想講下尋晚兩場波......
1) 西班牙對俄羅斯
俄羅斯輸波唔奇
但輸咁多就幾意外
小弟歸納左幾個原因
首先人腳天殘地缺令佢地好似捉棋讓人雙車
前線艾沙維停賽
普基尼耶克因傷退隊
而防線主力比列蘇斯基兄弟又令人意外冇份落場
睇見出場陣容已知佢地冇運行
而佢地行軍節奏唔快
對住技術型既西班牙竟然慢慢搓
人地唔佔上風先奇
而佢地一心唸住靠死球屈機
但0的死球水準又好一般
多數都斬唔起
而最致命既係佢地全場犯下幾次低級錯誤
如果唔係艾堅費夫夠勁
佢地半打都有得輸
另外,軒迪克今場兩度變陣失敗
不過限米煮限飯
又唔怪得佢太多
西班牙方面
羸夠四個一皮固然令人留下好感
韋拿大演帽子戲法
托利斯冇波入但踢法唔自私
二人同樣搶鏡
佢地未至合作無間
不過亦反映現仍可以再有進步空間
冇受考驗既4人中場分工清晰
只驚恩尼斯達過多時間入左中路
阻住沙維做野
同事甲繼荷蘭後又搵到多一隊鬥牛國作為支持目標
不過佢地條防線其實幾唔掂
講表現同俄羅斯只係五十步笑百步
而沙治奧拉莫斯同埋馬真拿仲先後同佩奧爾嗌交
認真冇大冇細
印象中'後衛輸幾多,前鋒補返數'
已經係幾十年前既睇波情節
主角仲要係有比利押陣既巴西
82同埋86既巴西功力咁勁都被後防所累
最終搞到一無所有
何況眼前既西班牙
佢地既防守如果持續冇改善
小弟打死都唔信佢地可以捧盃
2) 瑞典對希臘
可能因為驚左伊巴謙莫域同埋拿臣
亦可能因為列哈格想第一場踢得保守少少
希臘一改 4-3-3 陣式
收起阿曼尼迪斯
改用多個中堅安沙斯
以一個介乎 5-3-2 或者 5-4-1 既陣式應戰
佢地未失波前其實同瑞典拉成均勢
不過最終因伊巴謙莫域一腳世界波失守
做足本份但輸俾人地既質素真係非戰之罪
而因為要加強火力搏殺
達拉斯被換走
就遇左隨時失多球
不過佢地後防罕有輸得咁肉酸
就始終令小弟有0的意外
希臘神話收皮
另一個原因同中場冇料到有關
巴辛拿斯力不從心
加拉高尼斯同埋加素蘭尼斯就未老先衰
而3條友全場竟然俾唔到一腳靚波
一條冇活力兼創造力既中場
解釋左球隊有幾多射手都冇用
瑞典方面
講表現都唔算突出
如果唔係伊巴謙莫域既世界波
隨時同希臘和波收場
睇來佢地多數8強收皮
2 comments:
無左艾沙維同埋普基尼耶克呢對辛尼特孖寶，其實影響的確大。艾沙維要去到最後一埸分組賽先出到，普基尼耶克更加退埋隊。俄羅斯下埸捱唔捱到真係未知。
西班牙條防線，對住伊巴謙莫域或者係拿臣先係考驗。卡斯拿斯隨時有排忙。
To: 舒利亞
1)
俄羅斯既表現如果冇改善
下場對希臘未許樂觀
雖然希望首場既表現都唔見得好
但最少比俄羅斯有隊型
2)
就算球隊對俄羅斯
卡斯拿斯都已經好唔得閒
何況下場對瑞典
Post a Comment