想講下尋晚俄羅斯對瑞典既比賽……
俄羅斯有好波之人艾沙維停賽期滿復出
佢取代托賓斯基踢正選係軒迪克既唯一調動
而和波都可以出線既瑞典就用返上場對西班牙既相同人腳
由於必須要羸波先可以出線
俄羅斯一開波就搶攻
而佢地亦立即主導左場波
艾沙維位置飄忽
令瑞典守衛難以緊盯
而佢既走動拉開左瑞典防線好多空位
而比亞尼甸洛夫,森索夫同埋沙里恩洛夫
3名中場隨時後上
瑞典防中 A. 史雲遜獨力難支
加上俄軍左右閘沙哥夫同埋安瑜哥夫又出擊頻頻
成功進一步拉開瑞典既防線
結果瑞典防守球員睇得住一個,又睇唔住第二個
門前多次險象環生
失波只係時間既問題
結果上下半場各失一球
雖然分別係陣地戰同埋突擊既時候輸
不過死因都係因為被人搓到空晒
如果唔係伊薩臣有好表現
加上俄羅斯球員持續敗家兼唔夠運
長人門將隨時繼上個月既英超煞科日之後再次慘嘗一場失8球既滋味
瑞典今場唔止守唔穩
進攻方面亦無甚睇頭
拿臣頭槌中楣已經係佢地全場最好,亦係唯一一次高水準既埋門
佢地早前2場入3球
其實唔計伊巴謙莫域0個腳神來之筆既猛虎射球
其餘兩球好大程度係因為對手防守差
佢地進攻無甚板斧
伊巴謙莫域今場負傷冇態
佢地就繼上場對西班牙既下半場後再次搵唔到進攻中心
有時組織唔到攻勢
就冇甚意義咁大腳斬中搏運氣
但面對唔驚高波,兼已慢慢建立自信既俄羅斯防線
就一定冇運行
而拿格碧克先後換入既兩個球員
未換入已經知冇作用
卡斯唐一睇身型就知唔 fit
小弟睇波20年只見過3個有本事以一己之力去扭轉局勢既肥仔
斷估佢唔係繼馬勒當拿,加斯居尼同埋羅馬里奧之後既第4個
而柯碧克根本就唔係當時瑞典最需要既箭頭球員
都唔知點解0的冇料既領隊
發覺隊波水浸眼睸就只係識放晒0的前鋒落場踫運氣
講波佬就同拿格碧克講好說話
話佢限米煮限飯
不過施巴斯坦拿臣連後備落場既機會都冇
就點都講唔通
下場俄羅斯要越級挑戰荷蘭
有軒迪克領軍既球隊幾時都唔可以睇小
下場波隨時係尹巴士頓4場波以來既最大考驗
因為分組賽既其餘3個領隊
計功力加埋都唔夠軒迪克咁堅
另一方面,小弟估軒迪克會盡可能繼續用佢既主攻戰術
不過如果俄羅斯想爆冷
就先要改善埋門一腳
否則隨時步意大利同埋法國既後塵
亦會繼對西班牙後再被大炒一場
4 comments:
想不到我喜愛既三隊二線球隊,只得克羅地亞踢得較好,其餘捷克及瑞典都力有不逮,球隊老化及青黃不接的問題較幾年前既德國嚴重
To: sammysir
1)
捷克既中前場其實有幾個年青球員待住接班
前場既史華高斯同埋芬連仲幾高質素
情況唔算嚴重
反而要注意後防方面
因為烏化奴斯同埋贊古奴夫斯基已經三十出頭
但國內可選擇既新血只有卡特歷比較可取
2)
瑞典其實唔係青黃不接
國內有幾多年青球員
佢地只係等緊出國搵食同埋吸取經驗
反而問題係列格碧克用人太保守
近乎唔用施巴斯坦拿臣就係好明顯既例子
艾沙維一出，俄羅斯就立刻成隊掂哂。荷蘭對俄羅斯呢埸波，真係幾有睇頭。
To: 舒利亞
兩隊多數鬥攻
加上軒迪克惡鬥尹巴士頓
表面強弱最分明既比賽
偏偏局勢未明又好有睇頭
亦係除左德國鬥葡萄牙以外
小弟最期待既一場比賽
Post a Comment