想講下西班牙對俄羅斯既比賽......
俄羅斯既捧盃美夢幾日後就幻滅
成隊波幾日冇見就好似變左一隊弱隊
唔知既話可能以為只係睇緊'白俄羅斯'
而唔係幾日前羸荷蘭兩球都嫌佢地羸得少既俄羅斯
小弟唔知點解佢地會搞成咁
上場搏得太盡?
唔擅長踢水戰?
入到4強覺得有壓力?
大賽經驗少?
小弟唔識估
不過就眼前所見
小弟有以下既 comment......
首先西班牙今場波同分組賽既踢法有所不同
打分組賽既時候
西班牙既控球時間只得43%
有波羸全因快速突擊同埋當時既俄羅斯好多低能失誤
但今場波既西班牙一開波已經好注重控球在腳
(其實這方面自第二場對瑞典已經開始有改善)
今場波佢地既控球時間高達65%
控球在腳既球隊如果識用波既話
好易就會控制到比賽節奏
羸波自然更易
而上半場頭2/3既時間
西班牙冇咩明顯優勢可言
不過當法比加斯入替傷出既韋拿後
西班牙改踢 4-1-4-1 後
佢地既中場變化多左就令俄羅斯越來越難捱
法比加斯既位置好自由
左,中,右,略前同埋略後既位置都可以搵到佢既蹤跡
加上沙維同埋恩尼斯達又忽然回勇
大衛韋拿又持續有活躍表現
4個人於中場好肯走位去創造空間互傳
(上場荷蘭既球員既走位明顯少好多)
中場再冇大塞車既情況出現
更甚既係佢地更有人會搵機會入禁區埋門
咁既中場線絕非走晒樣既俄羅斯中場可以對抗
西班牙羸波好明顯羸在中場
小弟講過 n 次中場回防不力既球隊多多都有得輸
今次又係一個好例子
同上場對荷蘭相比
俄羅斯幾個中場截擊已經唔成功
更衰既係成日走甩人
阻唔到人俾波都仲未輸得
但阻唔到人埋門就一定輸死
輸第一球既時候沙安高竟然跟波唔跟沙維
結果沙維於禁區內空閒左兩秒睇定晒去撞射
輸第二球雖然入波既係古爾沙
但大衛施華衝上來既時候
之所以印晒俄羅斯所有後衛既注意
某程度係因為佢完全冇人睇
而之後大衛施華入第三球又係咁既類似情況
而俄羅斯今場既後防亦有一定問題
踢來慌失失
特別係中路既一對莫斯科中央陸軍中堅
佢兩個除左移動緩慢之外
最離譜既竟然係右閘安約哥夫頂高波既次數竟然隨時仲多過佢兩個
而佢兩個咁廢
就搞到兩閘要經常移入中路包抄
例如輸第三球大衛施華於中路起腳既時候
出腳攔截既竟然係左閘沙哥夫
而俄羅斯既前線方面亦令人 R 晒頭
艾沙維夢遊球場就絕對令人失望
不過就算佢有料到
西班牙既後衛都未必太怕怇
因為佢地從來都唔怕技術型球員
平時踢西甲同美斯,細哨,羅賓奴都鬥唔少
相反佢地應該驚柏夫奴真高多0的
這個埋門把握一般既前鋒上半場都仲俾到西班牙防線零星既威脅
但之後隨住球隊中場失勢
佢亦因為苦無供應而隱形於球場上
不過講返轉頭
西班牙條防線近兩場有明顯進步
雖然仲係驚高波
但起碼識得搵兩個中堅一齊夾住對方前鋒
對方頂得到都唔慌靚
而沙治奧拉莫斯俾人狂插之後都開始有料到
守得穩之餘仲繼續助攻
仲次次都趕得切回防
沙哥夫今場波明顯修佢食住
最後想講下兩隊教練既臨場調動
先講阿拉干尼斯
佢於球隊比較需要防守既時候
好正路咁以沙比艾朗素入替沙維
而佢比較絕既係用古爾沙入替托利斯
阿拉干劬斯近兩場都用古爾沙入替托利斯
有理由相信阿拉干尼斯可能用托利斯去放乾對手後衛
再以古爾沙去屈機
上場針對既係彭魯基
而今場既就係恩格拿舒域治
結果佢入場幾分鐘就入波
至於軒迪克方面
佢先後以比亞尼甸奴夫同埋舒捷夫入替森索夫以及沙安高
但比亞尼甸奴夫自上場起踢後備
就係因為佢之前踢分組賽已經冇料到
而舒捷夫最強項係速度
岩踢反擊而唔岩踢陣地戰
軒迪克換佢兩個既時候應該知道唔慌會有料到
似係純粹盡人事
因為佢於賽後既記者會都話自己冇 option
小弟於俄羅斯分組賽大敗之後
話佢老人家限米煮限飯
估唔到而家佢自己講到出口
4 comments:
想不到西班牙能再次剋制俄羅斯,
而且兩場都是大勝
西班牙和德國兩隊真的互有優點,
我估計德國vs西班牙應該很有娛樂性,
能踢出賞心悅目的足球,
希望兩隊都踢對攻式的足球,
不好只顧控球在腳啦!
不過西班牙的後防制空力弱
只靠門將力挽狂瀾
加上韋拿受傷,
與及久違了的決賽經驗,
對德國真的很輸蝕
另外,一直以來,
我都覺得西班牙的踢法
和德國相比
感覺上是不夠奸險和不太精於計算
單單以上的原因
真的被德國完全比下去...
又真係估唔到俄羅斯會再大敗比西班牙。係有少少失望，不過以俄羅斯既實力，殺到入四強其實已經有交代。
德國決賽要惡鬥西班牙。其實兩隊實力差唔多，不過暫時我會比較睇好西班牙。兩隊防線都唔係穩陣，不過西班牙仲有卡斯拿斯，德國就連列文都係不穩。但係對德國有利既係，暫時神射手韋拿無得出，威脅減少左。不過如果埸波拖到入互射十二碼，捧盃既好大機會係西班牙，原因又係因為西班牙有位好門將。
To: sammysir 同埋舒利亞
1)
冇左韋拿既西班牙因禍得福
改踢 4-5-1
憑中場組合既變化玩死左俄羅斯
講狀態西班牙前線仲有托利斯同埋古爾沙
冇韋拿既影響唔係想像中咁大
2)
sammysir 睇好德國
舒利亞睇好西班牙
小弟就睇好愛隊德國少少
因為如果班波唔發波瘟
路維只要於中場落重藥
西班牙好難學4強咁如取如攜
而比賽萬一要打加時
雖然德國平均年齡略大
但體能向來有保證
唔見得好蝕底
驚既只係路維一心等射12碼
重蹈06世界盃
因為唔夠意大利咁有決心而輸波既覆轍
而射12碼方面
德國球員向來有質素保證
而列文雖然經常發神經
但講撲12碼既實力絕對不在卡斯拿斯之下
所以西班牙一旦90分鐘內搞唔掂德國
隨時係放虎歸山
4強未踢之前
小弟同土耳其迷 ck 傾波經
大家都估中決賽係德國對西班牙
而家應該訪問埋佢睇好邊隊
Post a Comment