2008-6-22 (1)

今日生果報既AA9版(當然上網都有得睇)
有 ck 型英帥靚正既照片
貌似侯夫同埋辛達路斯既就係佢啦
個篇報導亦話俾大家知佢忙緊既其中一樣野

由於 ck 兄因為私務繁忙
到而家都仲未得閒寫土耳其對克羅地亞既賽後感
所以小弟改為搵佢於德國對土耳其先至賽後論戰
(到時小弟大戰 ck......hehe!)

小弟而家 post 返之前已經預備好既賽後感......

克羅地亞以砌低德國既陣容原陣出擊
而土耳其既陣容就殘缺不全
高漢辛同埋艾斯基紮住上鎮守中路
杜普爾就取代停賽既奧利里奧
而泰連終於從善如流
肯用沙里奧古踢右閘
令咸美治艾天托普可以踢返最擅長既中場位置
不過佢老人家再次起用踢法粗枝大葉,同隊波唔多夾既卡森李察士
仲要唔用佢踢前面幫手頂下高波
反而要佢繼續於中場幫手攔截兼駁腳
雖然可以消耗對手體力
但始終令小弟莫名奇妙

開賽頭15分鐘土耳其係威係勢
不過之後就無以為繼
克羅地亞穩定左陣腳之後
第一擊就幾乎搞掂
不過奧歷咁近都頂中楣
就貫徹土耳其今次賽事死口命既形象

之後既時間基本上克羅地亞主導左場波
不過佢地亦因而少左好多機會踢擅長既突擊
而兩邊傳中少有佳作
就算有亦頂唔羸防守高波唔算出色既土耳其後衛
而卡蘭積卡亦因為狀態同埋體能都有所不足
而未能好好發揮後上中場既角色

小弟認為克羅地亞既然羸左個勢
教練比歷其實可以於半場就用柏達歷入替卡蘭積卡
64分鐘先作調動已算略遲

不過講返轉頭
土耳其能夠於90分鐘內力保不失
羅士圖列巴明顯係頭好功臣
當中飛撲施拿既靚罰球
仲係今次賽場到而家為止小弟認為當最精彩既罰球撲救

而端基同埋咸美治艾天托普亦應記一功
前者踢4場波以來最好就係今場
雖然未至於光芒四射
但至少進攻有中距離射門
防守時又肯走肯搶

而後者踢中場令中場既控球能力大增
佢地雖然好多時間都係下風波
不過有這個拜仁中場押陣下
球隊既控球時間冇被克羅地亞比下去
雖然冇能力大打進攻足球
亦至少減輕後防壓力

場波既精華其實係加時(仲要係最尾既3分幾鐘)
克羅地亞球員於加時因為體能上不及土耳其
而比較處於下風波
但佢地偏偏於臨完場先因為羅士圖列巴犯錯而入波
上至比歷,下至球員
都唸住對手實冇仇報而明顯鬆懈

但泰連就發揮佢最大既優點--唔肯認輸
佢眼見部份球員訓左0係度
立即鼓勵球員要把握時間去搏埋餘下既時間
結果奇蹟再現
於補時已過1分鐘既時候
辛杜克既射門有少少省到人既情況下就入左

比歷失波後只係識向第4旁證投訴
佢應該唸下自己兩分鐘前興奮到衝埋出球場同球員慶祝
佢自己都唔夠專心
何況比賽緊既球員

比歷同佢既教練班底畢竟年輕唔夠經驗
如果換轉係其他比較有經驗既教頭
已經識得提醒球員唔好分心
而正如講波佬積 sir 所講
克羅地亞球員當時如果醒少少去阻住羅士圖列巴開波
罰張黃牌就已經可以搞掂土耳其
再次引證冇經驗好多時都要付出代價

形勢咁樣 U-turn
未射12碼就已經知土耳其會羸

賽後泰連自然俾傳媒捧上天
不過如果睇返佢既臨場調動其實幾一般
波路入替卡森李察士後
無論攻守都唔多掂
直至杜普爾被辛杜克入替後
波路專心踢防中先覺得佢似樣少少
不過始終平平無奇

而辛杜克比較掂既射手往往只係用作變陣
就算佢有正選踢都只係踢得半場
夠高又有入球能力既佢係全隊當中掩護尼赫治既最佳人選
偏偏泰連寧願任得尼赫治孤軍作戰
結果尼赫治成個賽事只係踢過幾分鐘好波
仲要係靠施治甩手同埋贊古奴夫斯基包越位

土耳其雖然殺入4強
不過靠既只係唔服輸既精神同埋一世夠運
佢地3場波以來已經兩次補時省中人入網
5度靠門框頂住唔使輸
論整體表現好無說服力