2008-6-7 (2)

C組方面
小弟既第二最愛意大利身陷險境
荷蘭,羅馬尼亞同埋法國都非善男信女

先講意大利
佢地於歐國盃近年超唔掂
96同埋04兩次分組賽出局
92仲衰到連決賽週都冇份
當中最大原因唔係對手勁
而係佢地本身唔爭氣

00年韋利同埋保方因傷缺席
偏偏打得好攞亞軍
可見有質素既佢地肯搏既話就唔會差
佢地後防問題多多
走下坡,易爆鑊同埋冇經驗
每個後衛都可以各自對號入坐
與其靠保方幫佢地補鑊
不如中場先做好防務
加度素同派路雖然狀態下滑
但都仲係必然正選
另一個席位小弟認為用迪羅斯比阿古蘭尼好
因為防守能力比較強

以東尼為首既前線反而唔使驚
佢地比06世界盃時更有效率
而就算後備既迪比亞路,卡斯辛奴,波里路等都質優態勇
令人可以忘記麻煩兼自私既托迪

荷蘭方面
攻擊方面重拾水準
前線無論用雲佬定係亨特拉爾都掂
而後面插上來既洛賓,尹達華治同埋史奈達亦幾得人驚
不過玻璃腳既洛賓又傷
肯定趕唔切對意大利
可能要超用有質素,但冇經驗既阿費利

不過後防就繼續令人擔心
外圍賽失5球只因對手弱
成條防線除左雲達沙,希丁加同埋雲邦賀斯之外
冇一個睇得順眼
所以迪斯奧同埋安格拿既掃蕩係荷蘭能否出線既關鍵
但偏偏佢兩個冇咩經驗

羅馬尼亞方面
牌面同埋知名度輸晒
不過機會其實同其餘3隊係一樣

整體戰先力保不失係佢地既生存之道
而捷禾改踢中場
亦令佢地搶羸中場既本錢多左
加上其餘3隊既防中亦各有問題
所以羅馬尼亞隨時不落下風
之後再睇下梅度偷唔偷到雞

法國方面
唔要沙格拿,麥薩斯,費文尼,賓艾化同埋查斯古特等好野
但偏偏保桑此等廢物仲有份入選
令小弟不禁想法國出局
令杜明尼治唔好咁自以為是
佢因而要落台就仲好

球隊既防守暫時睇落冇大漏洞
但就一定有有隱憂
因為韋拉有傷
隨時趕唔到任何一場分組賽
而萬一杜林或者加拿斯有傷
就只可以靠保桑或者史基拿斯做替補

另外,佢地既火力明顯靠晒列貝利一個
而家佢好似腳踭有少少傷
萬一佢有咩冬瓜豆腐或者被人凍結
後斯丹時代既法國就會近乎死晒火

C組叫得死亡之組
其實第一場最關鍵
因為印象中身陷死亡之組既球隊
如果第一場輸波通常都會出局
所有小弟好同意柏金曾經講過荷蘭最關鍵第一場許和不許敗
而法國既優勢可能就在於佢地第一場只係對羅馬尼亞
因為法國近3次對賽都羸
心理上佔優

D組方面
小弟向來都唔睇好既西班牙
因為佢地向來雷聲大,雨點少
加埋廢領隊阿拉斯干尼
中場學人唔踢翼
但中路位置重疊兼大塞車
後防既佩奧爾又冇一個好拍檔

不過摩連奴偏偏睇好佢地
認為佢地既外流球員可將經驗帶返國家隊
又話皇馬球員今季羸聯賽既過程比想像中輕鬆
加上歐聯又提早出局
有助皇馬球員保持狀態踢決賽週
又即管睇下佢地踢成點

瑞典方面
佢地向來唔係爭標份子
但近年踢大賽又多數過得到分組賽

伊巴謙莫域雖然於國家隊入波向來唔多
但就助攻不絕
加上有拿臣回歸
令前線總有入球能力

而龍格堡,韋希姆臣加上卡斯唐既中場線
雖然唔會好好睇
但總算夠晒實用
因為佢地既傳中對身材高大既前線球員好有用

而達連羅夫長抖之後復出
仲及時上力
對瑞典好有用
因為瑞典既防線始終有少少隱憂
伊薩臣今季坐多過踢
而於維拉踢閘既美爾堡於國家隊要踢中堅
可能會有適應上既問題
而佢3個後防指檔仲全部三出頭
話冇體能上既憂慮小弟就打死都唔信

俄羅斯方面
艾沙維頭兩場分組賽要坐波監
加上普基耶克因傷隨時緣盡今次賽事
令佢地火力大減
睇牌面點都唔似可以砌羸西班牙同埋瑞典

不過有軒迪克執教既球隊始終唔可以睇小
因為講功力佢同列哈格
隨時算死阿拉斯干尼同埋拿格碧克

而體能上可能係俄羅斯既最大優勢
因為俄羅斯超聯於3月先開季
陣內有好多國內球員既俄羅斯而家上晒力之餘
仲一定未殘
而佢地主力既年齡大多唔夠26歲
體力化既緊迫踢法可以成為佢地既出線關鍵

至於衛冕既希臘
今次唔會再被人當魚腩
想再成功偷雞既機會近乎零
連出線都可以講話好難
不過中後場幾穩既佢地
就絕對有能力成為其他3隊出線既攔路虎

p.s.:
由92年起睇左4屆歐國盃
96年睇好英格蘭同埋德國
00年就睇好荷蘭同埋法國
不過92年同埋04年搵唔到一隊有冠軍相就出事
丹麥童話同埋希臘神話真係估佢唔到

到左今次歐國盃
小弟竟然又搵唔到一隊好似樣既球隊
莫非......(唔好咁邪呀!)

歸根究底
似乎係所謂一眾強隊本身防守有隱憂
球員又踢到殘晒
而下風球隊就戰術行先
靠穩守突擊搏偷雞
今次決賽週似乎依然走唔出體能同埋戰術既框框

希望兩支愛隊德國同埋意大利生生性性
繼06世界盃後再俾小弟一個 happy tournament
而佢地確實亦有客觀條件做得到