想講下尋晚既兩場波......
1) 瑞士對捷克
主辦國踢揭幕戰
唔緊張就呃人既
不過睇瑞士既排陣就已經知佢地有決心羸波
領隊古恩冇排出慣常既 4-2-3-1 陣式
反而起用馬高史達拿去支援費爾
以 4-4-2 陣式迎戰
相反捷克就收起巴路士
布克拿只以真高拿踢單箭頭
罕有咁排出 4-5-1 陣式
計表現捷克尋晚羸波好冇說服力
單箭頭既真高拿已經做足本份
因為如果頂得到既傳中或者長傳
佢都盡晒力去頂
不過隊友既傳球質素一般
令佢全場冇一次可以直接攻門
而佢就算成功二傳
都冇隊友有意識去 follow
結果捷克全場只曾經兩次威脅瑞士大門
其中一次仲要係上半場主隊既麥連幾乎擺烏龍
但下半場加拉錫一下解圍竟然變成助攻
後備入替真高拿既史華高斯就咁搞掂左主隊
瑞士可能因為緊張
所以表現唔見得叫好好
恩拿同埋費蘭迪斯勤力有餘
不過搶波多,誤傳亦唔少
巴尼達修癒唔 fit
比哈美對住麥連亦佔唔到便宜
不過佢地至少有能力製造多次具威脅既攻門
上半場費爾未傷出既時候已3度攻門
當中有兩次都俾到施治麻煩
而下半場入替費爾既哈根耶堅
亦有過10分鐘虛火
之後更曾經冇人看管下頂斜
瑞士咁多攻勢都把握唔到
結果埋下輸波既伏線
但佢地其實落後下仍有唔少機會
不過全部都把握唔到
其中禾倫丹既執雞中楣
只可以講句天亡瑞士
瑞士雖然輸波
兼有隊長費爾要養傷6個星期而緣盡今次決賽週
不過佢地只要放鬆心情
同埋改善埋門一腳
下場對土耳其仍然有希望
2) 葡萄牙對土耳其
葡萄牙尋晚既表現雖然未至於水銀瀉地
但總算係小弟印象中
佢地自從英國踢友誼賽羸巴西之後最好既一場波
C7全場發揮唔算特別好
同佢仲有少少獨食有關
不過佢既表現已經比森馬奧好
而紐奴高美斯機會唔算多
不過全部都把握得唔錯
冇波入只因唔夠運
不過講返轉頭
其實全隊都唔多夠運
否則佢地足以羸5球
葡萄牙尋晚中場既分工算幾清晰
比堤主力截擊同埋駁腳
莫天奴同埋迪高就主力進攻
不過比堤尋晚冇咩受考驗
對勁隊既防中就唔知佢到時頂唔頂得住
後防方面
保羅費拉拿要串演左閘可能係防線既最大漏洞
尋晚冇出事又係同受壓唔多有關
小弟留意到C7同埋森馬奧其實係比較多於左路埋手
可能係史高拉利唸住以攻為守
以減輕保羅費拉拿既防守壓力
而柏比雖然尋晚多次出擊兼有波入
印象分應該可以攞唔少
不過小弟始終對佢既防守能力有所保留
般奴艾維斯始終係一個防守能力比較強既中堅
史高拉利尋晚選擇用柏比
可能只係預左受壓唔多同埋考慮到佢既助攻能力
土耳其方面
雖然佢地佈越位既水準唔差
不過小弟對泰林既排陣同埋用人就有少少失望
首先上半場咸美治艾天托普踢右閘
就浪費左佢既攻擊能力
第二卡森李察士踢法粗枝大葉
唔岩用來踢中場
出多個防中幫手搶波仲實際
第三前線太技術型
不過冇合作即係冇用
端基同尼赫治直情好似躉腳踢街波咁
唔講直情以為佢地之前從未夾過
而再加多個艾丁就仲衰多幾錢
點解唔索性用辛杜克或者卡森李察士踢最前
起碼打反擊踢簡單足球仲實際
而土耳其下場更要注意防線既靈活性
替補費爾既禾倫丹同埋達迪約克
雖然埋門把握一般
不過就好靈活
今場所見土耳其既後衛大隻有餘
既唔快又唔靈活既佢地隨時爆鑊
2 comments:
有睇既只係第一埸。
成埸波瑞士都不落下風，甚至有段時間係完全佔優。較可惜既係費爾上半埸尾段已經傷出，唔係我諗下半埸瑞士要入波唔難。
誤傳兩隊都唔少，印象最深係捷克上半埸開波無耐已經交過醫院波俾對面接到，可惜費爾選擇自己遠射而唔係交俾右面空哂既隊友，如果唔係隨時已經先開紀錄。
捷克既表現，完全唔似一隊黑馬。入既一球，其實都帶有幸運成份。其實如果琴日真高拿拍住巴路士而唔係單箭頭，效果應該會幾好。真高拿頂到既波唔少，但係無人接應佢頭鎚二傳。下半埸入替佢既史華高斯表現唔係話特別好，不過咁岩把握到一次機會就攪掂。
成隊捷克要讚既，似乎唔多。贊古奴夫斯基經常助攻，攪到後面空位多多。烏法奴斯更加係下半埸禁區內兩次手球，兩次球證都無吹，算係好彩。成條中埸線都無咩突出。踢得最好既，應該要數到施治。雖然俾到佢既威脅唔多，不過佢亦都救到唔少靚波，包括下半埸對方禁區頂既一個妙射。禾倫丹之後既執雞唔入，亦係瑞士無法攞返一分既原因之一。
總括來講，瑞士唔係無機會。只要之後可以擊敗土耳其同埋逼和葡萄牙，仍然可以出線。因為我估捷克之後兩埸都未必攞到分。瑞士對葡萄牙果陣，葡萄牙應該已經出左線，留力都唔奇。
To: 舒利亞
1)
小弟都同意施治係場波既最佳球員
不過技術小組既選擇竟然係
兩次犯手球都唔使輸12碼既烏化奴斯
2)
瑞士只要輸波唔輸士氣
真係仲有機
Post a Comment