想講下尋晚德國對西班牙既歐國盃決賽......
小弟之前講過德國如果可以唔發波瘟
肯拉邊而中場又落重藥對付西班牙既中場線
德國絕對有力一戰
但睇過尋晚場波發覺佢地全部都做唔到
咁就當然俾西班牙壓住去砌啦
如果唔係列文尋晚擋左幾個必入波
佢地輸得仲甘
而德國佬連入波板斧高波同埋死球都大失準
邊有可能入到波
攻不銳,守不穩係佢地尋晚(或者今次賽事)收皮既原因
西班牙方面
一條黃金中場線固然係羸波既最大本錢
但防線慢慢回勇亦係主因
踢完第一輪分組賽既時候
葡萄牙,荷蘭同埋佢地被捧為奪標
3隊既後防當時都有隱憂
最終葡萄牙同埋荷蘭都因為防線問題而下馬
只有西班牙從8強賽事開始逐漸執靚條防線
攻守兼備係佢地44年來捧盃既關鍵
同尋晚既德國絕對係高下立見
對於德國輸波
小弟仲想提出兩個 point
首先講教練既臨場調動
路維尋晚既調動真係令人幾費解又失望
用贊臣代替拿姆
基本上發揮唔到任何化學作用
前者識用隻左腳出波似乎已經係唯一 make sense 既解釋
而用古蘭爾入替希斯貝加
將陣式由 4-5-1 轉至 4-4-2
已經係佢尋晚最正路既調動
不過古蘭爾明顯唔係佢既重心球員
臨危受命既佢同高路斯根本毫無默契可言
而最令人費解同埋最令小弟扯火既係
佢竟然用馬里奧高美斯入替有輕傷既高路斯
前者已經冇晒信心
根本就唔適合落場
佢玩死隊波既同時亦玩死埋一個年青球員
佢既調動令小弟覺得佢自己本身都好亂
佢自己根本都苦無對策
亂石投林既教練從來都唔會有運行
杜明尼治,麥卡倫如是
佢當然都唔會例外
再睇下阿拉斯干尼
佢既每一個調動都有根有據
佢先用沙比艾朗素入替表現冇上場咁搶既法比加斯
如果尋晚睇得細想既話就會發現
德國全場只有兩段時間係特別肯去搶攻
分別係上半場開波既頭10分鐘
同埋古蘭爾落場後既幾分鐘
古蘭爾入場後
德國改踢 4-4-2
打算用比較簡單既兩邊側擊去強攻西班牙
阿拉斯干尼立即起用沙比艾朗素去穩住中場
再以小組反擊去偷襲德國
德國這段虛火亦因為咁而被立即撲熄
之後既德國已再冇能力還拖
而阿拉斯干尼換走大衛施華同埋F.托利斯
就明顯因為前者既情緒狀態唔適合比賽
同埋有古爾沙代替後者繼續去壓迫德國防線
相比起路維既調動
尋晚德國球員最後廿幾分鐘等收工既態度
其實更令小弟失望
06年奇連士文帶領德國攞左世界盃季軍
build up 晒班球員既信心
不過今次賽事佢地已經唔止一次可能因為輕敵而出事
而佢地亦冇兩年前咁積極
對葡萄牙只係6場比賽中唯一似樣既一場
而尋晚眼前所見咁冇鬥志既表現
就絕對令人扯火
如果佢地尋晚心入面0個團火冇咁快熄既話
就算殘陣劣勢都仲有機
西班牙尾段只係捱高波都有排佢地捱
不過一早放軟手腳就只有將機會斷送
自90年世界盃決賽羸阿根廷1:0之後
德國近18年來踢大賽只係羸過一級球隊兩次
而兩次都係羸出名防守差既葡萄牙
德國明顯已經唔再係一線球隊
如果佢地想於南非世界盃翩身
第一步要做既應該係積極咁打返前輩既擦鞋仔波
好似碧根鮑華,馬圖斯同埋森瑪咁堅
當年都要咁樣踢擦鞋仔波
何況而家既佢地?
p.s.:
小弟,sammysir 同埋 ck兄都撐錯左德國佬
好友阿森同埋舒利亞
反而同摩連奴以及尹巴士頓同一陣線撐西班牙
一個字:勁!
3 comments:
德國真係令人失望,
上次俾土耳其圍攻而唔駛輸,
原來已經好好彩,
今次西班牙用番對俄羅斯既打法去對付德國,
原本以為德國會好似對葡萄牙一樣,
會對西班牙既中場作出針對性部署,
怎知都係比下去,
西班牙既打法真的好全面,
能攻善手,行軍迅速,
人腳真的好充裕,
能以全勝姿態取得冠軍,
真的實至名歸,
亦證明全攻既充滿娛樂性踢法是有其可取之處,
希望持相同信念既基謹能與西班牙一樣,
在下季帶領紐卡素取得理想成績
其實ivor也是支持西班牙,原因當然是有利記球員的關係啦
今屆既決賽其實幾失望，雖然比數唔係話好大距離，都係一球。但係埸波就完全可以講係一面倒，德國連機會都無幾多次，後面又唔穩，憑咩贏?我覺得隨時土耳其殺入決賽對西班牙會更好睇。
而網主提到，德國班球員最後廿幾分鐘已經等收工，其實真係仲令人扯火。佢地好明顯係無睇過土耳其今屆既賽事，又或者睇左都get唔到土耳其果種鬥心。土耳其今屆曾經三番四次最後階段逼和甚至反勝。何況德國當時仲有廿幾分鐘?
路維既調動的確係幾令人失望，希望今次歐國盃可以令佢反醒下，畢竟佢應該都只係第一次帶隊參加大賽。
p.s.其實我都只係估西班牙險勝，或者係互射十二碼贏。我都低估左西班牙同埋阿拉干尼斯既實力。
To: sammysir
1)
即使小弟係德國球迷
都唔可以否認西班牙同埋阿拉干尼斯羸得漂亮
2)
以基瑾既大娛樂家性格
佢唔使學都識踢進攻足球
不過唔識平衡攻守
同埋點樣去進一步解決防守問題
係佢多年來一事無成既死穴
亦係佢最需要去學既野
To: 舒利亞
1)
小弟睇波既時候
都有唸過寧願葡萄牙或者土耳其入到決賽
因為雙牙大戰既技術成份比較高
而土耳其亦比德國更似日耳曼球隊
2)
路維要學既野仲有好多
俾多兩年時間佢
南非世界盃既德國應該會有進步
到時如果仲係咁唔似樣既
碧根鮑華等名宿唔插死佢
佢自己都冇面留低獻世
3)
阿拉斯干尼於關鍵時候執靚條防線
而佢老人家一次過改晒幾年前既重複犯錯
絕對係球隊既最大功臣
小弟雖然唔欣賞佢既為人
但都唔可以口硬唔承認佢既於今次賽事既調配
係有佢既獨到既地方
Post a Comment