想講下B組兩場波......
1) 奧地利對克羅地亞
克羅地亞有得羸波
第一個要多謝既應該係對手既奧夫侯沙
佢早段魯莽侵犯奧歷連累球隊輸12碼
打開缺口後格仔國仲一度壓住奧地利0黎砌
不過自從上半場2/3時間起
佢地就再冇明顯優勢
奧地利教練希格斯貝加解釋話班波開波頭30分鐘好緊張
小弟都同意亦明白
如果唔係咁緊張
陣中算得上比較有經驗既奧夫侯沙應該唔會咁魯莽輸球12碼
有普加迪斯死好命唔使兩黃一紅出場既佢地
之後就慢慢打返個隊型
奧夫侯沙同埋艾雲舒捷斯開始佢地既分工
前者去搶
後者就試圖組織攻勢
而針對柏拉積既不穩
哈尼克亦多左去右路搵食
而奧地利半場休息後將防線壓上前
佢地更可以講話主導晒整個下半場
佢地上半場俾克羅地亞砌左30分鐘
但全場既控球時間依然多達64%
可想而知佢地下半場真係壓住克羅地亞去抽
艾雲舒捷斯開始有時分到下波
哈尼克專心右路搞爆破
後備落場之後有貨交既哥克馬斯就頻頻於左路搞搞震
不過製造到機會都唔代表可以入波
因為受到紐卡素,韋斯咸同埋米堡注視既連斯
同埋後備入替既基拿斯特
只識得於禁區等運到
希望單靠身高可以壓倒克羅地亞中路既老人家
而38歲既華斯迪埋門一腳雖好
但英雄遲暮
入場後冇咩表現
其他球員走入禁區攻門既意識就好差
白白浪費左好多機會
而克羅地亞於下半場1/3時間起就踢龜縮足球
令質素唔高既奧地利球員有時控住個波
但都唔知可以點做
先後 n 次以浪射來結束攻勢
其實佢地既攻門次數多達18次
比尋晚既瑞士更多
但球員既表現就解釋點解佢地最終不但入唔到波
更連有威脅既攻門都唔夠瑞士多
從中可以反映出奧地利既水準比瑞士更低
再講返克羅地亞
比歷解釋球隊下半場失勢唔係輸體力
而係衰在下半場1/3時間起就縮晒於禁區內
結果0個勢輸晒俾人
但小弟認為佢地自從30分鐘之後慢慢冇迫住對手去踢
咁邊有可能唔受壓
當中原因可能係心態唔夠積極
而亦有可能係體力問題
體力從來都唔係佢地既強項
球員經過漫長球季已經冇幾多貨剩
當中部份球員仲係煙剷
自然仲快莫氣
而唔夠硬朗都係主因
佢地既中場線全部都係技術型球員
連防中既尼高高華都係靠路數踢波
對住奧地利0個班好氣好力既大隻佬難免蝕底
另一方面,比歷既調動同埋臨場指示值得商榷
佢於61分鐘以防守球員基尼斯域入替卡蘭積卡
佢既想法似係想多個人幫手搶波
應該未至於咁快放棄進攻
但要留意既係佢換人既時間同球員開始龜縮既時間係 perfect match
小弟夠膽講球員好可能誤解佢既意圖
結果越踢越縮
踢得唔好都唔使輸
只因時辰未到
如果今場見到克羅地亞既水準
係佢地既5成或以上
小弟會認為這支所謂既黑馬應該唔慌會行得遠
2) 德國對波蘭
'行行企企,食飯幾味'
應該可以形容德國今場既表現
格食格既情況
大佬德國點睇都唔似會輸俾細佬波蘭
但想講既係德國同埋頭場既克羅地亞相比
真係高下立見
德國領先之後仍然繼續長時間維持住水準
雖然未至於下下都迫得對手好緊
(事實上佢地仲未去盡,睇得出依然有大把本錢在手)
但起碼隊型仲 keep 到
防線亦冇縮後
可以講話當咩事都發生過
紀律性一流
跟住就想講下幾個球員既表現
列文同馬里奧高美斯算係踢得比較緊張
前者經過比賽初段後
已經慢慢入局
不過後者上半場兩度錯失入波機會後就越踢越沉
路維似乎要輔導下佢
而拿姆雖然聲稱右閘先係佢既最佳位置
不過佢又真係冇兩年前世界盃咁 sharp
反正馬素贊臣冇咩料到
路維倒不如將拿姆移返去左路
再用返A.費特烈治踢右閘
另一方面,費斯踢右中場既侵略性不足
如果對手既左路攻擊力唔太強
其實用舒韋恩史迪加會比較化算
p.s.:
雖然克羅地亞尋晚踢得唔好
小弟都踩得佢地好盡
不過唔代表佢地下場冇本事嚇人一驚
98世界盃
南斯拉夫第一場羸伊朗既表現又係不知所謂
不過第二場對德國就突然踢到曉飛
德國先輸兩球
幾經辛苦先迫和對手
所以有邊個敢擔保佢地既兄弟波克羅地亞唔會突然回勇
德國下場依然冇放鬆既餘地
否則8強即刻要對葡萄牙就唔好啦
4 comments:
波蘭無我守龍, 真係無咁好睇!
琴日諗住克羅地亞應該入番三四球啦掛，特別係兩分鐘就十二碼入埋。點知跟住佢地唔知係不思進取定係真係得咁多料，一開始仲可以控球在腳，點知上半埸中後段已經俾人攞番控球權。
下半埸開波到完埸，奧地利可謂完全佔優。不過都係果句，質素所限。埋門多無用，最緊要把握到。佢地好多時都係攻唔入就求其一腳射埋去，完全唔中目標。
奧地利比我預期中強得多，絕對唔係魚腩。(可能主埸威力)如果早少少換華斯迪呢位老人家入來，唔夠膽講有好大作用，不過最少都可以鎮住班波。
睇番呢組，德國首名應該走唔甩。而以琴晚既表現，呢組其他三隊又無一隊係葡萄牙對手。所以我估葡萄牙入四強都無咩難度。
奧地利vs克羅地亞場波節奏好快,
克羅地亞只得首20分鐘踢得好,
其餘時間都係同人地混戰
奧地利其實都打得好好,
中場好肯搶,都有好多撞牆既傳送睇下,
只是埋門質素低,
我估有機會win波蘭..
這隊克羅地亞同我至愛既96及98年果隊真的差好遠了,
摩德納既表現唔差,
但同奧地利既中場冇大分別,
唔值咁高身價,
幸好紐記買唔到佢...
見到完場時,
克羅地亞球員個個踢到訓哂地,
証明佢地俾奧地利壓得透唔到氣
亦到証明英格蘭真的唔抵入決賽週
德國果場我都有睇
評語只得三個字: 格食格
波蘭既兩邊傳中失色,球關乏力
德國踢來好似睇住來食,
當練習賽去踢,
同組其他三隊真的比下去
To: 死佬
其實比赫加初上任既時候係起用杜迪
不過佢連翩犯錯
連累球隊於第一場外圍賽就落筆打三更
主場竟然1:3不敵芬蘭
迫住比赫加改用穩健好多既 W.Kowalewski
不過這個光頭龍門之後要坐波監
就被保路錫把握搶左個正選
仲 keep 到而家
而這個光頭龍門因為古斯錫因傷退隊
而臨時被比赫加重召
佢雖然自年初轉會重返國內後長坐冷板
不過比赫加依然寧願選佢
都唔選於皇馬都有幾場波踢過既杜迪
可想而知杜迪0個底一場波就已經花晒
仲要係近乎 permanent black-list
To: 舒利亞 & sammysir
1)
奧地利肯搏
不過質素有限
2)
尋晚睇晒兩場波
明顯德國無論實力同埋表現都係超班
3)
克羅地亞體能上明顯有問題
4)
摩達歷係要有個好硬朗既防中同佢做粗重野
佢先可以發揮出水準
5)
兩位講既野都幾到位
有冇興趣客串寫下賽後感
有既話就預早通知小弟
Post a Comment