1) 德國對克羅地亞
寫歐國盃 preview 同埋德國對波蘭既賽後感
小弟先後提出幾個德國隊既隱憂
當中包括:龍門,左閘,中場側擊,前鋒同埋教練
唸都冇唸過尋晚一場波就暴露晒出來
不過咁都唔足以解釋點解尋晚德國會輸俾克羅地亞
小弟原本放 annual leave
唸住休養生息
順便睇下 NBA 支持下塞爾特人既3個巨頭
結果都係忍唔住再三翩睇尋晚場波
先講排陣
雖然包括布林美在內既多位名宿狂插贊臣
但路維依然決定原陣出擊
而比歷就收起上場全隊最差既柏達歷
改用練波時有好表現既拉傑錫踢左中場
以 4-1-4-1 陣式迎戰
比賽初段
克羅地亞好積極壓迫德國
唔俾德國取得比賽既主動權
穩定左陣腳之後
佢地就開始慢慢發動攻勢
交替用長傳同埋小組滲入對付今場唔夠機動既德國
而克羅地亞今場起用勤力既奧歷踢單箭頭
主要係靠佢牽制德國一隊中堅
真正既進攻點其實係隨時後上埋門既中場
要對付對手既後上攻門
單靠後衛係唔足夠
因為佢地好難預測對方邊個同埋幾時會後上攻門
所以係好倚靠中場既回防
偏偏德國一條中場線上半場回防效率不足
踢後衛出身既費斯回防最多
但質素一般既佢要對付對方出色既小組入滲
顯得有心無力
而普度斯基回防意識同埋防守能力又非常不足
更致命既係波歷克同埋芬寧斯大失水準
令克羅地亞既4名進攻中場可以為所欲為
而德國今場既防守
可以講係繼06年初對意大利既熱身賽後最不知所謂既一次
兩名高大中堅未能應付對方既傳中
左閘贊臣多次失位
結果其中一次就俾對方偷雞得手
上半場中段起接連廿幾分鐘門前數次風聲鶴唳
落後下既德國
有波歷克壓前以圖收復失地
不過普度斯基唔係側擊既好材料
掛住回防既費斯又唔夠侵略性
單靠中路硬闖同埋高Q大棍
面對防守不俗既克羅地亞
結果當然徒勞無功
而波歷克壓前亦加重左芬寧斯既負擔
結果半場只得一次強勁罰球攻門算係似樣既德國
就半場落後一球
半場接戰
路維面對現實收起贊臣
由拿姆舊調重彈
費斯就墮後安心踢閘
不過路維錯在起用冇態兼仲未收晒身既奧當高
佢成個下半場不但未能拉開克羅地亞既左路防線
仲曾經試過俾對方既左閘柏蘭積爆返轉頭
調動明顯失敗
舒韋恩史迪加或者保路斯基似乎先係一個更好既人選
而德國下半場經過頭幾分鐘既虛火後
又再令人有老鼠拉龜既感覺
佢地既控球時間比率雖然已經增加
不過節奏就俾對手控制
而不安同埋急躁令佢地踢得更差
佢地明顯忘記左破密集防守
需要既唔止質素
仲要耐性
而略為將防線縮後既克羅地亞就全耐心等機會反擊
佢地之後更憑一個略帶幸運成份既入球將比數擴大
不過話雖如此
德國防守球員其實要為佢地既唔集中而付出代價
輸夠兩球先識用舒韋恩史迪加
入替冇表現既馬里奧高美斯
佢冇表現除左冇供應之外
更大既可能其實係開唔到齋既壓力
而之後普度斯基成功破蛋
都掩飾唔到德國今場演出不濟既事實
路維同埋佢既球員應該慶幸今場只係分組賽
而唔係淘汰賽
一場輸波如果可以喚醒佢地有大改善
小弟會認為今場既敗仗反而係好事
小弟姑且相信路維能夠帶隊闖過奧地利既一關
之後雖然德國多數要對上線既熱門葡萄牙
但如果抱住 all-or-nothing 既心態
葡萄牙只不過係爭標既中途站
8強抑或4強先交手其實冇咩所謂
只要佢地既表現有改善
單憑球員質素對葡萄牙依然有力一戰
關鍵反而係路維既臨場應變
因為而家佢連比歷都嬴唔到
一下子要佢羸連世界盃都捧過既史高拉利似乎好有難度
2) 奧地利對波蘭
奧地利開賽初段多次失機
埋下落後伏線
不過波蘭領先之後亦多次錯失擴大比數既機會
亦埋下被迫和既伏線
雙方既埋門能力不足
係未能全取3分既主因
特別係主辦國
如果佢地既主力華斯迪後生10年
而家好可能已經全取6分兼晉級分組賽
7 comments:
好老實,奧地利自東尼.保士達(Toni Polster)退役改任樂隊主音後, 的確十年來都未見過一個似樣的射手,華斯迪雖然是較像樣的一個, 但多年來均不是一個正射手......而現時前鋒質素例如連斯,跟一些英冠前鋒無分別
以夏歷我睇得出有潛質,但需要學會從壓力中成長, 因為自昨晚幾度失機後, 實被傳媒口侏筆伐......他只得廿一歲而已
希望4年後的奧地利會打得更好, 因為普度爾,卻馬斯,夏歷,列特格比,普加迪斯,艾雲舒捷斯,加歷斯,基連斯特及沙奧美都很年青......有進步空間, 當然還看其世杯外圍賽有沒有良好演出
如果舒亞拿肯歸隊就更完整
版主寫既第一篇分析非常詳細,鉅細無遺,
真的很像大學論文既水準,
我本身都估唔到大熱門德國既球員趺哂watt,
竟被我既另一支愛隊克羅地亞好似格食格一樣,
(其餘兩支為走樣左既捷克及瑞典)
很難想像一向功於心計既德國被克軍既針對性部署完全拑制著,
回想起來,英格蘭在外圍賽被克羅地亞踢出局,
真的輸得心服口服
下一場德國要振作,
變番一支擅踢大賽既球隊,
防中上要取回主導,
否則以其突然跌watt既防線,
會很易被踢法上節奏明快既奧地利撕開.
聽到個friend話克羅地亞贏左德國，都呆左一呆。兩隊今埸既水準同第一輪真係幾唔同。克羅地亞進步左唔少，德國似乎被比下去。佢地對住克羅地亞既密集式防守攻得咁差，隨時下埸都未必攻得入奧地利。
奧地利經過兩輪後，已經成為不容忽視既球隊。如果德國唔打醒十二分精神，輸埋我都唔會奇怪......
克羅地亞率先出線，的確令人有少少意外。佢地好大機會對住捷克或者土耳其。要突破八強似乎亦唔係難事。如果佢地一埸比一埸進步，隨時有更佳成績。
sammysir 個 blog 幫你賣廣告喎!
http://www.xanga.com/sammysir2001
To: ck
1)
小弟都同意保士達仲勁過華斯迪
華斯迪只係而家陣中小弟認為最可信既球員
2)
小弟最懷念既其實係中場靴索
當年佢踢雲達不來梅
佢既創造力真係 fit 晒
To: sammysir
1)
你太誇獎小弟
同埋多謝你於 xanga 提及過小弟既 blog
2)
講波佬話唸起98年既克羅地亞
不過其實小弟既第一個反應係
唸起佢地點樣於主場打瓜英格蘭
3)
德國真係要重整陣容
否則對住仲有出線機會既主辦國奧地利
隨時陷於苦戰
To: 舒利亞
如果講黑馬
似乎克羅地亞最令人驚喜
搞掂德國既一場波
羸晒印象分
To: 死佬
有冇睇歐國盃?
雖然你鍾意既英格蘭同埋杜迪都冇份踢....
梗有睇! 不過今屈無咩驚喜喎!
To: 死佬
咁又真係冇咩驚喜
不過荷蘭比預期中好睇好多
最終捧唔到盃都一定羸盡口碑
而奧地利同埋瑞士既表現
亦好過之前既熱身賽好多
另外,土耳其3場都幾有運
仲簡直係球迷奇遇記
Post a Comment