2008-6-23

想講下尋晚意大利對西班牙既最後一場8強賽事......

意大利冇左加度素同埋派路後既中場實力即刻打個六折
岩布仙尼雖然仲算肯走肯搶
不過質素唔高兼攔截魯莽既佢
就連冇態既加度素都比唔上
佢於上半場冇俾球證吹罰12碼已經賺左

而冇左派路就仲大鑊
成條中場線組織力大減
準繩既長傳亦不復見
代替佢既阿古蘭尼雖然助攻助守
不過兩方面都唔算突出
鄧納東尼最終俾佢踢左108分鐘
都唔知係佢老人家好耐性定係反應遲鈍

而鄧納東尼其實都算有自知之明
心知隊波既中場實力不及西班牙
一於立定主意大打守勢波
中後場8個球員於危險地帶塞住西班牙球員既傳送同埋推進

而以頭兩場分組賽原陣出擊既西班牙雖然相對明顯好肯進攻
不過成場波都老鼠拉龜
沙維一攞波就被包圍
恩尼斯達就再次同大衛施華換邊踢
前者就幾近死晒火
而後者兩度於右路 cut 返入中路起腳已經係比較似樣既攻門
就反映場波只係緊張但唔精彩

上半場30分鐘打後既意大利其實已經開始肯打多0的進攻
不過態沉既東尼於前線孤軍作戰
就算勉強頂羸對手都冇人後上 follow
卡斯辛奴就繼續冇人知佢想點踢
而柏路達亦由於好多時間回防
冇機會發揮佢最擅長既後上埋門
結果意大利整場弱勢
甘莫蘭尼斯後備落場後幾分鐘既攻門
加上迪拿達利同埋東尼於加時短時間內既兩下頭槌
已經係法定時間內既比較似樣攻勢

而西班牙方面
阿拉干尼斯眼見沙維同埋思尼斯達冇料到
就繼瑞典既分組賽後
再次唔夠60分鐘就一次過以法比加斯同埋辛迪卡蘇拿入替
之後既西班牙攻勢略有好轉
小弟認為係因為法比加斯既踢波節奏比沙維略快
不過仍唔足以威脅意大利防線

相反辛拿既兩次中距離對保方既考驗更大
若非條柱救左佢
辛拿既第二球中距離射門足以令佢成為輸波罪人
佢之後回復水準就幾次力保不失
令人睇落西班牙真係唔似會有波入
當然大衛施華於加時既快射唔入亦幾可惜

另一方面,韋拿同埋費蘭度托利斯於前線苦無供應
就算有亦逃唔過保方同埋幾個後衛
彭魯基以經驗同埋路數撐場
兩閘亦機警包抄
不過踢得最好既都係基亞連尼
佢無論攔截,包抄同埋解圍都幾乎冇犯過任何錯誤
小弟同意大哥瑜所講
佢絕對係意大利於今次賽事既最大發現

卡斯拿斯兩救12碼
又曾於法定時間又先後精彩撲出甘莫蘭尼斯同埋迪拿達利既攻門
結果當選最佳球員
不過小弟覺得基亞連尼更值當選
因為如果意大利冇左佢
根本唔可能捱到120分鐘都唔失波

射輸12碼話就話冇高低
不過意大利未射之前其實已經係幾下風
因為迪羅斯於作客奧脫福宴客後已經唔敢再操刀
而迪拿達利於加時已經俾人柴台到佢驚
睇樣已經知佢兩個冇好下場
加上派路,馬達拉斯同埋波里路等比較擅射12碼既球員都唔在場
邊可能仲有運行

而家入埋4強
真係西班牙近年最有機會叫糊既一個大賽
當西班牙球員未來幾日要盡量休養生息既同時
阿拉干尼斯就似乎有排忙
既要唸下點樣對付艾沙維
又要繼續同一眾後衛補習點樣頂頭槌
更要唸下點樣改善中場塞車既問題
因為以上3點都隨時令西班牙俾俄羅斯復仇成功