2008-6-16

原本米堡迷 ck 因為撐端基而愛屋及烏撐埋土耳其
佢仲答應為土耳其對捷克既生死戰再次寫賽後感
令小弟以為可以抽時間講下幾日都冇過既轉會新聞

不過尋晚場波咁戲劇性
雖然小弟對兩隊都冇好感
不過唔講真係會好唔安落......

一定要講既係點解捷克會反勝為敗
小弟第一個反應就係冇運
捷克羸緊2:0既時候
普歷克攻門中柱
令土耳其不致於輸到翩唔到身既第3球

但另一邊既土耳其
入第一球就中內柱入
入第三球就中楣底彈入
邊隊有運一睇就知

不過從另一個角度睇
小弟又唸到另一句說話:’機會只係會留俾有準備同埋付出既人’
如果土耳其班波輸兩球就已經放棄既話
杜蘭根本唔會有機會追成比較接近既比數
而如果尼赫治唔係夠勤力既話
根本就唔會把握到施治甩手
同埋贊古奴夫斯基包左越位所帶來既入球機會

而雨戰亦幫左土耳其唔少
因為捷克陣中比較多老將
踢水戰令佢地既體能下滑得更快
係佢地比賽尾段嚴重受壓既主因
上述3個 point 加埋就解釋左點解捷克會衰收尾

跟住小弟就想講下兩個教練既調動有幾差
先講布克拿
佢唔肯用巴路士入替體能不足既真高拿
令球隊少左本錢於比賽尾段打突擊

而柏拉斯於70分鐘起已經明顯跟唔上比賽節奏
加上佢既地頭又係土耳其好多時既進攻起點
冇理由要拖左最少10分鐘先換入卡特歷
而布克拿不但遲換人
亦冇搵個防中去支援氣力不繼既柏拉斯
小弟對佢既調動真係幾失望

不過唔好以為土耳其羸波
小弟就覺得泰連好醒
其實小弟覺得佢既調動仲不知所謂

首先土耳其連續兩場波既上半場都踢得唔好
主因係佢地整個上半場都唔識變通
上場波落大雨都仲要 keep 住踢地波玩小組滲入
今場佢地上半場俾人兩邊不繼搓
對方不繼傳中俾真高拿屈機
或者於中路搵機會射中距離
不過土耳其班友都冇加強兩邊既防守
而進攻既時候又唔知佢地想點
當中既主因係泰連成個上半場都冇即時作出調動
佢老人家好似一定要於半場先至識做調動
如果調動只係限於半場時於更衣室內進行
咁咩叫臨場調動呀

而佢既半場調動又令小弟莫名奇妙
佢換入沙里奧古打右邊以加強側擊
偏偏前線最頂得既辛杜克就被換出
爭頂既好多時竟然都係尼赫治
而中場後上既水準又唔係好似克羅地亞咁叻
咁點解泰連要求球隊踢咁既足球
佢地咁都有波羸
除左有運又勤力之外
怕且對手不濟亦係主因

而下半場踢左一陣
佢就以卡森李察士入替杜普爾
小弟滿以為佢識擺返個人去前面啦
點知卡森李察士好多時又於中場出現
而佢既踢法咁粗枝大葉
同隊波格格不入

而最令小弟扯火既係
球隊輸0:2既時候
佢只識埋怨第四旁證令佢趕唔切換入根哥亞打中堅位
但點解佢唔識檢討下冇左個中堅佢都唔識搵人頂住
小弟踢街波都識咁做啦
而落場既球員(特別係防中奧利尼奧)又冇人識自動自覺咁去補位
明顯上至教練下至球員既防守意識都嚴重不足
講落都幾匪夷所思同埋恐怖

而咸美治艾天托普成日都要踢右閘
就一直令人覺得好浪費
佢要到最後既三十幾分鐘
球隊水浸眼睸既時候
先再有機會以中場身份多參與進攻
結果入3球波都關佢事
不過遲早總好過唔做
希望泰連下場可以俾咸美治艾天托普發揮所長

幾年前既泰連領領費倫天拿踢出悅目足球
但睇左3場既土耳其真係不敢恭維
佢除左夠膽死棄用大牌同埋提拔新人
以及激勵到球隊士氣之外
小弟真係唸唔到佢仲有咩個人之處

P.S.:
正如 NOW 既靚女主持依雯所講
捷克出局,施治犯大錯同埋最尾冇12碼睇
真係一次過令好多人3重失望