
但好神奇連磁力共振都 check 唔到咩事

而家單野真相大白
話說原來佢同亨通上星期有晚去飲通宵
跟住第二朝就當然唔想練波
就以傷患為理由去到球場報到但都唔肯練

最終列卡特本季第 n 次將佢放入雪櫃
但唔知有心定真係唔小心
磁力共振既 report 竟然流入手中
令佢於隊中既地位跌至新低點

小弟早前仲讚佢狀態有回勇跡象
唸住冇美斯都仲有佢撐場
點知佢又搞單咁既野

而家最開心既應該都係
華倫西亞,基達菲,皇馬,史浩克04同埋曼聯掛
(其實仲有上線既利物浦同埋阿仙奴)

2)
羅傑承表示仲未落實搵邊兩支外隊
指紐卡素,維拉同埋祖雲達斯都有一定機會

3)
消息指碧咸同埋禾確特會被卡比路選入國家隊

4)
消息指基雲將要抖6星期

5)
雲佬因為右腳腳踭要開刀而最少缺陣1個月
隨時提早收咧

6)
燕豪芬方面表示唔排除搵李榮杓重返球隊

7)
杜斯山度士於1月曾於1星期內
先後同曼聯,車路士以及熱刺接觸
佢被指以轉會去威脅巴塞隆拿加佢人工
消息指巴塞隆拿已經決定放棄佢
將佢掛牌以670萬鎊出售

8)
就貝迪斯球迷上星期六
用樽掟暈畢爾包龍門艾曼度一事
佢地被罰主場禁賽兩場
罰款9000歐羅
而場波唔會重賽
根據腰斬時既比數1:2判佢地落敗

9)
伯明翰涉貪污被調查

10)
盧斯奧表示想於季尾離隊
幾個月前佢曾經被指可能於季尾轉投AC米蘭
4個字:空穴來風

11)
費高否認轉投昆士伯流浪

12)
馬田斯被指成為曼城既1000萬鎊增兵對象

另一方面,韋斯咸由於預計艾殊頓將會要求轉會
所以準備出價200萬鎊搵維度卡做替補
但當時人就表明同基瑾之間冇任何問題
亦唔準備離開紐卡素

13)
卡文尼再次被指成為熱刺450萬鎊既增兵對象

14)
維拉由於仲未搵到岩用既進攻中場
所以可能向打呲郡出價400萬鎊買巴尼斯

15)
AC米蘭被傳準備出價3000萬鎊買貝碧托夫

16)
早幾日講過阿仙奴想搵雷恩既 Stephane Mbia
而家巴塞隆拿,紐卡素,曼聯,曼城同埋利物浦都被指想加入戰團
消息指佢既身價已被炒至1000萬鎊

目前佢加盟利物浦既機會比較高
因為佢既國家隊隊長桑治曾經效力利物浦
提議佢可去利物浦一試

小弟覺得佢雖然可踢防中同埋右閘
但以利記現時人腳
唔可能容納佢踢防中
而如果用身價高達1000萬鎊既佢踢右閘
又唔多化算

相反小弟認為佢加盟紐記或者曼城
就一定會有正選防中踢

而佢去巴塞隆拿亦應會有更理想既發展
因為巴塞隆拿只得耶耶托尼一個似樣既防中
而佢地亦唔會介意咁貴去搵佢取代森保達踢右閘

2008-3-19 (2)

1)
南華將於22/5搞雙料娛樂表演賽
頭場多數對曼城
(紐卡素既機會比較微)
尾場就對熱刺

由於成本唔太貴而贊助又多
門票價錢可能比上年既英超挑戰賽平

2)
東尼被指成為AC米蘭既800萬鎊增兵對象

3)
紐卡素搵左閘出現阻滯
懷斯既經理人否認有關報導
而另一目標 Michal Kadlec 就多左對手拖連奴

4)
新特蘭雖然仲未護級上岸
但已經為加強下季既火力而搵緊新血
目標分別有科蘭同埋堅尼米拿

5)
禾高以自由身轉投布力般流浪
簽約2年半

但曉士仍然會繼續物識其他防中
有消息指加維臣成為佢150萬鎊既考慮人選

6)
雖然國際足協施壓
但英超聯賽會表明唔會對馬田泰萊加監
佢只會被罰停賽3場

7)
柏天尼呼籲英格蘭足總同埋球迷
要抵制美資對英超球會既收購

8)
迪高被指成為曼城既羅致對象
另一方面,有入就有出
有消息指孫繼海將被掛牌

9)
基雲尋日於德國開刀
操刀既醫生 Ulrike Muschaweck 原來大有來頭
當年曾經醫好奧雲同埋舒利亞

10)
車路士成為最新一支同 M.高美斯扯上關係既球隊

11)
高雷雷加盟威靈頓鳳凰

12)
尋日講過幾間大球會想引入巴西射手 Jo
原來阿仙奴比佢地更做 take action
俄羅斯傳媒於11日前已爆料
兵工廠一早就派左球探去觀察佢既表現

13)
迪亞高暗示想轉投皇馬

14)
阿根廷奧運初選30人
當中包括列基美,美斯,馬斯查蘭奴,
迪亞高米列圖,迪米捷利斯同埋阿古路

15)
細哨既右大腿內側長期覺得唔妥
但連電腦掃瞄都搵唔到有咩問題
消息指巴塞隆拿將為佢提供特別療程

16)
波圖方面表示未收過曼聯對保辛華既 offer

17)
白蘭斯被指成為巴塞隆拿新教練既其中一個候選人

18)
西班牙同埋英國傳媒指熱刺
想從維拉利爾引入迪亞高盧比斯
但佢高達1885萬鎊既贖身費就成為轉會既障礙

2008-3-19 (1)

對於伯明翰對紐卡素場波
sammysir 講得咁有水準
(以小弟認識既紐迷當中,sammysir 應該係最識波既一個)
小弟心生有愧
有幾個 point 要補充返:

1)
未開波見到佢地既排陣
已經估到係 Big Sam 最最好既 4-3-3
但唔明既係基瑾冇理由唔知
紐記班友踢 4-3-3 唔掂

下半場變左另一隊波
原因除左尋日講過紐記班友好搏
同埋伯明翰略為保守左少少之外
另一個原因係0個班原本踢 4-3-3 既人腳
似改踢 4-4-2

2)
十幾年前有睇開紐記既都會知
基瑾好鍾意用 4-4-2 陣式
1個進攻中場再加兩翼傳中
前面兩個射手
其中一個要擅長二傳
只要從這方面去唸
就會明點解基瑾會以尼索比亞換走馬田斯

小弟唔反對用尼索比亞
因為佢想拉開伯明翰既右路防守
concept 上一定冇錯
但就好好好好好好唔贊成馬田斯被收起
(利記作客炒3:0場波見佢咁有球味同埋鬥心
自始佢就係小弟最睇得順眼既紐記球員)
反而 prefer 基瑾換走奧雲

而維度卡就明顯因為有二傳能力而唔使被換走
不過如果有二傳能力,但冇態都可以留低既話
基瑾1月增兵成日食檸檬既時候
其實應該搵舒靈咸幫手
而同舒利亞合作既時候
倒不如搵佢返來踢前鋒
好過搵佢做副手

雖然安迪卡路爾未夠火候
但小弟都同意用佢試下
反正真係冇壞

3)
以巴頓而家既表現
倒不如將謝列美移入中路
小弟個人認為一定會好過而家

4)
荷西安歷基仲要再睇多一段時間
(不過唔知佢於紐記仲有幾多時間......)
今場佢冇爆鑀
好大原因係伯明翰今場既右路冇料到

5)
小弟到而家都依然相信
紐記只需要一場勝仗就可以重上正軌
因為佢地明顯係有士氣同埋鬥心
今場係繼主場和左阿仙奴之後
小弟感覺到佢地最有鬥心既一場

6)
講都講到口臭......
後防依然令小弟勁勁勁勁唔滿意

2008-3-18 (2)

1)
亨利被傳成為曼城1000萬鎊既增兵對象

2)
由於森保達幾乎肯定會於季尾離隊
巴塞隆拿被傳將向阿仙奴出價600萬鎊買伊保爾作替補

3)
基維爾同埋保定被傳成為些路迪暑假既增兵目標

4)
紐卡素第 n 次被傳將於季尾向利物浦出價買懷斯

5)
消息指雲加會為阿仙奴既中場買人
拉傑錫同埋派拿就成為佢既目標
二人既身價分別係1200萬鎊同埋250萬鎊

另一方面,聖伊天隊長 Loic Perrin
被指成為兵工廠500萬鎊代替費文尼既可能人選
佢可踢防中或者右閘

6)
雷恩既喀麥隆中場 Stephane Mbia
被指成為曼聯,曼城同埋利物浦既羅致對象

7)
文尼斯被指成為拉素600萬鎊既增兵對象

8)
因為班士利未能同西布朗達成協議
前者問後者借用既門將史泰爾
肯定唔會於足總盃4強既比賽重賽

9)
布朗,科蘭同埋比亞堤都被指
成為維拉既羅致目標
其中科蘭既轉會費被指高達1500萬鎊

10)
費查同曼聯續約3年
週薪被增加至4萬鎊

11)
迪米捷利斯向軒斯菲特以及拜仁認衰仔後
終獲解凍

12)
史篤城被指已經打消借用紐根特既唸頭

13)
莫斯科中央陸軍既巴西射手 Jo
被指成為曼城,AC米蘭同埋華倫西亞既羅致對象
轉會費仲被傳已經炒至2000萬鎊

14)
沙士菲對聖羅倫素既比賽
前者有一個球迷被射殺
而小保加對河床既比賽
亦有球迷被刺傷

15)
皇馬被傳準備用1700萬鎊從費倫天拿引入梅度

16)
基拔圖施華表示將於季尾考慮離開阿仙奴

17)
維拉利爾成為最新一支同查基扯上關係既球隊
西班牙傳媒指佢地願意出價800萬鎊買人

18)
謝斯高連倫因背傷要開刀而提早收咧

19)
曼聯被指準備於暑假賣走沙夏吐現再另買射手
路爾斯法比安奴同埋大衛韋拿
都被指成為佢地既考慮人選

不過皇馬對兩者亦虎視眈眈
而巴塞隆拿同埋車路士亦對後者好有興趣

2008-3-18 (1)

伯明翰對紐卡素
基瑾出人意表咁排個近似 4-3-3 陣式
奧雲,馬田斯同埋維度卡3個箭頭一次過出晒
中場就靠畢特,巴頓同埋謝列美3個撐住
不過就幾乎搞出個大頭佛......

每隊踢半場好波
伯明翰上半場明顯踢得比較好
小弟認為除左紐記本身有問題之外
主隊小將梅姆巴既出色表現亦係主因
佢明顯將對手中場既3位前輩比下去
以佢既質素
小弟個人認為佢加入國家隊既日子指日可待

阿仙奴出名多勁既新仔
每季總會有部份年青球員
為左出場機會而提出轉會
雲加亦好多時承人之美
但近年只有佢同埋賓特尼令小弟覺得可惜
可想而知小弟覺得佢幾勁

當然紐記本身亦唔爭氣
中場3個除左巴頓較擅長進攻之外
畢特同埋謝列美都係以助守為主
前場3個以馬田斯最勤力走動
不過冇咩供應
佢幾勤力都冇用
奧雲上半場亦係冇料到
維度卡就更加係未上力

而紐記後防持續令人失望
小弟成場都睇唔到史堤芬泰萊同菲爾有咩默契可言
而輸0個球波菲爾要負上部份責任
因為位置上佢應該可以快麥法頓一步解圍
但偏偏對手會最終有機會埋門

(尋晚同個 professor 食飯
講起紐卡素
佢劈頭第一句就話:
'紐記條防線真係好屎
都唔記得佢地今季已經被人炒左幾多次'
佢其實好少睇紐記
可想而知紐記防線比人既印象幾差)

不過半場之後又係另一件事
只計下半場既表現
紐記又好抵讚
起碼睇得到有 heart 去搏翻身

小弟認為伯明翰變得保守左少少
亦係佢地下半場失勢既原因
而紐記班友追平後心都雄埋
個勢都攻得幾勁

紐記上半場輸晒既統計數據
下半場就羸突有餘
紐記迷可能仲會因為咁而覺得羸唔到波有0的唔抵
不過現實係尋晚0個場係足球比賽
而唔係拳賽
點數冇分計架

小弟就覺得兩邊各踢半場好波
大家各得1分都好合理

2008-3-17 (2)

1)
西班牙傳媒粄料指
紐卡素想搵桑坦德既教練馬些連奴加盟

佢今季接手後
雖然冇咩資源
但隊波表現好平穩

而家雖然排第7
但只落後第4既馬體會3分
依然有力爭前歐聯席位
佢被評為有 potential 成為歐洲一級教練

2)
消息指納比下季會回歸祖雲達斯
取代冇料既雲尼亞里

3)
蒲和紅鑽上季衰收尾
今季開咧又脫腳兩連敗
終於怒炒教練奧鍚克

4)
足總主席梁孔德透露
如果今年9月成功向立法會申請撥款
旺角場最快可於2009年5月起展開重建工程

5)
費高被指好可能以自由身轉投昆士伯流浪

6)
尼維特被指成為艾哈里既羅致對象

7)
耶高保轉會被指涉及黑金

8)
米高勞特立被傳成為巴塞隆拿新教練既可能人選
不過基達菲會長安祖托利斯就表明
prefer 佢轉投車路士多於巴塞隆拿

9)
布拉格斯巴達左閘 Michal Kadlec
被指成為紐卡素150萬鎊既羅致目標

10)
皇馬被指準備搶人
維路素同埋祖雲歷都被指成為佢地既截劫目標

11)
阿馬利再次被傳成為祖雲達斯1000萬鎊既增兵對象

12)
韋斯咸準備宣佈 G.蘭尼出任佢地既技術總監
佢之前曾經係布雷西亞既總經理
佢負責買人之餘
亦會幫手搞青訓

13)
之前講過維拉睇中前鋒 Sam Vokes
而家紐卡素同埋樸茨茅夫都被指有興趣引入
這個18歲既威爾斯 U-21 射手

2008-3-17 (1)

幾場波想講:

1) 利物浦對雷丁

羸波唔意外
但要先落後就冇唸過
不過有時最終有3分落袋
都唔可以苛求咁多

托利斯英超入到第20球
最近佢咁 fit
如果其他人(特別係謝拉特)
都可以咁樣 keep 到季尾
唔止可以比幾輕鬆咁壓倒
尋晚作客富咸爆個小冷門輸波既愛華頓排第4
要羸多次歐聯亦唔係癡人說夢

2) 阿仙奴對米堡

小弟認為場波既其中一個關鍵係
主隊上半場5分鐘就因為旁證誤判
而冇得先開記錄
如果米堡初段就落後
以佢地咁屎既心理質素同埋鬥心
隨時被阿仙奴大炒一場

大難不死既佢地之後仲有後福偷襲得手
全場得一下射中框就入一球
以佢地岩踢順境波既特質
緊迫對手同埋清波都做得唔錯
就搞到阿仙奴好辛苦先迫和對手
同上季既交手情況近乎一樣

連和4場既阿仙奴不但浪費晒之前既5分優勢
而家爭標機會仲已經幾被動
達施華被重創事件明顯係主因
加上踢歐聯又或多或少有影響
但總唔可能咁無了期衰落去

如果佢地仲唔振作
小弟都幾驚佢地今季可能又搞到一無所有

最後就要為美度訴不平
佢係有危險動作之嫌
但佢其實全程都係望波
亦快過基治一步踢中個波
睇落唔似係茅波

3)
皇馬作客拉科輸波
點知巴塞隆拿又唔爭氣
被艾美利亞迫和
踢完28輪聯賽依然落後皇馬7分

不過原來歷年來踢完27輪聯賽
從未有球隊落後8分都追得設返
所有如果信數據既話
巴塞隆拿上星期已經玩完

4)
尋晚既護級大戰
韋根苦戰兼踢少個都羸保頓1:0
而家佢地同米堡基本上已經有半隻腳上左岸

紐卡素如果唔想繼續沉落去
今晚作客伯明翰最好醒醒定定
唔旨意佢地今晚反底羸波
但都唔該佢地千祈唔好輸

因為一來一回六分波
如果輸左既話
佢地同新特蘭,保頓以及仲未死得晒既富咸
數字上就已經真係冇咩點分到高低

2008-3-16

1)
尋晚西甲貝迪斯對畢爾包既比賽
72分鐘當客隊領先2:1既時候
佢地既龍門艾曼度被主隊球迷用膠樽掟傷
球證決定終止比賽

2)
盧保被指成為阿仙奴既800萬鎊羅致對象

3)
迪米捷利斯因為拒絕近期第3度為拜仁串演防中
而被罰停賽至另行通知
而軒斯菲特仲唔准佢跟操

4)
麥利殊警告阿根廷借將前鋒薩拉迪唔好再插水
因為佢已經兩次因為插水而被罰黃牌

2008-3-15

1)
簡安表示林伯特會最終留隊
格蘭亦唔會被炒
小弟覺得佢只係講左一半真話......

2)
艾加因為跖骨傷患未完全康復
而將會缺席本季餘下既賽事

3)
巴塞隆拿再次被傳會於暑假出價買沙比艾朗素

4)
伊雲斯被指趁開P強姦一個26歲女人既 case
因為唔夠證據而唔會被差佬起訴

5)
諾域治既翼鋒告夫特成為韋根100萬鎊既增兵對象

6)
(多謝曼聯迷 Terry 報料......)

原來費查離奇受傷
話說上星期對里昂羸波後
佢於更衣室開廁所門既時候
廁所門突然砸到佢個頭
佢即場暈左
仲要聯幾針

其實類似既野發生左 n 次
遠既有比辛被果醬樽砸跛腳
近年亦有簡尼沙尼斯被鬚後水樽砸跛腳
碧咸被發火既費 sir 用波 boot 飛中
羅賓遜放狗但拉唔掂隻狗結果最終整親自己
大衛柏堤被一個踩三輪車既小朋友車親腳踭
最近亦有登地聯既萊爾從咖啡枱跌落來整親個胃

當中任何一單既意外
試問有冇人自己或者身邊既人遭遇過
所以聽到都真係o晒

2008-3-14

1)
歐聯8強抽左籤......
(艾比路亞勁烏鴉口
話唔想對英超隊
而家即要硬撼阿仙奴)

結果如下:
阿仙奴對利物浦 V.S. 費倫巴治對車路士
史浩克04對巴塞隆拿 V.S. 羅馬對曼聯

上線方面
由於格蘭實在太廢
而費倫巴治攻強守弱兼唔擅長作客
所以阿仙奴同埋利物浦既勝方可以講係直入決賽

下線方面
巴塞隆拿對史浩克04可以講係睇住來食
前者首回合作客羸唔到唔緊要
只要保持不敗都可以等次回合返魯營先羸波出線

而羅馬雖然唔算差
但對住今季作客表現穩定左少少既曼聯
仍有所不及
加上佢地16強連皇馬都羸埋
曼聯更加唔會輕敵
令羅馬更難偷雞
仲有既係史巴利堤雖然有料
但仲未夠費格遜咁老謀深算

小弟之前於16強曾暗示
巴塞隆拿同埋利物浦係小弟心目中既冠軍選擇
(超忠實讀者舒利亞一睇就估到)
但巴塞隆拿而家冇左美斯
對曼聯其實只係55波
唯一優勢反而係佢地西甲聯幾乎輸硬
可專攻歐聯

所以隨時被 C7 講中
決賽會由曼聯對英超隊

2)
華倫西亞會長蘇拿以健康理由辭職

3)
格蘭否認車路士斟迪亞高

4)
朗拿度表示希望可以復出

5)
格蘭莊臣被指成為曼聯800萬鎊取代加利仔既人選

6)
柏天尼表示支持卡迪夫城
仲話如果佢地羸左足總盃都冇得踢下季既歐洲足協盃
佢會作出干預

7)
由於冼佳亞被車路士外借到查爾頓後冇咩出場機會
令冼佳亞好可能提早離開查爾頓
水晶宮而家就希望到時借用佢到季尾

8)
卡域克被傳成為紐卡素1500萬鎊既羅致對象

9)
德國傳媒指薩格勒布戴拿模既中場 Ognjen Vukojevic
可能以800萬鎊既價錢於暑假加盟

10)
亭特拉爾被指成為熱刺1600萬鎊既增兵目標

11)
意大利同埋西班牙兩地既傳媒都有報導
費倫天拿可能各艾美利亞開價1000萬鎊
買佢地既24歲巴西中場美路


12)
華倫西亞成為最新一支同卡文尼扯上關係既球隊
西班牙傳媒指佢地願意向愛斯賓奴出價500萬鎊買人

13)
由於魯爾同埋雲佬都年事已高
皇馬再搵射手己係必然既事
波爾多26歲法國射手奧貝頓
同埋西維爾既法比安奴
都被指成為佢地最新既考慮人選

不過前者冇咩名氣都估計要1200萬鎊
後者更加貴到要2000萬鎊

另外,皇馬被傳想同車仔爭烏拉圭中場 M.卡斯利斯

14)
巴塞隆拿由於後防持續不穩
域陀華迪斯同埋杜林被指位置不保
取而代之既係紐亞同埋格雷

15)
西布朗同菲臘斯傾唔掂新約年期
令續約一事拖到而家都未掂

P.S.:
今日遲左交功課
唔好意思
聽日會講下幾單球員離奇受傷既例子

2008-3-13

1)
油王被指已有清洗名單
當中包括林伯特,杜奧巴,舒夫軍刀,古迪仙尼,薜維爾,賓希姆,
比沙路,比列堤,馬路達同埋馬基里尼

前6人已被指另有出路
林伯特有祖雲達斯同埋巴塞隆拿等緊
杜奧巴就係皇馬,巴塞隆拿同埋AC米蘭增強攻力既人選
軍刀重返AC米蘭更係公開既秘密
古迪仙尼亦被傳得到拉莫斯既賞識
薜維爾就有雷丁,韋斯咸同埋新特蘭睇中
賓希姆亦可能轉投紐卡素,保頓或者熱刺

至於其餘4人
除左馬基里尼多數於季尾掛靴
其他人就暫時冇咩聲氣

2)
基維爾被指將不獲利物浦續約
小弟認為佢復出初期曾經有好表現
但之後就無以為繼
如果真係搏唔到新約
以上季辛頓既例子0黎睇都唔奇

3)
沙比艾朗素因為要陪女友生仔而冇隨隊對國米
傳聞因而令佢同賓尼迪斯既關係更差

4)
莫拉堤表示
文仙尼 U-turn 改口話肯留隊至2012年

小弟估計文仙尼而家留低
將令費高同埋韋拉更大可能離隊
其中前者前晚對國米仲拒絕後備落場

(一0的職業操守都冇
仲搞到小弟插錯文仙尼
不過佢咁遲先換入占美利斯就點都係有問題......)

另一方面,摩連奴表示唔會接手國米
兩件事咁近

難免令人(至少小弟會)懷疑國米
因為斟唔掂摩連奴而翻兜文仙尼

5)
古柏接手帕爾馬

6)
消息指熱刺最有機會訪港鬥南華

7)
保方同祖記續約至2013年

8)
占士同樸茨茅夫續約至2010年

9)
方坦拿同巴勒莫續約至2009年

10)
皮利斯同維拉利爾續約至2009年

11)
比歷否認將於歐洲國家盃後接手韋斯咸

12)
同般尼茅夫前鋒 Sam Vokes 既維拉
被指打算各紐卡素出價800萬鎊買占士米拿

13)
祖雲歷既經理人向傳媒放風
指雖然有傳佢既轉會費被炒至1700萬鎊
但佢依然會於季尾轉投費倫天拿

14)
卡斯伯舒米高被外借到高雲地利至季尾

15)
AC米蘭被指願意出價簽 M.高美斯

16)
紐亞否認會轉投熱刺

17)
昆洛斯表示唔會接手賓菲加

18)
薩拉迪表態想由艾沙迪轉投伯明翰

19)
艾美利亞被指成為羅馬1200萬鎊既羅致對象

20)
巴尼斯被指成為愛華頓400萬鎊既增兵目標

21)
拿玻里既19歲捷克中場 M.Hamsik
被指成為祖雲達斯700萬鎊既增兵對象

而老婦人最近既增兵對象多數為年青人
除左之前既基治,卡普同埋岩岩講既 M.Hamsik
竟然仲有米卡李察士同埋碧基

不過兩者都有一定難度
因為前者短期內應該會留0係曼城
而後者就算真係決定離開曼聯
都多數會返西甲
以500萬鎊既身價轉投馬體會

2008-3-12 (2)

1)
消息指油王將會撥款1億英鎊重新'砌車'
估計最少10名球員會被放棄

維拉利爾既烏拉圭中場 M.卡斯里斯
被指成為車路士既羅致對象
不過佢高達1520萬鎊既贖身費就成為轉會障礙

另一方面,格蘭亦被指收到最後通牒
如果今季最終4大皆空
佢將會冇得撈

2)
文仙尼宣佈季尾離隊
摩連奴即刻成為下任國米教練既大熱門

3)
葡萄牙傳媒指昆洛斯同埋比安基
成為賓菲加下季教練既熱門人選

4)
熱刺成為最新一支同沙比艾朗素扯上關係既球隊
消息指由於女友想留於英國生活
令沙比艾朗素就算決定離隊
都只會轉投其他英超球會

5)
馬賽方面承認希望將哥古夫帶返法甲

6)
白賴仁笠臣被指可能重返曼聯
出任宣傳大使
以減輕卜比查爾頓既 workload

7)
河床方面承認想於暑假向薩拉戈薩出價550萬鎊
將艾馬帶回阿根廷

8)
迪保基斯將於歐洲國家盃後接手西班牙國家隊
小弟覺得最開心既可能係魯爾

9)
迪高被指成為馬體會850萬鎊既增兵對象

10)
意大利傳媒指一旦羅馬羅致亨特拉爾失敗
將會改向史特加開價600萬鎊買 M.高美斯

11)
帕爾馬怒炒迪卡路
消息指沙哲朗尼同埋前教練史卡拿
成為接手既熱門人選

12)
尼史葛同愛華頓續約至2012年

13)
愛斯賓奴成為最新一支同麥基迪扯上關係既球隊
佢地被指願意向些路迪出價1000萬鎊買人

14)
賓菲加既20歲阿根廷射手迪馬利亞
被指成為費倫天拿600萬鎊既羅致對象

15)
維拉被指成為最新一支有意引入賓特尼既球隊
消息指佢地願意開價1200萬鎊

16)
早前講過利物浦同埋紐卡素都睇中既年青門將 Scott Loach
原來亦成為熱刺同埋曼城既青訓目標
兩間會亦先後派出球探去吼路

17)
阿倫史勿夫被傳將被紐卡素放棄
有消息指佢可能會以400萬鎊既價錢被賣到新特蘭

18)
史浩克04既年青門將紐亞
被指成為取代保羅羅賓遜既500萬鎊人選

19)
哥治再次被傳將會加盟曼城

2008-3-12 (1)

君臨聖西路......

唔係馬後炮
知道(其實一早預左)出場陣容
已經知掂硬

早於利物浦作客車路士之後
小弟已經講過有馬斯查蘭奴同埋盧卡斯利華
為謝拉特做 back up
神奇隊長既攻擊力自然會得到釋放
佢同托利斯既化學作用仲遠超預期
0個時已有預感賓尼迪斯已經試到最佳陣容
佢仲好在肯盡量少 rotate 0的人腳
雖然陣容仍有弱點
(有機會再講......)
但已經超開心

場波預左要搶中場先有機會打突擊
面對國米韋拉加上甘比亞素
馬斯查蘭奴同埋甘比亞素完全不落下風
小弟認為以前者今季既整體表現
就算唔係全世界第一既防中
都應該至少係3大

有佢兩個再加上表現越來越穩健既拉爾拿
仲要史基圖犯上超低能錯誤
利記都竟然死唔去
基本上已經立於不敗之地

場波自從佢地再次踢少個
而伊巴謙莫域收左史基圖0個份自殺式橫傳既厚禮都無福消受
場波已經可以放入雪櫃
或者應該形容為好似籃球比賽既垃圾時間
托利斯既入波只係於國米(或者文仙尼)既傷口上灑鹽

最後想講下兩位教頭
賓尼迪斯唔玩 rotation
用左現時既最佳陣容
已經講過話佢好抵讚

佢臨場調動亦見功力
於貝迪素被驅逐後
因為人多打人少
受壓時間同埋變相打突擊既機會亦會減少
佢索性以擅長用波既班拿約
入替踢反擊叻過搓波,兼有黃牌在身既巴布
既可以用空間消耗時間
更可以使上半場走動比平常多既國米球員更快消耗體力

但右後防同埋中路就真係幾令小弟擔心
小弟於史基圖初來報到既時候
已講過佢仲要浸淫
只係唔能夠救近火既遠水

如果用加歷查改踢右閘頂芬倫個位
而用史基圖踢中路
咁就同放個炸彈自殺冇咩分別
小弟認為倒不如一開始就用艾比路亞踢右閘

另一方面
上回合利記最初攻唔入守得幾好既國米防線
賓帥都識換個踢邊既賓納特入場
作左次示範比文仙尼睇
佢原來都未學到野

今場未踢少個之前
或者應該講最初唸正選既11人
其實佢有條件用費高或者占美利斯
不過只見前者有份熱身
後者亦於敗局已定之後先有得落場

就反映佢唔夠果斷
又或者應該講佢一直以來被人批評
踢歐洲賽時太保守既缺點仲未有改善

今季於意甲久攻不下
佢隨時變陣改踢3箭頭
以為佢已有進步
識得幾時要有吉屎
點知一踢歐洲賽
對住0的高班球隊同埋教頭
就即刻畏首畏尾,打回原形

佢同賓帥,又或者摩連奴同埋軒迪克一比
4個字:高下立見
佢賽後即刻宣佈季尾離隊
之後佢有大把時間
真係要慢慢反思清楚自己一直衰0的咩
先好再唸出山教波
因為獻技變成獻醜或者獻世就真係無謂

2008-3-11 (2)

1)
利物浦最大既老闆希斯表示
由於 DIC 財團準備於入主後改變營運方式
佢怕對利物浦既長遠發展不利
所以已經終止同 DIC 財團再傾收購既事
但消息指 DIC 財團仲未死心

小弟第一個反應係:
希斯講得好好聽
但似乎只係等緊一個更高既價錢
收皮啦佢

2)
原來對上一次只有一隊頂級聯賽球球打入4強
已經係1908年既事
距離而家足足有100年

不過自從1888年英格蘭足球聯賽成立以來
就從未試過冇頂級球隊打入決賽

另一方面,由於卡迪夫城來自威爾斯足總
所以雖然得到威爾斯足總開恩
可以參加英格蘭足總盃
不過就算捧盃都冇份踢下季既歐洲足協盃

3)
金馬曹於前日球隊再次失分後
正式向賓菲加請辭

4)
之前講過費倫天拿極有機會簽得祖雲歷
但而家佢地卻應該成為第一支
宣佈退出爭奪既球隊
因為這個17歲黑山前鋒既身價
已經被柏迪遜炒至1700萬鎊

5)
雖然有消息指祖雲達斯準備出價1200萬鎊買卡普
但西維爾放人既機會依然唔大

6)
賓科士打應該會壓倒希頓暫代雲達沙踢正選

7)
修咸頓5名球員涉嫌偷竊

8)
意大利傳媒指祖雲達斯
可能向帕爾馬出價700萬鎊買施加連尼

9)
迪亞拉由於轉投樸茨茅夫後持續有好表現
傳聞熱刺將於暑假出價800萬鎊買佢以改善防守

10)
沙比艾朗素因為女友有左BB
而極可能缺席利物浦作客對國米既比賽

11)
戴倫賓特再次否認轉投韋斯咸既傳聞

12)
法比安奴被傳成為皇馬既羅致目標

13)
利物浦被指將於季尾向皇馬出價500萬鎊買軒斯

14)
熱刺被指打算從薩拉戈薩同埋基達菲
分別引入射手迪亞高米列圖
以及可踢後防多個位置既戴亞斯
消息指拉莫斯預算用1400萬鎊完成晒兩單交易

15)
赫斯既19歲保加利亞射手 B.哥斯達甸洛夫
正於曼城試腳

16)
英國傳媒指些路迪以及米堡都打算於暑假
從波琴買入加拿大30歲中場恩賀夫

2008-3-11 (1)

尋日因為時間關係
有好多單傳聞都唔得閒講
而家補返......

1)
古比士利再度傳出將會被炒
而韋斯咸方面就發表聲明撐佢

2)
AC米蘭成為最新一支被指希望引入費文尼既球隊

3)
馬體會18歲中場 I.金馬曹
被指成為阿仙奴青訓既最新目標

4)
利物浦被指打算向馬略卡借用20歲射手 O.Trejo

5)
阿古路被指成為車路士2000萬鎊既增兵對象

6)
紐卡素被指睇中尼斯既法國 U-21門將 Hugo Lloris

7)
馬甸尼同埋岩布仙尼公開表示
希望舒夫真高可以重返AC米蘭

8)
保頓成為最新一支同希比亞扯上關係既球隊

9)
伊巴謙莫域準備同國米續約至2012年
年薪被指高達1500萬美元

10)
愛華頓被傳準備於暑假向里昂出價買卡士唐

11)
回勇既保拿特被指成為米堡同埋維拉既羅致對象

12)
侯城同埋葉士域治都被指有意向富咸借用大衛希利

13)
米高勞特立否認會於來季接手車路士

14)
由於基亞連尼表明冇意思離開祖雲達斯
消息指艾歷臣終於決定放棄

15)
消息指哥治唔肯續約
原因係同佢不和既賓尼迪斯仲未被炒

16)
由於一直有消息指胡禮菲臘斯準備離隊
所以車路士被傳有興趣出價1000萬鎊買賓特尼作為替補

17)
祖雲達斯既球探被發現去睇辛尼特既比賽
意大利傳媒即刻跟進
指佢地既目標應該係中場 Anatoliy Tymoschuk
估計出價大約300萬鎊

P.S.:
太多野要寫
等今日既 Part 2 再寫......

2008-3-10 (2)

1)
睇左20年波
都未見過英格蘭足總盃爆得咁勁

4強咁弱既戲碼真係未見過
樸茨茅夫,班士利,卡迪夫城同埋西布朗
真係弱過藥材舖

原來對上一次類似咁弱既戲碼
已經係86-87年球季既事

2)
國際足協打算插手馬田泰萊既停賽事件
要求英超賽會加佢監

3)
熱刺同埋巴塞隆拿都被指
想向西維爾出價800萬鎊買保臣

4)
保頓被指想引入自由身在即既簡尼沙利斯

5)
胡禮菲臘斯否認離隊傳聞

6)
伊雲斯表示唔排除正式轉投新特蘭

7)
費文尼被指成為皇馬既羅致對象

8)
消息指卡比路想放奧雲入雪櫃

9)
告魯夫因為同尹巴士頓就青訓方面意見不合
而向阿積士辭任技術總監
佢原定於下季上任

10)
由於雲達沙要養傷
古斯錫又要停3場
科士打同埋希頓就成為曼聯既替補人選
不過前者冇態
後者就直情未試過為一隊上陣過
費 sir 都幾頭痕

11)
原來前幾日唔記得講
紐卡素決定同迪亞達簽約至季尾

2008-3-10 (1)

幾場波想講:

1) 南華邀請隊對洛杉磯銀河

場波南華唔知係留力定係少少放水
碧咸其實有幾多表演機會
(不過佢而家既體能明顯唔掂
唔足以應付頂級賽事
小弟覺得佢似乎要勤力0的)

佢既傳球落點真係超準
印象中只係上半場試過有一次偏離目標
不過班隊友咁屎波就佢傳得幾準都冇用

場波既其中一個宣傳重點係罰球王大戰
黃金左腳李海強對黃金右腳碧咸
但最終對戰方式只係12碼就難免令人有少少失望

睇完場波
覺得銀河真係好唔掂
唔計碧咸同埋沙維亞
成隊波只有華加拿斯,居連
同埋射失12碼既域連尼係比較掂

卡路士雷斯幾名大於實
(其實都冇咩名氣,只係見佢上場入3球
同埋話晒係危地馬拉國腳)
而冇左當奴雲
更加顯得前線埋門把握力不足

而唔知係拉拿斯有心將球隊明星化
定係只係巧合
銀河陣中有幾個不知名球員都幾靚仔
(其中有個叫 B.Jordan 既仲超靚仔
五官同陳冠希似左9成!)

不過拉拿斯如果要改善球隊既成績
就真係唔好再搵咁多過氣老將
(一直有消息指佢地打文迪達同埋費高既主意)
佢地係係可以傳授經驗比其他人
亦可以刺激球會收入
但就好難帶領球隊起飛

2) 利物浦對紐卡素

冇野想講
之前已有信心愛隊利物浦會羸
但預左過程唔會太輕鬆

不過真係多得荷西安歷基一個低級錯誤
(衰孤寒唔肯輸角球
被賓納特封晒位都要向橫邊解圍
一個字:蠢!)
令利記可以打破悶局
而之後紐卡素又慣性地自己散晒
利記方面有謝拉特同埋托利斯越踢越夾
真係想輸返轉頭都難

3) 曼聯對樸茨茅夫

明顯今場波曼聯係冇運

開波初段
樸茅咁都唔輸12碼真係要多謝球證
而之後幾次都大難不死
仲有埋後福

不過想講既係曼聯輸0個球突擊
回防既竟然係朗尼同埋安達臣
咁班後衛去晒邊?
而佢兩個掛住一齊追卡蘭積卡而走甩巴路士
就明顯係冇防守意識

曼聯輸12碼兼有後備入替雲達沙既古斯錫被逐
要由里奧客串守龍
就點睇都唔似有得追

不過少隻爵爺根本唔多志在既足總盃
對佢地爭聯賽同埋歐聯可能係好事
何況阿仙奴尋晚又和波唔見兩分
聯賽爭標形勢又有返主導權

費 sir 而家要唸既反而係用邊個龍門好
因為雲達沙未知要抖幾耐
古斯鍚又要停3場
賓科士打冇態
希頓又冇經驗
直情連一場1隊經驗都冇
死未?

4) 巴塞隆拿對維拉利爾

中後場咁屎
即使有細哨同埋沙維持續有好表現都係冇用

而連輸返兩場
同皇馬既差距又由原來既兩分
拉開到二月中本來既8分差距

小弟就唔係好信機會會一次又一次咁重現
加上皇馬只得聯賽可爭
可以集中兵力專攻聯賽
巴塞隆拿似乎專攻歐聯比較實際

2008-3-8

1)
托里斯獲得英超2月份最佳球員獎

2)
里昂表示賓施馬同樣續約到2014年
細節將於下星期公佈

3)
意大利傳媒指祖雲達斯依然對基治咬住唔放

4)
加斯居尼已獲准離開醫院返屋企休養

5)
阿仙奴又睇中靚仔
今次係現年12歲既 Ryan Gates
佢今季已經為 Havant and Waterlooville U-12 入左95球
修咸頓,樸茨茅夫同埋雷丁都對佢好有興趣

另一方面,卡迪夫城17歲中場艾朗蘭森
亦被指成為兵工廠既羅致對象
早前有消息指一間倫敦球會曾出價100萬鎊被拒
未知係咪指佢地

6)
曼聯考慮將賓科士打於餘下球季外借到英冠

7)
禾高有可能得到布力般流浪既短期合約

8)
曉士表示唔預期會放走賓得尼
小弟認為佢唔想放人
但班高層敵唔過銀彈都係冇用
賓特尼離隊只係時間既問題

2008-3-7 (2)

碧咸訪港人氣大不如前係預左
不過球迷仲少過保安或者差佬
就真係唸都冇唸過

不過佢今日去教小朋友踢波
同埋尋晚(應該仲有今晚同埋星期日晚)既 Dragon-i 之旅
應該可以令佢尋回幾年前被萬人追捧既感覺

去教小朋友踢波應該係為左同贊助商交代
但去蒲怕且都係為左同自己交代
如果唔係又邊會一到埗就同埋一眾隊友
由超級蒲精教練古烈治帶領下出去蒲
既可以同隊友打好關係
又可以於'中立場' Dragon-i 同一大班等佢好耐既美女過招
佢0個刻應該會發覺自己依然好受歡迎

所以小弟覺得去蒲老蘭
對咸哥而言應該至少係一項心理治療既療程
而成班咁索既 model 用人海戰術列晒陣等住佢去
唔去又真係超級浪費
聽落真係蒲得有道理

不過小道消息竟然話佢最終飲到貓晒
之後今朝就以身體不適為理由
(實情係唔知醒)冇去操練
咁就點都講唔通掛

佢自己成日話要爭取重返英格蘭
但咁既狀態同埋態度
卡比路會選佢就奇

如果一個星期前有人同小弟講
碧咸唔會有機會第一百次為英格蘭上陣
小弟會半信半疑
但而家小弟最少信8成

P.S.:
段估佢收山之前應該都唔會再訪港
雖然佢而家既狀態應該只係一般
但係如果到時佢同李海強鬥波時忽然有料到
0個種開心應該至少會大過臨場有嘉士伯贈飲

2008-3-7 (1)

1)
馬甸尼透露有意延遲1季退休

2)
基文迪成為梅西亞既新教練

3)
紐卡素被指有意出價700萬鎊引入
勢必於季尾離開巴塞隆拿既古莊臣

而佢地亦被傳想向曼聯出價550萬鎊買費查
不過就要同伯明翰爭過

4)
烏化奴斯被指可能以自由身轉投馬體會

5)
文仙尼版傳成為皇馬暑假1100萬鎊既羅致對象

6)
托利斯原來成為利物浦近60年來
第1個連續兩場於主場大演帽子戲法既球員
亦係歷年來既第4人

2008-3-6 (2)

1)
利物浦球迷會發言人艾堅遜
表示球迷對 DIC財團既出價'審慎地歡迎'
仲話希望兩個美國老闆有得賺就好走人

2)
原來美斯最終要抖6個星期

3)
紐卡素再次被指將於暑假出價買賓特尼
轉會費高達1500萬鎊
但有力般流浪已表明唔準備放人

小弟認為以佢地暴力幫高層既作風
咁既價錢佢地實會放人

4)
卡斯辛奴為左日前既鬧劇
而要停賽5場兼罰款約15000歐元

5)
費倫天拿新星柏斯哥利
被指成為祖雲達斯500萬鎊既羅致對象

6)
林伯特被傳將以600萬鎊買斷同車仔餘下既合約
祖雲達斯亦被指可能會乘機出價買人

7)
拉葛特表示唔排除正式轉會到史篤城

8)
馬體會被指可能出價2300萬鎊
一次過引入拉爾拿同埋沙比艾朗素

9)
阿馬利自爆車路士曾經對佢作出斟酌

10)
西班牙 U-21 進攻中場古蘭路
原定將於季後由基達菲重返皇馬
但有傳拉莫斯想將佢帶到熱刺

11)
費文尼表示冇意思轉投祖雲達斯
表明最想同阿仙奴續約

2008-3-6 (1)

尋日冇時間講新聞
而家補返......

1)
吉列可能出售佢手頭上既利物浦股份

2)
美斯要養傷3星期

3)
古治被指成為拜仁既增兵對象

4)
奧林比亞高斯既22歲希臘右閘托路斯迪斯
被指成為紐卡素,祖雲達斯,馬體會同埋摩納哥既羅致對象
佢地4隊都會派球探入場
睇今晚車路士對奧林比亞高斯既比賽

5)
奧高查將於季尾掛靴

6)
列達以借用身份
由雷丁加盟查爾頓4星期

7)
艾比達向華倫西亞索償6000萬歐元一事
被裁定敗訴

8)
迪羅斯被指成為車路士同埋皇馬既增兵對象

9)
哥治被指可能考慮由利物浦轉投維拉

10)
謝斯高連倫再被指會以自由身加盟阿仙奴

2008-3-5 (2)

一個充實既歐聯晚上......

AC米蘭主場被阿仙奴擊潰
成為連續第4支歐聯衛冕球隊於16強出局外
睇完場波
即睇曼聯同埋巴塞隆拿兩場波既精華

充電後既C7果然又再有料到
不過講真曼聯埋門一腳唔多掂
如果唔係雲達沙死好命
封唔晒近柱都仲有條近柱幫佢頂住
場波實要加時

巴塞隆拿方面
細哨明顯回勇
繼上場倒掛入波後
尋晚又先後兩次 no look pass
不過美斯就拉傷提早離場
暫時未知要抖幾耐

睇完兩場精華
即轉去672睇西維爾對費倫巴治既加時直播
佢地咁累都仲肯高速跑上跑落
(焗住都要咁樣跑既球證仲最終抽筋
可想而知班球員有幾辛苦)
雖然冇咩實際
但已經唔可能太苛求

主隊既艾斯古迪,馬利斯卡同埋丹尼爾艾維斯
先後射出冇力兼冇角度既12碼
想唔輸都難

睇到6點幾先上床訓都抵
因為真係幾正
不過如果講波佬既表現再好0的
尋晚會更加完美

Peter 兄尋晚既作風一如以往已經預左
不過佢夢遊直播室就抵被人炳啦
佢話:'迪亞比已經算好
冇於危險地帶輸罰波
等P.祖連奴冇機會表演......'

P.祖連奴?!
之後, dead air 左兩三秒
小弟唸江忠德0個刻都應該 O 晒

跟住佢又有波唔講
突然問江忠德:
'歐聯8強要唔要再抽籤架?'
一個字:頂!

另一邊既672
射12碼既時候
邢安邦話:'簡路迪既12碼呃晒柏立'
今次到小弟 O 晒
講波講左120分鐘既佢
竟然將兩隊龍門個名搞錯晒
一個字:唉!
佢可能之前講新聞掛左有稿讀
講直播仲未太得
有時令人覺得佢幾緊張下

喂!監製唔該好心做下野啦
特別係 Peter 兄
佢究竟會持續失控到幾時?
好煩呀!

2008-3-5 (1)

尋日做野做到扯火
放工即刻去舉鐵發泄既時候
聽到有幾個認識既 uncle 講波
有個就話阿仙奴死硬
講左一堆報紙都有寫既數據
之後就話小注左$2000

(咁都叫小注?
$2000已經夠類似小弟既死窮鬼捱一段日子
如果去類似石蔭既舊區
1年前仲夠買2000個豬仔包
或者250盒單拼燒味飯(仲可以話要多飯呀))

聽到佢阿叔(林尚義)上身
講野又串串兜兜
向來主張言論自由既小弟
等佢講完晒先開始咀咒佢:
'阿仙奴如果做到05-06年球季踢歐聯既防守水準
你0個2000蚊凍過水'

跟住個 uncle 既面口開始有少少難睇
佢話:'小黑!......(一堆報紙寫既數據,無謂重複)'
小弟就話:'算吧啦你!
大家都係上網睇外國0的賽前消息
我知既野應該唔會少得過寫稿0個班友
我覺得場波計牌面頂多六四波
如果AC米蘭都要小注$2000
咁另外3場曼聯,西維爾同埋巴塞隆拿點算呀
$20000定$200000呀?'

個 uncle 又話:
'AC米蘭班波夠經驗,又主場喎'
咁小弟就打斷佢:
'uncle 你睇樣夠經驗老到啦
不如咁啦,你搵過球場,我同你踢
睇你羸唔羸到我?'

跟住有另一個 uncle 打圓場
話夠鐘要去做熱身,跟住跑步
爭論亦到此為至

而家事實擺在眼前
阿仙奴2:0技術性擊倒對手
成為史上第一支英格蘭球隊作客AC米蘭羸波

佢地既防守效率重現
雲加亦一如所料用 4-5-1 陣式搶中場
(只不過小弟估佢用基拔圖施華
但雲加最終用迪亞比)

AC班波既攻勢因卡卡被凍結
同埋施多夫真係因傷倦勤
而近乎冇料到
柏圖又衰獨食
而恩沙基就慘在冇人供應

艾蒙尼亞成場波只受過兩次小考驗
如果唔係法比加斯上半場抽射中楣
阿仙奴會羸得仲輕鬆

小弟唔會扮野話估佢地會叻到作客羸波
不過就真係覺得有力保住最少90分鐘不敗

如果賭波真係咁易
蘋果0個個波神就唔使日日返工寫 blog 啦
佢地班名家亦唔會平均每個月輸到阿媽都唔認得

小弟更加唔使日日返工
被0個個貌似樣衰版芝思姑bi 既 immediate supervisor
時時刻刻精神虐待
將死貓當零食係咁食

我信有人獨具慧眼,好叻賭波
但打死都唔信尋日0個個
腹肌數量只有小弟1/6
識波連我1/6都冇既 uncle 會掂0羅

2008-3-4

1)
DIC 行政總裁 Sameer al-Ansari
證實佢地正同利物浦既兩個美國老闆
傾緊買盤既野

2)
飛燕諾主帥雲馬維治
落實於歐國盃決賽週後接手荷蘭
佢同荷蘭足總簽約兩年

3)
英超賽會否認準備提高票價

4)
列卡特否認同車路士傾過檔

5)
伊路列達決定向薩拉戈薩請辭
而維拿路拉將會接手
協助球隊護級

6)
愛華頓準備同莫耶斯傾續約

7)
維拉中堅居迪斯戴維斯要養傷7個月
提早收咧

8)
史堤芬泰萊被指成為熱刺600萬鎊既羅致對象

9)
於愛華頓少左好多出場機會既A.莊臣
被指可能以1000萬鎊既價錢轉投米堡

小弟認為成事機會唔大
因為米堡本身夠前鋒
又唔係錢多
冇咩必要買佢
而A.莊臣亦唔會咁蠢搵一間前線夠晒人既球會掛

10)
曼聯被指可能向愛斯賓奴出價400萬鎊買卡文尼

11)
米拿被指可能以借用形式
由新特蘭轉投列斯聯

2008-3-3 (2)

1)
賓尼迪斯被傳會得到利物浦續約至2012年

2)
紐卡素同埋熱刺被指可能會順道來港

3)
消息指雲加有接近7000萬鎊資金增兵

4)
些路迪既澳洲射手史葛麥當奴
被指成為紐卡素600萬鎊既增兵對象

佢本季上陣36場入左25球
前球會射手赫臣指如果佢有個好拍檔
佢有能力成為新拿臣

5)
祖雲達斯再被指想引入林伯特

6)
烏拉維利同里賈納達成解約協議

7)
皇馬準備同羅賓奴續約

8)
愛斯賓奴既攻擊重心雷亞拿
同埋白蘭恩既挪威門將 Håkon Opdal
都被指係熱刺既羅致對象

2008-3-3 (1)

想講某些人同埋事......

1)
利記有波贏
好大原因係佢地上半場初段超有運
兩次大難不死
跟住謝拉特射波唔中框
都竟然因謝斯高連倫現實生活中難得一見既顏面當球
而有得倒西入波
真係80歲唔死都有奇聞聽

打破悶局之後佢地既演出正常返
但後防始終唔太穩
全場只失1球真係要還神

史基圖同埋希比亞最終冇出洋相只因對手級數低
加歷查踢右閘又真係唔多掂
如果賓尼迪斯真係都睇到芬倫走緊下坡
就真係要暑假搵返個好右閘

2)
睇到紐卡素踢出基瑾接手以來最好既進攻足球
杜夫同埋占士米拿既活動範圍好廣闊
奧雲亦成日入鏡
不過最終冇好下場

除左因為球證初段冇判罰森巴攬跌辣椒仔
同埋對方既費度守到上左身之外
本身埋門一腳好唔掂先係真正既主因
所以佢地都冇咩好埋怨

紐記既防守出名差
全英超第3差既防守
印象中係佢地上左英超之後最差既一次
想生存就唯有後面輸幾多
前面同佢補返數
這個亦係大娛樂家基瑾向來既生存之道

有時埋門一腳差係原自信心不足
小弟睇得出紐記既進攻基本上已經有個 form
差既只係冇晒信心之後
重新起步既一腳

打呲郡係降班穩膽
富咸又幾近緊隨其後
紐記距離降班區域仲有3分優勢
計實力講真佢地羸晒其餘既護級對手
連鬥心而家都返埋來
未有既就真係只係信心

3)
米堡又因韋達爆鑊而輸波
小弟一0的都唔意外
佢仲有排浸
佢唔犯錯小弟先意外

要被人炳既唔係佢
而係睇遠唔睇近既修夫基
賣走活基治但唔搵返個替補
咁算點先?

想韋達上位
除左為佢繼續提供機會之餘
都要搵個人帶住佢掛
侯夫同普基迪斯連自己都顧唔掂又點可以帶住佢踢
佢係要一個識包波
踢法似以前既修夫基既後衛去帶住踢

韋達同侯夫係有拚勁
不過踢波除左拚勁,仲要用腦架

4)
利記,紐記同埋米堡既防守都好難令人放心
不過都唔算係本週最差既防線

因為祖雲達斯比佢地更差
主場出擊
兼有保方左飛右撲都失3球
已經可以想像到佢地有幾差

佢地有齊上述3隊既防守弱點之外
仲要衰多瓣畏高
見球波幾層樓高跌落0黎
人地既前鋒又殺到埋身
佢地都夠膽死等個波彈地先去解圍
有咩辦法會唔死

越來越覺得羅傑承對佢隊南華有信心係岩架
祖記咁既防線
南華用迪天奴屈機實有波入

5)
皇馬有波羸
全靠魯爾同埋羅賓奴
就算佢地傷兵滿營
小弟覺得靠佢兩個都有本錢於歐聯反勝羅馬

魯爾咁搏
狀態仲回勇兼穩定
正常教練都識選佢重返國家隊
阿拉干尼斯條老鬼冇料兼小氣
小弟永遠都唔會歡迎佢過利記

6)
巴塞隆拿作客馬體會反勝為敗
除左阿古路超勁之外
佢地本身不思進取先係主因

佢地今季已經唔止一次試過咁樣失分
都仲未知衰
球隊由球員到教練列卡特都好抵炳

不過小弟覺得如果列卡特冇叫班球員咁樣拉布
佢地又點邊會重覆犯錯
難為列卡特賽後好意思將個責任推晒落0的球員度
話唔應該拉布喎
簡單幾句就咩野責任都推卸晒
勁!

P.S.:
不過講到推庄
佢都未夠尋日台上既鄭少秋賤
扮0野秋衰到帶埋個女做半個擋箭牌
最火滾就係聽到佢講'我應唔應該講出真相呀?'
即場將個波拋比個女
個女唔通即場篤爆佢咩?
頂!

小弟0個刻覺得佢再扮大俠都唔會有說服力
收山啦佢!
反而欣宜表現得體
雖然覺得佢都係依然唔岩娛樂圈
不過都突然順眼左好多好多......

2008-3-2

1)
'香港之寶'姚卓然今晚舉行安息禮

2)
賓尼迪斯被指成為國米同埋華倫西亞既新教練人選

文仙尼雖然帶領國米稱霸意甲
但帶隊踢歐聯咁耐都未掂過

而華倫西亞被傳會易手
消息指新老闆會即炒搞
教波唔叻,兼且搞到家衰口不停既朗奴高文

所以兩支球隊都被指想打賓帥既主意

3)
錫週三被指想搵舒利亞取代現有領隊 B.羅斯

4)
舒靈咸宣佈將於季尾掛靴

5)
伊度亞度達施華公開向軍醫利雲致謝

6)
消息指施多夫'可能'因腿筋傷患而缺席對阿仙奴既比賽
又'可能'......?
小弟覺得最大既'可能'係'又係煙幕'......

7)
哥古夫表示將於季尾同AC米蘭方面
商討佢於球隊既前景

8)
希爾星堡既貝寧射手奧莫托約斯
被指成為樸茨茅夫,雷丁,打呲郡,帕爾馬,
阿特蘭大同埋格羅寧根既增兵目標

9)
維拉利爾既門將迪亞高盧比斯
被指成為曼聯新門將既人選
之前AC米蘭亦曾經被指想於季尾簽佢

10)
消息指費倫天拿將成功從柏迪遜
買入17歲天才射手祖雲歷

11)
消息指費格遜將會獲邀
帶領英國聯隊踢2012年倫敦奧運

12)
朗斯後衛希爾頓成為貝迪斯既羅致對象

13)
Afshin Qotbi 成為伊朗既新教練

14)
法國傳媒指拖連奴想
從巴黎聖日耳門既右路防守球員文迪

15)
消息指紐卡素同埋熱刺
都有興趣於7月去中國踢表現賽

16)
車路士準備從巴勒莫引入
現年14歲,意大利 U-21 後衛 Giuseppe Prestia

17)
意大利傳媒再次指舒夫真高會於下季重返AC米蘭
消息指佢會簽約3年

18)
阿積士既亨特拉爾同埋艾曼紐臣
被指將可能於季尾轉投羅馬

19)
祖雲達斯被指準備於季尾從圖盧茲引入艾文達

20)
利物浦準備同希比亞以及哥治續約

2008-3-1

1)
馬斯查蘭奴落實加盟利物浦
佢同利記簽下4年合約

2)
屈福特19歲門將 Scott Loach
被指成為利物浦同埋紐卡素既增兵目標

佢現時被外借到巴拉福特
皮雅斯之前亦表示有意選佢入 U-21 代表隊

3)
里昂會長歐拿斯既顧問 Bernard Lacombe 爆料
里昂曾對摩連奴展開斟酌
不過被摩佬拒絕
而原因係佢下季將會接手巴塞隆拿

4)
華斯高向 FIFA 投訴皇馬
私下聯絡佢地15歲球員菲臘比哥天奴既家人
向當時人提供非法既 offer

5)
有'新杜奧巴'之稱既聖伊天射手 B.高米斯
被傳成為紐卡素暑假既增兵目標

因為球探既推介
完左今日對布力般流浪場波後
基瑾仲會飛去法國睇聖伊天對尼斯既比賽
睇下係咪真係值1200萬鎊

另一方面
紐記準備簽下塞內加爾後衛迪亞達
佢可以踢中堅同埋右後衛
體力，制空力同埋助攻都唔錯
只係踢法好粗枝大葉

佢於法國曾經踢過里昂,馬賽同埋聖伊天
之前就效力比錫達斯
有消息指佢於球隊被利物浦大炒８：０後
成為高層下令炒人出氣既８個代罪羔羊之一
但亦有消息指係佢自己提出買斷合約離隊

而佢早前曾經被指會得到伯明翰既半季合約
不過最終未能成事

6)
因為工作證問題而未能加盟維拉既美國隊門將古辛
已同些路迪達成合作協議
將於暑假加盟

7)
米堡將拉葛特外借到史篤城直至季尾

8)
由於國際足協唔准
一個球員一季內為多於兩間球會上陣
令吉遜未能如願由格拉斯哥流浪
以300萬鎊既價錢轉投富咸

9)
曼聯準備同里奧傾長約
確保佢餘下既球員生涯會於曼聯度過