君臨聖西路......
唔係馬後炮
知道(其實一早預左)出場陣容
已經知掂硬
早於利物浦作客車路士之後
小弟已經講過有馬斯查蘭奴同埋盧卡斯利華
為謝拉特做 back up
神奇隊長既攻擊力自然會得到釋放
佢同托利斯既化學作用仲遠超預期
0個時已有預感賓尼迪斯已經試到最佳陣容
佢仲好在肯盡量少 rotate 0的人腳
雖然陣容仍有弱點
(有機會再講......)
但已經超開心
場波預左要搶中場先有機會打突擊
面對國米韋拉加上甘比亞素
馬斯查蘭奴同埋甘比亞素完全不落下風
小弟認為以前者今季既整體表現
就算唔係全世界第一既防中
都應該至少係3大
有佢兩個再加上表現越來越穩健既拉爾拿
仲要史基圖犯上超低能錯誤
利記都竟然死唔去
基本上已經立於不敗之地
場波自從佢地再次踢少個
而伊巴謙莫域收左史基圖0個份自殺式橫傳既厚禮都無福消受
場波已經可以放入雪櫃
或者應該形容為好似籃球比賽既垃圾時間
托利斯既入波只係於國米(或者文仙尼)既傷口上灑鹽
最後想講下兩位教頭
賓尼迪斯唔玩 rotation
用左現時既最佳陣容
已經講過話佢好抵讚
佢臨場調動亦見功力
於貝迪素被驅逐後
因為人多打人少
受壓時間同埋變相打突擊既機會亦會減少
佢索性以擅長用波既班拿約
入替踢反擊叻過搓波,兼有黃牌在身既巴布
既可以用空間消耗時間
更可以使上半場走動比平常多既國米球員更快消耗體力
但右後防同埋中路就真係幾令小弟擔心
小弟於史基圖初來報到既時候
已講過佢仲要浸淫
只係唔能夠救近火既遠水
如果用加歷查改踢右閘頂芬倫個位
而用史基圖踢中路
咁就同放個炸彈自殺冇咩分別
小弟認為倒不如一開始就用艾比路亞踢右閘
另一方面
上回合利記最初攻唔入守得幾好既國米防線
賓帥都識換個踢邊既賓納特入場
作左次示範比文仙尼睇
佢原來都未學到野
今場未踢少個之前
或者應該講最初唸正選既11人
其實佢有條件用費高或者占美利斯
不過只見前者有份熱身
後者亦於敗局已定之後先有得落場
就反映佢唔夠果斷
又或者應該講佢一直以來被人批評
踢歐洲賽時太保守既缺點仲未有改善
今季於意甲久攻不下
佢隨時變陣改踢3箭頭
以為佢已有進步
識得幾時要有吉屎
點知一踢歐洲賽
對住0的高班球隊同埋教頭
就即刻畏首畏尾,打回原形
佢同賓帥,又或者摩連奴同埋軒迪克一比
4個字:高下立見
佢賽後即刻宣佈季尾離隊
之後佢有大把時間
真係要慢慢反思清楚自己一直衰0的咩
先好再唸出山教波
因為獻技變成獻醜或者獻世就真係無謂
2 comments:
國米再輸，小弟又真係估唔到。始終國米番到主埸，諗住應該不敗啦掛。點知今朝一睇，竟然輸埋，文仙尼仲要季尾走，真係點都估唔到。當然，利記本身係值得取勝既。不過文仙尼唔做，對國米既影響我覺得幾大。雖然佢係有唔少地方未做到最好，但係已經叫做將國米帶到近年最穩定既水準。真係有少少可惜。
To: 舒利亞
文仙尼事件而家 U-turn 收場
佢老闆話佢會繼續留任
不過其實佢本身都可能教得幾唔開心
因為佢同部份球星不和
而教國米既壓力又向來超大
(如果有時間
今日應該會講幾句佢單野)
Post a Comment