想講下意大利對羅馬尼亞
鄧納東尼雖然維持 4-2-3-1 陣式
不過就一氣更換5個球員
當中包括基亞連尼,格羅素,迪羅斯,柏路達同埋迪比亞路
而羅馬尼亞既變動較少
只以比達代替尼高利達出任右中場
意大利既演出明顯有改善
後防方面森保達同埋格羅素雙閘齊飛
基亞連尼就一柱擎天
而彭魯基就繼上場既下半場後
再次串演中堅
中場方面
柏路達同埋迪羅斯兩名活動範圍較大既中場得到出場機會
前者可能因為傷癒後仲未上力
演出只係一般
後者就明顯搶鏡好多
佢既活動範圍大得驚人
試過離門幾碼頭槌攻門
亦試過追至自已龍門口幾碼補位解圍
有迪羅斯幫輕下
派路今場可以更專心駁腳
同埋多次於後場放長傳
當中有幾腳波既落點仲好準
前線方面
東尼受制於哥恩同埋達馬斯
機會唔多
不過上半場完場前入波被誤判越位真係好可惜
迪比亞路臨危受命有表現
遠比上場既達拿達利好
不過小弟覺得甘莫蘭尼斯上場咁唔掂
今場有正選之餘
仲可以踢85分鍾就有少少意外
用錯佢同埋柏路達亦係小弟認為鄧納東尼今場唯一可以被人挑剔既地方
另一方面,於球隊火速追平後
鄧納東尼乘勝追擊
用卡斯辛奴而唔係岩布仙尼入替柏路達
仲好有納比當年既風範
意大利成場波都略佔上風
不過遇上盧邦守到上左身
入唔到波都冇計
而羅馬尼亞又繼續守得好
意大利有幾多人參與進攻都好
羅馬尼亞至少搵足人去二仔底死跟
而佢地既進攻次數雖然冇咁多
但好多時都好到肉
仲憑梅度把握森保達少有既低級失誤而先開記錄
至於彭魯基就真係今場波既焦點球員
上半場捷禾罰球省中佢再中柱
下半場佢又幫森保達補鑊
尾段佢一下唔算大動作既犯錯輸12碼
就好彩有保方救返球隊一命
而射失12碼既梅度就當然亦係另一個焦點球員
佢宴客後好似信心盡失
之後被高施斯入替既佢
令小弟唸起當年俾列文撲出12碼後既列基美
p.s.:
意大利而家最驚既可能唔係尋晚表現同樣有進步既法國
而係荷蘭放水俾羅馬尼亞
而場波當地時間17號踢
偏偏意大利歷年好多衰野都同17有關
例如鄧納東尼90世界盃射失12碼
佢既號碼就係17
小弟雖然從來都唔信咁既迷信野
不過球員同埋鄧納東尼信唔信就好難講
可能因而對信心會有一定影響
2 comments:
我都幾驚荷蘭會放水俾羅馬尼亞，不過我估荷蘭隨時驚羅馬尼亞多過驚意大利同法國。始終羅馬尼亞外圍賽未輸過俾荷蘭，雖然果陣荷蘭係低潮，不過佢地多少都會怕左羅馬尼亞。
To: 舒利亞
小弟覺得而家既荷蘭同埋尹巴士頓
邊隊都唔會驚
不過如果要放水既話
放俾羅馬尼亞會比較正路
雖然外圍賽對住佢場一和一負
而佢地既防守又幾穩健
但佢地既實力已經可以講話係見晒底
加上梅度唔 fit
威脅有限
但意大利同埋法國既水準如果持續有改善
(前者既進步幅度仲幾明顯)
而兩者雖然大敗俾荷蘭
但其實亦有唔少入波機會
可見兩隊對荷蘭既威脅應比羅馬尼亞大
Post a Comment