2008-6-26

尋晚場德國對土耳其有兩篇賽後感......

a) 小弟既......

賽前最大既焦點係泰連於冇咩人可以用既情況下
最終砌得出一個點樣既陣容
結果佢用杜普爾串演中堅
停賽復出既奧里奧古繼續踢防中
又用左之前從未出過場既艾卡文
同埋咸美治艾天托普一齊支撐中場中路
而波路同埋卡森李察士就負責左右側擊
再加上用辛杜克踢單箭頭
組成一個 4-1-4-1 既陣式同用返上場波相同陣容既德國死過

土耳其之前4場比賽都會於開波初段向對手施壓
之後先至會專心佢地既穩守戰術
今場對德國亦唔例外
但佢地可能唸都冇唸過德國竟然會俾佢地壓到抖唔到氣
佢地上半場既控球時間多達2/3
攻門次數多達16射8中
相反德國只得3射1中
德國佬既表現唔似係一支國家隊
反而似一支德甲既榜尾球隊

小弟認為德國搞到咁狼狽有幾個原因
首先路維絕對唔係一個居安思危既教練
因為佢冇可能唔知道土耳其進攻既特性
但隊波偏偏尋晚上半場(特別係失波前既22分鐘)
面對土耳其既壓迫踢法就搞到完全進退失據
最大既可能係路維根本冇作出針對性部署
上半場最終開到個和局已經還得神落

而球員方面亦有問題
成條防線無論龍門,中堅,一對閘同埋兩件防中
繼對克羅地亞既分組賽後再次集體發波瘟
A.費特烈治因為唔夠波路靈活而俾波路不斷出波
拿姆就俾卡森李察士用身位同埋力量玩死
而後者不時嘗試走入中路搵機會起腳
偏偏前者於上半場足足走甩後者3次
搞到列文俾人練靶咁練
而列文同埋一對中堅亦再次失失慌
失位頻頻既佢地唔夠集中亦導致失左第一個波

而希斯貝加同埋路菲斯兩個防中就連上場5成水準都 keep 唔到
佢地未能於中場攔截對手之餘
有意識回防但又冇意識去盯人
有波在腳亦俾唔到其餘3個攻擊中場
而多次 face to face 傳失波就更加令人失望
如果芬寧斯當 fit 既話
一個人已經足以頂替晒佢兩個
結果眼角爆左既路菲斯亦於半場被芬寧斯所入替

而進攻方面
波歷克其實於今次賽事好少於生波既時候發揮進攻威力
只能靠死球屈機
今場波又要面對奧里尼奧既緊纏
加上又因球隊嚴重受壓而要經常回防
整個上半場對進攻既差唔多毫無貢獻
但更大既問題係佢連分波去兩邊都唔掂
加上之前講過一對防中亦俾唔到供應去兩邊
結果德國兩翼幾近死火

全個上半場德國於右路未試過有一次傳中
左路亦只有兩次左路傳中
不過就已經入到一球
舒韋恩史迪加後上攝到靚位入波
其實亦再次反映土耳其後防中路冇左沙維特既影響
可見兩翼側擊真係最簡單直接去打瓜土耳其既方法
奈何德國上半場既整體發揮嚴重出左問題
未能如常拉開對手既防線
而其實土耳其既防線亦非穩陣
如果普度斯基唔獨食既話
德國佬隨時半場已經輸形勢但羸左波

下半場德國隊扭轉左形勢
除左土耳其因為體力流放既原因而冇迫得德國咁緊
換入芬寧斯先係最關鍵
佢既表現比路菲斯高左起碼一班
佢不但有回防幫手攔截同埋解圍
於中場截到波之後又識分波
就算俾對手力迫亦有能力護住個波
而佢落場後亦釋放左希斯貝加同埋波歷克
特別係前者多左參與進攻
一記中距離勁射同埋助攻拿姆入第三球就係好例子
而由於兩邊多左佢既供應
左閘拿姆同埋兩隻翼既表現係明顯比上半場活躍得多
成隊德國雖然仲未算係十足水準
但起碼有返7成功力
小弟睇06世界盃已經發覺
有時候芬寧斯比波歷克更似德國隊既真正發電機
今場波絕對係好例子

最後連埋補時既十幾分鐘係成場波既高潮位
雙方接連犯錯令比賽出現3個入波
先有羅士圖列巴出迎打空拿姆既傳中
被高路斯頂入空門
不過今次失波亦會再次令人懷念沙維特
因為孭鑊既再次係串演中堅既杜普爾

之後就輪到德國後防爆鑊
拿姆被奧里奧古乖巧推右走左擺脫
之後梅斯達攔唔到後者既地波傳中
梅迪薩卡又睇得辛杜克唔緊
而列文就大安旨意等波接
結果球波俾辛杜克於一個近乎冇得輸既角度下搞掂左

講返轉頭
德國今場輸既兩球波都同拿姆,一對中堅同埋列文有關
拿姆有錯不過唔係錯得最嚴重
因為普度斯基冇回防幫佢亦好抵鬧
但一對中堅同埋列文3條友兩次發波瘟就輸左兩球
佢地既狀態起伏咁大
睇到小弟心都寒埋

至於89分鐘決定勝負既一球
若非卡森李察士唔知點解跣腳而走甩左拿姆
就算希斯貝加俾腳波咁毒
拿姆都未必有機會埋門

球波其實亦可以睇成日耳曼民族超強心理質素既又一例証
岩岩孭鑊既拿姆起腳0個刻心理壓力應該好大
但佢埋門一腳仲可以咁冷靜
佢同埋小豬上半場於劣勢下既入球
或者可以解釋點解德國佬經常輸形勢下都一樣可以羸波

96年德國既人腳同樣天殘地缺
但仍靠質素捧盃而回
而家土耳其質素唔夠但鬥志搭夠
入到4強亦雖敗不辱
佢地前4場波表現出既水準其實只係好一般
但今場波只計上半場已經羸返口碑

而德國方面
芬寧斯下場勢必重返正選行列
中場既質素應該有一定保證
不過如果後防繼續發瘟同埋進攻拉唔開兩邊既話
決賽無論對西班牙或者俄羅斯都唔慌會有運行




b) 土耳其迷 ck 既......(十萬個唔該晒)

甚麼叫做地莊陣容應戰? 看罷這場歐國杯四場賽事必能回答這個問題, 土耳其受傷停困擾之下, 僅得十五名球員(包括兩位守門員)可用, 可說是近年大賽中罕見的現象。最後幸好傷疲盡起, 至少美田可上陣30分鐘, 而安利亦「好番六七成」。

今場泰林於陣容上作了不少變動, 守門員繼續由羅士圖列巴出任,後衛由右至左分別為沙里奧古, 高漢辛, 杜柏及哈根巴達把守, 而防守中場則由奧利里奧及古亞波路擔任, 而工兵則由咸美艾天托負責連繫中前場, 卡森李察士及艾克文則任翼鋒, 正箭頭則由施美亞辛杜克擔任, 較令筆者詫異的是卡丹尼斯「坐冷板」,把機會讓予艾克文上陣。

德國隊則跟上次八強賽事的陣容完全一樣, 沒有變動, 守門員列文, 後衛為費達列治, 梅迪薩卡, 梅斯達及拿姆；中場續由路菲斯及希斯佩加任雙防中, 進攻中場由右至左分別為舒韋恩史迪加、波歷克及普度斯基, 正中鋒為高路斯。

土軍於上半場五分鐘率先搶攻,其傳中球質素亦不俗,惜被德軍後衛頂走；而卡森李察士的射門被列文接牢, 之後拿姆送大禮,比艾天托搶到皮球, 一射被列文用腳閂出, 十三分鐘,土軍把握德國中場失誤, 輾轉間於右路傳中, 後上的卡森李察士勁射, 可惜射中門楣。德軍於頭十五分鐘完全受制於土軍壓迫踢法,導致誤傳頻頻；德國企穩陣腳後亦有攻勢,可惜其傳中球不是被後衛頂出及閂出, 就是被列巴手搥打走。經過土軍一連串攻門後, 土軍終在22分鐘先開紀錄,當時在右路的傳中球, 辛杜克臥射中楣,皮球落在古亞波路腳下射入,雖被列文擋到,但都可以射入。四分鐘後,德國迅即由普度斯基地波傳中, 花名「小豬」的舒韋恩史迪加攝贏杜柏, 一射入網,追成平手。三十一分鐘列文的失位差點令土耳其搏得的罰球射入, 射門的是艾天托, 可見列文真的企位差……不久後土軍後防空虛, 普度斯基於左路推進單刀,可惜不知高路斯在中間, 自己射出界, 把黃金機會白白浪費掉；三十七分鐘, 卡森李察士於右路搏得罰球, 由古亞波路負責, 竟然窄角度直射, 幸好列文雙搥打出, 球員們並沒有把皮球改變方向；而四十一分鐘沙里奧古的遠射亦足以令列文撲到「癱癱腰」,可惜墜得慢, 皮球高出了一點點。

今日土耳其隊憑著一人走多一步的力量, 成功為德國防線製造麻煩, 亦迫使德國隊駛出真功夫, 可惜德軍今日個別球員演出在水準以下, 拿姆不斷被沙里奧古所緊逼,而奧利里奧成功收服波歷克亦是一個因素, 最後半場打成一比一平手。

下半場德軍立即由芬寧斯入替路菲斯, 亦壓住土軍來踢, 而五十分鐘出現了一個爭議性判決,沙里奧古於禁區邊攔截拿姆, 且踢中腳, 可惜球證耍手, 表示沒有犯規, 導致雙方越踢越燥。辛杜克就因過勇攔截而獲得黃牌；數分鐘後,德軍於禁區對出8碼獲得罰球, 可惜省中球員出界外。
之後這場精彩的賽事竟然因信號故障而中斷了數分鐘……

及後兩隊都開始有意保留實力, 不會貿然搶攻, 畢竟已過70多分鐘了, 但古亞波路於左路的發難, 另外希斯佩加的遠程炮都頗精彩的, 然而土軍仍未於此時換人, 是否意味著這場波會加時作賽?! 不久後,信號又在重要時刻出現問題……

這段時候高路斯入球了, 因為列巴嚴重犯錯 而土耳其亦立即作出調動,艾甸入替艾克文,以加強攻力, 而英國有畫面時, 香港卻在播精華, 不久後土軍又追成平手,施美辛杜克又入波, 沙里奧古又再玩弄拿姆,皮球橫傳遠柱, 施美辛杜克剷入.,土軍的永不放棄精神令人敬佩, 可惜德國的一個one-two, 拿姆入揳成功, 3-2再度領前,但信號又再出現問題……

土耳其臨尾亦有機會, 卡丹尼斯傳中, 可惜辛杜克不到位, 而美田所射的罰球亦高出,最後土耳其神話不再,. 以二比三稱臣於德軍腳下。

這次土耳其的歐國杯之旅, 雖敗猶榮, 尤其陣容天殘地缺之下, 實屬難得；而德國的心理質素非常佳, 雖然拿姆犯錯, 但仍能把錯誤拋諸腦後, 盡力比賽, 終於將功贖罪, 這場準決賽水準極高, 值得一看再看。

而土軍及其球迷也不會怪責列巴, 始終也是一手一腳把土軍帶進四強的功臣；對於列巴來說,或者人生就是總有一些遺憾吧……