2008-6-17 (2)

想講下尋晚既德國對奧地利......

奧地利負隅頑抗
仲有段短時間主導左場波
不過德國表現雖冇霸氣
但勝在質素明顯較高
所以一球起,兩球止既類似賽果絕對正路

除左兩個教練被趕上看台,
馬里奧高美斯龍門口唔入仲難過入既機會都可以失之交臂
同埋波歷克既炮彈罰球
場波其實冇咩特別令人難忘

所以小弟反而想講下德國個別球員既發揮
先講後防
隨住 A.費特歷治重返正選行列
06世界盃防線既所有正選得以再度合作

奧地利今場俾唔到德國後防好大壓力
畢竟德國後防從來只怕對手好波,靈活高速兼有靚組織
一鼓作氣靠衝既對手佢地反而無任歡迎
而家成條防線既最大隱憂只餘下梅斯達仲未上晒力

中場方面
波歷克除左入左球世界波之外
其餘時間既表現唔算突出
反而佢於比賽後段墮後
就釋放左芬寧斯既助攻能力

右中場既費斯就繼續冇侵略性
其實尋晚對奧地利唔算強既對手
小弟認為路維應該起用攻擊力較強既保路基斯
不過下場要應付C7既側擊
如果路維繼續起用費斯反而唔難理解

左中場普度斯基今場既表現就只係一般
不過回防就勤力左

前線就係另一個討論熱點
馬里奧高美斯表現持續令人失望
但路維就依然撐佢
不過自從第一場上半場兩度失機後
佢就患得患失
而踢埋對克羅地亞場波之後
佢既神情已經話晒俾全世界知佢失晒信心
路維尋晚仲要佢出來獻世
隨時愛佢變成害佢
其實路維基於整體利益
好應該考慮起用其他前鋒

小弟始終認為用普度斯基踢箭頭最正路
一來而家全隊腳風最順就係佢
二來佢同高路斯有好默契
隨時可以幫到有少少信心動搖既高路斯開齋

而左中場既位置
就可以從舒韋恩史迪加,保路斯基,希斯貝加同埋杜查奧斯基4選1
小弟就覺得用小豬會比較好
因為佢同拿姆有默契
可以支配成條左路

最後想講下下場波德國應該點踢
4個字:擦鞋仔波
要波到人到令葡萄牙唔好咁易組織到攻勢

另外,要知道葡萄牙既進攻最有威脅係C7
不過起點就係迪高同埋莫天奴
佢兩個係好 fit
但踢法始終比較柔
如果波歷克同埋芬寧斯可以俾多0的壓力佢兩個
就可以即刻 block 左葡萄牙既進攻起點
加上比堤始終唔係一流防中
如果德國可以搞掂葡萄牙既3人中場線
成隊葡萄牙就會斷開3截

另一方面,葡萄牙防線既制空力嚴重不足
德國可以多用高波屈機

而葡萄牙既中場回防時有不足
後衛又睇唔緊對手既後上球員
德國球員後上射中距離
甚至衝入禁區搵食好可能會有意外收鑊

不過德國依然有兩大隱憂
一係之前講過路維同史高拉利級數有別
二係一旦大菲用C7踢正箭頭
德國一對大隻佬中堅好可能會俾佢玩死