3場波想講:
1) 曼聯對利物浦
小弟 preview 講過利記近況咁好
有力去奧脫福要返1分
不過多得馬斯查蘭奴同埋拉爾拿兩個傻仔
就註定輸波收場
先講傻仔1號馬斯查蘭奴
小弟唔介意佢過勇攔截領第一張黃牌
不過之後佢仲夠膽死去惹賓納特
都未攞第二張黃牌
人地做球證既已經好俾面
小弟認為0個時既佢已經唔適合繼續比賽
如果後備席有其他防中可供選擇
賓尼迪斯應該一早就換走佢
到托利斯去同球證出口術領黃牌
馬斯查蘭奴又走過去衰多口
沙比艾朗素只係扯一扯佢件衫
見勸佢唔掂就只係掛住準備開波
小弟心唸:究竟開波緊要0的,定係唔使踢少個緊要0的?
已經輸緊一球既利記咁就踢少個
場波亦已經 over
成件事,身為行記迷既小弟
絲毫冇反對馬斯查蘭奴既兩張黃牌
小弟估佢最終仲要停夠4場
跟住講傻仔2號拉爾拿
小弟知佢全場有7個 save
但頭兩球出迎既時間都咁差
又試過幾乎拍個波入自己龍門,開波出界,拋錯波俾對手......
幾乎咩野蝦碌野都有佢份
就不禁令小弟唸:
幾時利記先會搵到個好似當 fit 既簡尼,保方,施治,舒米高
咁令人有信心既龍門
曼聯本身場波唔見發揮得好好
不過利記咁樣讓波
人地想唔羸都難
P.S.:
最後要讚費 sir 幾句
佢見利記於下半場中段準備搏一舖既時候
即刻以蘭尼同埋泰維斯
入替傑斯同埋安達臣
繼續壓住利記來踢
咁既調動
小弟肯定英超好多領隊都唔識咁做
2) 車路士對阿仙奴
成場波主隊略佔優勢
上半場因為球證走漏眼而未得12碼相當唔抵
下半場阿仙奴偷雞一球之後就無以為繼
小弟認為佢地最終反勝為敗
第一球杜奧巴同埋安歷卡明顯越位在先
球證既誤判係勝負既轉捩點
但對住杜奧巴既強勁衝刺
阿仙奴條防線力量上未能制衡佢
仲咁冇集中力
就真係過得到初一都過唔到十五
講波佬話格蘭既調動係勝負關鍵
仲話佢威返舖
但一場勝仗唔足以令小弟對格蘭改觀
原因係佢開波已經排錯陣
用艾辛踢右閘
到輸波要變陣先識用巴列堤
將艾辛移前取代馬基里尼
而波歷克同林伯特擦唔出火花就近乎全個球壇都知
佢亦係後知後覺先識收起前者
小弟只可以話佢知錯能改
而用安歷卡伙拍杜奧巴合作入到第二球
根本係輸高路托尼失位走甩左後者
講到貿然用 4-4-2 有波羸就讚格蘭
小弟份人咁硬頸就真係做唔到
最後要彈雲加幾句
佢今場波用雲佩斯踢正選未算好差既決定
但雲佩斯踢得唔好
都仲要等到76分鐘先用禾確特入替佢就真係敗筆
另外,賓特拿今季已經唔止一次入場後
竟然成日返後場搵波踢
就整定浪費左佢既身高優勢
咁就不如唔好換佢入場
3) 紐卡素對富咸
基瑾接手咁耐終於有波羸
佢地明顯搵到進攻既 form
有鬥心又有實際
入波自然唔難
不過佢地依然有改善空間
而小弟感覺基瑾仲未肯重用馬田斯
另外，多得對手出名作客差
成場波近乎未有一次有威脅既攻門
令到紐記班後衛連爆鑊既機會都冇
5 comments:
好開心，終於贏番埸。維度卡今埸明顯打得幾好,入果球盡顯功架。而成埸波都打得幾好。馬田斯仍然好生。不過又俾KK換走，唔知佢會唔會唔開心......奧雲做左隊長後，見到佢真係勤力左，不過都仲未可以下定論。
後防今埸未有太大考驗，富咸好多時都傳傳下斷左，所以下埸作客熱刺先係考驗。
中埸三位對贏波都幾大貢獻，係中間搶贏哂，謝列美兩個助攻出番口氣~
To: 舒利亞
其實紐卡素前中後依然有好多問題
只不過今場既對手富咸出左名作客差
令紐記踢得好輕鬆
小弟成日覺得紐記最大既問題係信心唔夠
希望羸返場波可以幫佢地減壓兼打起信心
至於執靚隊波
始終係要一段時間既
遲了reply,希望有人睇到啦!
寫一些關於下場對熱刺的少少分析
紐記最近2場排433,皆從弱旅身上搶到4分,但我覺得暫時這個陣式還未受到考驗,今屆或上屆我地能3次打敗熱刺,我覺得是有機會起碼取得一分的,不過中場3 個防中要補位快些,記得對伯明翰一役的上半場,這個陣式已被一個拿臣不時作出反擊,如果當時不是他被踢傷離場,下半場未必能追平.
熱刺既中場可以用波既球員不多,但一個艾朗連儂再加多個貝碧托夫已足夠玩弄一對仍末夠默契既中堅taylor及faye,所以三個防中既補位真的很重要,上場對富咸,佢地三個就做得幾好,而轉型中既奧雲因有維度卡在前面的掩護,在位置上稍為墜後幫手分波及控波對球隊的進攻組織上亦有建樹,起碼前場可以靠 martins幫手在左路爆入去禁區,右面有謝列美同beye助攻助守,從上場對富咸所見,發覺謝列美可以控制到中場造波節奏,跟波既速度亦教以前快,亦都幫輕了畢特在中場的工作,不用既常上前做分波,又要做防中,唔上唔落,吃力不討好,
我估這個陣式應該都可以抗衡到熱刺既進攻,起碼前鋒有三個頂住,可以使熱刺既中後場不會壓得咁上,不過在後備方面,我覺得應該加入杜夫,起碼在變陣442或451時,可以多一個選擇
另外我都有睇曼聯vs利物浦這場雙紅大戰
整場波我覺得利記既形勢已經被曼聯比下去,當時曼聯真的壓得好上..不過關鍵真的是打少個,但我認為當時就算輸一球時都可以靠變陣追回,可惜變陣卻不夠大膽..
當時換入班拿約都是一個幾好既調動,在左面可以做到攻勢,不過我仍嫌覺得保守一些,其實打少個既時候,與其保留一些造波型既球員,不如換入一些可以幫手屈機既球員,我覺得當時古積特同沙比艾朗素既表現都好一般,掂波又不多,其實可以早些換入懷斯及高治去代替佢地,起碼可以利用罰球,角球,界外球搏下,我估會有機會追平的,如果當時能追平,就算曼聯換入拿尼及泰維斯,以利記球員出名打生死戰既士氣,是有機會守和的..
當然,以上都是事後孔明的分析...
To: sammysir
你既 comment 已經被我
'copy and paste'
成為今日既 post
當然我又會多口講多幾句......
Post a Comment