2008-6-15

想講下尋晚兩場波......

1) 西班牙對瑞典

由於韋希姆臣同埋阿歷桑達臣因傷倦勤
前者更已緣盡本屆賽事
令拿格碧克改以艾文達同埋史杜亞出任正選
但球隊仍以慣常既 4-4-2 陣式應戰原陣既西班牙

比賽初段瑞典已經以緊迫踢法令西班牙難以組織攻勢
後者雖然仍能靠費蘭度托利斯打破悶局
不過西班牙中前場既表現明顯冇上場咁好

而瑞典既攻勢實而不華
整個上半場佢地既進攻仲做得比西班牙好少少
加上西班牙有佩奧爾傷出
要由艾比奧爾入替
及後瑞典再靠高波終令西班牙後防出錯
由伊巴謙莫域追平1:1

被追平後既西班牙之後有機會再次領先
不過大衛韋拿既窩利太正
而艾文達回防撞跌大衛施華
又逃過球證既法眼
結果半場進攻失色既西班牙只能同瑞典打成平手

不過伊巴謙莫域於半場因膝傷被換走
就成為今場波既其中一個轉捩點
下半場既瑞典冇左進攻既 focus
前場立即顯得有0的不知所措
加上之前寫 preview 已經講過體能係佢地其中一個隱憂
佢地俾唔到西班牙好似上半場咁大既壓力
結果西班牙係主導左下半場

不過西班牙唔多踢翼既中場
遇上防守尚算嚴緊既瑞典
好少去試圖拉開對方既防線
做到既機會自然唔多
阿拉干尼斯未到60分鐘就以法比加斯同埋辛迪卡蘇拿
入替沙維同埋恩尼斯達
不過換湯不換藥
西班牙既中場依舊令人有中路塞車既感覺

而62分鐘把握唔到既連環攻門機會,
辛拿既中距離射門
同埋84分鐘球證又再次發雞盲
睇唔到史杜亞控波落手
已經係西班牙成個下半場比較好既入波機會
可想而知西班牙既進攻唔算突出

若非大衛韋拿把握漢臣既出錯而於補時入波
西班牙有冇得羸波兼肯定首名入8強
真係好成疑問

最後就想講幾句拿格碧克既調兵能力
韋希姆臣唔踢得
佢就用有速度既艾文達去補返個位
不過艾文達明顯唔係踢翼既好材料
點解唔用龍格堡踢返擅長既右邊
再用有潛質既施巴斯坦拿臣踢左邊?

唯一既解釋就係佢老人家用人向來好睇經驗
只要睇下成隊波咁多老人家就略知一二
睇下佢地近年一踢淘汰賽就被 KO
就已經知唔可以再長年倚靠佢地
如果隊波仍然由拿格碧克話事
瑞典依然唔可能上到歐洲或者世界球壇既一線

隨時有伊巴謙莫域再次因傷倦勤既瑞典
下場對住尋晚表現有改善,年青力壯,唔怕高波,有艾沙維復出,
兼有軒迪克領軍既俄羅斯
如果拿格碧克到時一心唸住和波
小心要賠上自己份工同埋球隊既前途

2) 俄羅斯對希臘

俄羅斯方面
軒迪克只以盤扭出色既托賓斯基
取代上場表現失準既施切夫
而希臘方面
列哈格就因為唔可能再保守落去
而用返用慣用熟既 4-3-3 陣式應戰
柏薩索古,阿曼尼迪斯同埋列比路普路斯就得到正選機會

踢得幾保守既雙方頭30分鐘形勢均等
不過希臘就因尼高普尼迪斯於33分鐘再次犯上嚴重錯誤而陷於劣勢

羸左一球之後
俄羅斯未有因而變得保守
一有機會就再次進攻
不過埋門把握唔掂既佢地始終無法增添記錄
咁亦解釋左點解佢地兩場波以來咁多射門次數
都只係入得一球
普基尼耶克缺陣對球隊既影響徹底浮現出來

而希臘方面
列哈格雖然於40分鐘就以加拉高尼斯
入替可能有輕微受傷既右閘施達尼迪斯
不過正如上場既賽後感已經講過
希臘既中場無論創造力同埋活力都有所不足
加上前線再冇4年前既超高把握力
面對已將學生級錯誤改正過來既俄羅斯防線
自然徒勞無功
亦提早一輪分組賽出局既佢地亦宣佈衛冕失敗

俄羅斯今場有返應有既隊型
下場有埋艾沙維簡直如虎添翼
雖然一定要羸波先可以出線
但只要能夠改善埋門一腳
晉級機會仍在