2008-9-30

近幾日既新聞......

1)
尼日利亞財團上星期已出價3億5000萬鎊收購紐卡素
應該係暫時唯一一個正式出價既買家
而有消息指可能買家多達7個
買家分別來自美國,南非同埋中國等地

2)
高車士打雖然搵緊新領隊
但佢地既發言人就表示基瑾,舒靈咸同埋前領隊 P.柏堅遜都冇去應徵

3)
列卡特被指成為紐卡素新領隊既可能人選
不過據消息人士透露佢打算抖一季先再出山

另一方面,舒利亞再次否認重返紐卡素既傳聞

4)
麥馬漢打工既新加坡財團睇中熱刺
佢地被指打算出價4億鎊買美國老闆既8成股份

另一方面,因為球會既劣續
拉莫斯成為下個被炒領隊既頂頭大熱
不過抵死既係於拜仁同樣受到好大壓力既奇連士文
竟然被指成為新領隊既人選

5)
樸茨茅夫被指有街數6000萬鎊未清
二世祖老闆唸住賣盤
更有傳聞指高治同埋迪科爾等球星亦會被掛牌套現
否則班波隨時冇糧出
哈利列納就表示二世祖老闆只係接受問價
仲話見到好價而心動絕對係人之常情

6)
英格蘭足總既前行政總監戴維斯爆料
原來艾歷臣於04年既時候
曾經考慮搵古迪仙尼,伊度,沙夏同埋馬白蘭基去代表英格蘭

7)
冇錢用既韋斯咸繼續搵平野
佢地被指將於1月向布力般流浪出價75萬鎊
收購冇咩機會出場既格魯吉亞後衛基辛尼舒韋尼

而佢地又已經邀請左卓斯坦去試腳
事關艾殊頓因為腳踭傷患而要休息1個月
更有消息指佢可能要抖夠半年而要提早收咧

8)
消息指曼聯準備同傑斯續約1年
而費sir就表示因為傑斯既速度已經大不如前
佢今季唔使再負責側擊
而要出任進攻中場或者後上前鋒

9)
賓納特被指將於1月被利物浦賤賣
價錢只要唔少於350萬鎊就可以成交

10)
馬田斯要養傷6個星期

p.s.:
1)
雖然簽約到10月尾
但因為當年教森林有兩場波監未坐
而要到10月20號先可以正式領軍既堅尼亞
同佢有關既搞笑野原來層出不窮

之前球會冇搵人去機場接佢已經係對佢好唔尊重
點知到佢正式上任既大日子
佢竟然發現原來全體球員放假一天

一間球會由搵臨時領隊以至基本既聯絡都可以錯漏百出
唔慌可以有運行

2)
賽後感聽日先講

2008-9-26

1)
雲拿保斯拒絕左艾殊利10萬鎊領軍一場既 offer
理由係紐卡素而家既局勢好唔穩定
之後,一度有消息指紐記再次斟酌奧拉利

但最終人選係前溫布頓領隊堅尼亞
紐記同佢簽短期合約到10尾
佢當年未心臟病發前
於極有限既資源下都帶得溫布頓好唔錯
佢擅於執平貨
主張爛仔波踢法同埋激勵球員士氣
代表作包括96-97年球季於足總盃ko曼聯

但用佢亦有一定隱憂
因為佢因心臟病而被奧臣取代後
教盧頓同埋森林都已經冇咩料到
而佢仲4年冇教波
隨時已經同球圈脫左節

2)
歐洲足協準備於2016年歐洲國家杯
將決賽週既參賽球隊數目增加至24隊

3)
消息指利物浦將於1月向聖保羅出價收購20歲巴西後衛 Aislan

4)
當奴雲透露考慮於1月再到歐洲落班
拜仁,紐卡素同埋布力般流浪都係佢既傳聞目的地

5)
曼聯3號龍門科士打同埋標準烈治中場 S.Defour
都被指成為米堡既增兵人選

6)
美國奧運隊龍門 D.Cervi 加盟些路迪
雙方簽約兩年

7)
奧連特既英格蘭年青球員 J.Demetriou
被指成為紐卡素最新一個長線投資目標
來自塞浦路斯既佢可踢右閘或者右中場

p.s.:
由於小弟突然想到新加坡碰下運氣
睇下仲搵唔搵到F1既門票
個 blog 將會暫停3日
不便之處,敬請原諒

今個星期大戰甚多
當中包括利物浦市打呲同埋米蘭打呲,
而紐記會否低處未算低都好令人關注

如果有人睇完波有野想講
可以幫小弟寫下賽後感
可於個 blog 留個 comment
或者 send 到 blackyho@hotmail.com
謝!

2008-9-25

1)
消息指尼日利亞財團希望可於今個星期內成功收購紐卡素
而雖然之前有消息指雲拿保斯拒絕接手紐記
但賭波公司就忽然將佢成為下任紐記領隊既賠率大幅下調
似乎空穴來風......

事實上佢尋日同紐記高層會面
個會於英國時間今日上晝繼續
雲拿保斯將於今日內作出決定

另一方面,荷度亦被指係另一個接手既可能人選
不過暫時未有消息指佢同紐記方面有過會面

2)
尼日利亞財團聲稱基瑾支持佢地既收購

3)
莫拉堤家族旗下既石油公司
近日俾米蘭檢察院調查
懷疑佢地托高股價以補貼國米買賣球員所帶來既債務

4)
Ghost Goal 事件既主角球證艾韋爾
原定執法葉士域治對韋根既聯賽盃賽事
但賽會臨時決定撤換佢
佢之後仲可能被貶到更低組別執法

5)
安達臣同埋細哨同巴西國內既毒販扯上關係
當地警方竟然於前者名下既物業拘捕0個毒販
而警方又查到兩位球星同個毒犯一直有聯絡
但就表明佢兩個冇份參與任何犯罪活動

6)
安達迪可能因為膝傷而要提早掛靴

7)
艾沙維被指將於1月離隊
皇馬同埋熱刺係佢最有可能既目的地

8)
維拉被指亦有意思收購賓納特

9)
基維由於唔滿意出場機會太少
韋斯咸立即被指可能於1月收購佢
佢於暑假時曾被指成為槌仔幫200萬鎊既增兵目標

10)
冇左正選席位既艾加由於同利物浦只剩18個月合約
有傳聞佢可能考慮離隊
而賓尼迪斯就表示會方想同佢續約

另一方面,菲臘迪根一復出又傷
佢今次就斷左兩條叻骨

p.s.:
尋晚紐記主場鬥聯賽仲未開齋既熱刺
睇往績係羸晒
不過只得約兩萬球迷撐場
變相冇左主場優勢
仲衰既係只得臨時拉伕既曉頓
又點同盃賽專家拉莫斯過招
尋晚場波就可以證明一個有料既領隊有幾重要啦

2008-9-24

1)
傳聞紐卡素曾經斟酌前利物浦名宿杜格利殊
不過對方已向傳媒否認會接手紐記

但亦有消息指艾殊利準備於今個星期內宣佈新領隊人選
不過暫時未知人選會係臨時性質定係正式接手

另一方面,紐記雖然處於無領隊狀態
但仍有傳聞指佢地既高層依然為增兵做緊野
佢地被指有興趣於1月向布力般流浪借用射手達比舒亞至季尾

2)
就要賠償鉅款俾錫菲聯
韋斯咸準備提出上訴

3)
哈利列納表示樸茨茅夫既財力唔多可能滿足到艾比亞

4)
因為教練科沙迪接受胃部手術後將要長抖
卡塔爾足總決定同佢解約
消息指梅素好大機會會接手

5)
侯城同簡拿高普路斯簽約至本季季尾

6)
土耳其新星杜蘭被指成為阿仙奴1月增兵既1500萬鎊人選

7)
熱刺被指準備於1月出價500萬鎊買尼索比亞

8)
曼城被指將於季尾向里昂出價2500萬鎊收購賓施馬

9)
賓納特被傳將以600萬鎊既價錢轉投米堡

10)
韋根,紐卡素同埋西布朗都先後派球探
去觀察莫迪20歲挪威中堅 V.Forren 既表現
當地傳媒估計佢既身價可達400萬鎊

2008-9-23 (2)

如果話講聲望同埋功力
肥安絕對及唔上納比以及卡比路
應該冇咩人會反對
但佢係咪咁廢先?

幾年前
李華度從巴塞隆拿投靠AC米蘭
結果俾肥安雪到硬晒
高水準既表現從此不復見
好多人都因為咁而插肥安浪費左李三腳既球技
不過小弟絕對唔認同
因為簽李華度明顯只係老闆既主意
情況就好似叫個大廚用新鮮靚米煮炒飯
擺明強人所難

跳到幾個月前再講
話說肥安同老闆表達增兵要求:
穩健龍門,硬朗中堅同埋擅頂頭槌既箭頭各一個
但高層最想搵其實只有細哨同埋軍刀

而為左安撫肥安
體貼既高層就回收艾比亞迪同埋借用辛達路斯
但前者如果真係咁穩健就唔會連踢馬體會都冇正選啦
而後者係好硬朗
不過曾患上杜奧巴恐懼症同埋出名轉數低

增兵既要求冇人理都未係最慘
高層干預埋用人先最令肥安頭痛
細哨同埋軍刀點用得落手架
前者未夠30歲就提早中年發福
簡直係半個肥哨
食叉燒食半肥瘦當然好
但排陣要預埋蒲精半肥細哨就認真冇陰公
加埋近年只識為國家隊入波既锈軍刀
對元老隊都未必有波入

直至開咧仆直班高層先識驚
丙次俾肥安隨意排陣
講明冇細哨同軍刀都唔反面
結果球隊即刻連羸兩場止血

星期日晚大炒拉素既正選陣容
細哨,軍刀同埋費文尼通通冇份
只憑上季主力用速度同埋深度已經夠殺有餘
睇得出高層既眼光有幾獨到
而細哨知道高層靠山唔再撐佢先識驚
星期日晚後備上陣先有幾腳好波睇下

AC米蘭大炒拉素袋3分之餘
亦為肥安爭返口氣

2008-9-23 (1)

1)
紐卡素已正式委任投資銀行 Seymour Pierce 去處理賣盤
佢地先後參與曼城,維拉等多間球會既買賣
上年艾殊利收購紐記都係搵佢地幫手

另一方面,消息指尼日利亞有一個有8人組成既財團打算收購紐記
不過佢地3億5000萬鎊既出價
同艾殊利要求既4億鎊仲有一段距離
而尼日利亞財團已經發行債券以希望集資2億鎊
消息指佢地一旦收購紐記成功
基瑾,麥達莫同埋沙拿都會被邀請回巢
而基瑾仲會得到撥款7500萬鎊資金去買新球員

2)
傳聞路斯基既膝傷好嚴重
有掛靴既危機

3)
傳聞包括奧雲,馬田斯,史堤芬泰萊,基雲等11名球員
由於頂唔順艾殊利而要求於1月轉會
但實情係艾殊利應該賣盤在即
所以傳聞不攻自破
而史堤芬泰萊更已經表明冇意思離隊

4)
薜高同賓約哥達成口頭合作協議
接替轉任烏茲別克國家隊教練既卡斯米夫
而白比利仲可能會以顧問身份協助冇執教國家隊經驗既卡斯米夫

5)
雖然球証同埋旁証犯上嚴重錯誤
但英格蘭足總表明唔會批准雷丁同屈福特既比賽重賽

6)
英格蘭足總既仲裁小組判錫菲聯可向韋斯咸追討賠償
事緣當時泰維斯係由 third party 唔合法擁有

7)
柏天尼批評雲加過份重視阿仙奴個盤生意
結果當然係激嬲左教授

8)
里奧於日前比賽向萊利爆粗
好可能俾足總抽後算帳

另外,曼聯因為攞左多達7張牌而被足總罰款2萬5000鎊

9)
卡華路因為拉傷膝部韌帶而要抖4個星期

10)
查斯古特可能要抖5個月
比最初既估計更嚴重

11)
阿布札比聯合集團完成收購曼城既所有手續
班主艾拿恩仲重申曉士係球會長期發展重要既一部份

12)
阿仙奴同佐羅續約

13)
香港將有機會主辦星級外隊既4角賽

14)
費倫天拿方面表示
中場新星蒙杜利和將唔會於1月離隊加盟韋斯咸或者其他球隊

15)
簡尼表態唔會復出
仲出言力撐偏受批評既蘭星

p.s.:
消息指作風硬朗既南勇接替謝亞龍後
將會嚴懲兩個於重要關頭去搵女偷食既韓鵬同埋周海濱

小弟一早知韓鵬係其中一個主角
但估唔到周海濱竟然係另一個
佢仲要衰到於賽事期間,水浸眼睸既時候仲死出去滾
真係唔死都冇用

唔同有問題既食品以及玩具
衰格既人未至於成為祖國既專利特產
實情外國都應該有好多西人

最新一個可能會係紐記既A.卡路爾
佢涉嫌於9月14號襲擊(定係非禮?)一名女子
當地警方而家仲調查緊
暫時未提出起訴

2008-9-22 (2)

幾場波想講.....

1) 車路士對曼聯

曼聯幾日前對維拉利爾既歐聯賽事明顯係尋晚場波既預演
夏格維斯,費查同埋朴智星3條友都好搶鏡
就算史高斯踢得好沉都冇所謂

打開紀錄前既主因係佢地搶羸條中場
而佢地加上里奧費甸南同埋艾夫蘭輪流後上助攻
最終用左17分鐘就令一條有卡華路早段傷出既車仔防線失守

曼聯入到波
就令人睇到冇左艾辛同埋迪高既影響真係好大
米基爾同埋波歷克對攻守都冇咩貢獻
前者除左斬過一腳靚波俾沙洛文卡奴入波
其餘時間可以講話冇腳好波
林伯特雖然發揮尚算穩定
但就令人有孤掌難鳴既感覺

車仔失波反後雖然傾力反撲
但明顯受制於曼聯一條高效率既中場
結果控球時間羸一條街
但真正有威脅既攻門唔太多
就算有亦俾祖高爾同埋安歷卡浪費晒
最終可以迫和對手都係全靠沙洛文卡奴大打爭氣波

如果尋晚車仔保唔住主場既不敗紀錄
大菲切腹都唔掂
車仔尋晚既踢法同埋佢既臨場調動都有值得商榷既餘地

未失波之前
車仔既球員冇咩走位可言
而中場更加回防不力導致失波

失波後
佢又心急下半場即刻換入唔夠狀態既杜奧巴
小弟其實認為佢既狀態只可以搏15分鐘
而佢選擇換走馬路達
就倒不如換走安歷卡

不過大菲尋晚搞到咁狼狽
遠因同佢太老定,未有替補就放走馬基里尼同埋胡禮菲臘斯有關
因為篇幅關係而在此唔多講

p.s.:
不過講到差勁
兩隊應該冇一個人及得上萊利
有睇場波既應該會明白小弟講緊咩

2) 保頓對阿仙奴

阿仙奴可能真係十年如一日
順既話攻勢真係有如水銀瀉地
防守又係時有甩漏兼長期畏高
總括而言佢地踢既......此終係全英超,甚至全歐洲最有娛樂性既足球
但小弟多年最欣賞既始終係雲加既財技
上年又賺3700萬鎊

雖然未來17年每年最少都要還2400萬鎊
但只要雲加一日唔走
兵工廠 fans 對於球會財政上同埋球隊既悅目踢法
都一定可以好樂觀

侯利亞以前有句名言:
帶隊英超排第一既未必係最佳領隊
排第尾既亦未必係最差領隊

如果考慮埋理財能力同埋悅目踢法
小弟心目中既英超領隊始終係雲加
如果今季利記又羸唔到英超
小弟希望捧盃既係兵工廠

3) 利物浦對史篤城

愛隊羸唔到波既原因有好多個:
一係早段食詐糊
二係知恥近乎勇既對手守得好集中
三係愛隊攻得唔夠耐性

四係愛隊好多球員都好累
賓帥好似忽然唔記得佢自己最叻輪換!

五係賓帥太遲用班拿約
全隊最擅長破密集既就係這個以色列國腳
偏偏賓帥要73分鐘先放佢落場
佢週中唔計補時只係踢左21分鐘
小弟好唔明點解佢好氣好力都冇得一早落場
如果佢可以一早落場
利記應該可以打破缺口

如果之後幾場波就一次咁既表現
羸多曼聯10次都唔使旨意羸英超

p.s.:
1)
明知睇利記既重播會邊睇邊狂插
小弟都係決定照睇
某程度上小弟睇波同萬千師奶睇家好月圓既心態都係一樣

2)
預告:小弟聽日同肥安平反

2008-9-22 (1)

想講下過去3日部份新聞......

1)
消息指紐卡素曾斟酌雲拿保斯接手執教
不過已被這名前英格蘭教頭拒絕
紐記被指將改打侯利亞既主意
幾個月前基瑾未宣佈回巢之前
侯利亞亦一度被指係繼承 Big Sam 既人選

2)
有傳聞指紐卡素打算於1月以400萬鎊既價錢賤賣唔肯續約既奧雲
消息指包括曼城,利物浦,熱刺同埋愛華頓在內既4支英超球隊都打佢主意

3)
英國有傳媒報導拉莫斯因為屋企人唔適應英國既生活
加上熱刺太多問題要解決
意興欄柵既佢打算辭職返西班牙
但佢本人已經否認有關報導

4)
馬田斯向傳媒透露紐卡素既內亂好影響球員
佢亦表示要好好考慮佢既事業
但就講明唔會影響到佢於球場內既表現
訪問內容刊登後阿仙奴隨即再次被指打算出價1200萬鎊收購佢

5)
前巴西國腳防中明尼路即將以自由身加盟車路士
雙方將簽約至本季季尾

6)
諾定咸森林既開季成績未如理想
有消息指佢地想搵 Big Sam 出山去取代卡達活

7)
查斯古特因為膝傷而要休息兩至四個月

8)
馬勒當拿將出任國米既球探
(其實最初既版本仲係莫拉堤想搵佢做助教?!)
但有意大利傳媒分析莫拉堤咁做
只係為左將來斟酌阿古路而舖路

9)
朗拿度暗示可能加盟巴黎聖日耳門

10)
曼城被指打算開價4700萬鎊搶泰維斯
不過當時人已經表態冇興趣

11)
伯明翰打算透過借用球員去增加升班本錢
消息指熱刺既保定同埋韋斯咸既基舒都係佢地既考慮人選
不過前者好似唔多自願
而後者就唔夠 fit
麥利殊表明如果情況冇改善既話
就寧願唔借用佢兩個

12)
曼聯隊巴尋日賽後離開史丹福橋球場時
車頭玻璃俾人用樽掟爛
事件中冇人受傷
曼聯方面表示已經報警
車路士方面就表示會展開調查

p.s.:
想講一個關於艾殊利疑似PK既故仔
肥老闆一直被指向中東佬開天殺價
傳聞既賣盤價仲高達4億8000萬鎊
食水咁深原來係因為佢之前大手買入哈利法克斯蘇格蘭銀行
但股價於15,16號兩日勁跌
連累佢兩日之間蝕左大約3億鎊

0個間銀行係全英國規模最大既房貸銀行
根本就係英國版既'雷曼兄弟'
英國政府驚佢地收左皮會嚴重衝擊本土金融業
所以已經搵左財政健全既勞埃德TSB銀行去收購(救)佢地

2008-9-21

因為有信心愛隊利記可於主場苦戰下羸史篤城一球
(可惜事與願違......)
加上要睇左波先會有功課交
亦要見證蘇拿第一次正式領軍
結果22:00時段都係睇左槌仔幫對紐記

先講排陣
槌仔幫既陣容冇咩令人意外既地方
睇來蘇拿未摸清楚隊波之前
唔準備有大變動

紐記今場既排陣就好過上場
防線暫且唔郁任何一個球員
中場就搵左卡卡巴串演防中
傷癒復出既杜夫同埋謝列美就分別踢兩邊
前面就由奧雲同埋悉斯高負責攻堅

場波紐記可以話輸俾迪米捷利既技術同埋運氣
但亦可以話輸俾自己條防線

先講第一球
高路仙尼被從右邊移入中路既迪米捷利擺脫之後
史堤芬泰萊同埋艾加只係識得一齊向後縮
明顯怯於對方既技術
結果人地一腳省到人就 lob 死左基雲

到第二球
尼索比亞最初識得死跟迪米捷利入中路
但基雲救到第一次之後
尼索比亞就冇再跟住起身比佢快既迪米捷利
簡接令後者鬆容挑過史堤芬泰萊後
再射返基雲近柱死位

而第三球
迪米捷利從尼索比亞身邊入滲之後
埋門變撻Q咁傳左俾擺脫艾加既艾法寧頓

三球波既共通點係迪米捷利都係從尼索比亞既防守位置埋手
跟住其他防守球員就輪住出錯
或者俾迪米捷利技術性擊倒
小弟個人認為
曉頓下場波或者可以用比較穩陣既巴斯桑治代替尼索比亞

講完紐記防守上既失誤
就講佢地既進攻
佢地今場既排陣比上場好
進攻方面最少都做到個 form

卡卡巴同埋畢特主力踢雙防中
佢地已經盡力去緊迫柏加以及盧保
唔可以要求佢地於組織攻勢方面再有咩大貢獻
佢地有波就多數分去兩邊
謝列美,杜夫同埋奧雲就有時返中場中路幫手駁腳
前兩者移入中路亦開左條路俾艾加同埋尼索比亞後上

佢地將攻勢集中於兩邊再傳中
踢簡單足球絕對係明智既決定
因為佢地整體既組織能力真係幾差

不過佢地傳中落點唔準
就令佢地既如意算盤打唔響
成場波加埋似樣既傳中
應該5隻手指都數得晒
最終破到蛋都係靠奧雲既個人技術

另一方面,睇左悉斯高兩場波
佢除左反應快之外
冇咩優點令人信服佢就係奧雲既最佳拍檔

最後想講下蘇拿既調動
紐記追返1:3之後
幾次簡單攻勢都俾到槌仔幫少少威脅
講波佬又話紐記仲有一線生機
此時既蘇拿就淡淡定咁作出一個既關鍵,又有效既調動
......以防中梅連斯入替柏加
只係識攔截既梅連斯入場幫手搶波後
紐記即刻少返控球時間
而槌仔幫又將節奏拖慢好多
亦明顯冇強攻既意欲
一齊以控球在腳為先
紐記既返勝希望就咁樣幻滅左

從今次既調動
可以睇得出蘇拿雖然講明進攻行先
但亦都識平衡成隊波既攻守

如果唔計同冰島老闆以及同鄉技術總監既合作
小弟對蘇拿既英超領隊生涯暫時而言係審慎樂觀

p.s.:
至於利記點樣令小弟激心,
同埋兵工廠對保頓既賽後感
就會等埋今晚既雙龍會
聽日一次過講

2008-9-19

1)
紐卡素被傳打算搵奧拉利出任臨時領隊
消息指佢連仲已經見左工

今次傳聞有一定可信性
因為新老闆入主後好可能搵新領隊
而家同佢簽臨時領隊既短期合約
到時唔用佢都唔使補水俾佢

2)
美國富商 S.Kroenke 加入阿仙奴既董事會
出任非執行董事一職

3)
大菲承認原來阿仙奴於暑假曾出價收購沙洛文卡奴
而家有消息指兵工廠將於1月再出價900萬鎊買人

4)
耶耶托尼向傳媒透露於暑假期間
高路托尼同埋雲加曾遊說佢轉投阿仙奴
但已被佢即時拒絕

另一方面,消息指阿仙奴已向艾比亞提供合約

5)
加高因為左邊大腿肌肉拉傷而要抖1個月

6)
英國傳媒指曼聯同沙地電訊上個月簽左份價值930萬鎊既贊助合約
而其他相關既贊助就仲傾緊

7)
奧雲同埋軒斯都被指成為曼城既增兵對象

8)
由於唔受現任領隊拉莫斯既重用
法國年青球員泰納特被指將於1月被外借到馬拉加
而馬拉加更可於季尾買斷佢

p.s.:
辣椒仔因為壓力性骨折而要入廠開刀
將要抖大約3個月

佢既情況其實好多時都會發生0係我地身上
遇有咁既情況
當然要睇醫生同埋照 X-ray

但就未必一定要開刀
如果情況唔太嚴重
靠物理治療同埋藥物,戴埋個保護托
再多加休息都可以康復

2008-9-18

1)
韋健士回巢車路士以接替奇勒既位置

2)
米確特宣佈掛靴

3)
耶耶托尼由於唔受哥迪奧拿既重用
可能於1月以1200萬鎊既價錢轉投阿仙奴

4)
侯城宣佈於1月正式以300萬鎊既價錢買斷馬華龍京治

5)
沙洛文卡奴被拍成為巴塞隆拿季尾800萬鎊既羅致對象

6)
由於車路士唔夠防中球員用
有傳聞指車路士將於1月向維拉開價1800萬鎊收購巴利

7)
雖然英格蘭足總宣佈冇權將古費利既自動停賽令延長
意味佢只需要停賽3場
但消息指法根將透過法律行動去向佢追討賠償
而侯城方面已表明會支持佢咁做

8)
曼城被指將於1月向拜仁出價1200萬鎊收購普度斯基

9)
雖然星期一雲尼亞里先話唔會放棄長抖既安達迪
但意大利傳媒指祖記已經決定將會同佢解約

p.s.:
唔收火既老孫又爆鑊
隨時約滿後連英冠都冇得佢踢

2008-9-17 (2)

1) 利物浦對曼聯

優勝劣敗係今場波既寫照
利記之前有幾次鬥曼聯
於有好表現,略為佔優既情況下輸波
今次總算有合理回報

開波初段利記成隊波好似一隊慌失失奇兵
或多或少同冇左謝拉特有關
輸0個球波好多防守球員亦都要負責
但捱過左頭10分鐘之後
佢地就慢慢正常返

利記今場羸在緊迫到對手
同埋攻勢簡單得來實際
雖然入既兩球都係因為對手失誤在先
不過都係因為當中球員夠勤力先會有咁既機會

曼聯方面
球員既表現明顯係水準以下
只有里奧費甸南同埋上半場既泰維斯比較似樣

而費 sir 既排陣亦係搵佢自己笨
叫安達臣同埋朗尼近乎全場踢死左右兩邊
而就算傑斯後備落場都係踢中路
安達臣依然踢佢唔習慣既左路
結果曼聯全場兩邊既威脅好一般

而卡域克同埋史高斯踢中場中路
前者傷癒冇耐
後者就有老態
點同沙比艾朗素以及馬斯查蘭奴兩件硬野搶波
結果成條中場線失晒勢

曼聯咁既表現
只憑2分幾鐘既入波領先
又邊可能捱得到完場

講表現,今場利記只係得7成水準
不過對手曼聯更加不濟
結果賓帥得以於入主利記後第一次於聯賽羸波

2) 紐卡素對侯城

兩隊既士氣都唔多好
前者內亂
後者就上場後防發瘟而主場輸俾韋根0:5

今場雙方既陣式同埋人腳都有幾大變動
傷兵幾多既紐記
就索性以上季後段用慣用熟既4-3-3陣式出擊
而侯城為左唔使再狂失波
索性以5-4-1陣式
主守既心態明顯

講控球指數同埋機會
紐記都比較多
不過又係幾個老問題玩死左佢地

前線方面
無錯基瑾接手後紐記踢得最順既時候
係用4-3-3陣式
不過當時伙拍奧雲既係馬田斯同埋維度卡
但今場用艾美奧比同埋悉斯高
效果只會事倍功半

艾美奧比只岩踢護級隊或者英冠球隊
佢拍奧雲點可能會有火花
而悉斯高踢慣單箭頭之餘
更係一個要等人供應,埋門把握一般既普通貨色

而由於今場波3個中場極其量都只係工兵
創造力近乎零
就算有奧雲經常返大場搵波踢都係冇用
今場波亦反映左古迪利斯對球隊既重要性
寄望佢復出同埋干沙利斯 settle down 之後真係可以幫到紐記

後防方面
艾加代替比耶
雖然佢連後者6成既功力都冇
不過起碼唔會好似左邊既尼索比亞咁經常返上唔返落
尼索比亞係成條防線最大既漏洞
既然荷西安歷基唔會有運行
紐記下手領隊不如把心一橫
用新仔 Tozer 或者於1月買個新左閘好過啦

3) 馬賽對利物浦

場波簡直係謝拉特既 one man show
佢忽然戴志偉上身
射0個球滑翔衝力射球仲技驚四座

不過今場排4-3-3既利記
一如兩季前作客波爾多
都係明顯輸控球時間
不過勝在後面仲算守得穩
所以拉爾拿同埋4件後衛都應記一功

2008-9-17 (1)

1)
杜拜投資集團表示冇同紐卡素方面傾緊收購既野
而將來亦冇打算咁做

雖然消息指紐記方面有信心於月底前成功賣盤
但有分析指現時紐記既情況令唔少投資者卻步

另一方面,有消息指原來艾殊利半年前已經想賣盤
咁就同當時條肥佬主動聯絡DIC集團既傳聞好吻合

2)
班尼斯接手執教牙買加
佢同當地足總簽約1年

3)
端基因為膝傷而要抖6個星期

4)
利物浦同埋熱刺都被指有興趣於1月向韋根開價收購希斯基
但小弟就唔多信賓帥而家會重召佢

5)
禾確特被指成為曼城2000萬鎊既增兵對象

6)
洛基祖利亞由卡塔爾球會 Al-Rayyan 轉投彭美拉斯

7)
雖然麥比亞願意留於雷恩至季尾
但佢表明希望之後可以離隊
而曼聯正係佢既心水目的地

8)
曾偉忠因為健康理由而向南華辭任總教練一職
但佢依然會留隊幫手做顧問

2008-9-16

幾日以來重要既新聞如下......

1)
艾殊利星期日宣佈準備將球會所有股份出售
佢聲稱曾經為紐記用左2億4400萬鎊
一般估計佢唔可能以3億鎊以上既價錢放盤

而早前曼城既新油王集團原來亦曾經出價收購紐記
不過佢地最終以2億鎊收購曼城

放盤消息傳出後
傳聞買家幾多
當中包括阿聯酋財團 DIC,
早前宣佈放棄既印度富商安巴尼,
新加坡財團 Profitable Group (麥馬漢打工0個間),
Bill Gates 同埋中國第二富豪許榮茂
不過 DIC 已否認有興趣收購紐記

2)
消息指舒利亞收到紐記方面既通知
冇得再做佢地既宣傳大使
但之後紐記方面就發表聲明
指實情係因為舒利亞既合約已經於上季尾完結

3)
英國傳媒指朗拿度將以自由身加盟曼城
但曼城隨即否認想搵佢加盟

4)
韋斯咸同埋車路士終於傾掂數
令奇勒可以如願加盟槌仔幫做蘇拿既副手

5)
中村俊輔表示佢想於1月回國發展
家庭理由同埋唔想經常長途跋涉返祖家踢國際賽就係佢離隊既原因
佢表示回巢橫濱水手既機會最大
而史特根就表示想說服佢留隊

6)
泰利上訴得直唔使停賽

7)
比歷宣佈將於2010年世界盃後離隊

8)
紅牛打算出價8000萬歐元全面收購馬略卡

9)
哈索賓基宣佈掛靴

10)
卡域克因為骨裂而要養傷4-6個星期

11)
紐卡素方面證實古迪利斯要抖大約3個星期

12)
法根因為俾格夫里踢斷右腳脛骨而可能要長抖3個月
雖然醫生報告亦指如果佢康復得快
亦有可能只需要抖6個星期
格夫里事後已透過紐卡素向法根道歉

13)
維路素被指成為曼聯同埋阿仙奴1月既增兵對象

14)
巴西足總決定搵個監督'幫手'俾意見鄧加排陣

15)
莫達以自由身轉投熱那亞
雙方簽約4年

16)
加斯居尼又亂食藥
佢洗左胃之後已經冇大礙

p.s.:
賽後感聽日再講

2008-9-13

1)
基瑾同艾殊利尋晚再傾多次
不過依然未能達成共識

2)
安巴尼陣營方面表示
由於紐卡素現時球隊既混亂情況
加上佢地未能同紐記方面傾得成任何野
所以決定放棄收購紐記

3)
費古羅亞被熱那亞放棄
消息指佢即將以借用身份加盟小保加
再於1月被正式買斷

4)
卡斯辛奴表示冇興趣轉投祖雲達斯

5)
蘇格蘭足總主席比特表示唔會俾佢地既球員
加入英國隊參與倫敦奧運

6)
梅度否認退出國家隊既傳聞

p.s.:
利物浦部份球迷今日唔會入場睇波
以示對美國老闆既不滿
而紐記球迷暫時冇話有杯葛球隊既行動
不過今晚就一定好好招呼唔識死仲入場睇波既艾殊利

2008-9-12

1)
消息指曉頓同埋 R.Money 要捱3個星期
因為紐卡素需要時間去物色新領隊

2)
祖記被指將會為迪比亞路搵接班人
消息指阿古路同埋卡斯辛奴都係老婦人既考慮人選
仲有傳聞話祖記為左羅致後者
將會向森多利亞出價1800萬鎊
兼免費外借基奧雲高一季

3)
熱刺被指打算於1月向韋根出價400萬鎊買希斯基

4)
皇馬被指將於季尾向拜仁收購普度斯基

5)
京治幾有可能得到伯明翰放人
以自由身加盟韋根
同前任波士布魯士再度合作

6)
湯馬士以自由身加盟昆士伯流浪

7)
本地足總打算空降克羅地亞教練哥能去執教香港代表隊
早前佢地又自把自為搵林方基出任青訓及技術發展總監
連串空降引起球圈中人不滿

8)
米杜士堡方面否認會借用阿當莊臣到錫菲聯

9)
迪拉告魯斯即將以自由身加盟高雲地利

p.s.:
比歷尋日被問到有否興趣接手紐卡素
佢就即刻暫釘折鐵話冇

小弟認為母會槌仔幫同佢關係咁好
佢都因為想教克羅地亞而 say no
佢又點會肯過紐記收拾爛攤子
提問既記者都幾廢

2008-9-11

1)
科拿即將同布力般流浪簽約3個月
合約形式係出場先有錢收

2)
摩連迪斯由於唔滿意淪為華倫西亞既第4前鋒而想於1月離隊
熱刺隨即被指有興趣羅致佢

3)
卡卡承認有一間英超球會出價1億歐元收購佢
但佢表示冇意思離開AC米蘭

4)
古迪利斯於今朝既比賽傷出
初步懷疑右邊膊頭甩骹
阿根廷足總就冇透露佢既傷勢
只表示佢需要作出更多既診斷

5)
週薪3萬鎊既艾法寧頓由於有80萬鎊賭債未還
而收到死亡恐嚇
最終韋斯咸借糧俾佢
同埋準備送佢去接受治療

6)
安歷卡表示冇唸過會重返巴黎聖日耳門
佢透露就算同車路士約滿之後
都只會去美國或者中東搵食

7)
恩斯竟然被傳係紐卡素新領隊既人選
都幾離譜!

8)
奇勒被指成為韋斯咸副領隊既考慮人選

p.s.:
1)
克羅地亞尋晚慘敗
後防多失誤同埋踢少個無錯係主因
不過驕兵都係抵輸波架啦

而因為咁而攞0黎衰既仲有羅賓奴
話說幾日前巴西作客大勝智利3:0
羅賓奴竟然於更衣室既白板用西班牙文寫......
'要尊敬世界上最好既球隊'
0個種氣焰真係令人討厭
今朝巴西主場竟然踢多個都同玻利維亞踢0:0
3個字:現眼報

2)
911咁就過左7年......
但完全唔覺個世界太平左
都幾可悲

2008-9-10

1)
普耶表態冇意思接手紐卡素
另一方面,直至有新領隊之前
紐記將暫時由曉頓同埋 R.Money 領軍

2)
有消息指韋斯咸想請埋蘇拿而家既波士卡沙拉基
不過係請佢去做蘇拿既副手
但當時人已經表示唔會接受邀請

3)
熱那亞為左增強球隊既中場截擊力
打算羅致戴維斯或者加維臣
兩者現時都係未搵到班落

4)
賓尼迪斯表示仍寄望謝拉特同埋托利斯可以趕及復出鬥曼聯

5)
羅比堅尼成為近兩年內第7個屋企俾賊打劫既利物浦球員

6)
前拜仁加納中堅宣佈退休

p.s.:
(先表明立場......
英格蘭同埋克羅地亞都唔係小弟既心水球隊
不過就覺得比歷超型兼好有領袖魅力)

在傳媒落力大肆報導(實情係撥火)既情況下
加上比歷同埋佢班球員可能羸英超蘭羸到太有信心
近日不斷聽到佢地對英格蘭班友評頭品足
由人地既教練卡比路
到單調踢法都係佢地既討論話題

但問題係對賽前咁高調講對手咁多野
似乎從來都唔係好事
佢地對上兩場羸英格蘭
除左佢地本身有一定實力外
英格蘭班友仔作客衰輕敵
保羅羅賓遜,卡臣同埋加利仔既嚴重失誤
加上隨時係近代英格蘭最廢教練既麥卡倫
都絕對係原因之一

而家有料既老狐狸卡比路接左手
英格蘭既效率一定好過之前
加上隨住里奧趕及復出
今場既英格蘭防線應該係近3次對賽最整齊既一次
而從祖高爾都竟然會俾卡比路插佢回防過多
就可見佢地成條中場線都好肯做防務
如果英格蘭班友一心打穩陣波
格仔旗既球員要羸講真都幾困難

而卡比路今場應該用希斯基踢正選
就係針對主隊一眾後防球員
唔夠硬朗兼有少少畏高既通病
大隻妙雖然唔識入波
但就足以為朗尼開路

而卡比路上場突然用禾確特踢正選
似係留返上場只係踢左10分鐘既碧咸於今場搏命
而牛奶咀就隨時於後段被派落場用青春同埋速度去屈機

以英格蘭而家既人腳同埋陣式
話勁一定唔係勁
不過一定未至於任人魚肉
加上佢地上下都出奇地低調兼客氣
祖高爾去記招仲話和波都可以收貨
就知道擺明有鬼啦

而睇歐國盃決賽週就已經知
如果五五波或者六四波俾人略為睇好既時候
克羅地亞偏偏會踢到有少少綁手綁腳
就係因為佢地唔太擅於強攻
而佢地對德國反而忽然有料到
就睇得出佢地只係一班好有技術既擦鞋仔
難登大雅之堂

如果今次擦鞋仔竟然扮大哥玩輕敵
小心玩死埋自己

2008-9-9

1)
拉科魯尼亞教練表示雖然曾經有人接洽佢接手紐卡素
但佢已決定唔會於季內離隊

另一方面,薜高竟然有興趣接手紐記

2)
印度富商安巴尼可能以私人名義收購紐卡素

3)
紐卡素球迷發起杯葛行動
先係罷買紐記商品
例如波衫,其他衣著,精品同埋雜誌等官方產品
而球迷當然亦會杯葛艾殊利旗下既運動用品銷售連鎖店
但球迷就表明唔會杯葛球隊星期六對侯城既比賽

4)
隨住鄧納東尼同韋斯咸傾唔掂數
蘇拿已經係呼之欲出既韋斯咸新領隊
不過佢因為而家隨意大利 U-21 代表隊
準備香港時間聽日凌晨對克羅地亞既賽事
消息指槌仔幫將會於星期四先宣佈佢既任命

5)
艾辛因為要開刀醫治膝傷而要抖幾個月

另一方面,大衛施華亦因腳踭傷患而要養傷3個月

6)
曼聯行政總裁基爾表示
如果曼城真係出價1億3500萬鎊收購C7
佢地將會考慮放人

7)
普度斯基宣佈考慮於1月離隊後
佢立即被指成為曼城既增兵對象

8)
基奧雲高被指曾經被阿仙奴私下斟酌
但佢既經理人已經表明這個意大利奧運腳 prefer 留於祖雲達斯

9)
保馬同維拉續約兩年

10)
路柏泰利即將於自由身加盟卡利亞里

11)
25歲荷蘭右翼 K.Bechan 現於布力般流浪試腳
消息指佢幾有機會得到恩斯既取錄

2008-9-8

1)
紐卡素解僱麥達莫同埋預備組教練 Sadler
佢兩個被炒或多或少同基瑾有關
紐記有咁多 staff 同埋球員撐基瑾
即管睇班高層可以炒得幾多個

而迪甘斯,莫耶斯同埋普耶等人就繼續被傳會接手紐記既爛攤子
當中前者被傳既原因同普耶一樣
佢又係被認為同韋斯關係唔錯
所以可能會願意接手而又可以同韋斯和平共處
而泰連亦同紐卡素扯上關係

不過小弟就唔多信
因為佢兩個出左名幾我行我素
唔似可以同紐記既高層好好合作

2)
謝拉特唔可以趕及對曼聯復出領軍

3)
莫斯科斯巴達方面透露米高勞特立將於兩日內落實接手

4)
列高巴轉投希臘球會彭尼安奧斯
雙方簽約兩年

5)
前米堡射手祖比決定加盟卡塔爾球會 Al Kharaitiyat
而前國米射手卡隆就加盟阿聯酋球會 Al Shabab

p.s.:
近日於香港既最大件事一定係立法會選舉
唔知係唔係小弟中左足球毒太深
睇見某0的政黨同埋某0的參選人
竟然由佢地聯想到球圈某0的人同埋事......

a) 保皇黨
佢地仍舊係立法會第一大黨
有勁多鐵票
除左因為有好多親中人仕想搵著數
所以好出力幫手之外
保皇黨本身亦好肯做門面功夫
仲識派餅仔俾公公婆婆去討好佢地

小弟經常都質疑
咁叻親中撐政府對特區政府既表現可以有咩幫助?

從佢地小弟就聯想到近日既法國隊
經過歐國盃決賽週既差劣表現後
當全世界都等緊杜明尼治俾人怒炒
點知亨利,列貝利,韋拉同埋艾夫蘭等人齊齊保皇
法國足總最終出人意表唔搵杜明尼治祭旗
當中一定同班友仔出晒面保皇有關

不過杜明尼治有得留低
咪只會俾佢繼續搞死法國隊
前晚輸俾奧地利就係一個好例子
唔知而家亨利唔妥條防線之餘
有冇為兩個幾月前出聲保皇而揼心口呢?

b) 自由黨
對於佢地地區參選全軍覆沒
除左長毛之外
小弟亦係另一個好開心既人

佢班友仔
掛為民服務既羊頭
賣官商鉤結既狗肉
靠佢地做野真係蛇都死
旨意佢地推介你飲飲食食就應該怕且得

佢地0的咁既人
識得為民憂心咩
對佢地有著數既野佢
佢地先似會肯俾心機去做足200分
至於其他事務
似乎遠遠及唔上出海攬女飲紅酒咁重要
(小弟既意思係指吃喝玩樂,小弟都知佢地有女黨員)

星期六晚知道艾殊利同3個損友豪飲0個單野
小弟就即刻聯想到田氏兄弟
艾殊利條肥野
紐記水深火熱佢都仲有心情去豪劈
個格係咪同田雞兄弟一樣咁衰?
佢地唯一既分別可能係
田雞兄弟未必豪到一晚俾3萬鎊做 tips

c) 劉千石
佢既出局又係大快人心
佢條友出左名議會出席率最低
但人工就同其他人一樣咁多

佢就令小弟唸起當年執教紐記既古烈治
當年佢出左名每個星期踢完聯賽後即返荷蘭 relax 下
但跟住多數話要請多日假
即係好多時星期六,或者日踢完英超
佢要到下個星期二,甚至乎星期三先肯蒲頭
但人工依舊收足

出來做野
如果條友做到野既
好似當年奇連士文經常遙遠控制德國隊都交到貨既
有時偷懶都唔會有人同佢計數計到咁盡
但偏偏劉千石同古烈治一樣
都只係名氣大,但功績平平既人
就抵佢最終冇得留低啦

2008-9-7

1)
印度富商阿姆巴尼被指有興趣收購紐卡素
決定加碼至3億鎊既佢仲派埋代表去左左英國
佢既身家多達215億鎊
差不多係艾巴莫域治既兩倍
佢表明肯撥款1億鎊
仲話一定搵返基瑾回巢

2)
有傳聞指基瑾曾要求球會收購亨利,碧咸同埋林伯特
但就被艾殊利 reject 左
因為肥老闆 prefer 搵新血作長線投資

另一方面,肥老闆被英國傳媒爆佢日前於美國蒲吧
一行4人埋單竟然洗左12萬5千鎊
當中有3萬鎊係俾侍應同埋 security 既 tips
佢要球員自己俾錢買 equipment
慳家到街知巷聞
唸都唸唔到佢自己平時用錢原來可以咁豪爽

3)
蘇斯達被指可能成為最新一個
因為唔滿意球會買賣球員政策而劈炮既教練

4)
韋斯咸方面公佈佢地既新領隊人選已有最後4強
包括比歷,蘇拿,鄧納東尼同埋米高勞特立

5)
托利斯可趕及星期六對曼聯

6)
蘇連同高士路簽約1年

7)
史奈達最快可於10月復出

8)
紅星隊宣佈解僱教練施文

9)
貝迪斯方面表示蘇比斯即將以1100萬歐元既價錢
加盟阿聯酋球會艾查斯拉

p.s.:
由尋日既本地波開鑼
到尋晚世界盃外圍賽既法國,羅馬尼亞,英格蘭......
再到今朝既美職盟
真係屎波一籮籮
有得睇唔睇(或者電視台冇播)都絕對唔係大家既損失

反而尋晚殘奧既精彩開幕
開口'我地就係奧運'既大婆台只播精華
仲要重點播歌星唱九唔搭八既歌

而只有明珠台播足全程
二奶台又只係半途加入
大家就可以睇得出本地電視台有幾尊重殘奧

2008-9-6

1)
基瑾離隊後
普耶,韋斯,迪甘斯,舒利亞同埋莫那斯都被指係可能既接任人選
當中仲有賭波公司將普耶列為大熱門
小弟覺得當中有一定道理
因為普耶應該係當今世上最可以同韋斯好好合作既人選

另一方面,舒利亞就已經表示唔會於現階段接手紐卡素
佢仲話只要紐記唔俾領隊有買賣球員既話事權
佢都唔會考慮重返紐記

2)
FIFA 宣布出年2月開始發售南非世界盃既波飛
數量大約有200萬張

3)
巴頓因為襲擊達保單野
而被英格蘭足總罰停賽6場

4)
文仙尼既經理人透露
這位前國米教頭雖然有興趣教英超球會
但唔會係現階段去接手韋斯咸

5)
塞爾維亞小將拉高域因於奧運比賽期間向球証吐口水
而被重判罰停賽1年
佢今季原先被車路士外借到川迪吸取經驗

6)
韋斯咸引入前河床球員禾達盧比斯
這名22歲烏拉圭左後衛由於腳法出眾
所以可以串演左中場,甚至前鋒
自由身既佢同韋斯咸簽約1年

7)
阿仙奴即將落實艾比亞既加盟

P.S.:
小弟以前既老師今日寫左篇稿講曼城
題目叫做:'班主太自信羅賓奴有難'
有興趣既可以睇下:
http://www.mingpaonews.com/20080906/sru6.htm

2008-9-5

1)
基瑾最終決定辭職
消息指佢既留隊要求係要紐記炒左韋斯
但唔成功下只好選擇離開
佢單野唔再多講
因為尋日既'2008-9-4 (2)'已經講過下

2)
消息指有阿聯酋財團睇中利物浦

3)
有傳聞指基瑾離隊後
令奧雲下定決心要離開紐卡素
消息仲指佢最快會於1月走人

另一方面,基瑾承認賣走占士米拿係佢既決定

4)
韋斯咸既新領隊考慮人選
除左大熱門比歷之外
仲有侯利亞,蘇拿,文仙尼同埋鄧納東尼
而已經考到教練牌既迪肯尼奧貞表態想接手

5)
普度斯基表示想於1月離隊

6)
皇馬打算向沙治奧拉莫斯開一份10年長約

7)
大哨承認收到曼城既斟酌
而有傳聞指羅賓奴既週薪其實高達16萬鎊

8)
巴勒莫(主席森伯連尼)又炒教練
高蘭托路輸左開咧場波
就即刻被前卡利亞里教練巴拿甸尼所取代

p.s.:
加歷查爆艾歷臣大鑊
指佢曾經教英格蘭球員唔好帶女返酒店玩
寧願問0的女攞電話同埋地址
再約去佢地度玩
以避開狗仔隊

而家搵左卡比路
最終有冇盃捧冇人知
但紀律同埋形象至少都會好左好多

2008-9-4 (2)

想趁機會講下領隊(或者教練)買賣球員既話事權
基瑾,古比士利,甚至乎摩連奴,祖爾等領隊
全部都因為咁而曾經同高層炒大鑊

當中原因係現時某些英超同埋意甲球會過份分工
將買賣球員既工作交由技術總監同埋總裁等職位去全權負責
德甲就普遍由經理一職去負責買人

其實領隊(或者教練)唔參與買人
係可以減輕佢地既 workload
令佢地可以專心教波
絕對係好事
不過當某些高層獨斷獨行
同領隊(或者教練)甚少(甚至於冇)溝通就去買球員
就好可能出現領隊(或者教練)冇岩用既球員可用
又點可能要求佢地交到好成績

試問一個要參加烹調比賽既廚師
如果偏偏冇得話事買咩野材料
你話幾唔 make sense 呀?

最佳例子就係摩連奴
佢之前教車仔
其中一樣最唔滿意既就係
技術總監晏尼臣買人返來之前從來唔問佢意見

晏尼臣未加盟之前
摩連奴如願搵到杜奧巴,保羅費拉拿同埋卡華路等人
晏尼臣加盟後
唔計老闆既心頭好舒夫真高同埋波歷克
摩佬仲要收埋接收埋阿歷斯等眼中釘
摩佬當年仲搵人剪輯左一隻 DVD 送俾晏尼臣
內容全部係阿歷斯歷來踢燕豪芬既出醜片段
可想而知摩佬有幾嬲

而家犘佬去左國米
佢落 order 話要文仙尼,哥利斯馬同埋林柏特
技術總監白蘭卡就先後引入前二者
(雖然老闆莫拉堤曾經出過聲話哥利斯馬太貴)
林柏特最後關頭改變初衷
摩佬話要改搵蒙達利
白蘭卡又即刻同佢搵到蒙達利
示範左教練同技術總監可以既點樣去完美配合

而家基瑾同埋古比士利買人未必有得睇貨版
悉斯高,干沙里斯,比哈美同埋迪米捷利等人
睇落唔多似係佢地既心頭好掛
而韋斯同埋簡路卡蘭尼(紐記同埋槌仔幫既技術總監)
仲衰到連賣球員都唔理領隊意見
甚至乎暗地進行

奧雲同埋巴頓如果岩價可能已經被賣走
安頓費甸南同埋麥卡尼就傾好左價錢
古比士利先知咩事
俾你係0個兩位領隊都一定扯火啦

有傳聞指基瑾而家一哭二鬧三上吊
其實係想 fight 到負責球員買賣既團隊要受佢 fully control
但小弟既意見係
如果有一個肯同領隊(或者教練)好好溝通,又做到野既技術總監
其實已經好足夠

你睇摩連奴而家仲使咩為買人而同高層搏火
只要佢學埋點樣擦靚老闆對鞋
(當然都要幾年內羸返至少一次歐聯啦)
未來幾年隨時係佢執教生涯比較寫意既日子

2008-9-4 (1)

1)
有傳聞指基瑾希望可以同紐卡素達成解約協議
之後想可以收返800萬鎊賠償
而又有傳聞指一旦韋斯坐正
普耶將為左過檔做佢副手而向熱刺請辭

另一方面,原來早前基瑾表示希望紐記收購舒韋恩史迪加
結果就當然又係令佢老人家失望啦

2)
大菲表示希望可於1月搵個新球員
而佢亦可能放走一至兩個球員

3)
原來曼城於轉會市場 deadline 前曾打算收購雲佬
不過皇馬唔想接連兩個攻擊球員而拒絕左

4)
安哥拉射手文路祖終於申請到工作証

5)
拿臣成為瑞典既新隊長

6)
拿破里既球迷被禁止於今季內到客場睇波

7)
哈利列納否認重返韋斯咸

2008-9-3 (2)

1)
基瑾單野仲未有結果
只知佢同高層仲拉据緊
基瑾試圖爭取更多有關買賣球員既參與

而有傳聞指紐記高層打算於轉會市場 deadline 前
在瞞住基瑾既情況下出售奧雲同埋巴頓
如果報導屬實,唔怪得基瑾咁扯火

2)
哈利列納否認於轉會 deadline 前向紐卡素洽購巴頓

3)
最初被傳即將加盟韋斯咸既自由身球員艾比亞
突然決定改投倫敦另一球會阿仙奴
如果通過體測
佢將會同兵工廠簽約3年

4)
費格遜決定搵原任一隊教練既費倫
出任佢既新副手

5)
尼美因傷宣佈退休

6)
基斯曹考慮於1月轉投羅馬

7)
入主曼城既阿布扎比發展投資集團
佢地既31歲領導人艾爾法廉
佢集團既總資產多達6500萬億鎊至8000億鎊之間
足足係艾巴摩域治既68.3倍!!!!!!!!!!

8)
法林明高再次被指打算引入朗拿度

9)
盧基以自由身加盟馬拉加

10)
沙治奧拉莫斯跳船到貝迪斯

11)
韋斯咸從拖連奴同埋圖盧茲
分別借入前鋒迪米捷利同埋後衛艾倫加

12)
施積以借用身份轉投桑坦德

13)
龍格堡拒絕加盟摩納哥

14)
加拿大記者迪根希爾爆料
原來06世界盃有4場疑似假波
當中包括意大利對加納,
巴西對加納
同埋意大利對烏克蘭

而加納,烏克蘭同埋厄瓜多爾既球員
就成為假波集團既收買目標

最搞笑既係假波集團原本打算收買厄瓜多爾球員
捧英格蘭贏兩球或以上
不過最終決定放棄
原因係假波集團原來好識波
驚英格蘭班友太屎波
有人打晒假波讓佢地都羸唔到兩球

p.s.:
古比士利遲來先上岸
成為本季第一個離任既領隊
佢因為唔滿意高層既賣人政策而劈炮
寫英超 preview 既時候
佢係小弟唯一一個提及過有離隊壓力既領隊
估唔到烏鴉咀竟然開口中

2008-9-3 (1)

想講下基瑾單野......

紐卡素發表聲明否認球會炒左基瑾
亦重申希望基瑾繼續留隊
但問題係基瑾會唔會已經決定左同紐記請辭?

消息指而家基瑾仍然係紐記領隊
但就去意已決
報導話佢尋晚同法律顧問開會
傾下有咩辦法可以唔以辭職既情況下離隊
因為一旦佢向紐記請辭
佢要賠償紐記超過100萬鎊

星期一英國傳媒話紐記高層同基瑾開會
仲曾經傳出基瑾已經辭職既消息
不過紐記已經否認

而家紐記話冇炒佢之餘,仲想留佢
咁段估而家唔開心好想離開既係基瑾
佢究竟有咩咁唔滿意?

可能性有幾個:
韋斯既特殊身份
同埋紐記既買賣政策應該令佢幾不滿

而基瑾開到口想用既人
紐記又次次都搞到一鑊泡
佢話想奧雲留隊已經講左幾個月
但到而家都仲未說服佢成功續約
當初仲要奧雲仔減薪100萬鎊
奧雲成個暑假都同熱刺,曼聯,市原同埋愛華頓扯上關係
而家依然有傳聞指拖肥糖打算於1月出賤價600萬鎊搶人
最終過左轉會 deadline 奧雲都仲未走已經算紐記班高層好彩
以上所講既應該係近因

而近因就有:
過左成個暑假買人既數量同埋花費
顯然唔足以滿足基瑾
而買既人又原來未必一定經基瑾過目
其中一個例子就係干沙里斯
佢老人家會點唸

而佢開晒口話要用(同埋最終用左)巴頓
就因而得罪左老闆艾殊利
而佢話要留既占士米拿又俾韋斯高價賣走左

(不過占士米拿單野小弟覺得韋斯可以做既野唔多
因為條冇料既反骨仔明顯因為新約問題而想轉投維拉)

堆晒所有野就星期一,二兩日同老闆以及其他高層開會
(美其名係開會
小弟覺得其實應該係搏火)

而家咁既勢
除非紐記班高層有本事令基瑾回心轉意
反則都已經可以搵定新領隊

不過如果基瑾話嫁又唔嫁
最終肯留隊既話
效果一定唔似幾個月前國米既文仙尼鬧劇
畢竟基瑾真係好有江湖地位
而班球員都超撐佢
這方面絕非隊內甚多仇家既文仙尼可以相比

2008-9-2

1)
基瑾離開紐卡素
消息指導火線係佢唔滿意球隊既買賣政策
佢講到明要留用既占士米拿俾維拉高價買走
佢同幾個墓事開完會後就有消息指佢離隊
消息指佢應該係被開除

而韋斯同埋莫耶斯就成為接任既熱門人選

2)
有新油王撐腰既曼城於最後關頭從車路士手中截劫羅賓奴
轉會費更係破英超紀錄既3250萬鎊

而由於車路士增兵失敗
令佢地唔可能以800萬鎊既價錢將馬路達賣俾紐卡素

3)
貝碧托夫終以3075萬鎊既價錢加盟曼聯
而曼聯亦要外借費沙甘寶到熱刺一季
另一方面,交易有附項講明熱刺唔可以投訴曼聯曾經非法斟酌貝碧托夫

4)
尼亞拿趕及加盟利物浦

5)
他信依然保持曼城名譽主席一職
不過就再冇投票權

6)
愛華頓1破球會紀錄既1500萬鎊引入
標準烈治既比利時中場費亞尼

7)
富咸同史馬田解約
又將哥連斯約翰外借到NEC
另一方面,佢地就向高雲地利借用中場格雷到季尾

8)
華倫西亞方面透露皇馬於 deadline 前曾出價收購大衛韋拿
消息指出價高達4800萬歐元
部份西班牙傳媒更認為價錢高達6000萬歐元

9)
紐卡素同埋布力般流浪原來都先後向愛斯賓奴出價
收購佢地既27歲攻擊球員華度
不過兩會既出價同佢既贖身費560萬鎊仍有一段距離

10)
熱那亞增兵成功
先以600萬鎊既價錢引入舊將迪亞高米列圖
再從巴勒莫借用贊高域

11)
阿積士方面透露拒絕左兩間球會於最後關頭對亨特拉爾既出價
消息指轉會費更高達4000萬歐元

12)
祖雲達斯成功從巴塞隆拿引入18歲西班牙中場耶高

13)
文迪達決定掛靴

14)
巴勒莫未能打動國際隊割愛24歲巴西射手尼馬

15)
尼斯達同埋基斯普都冇入踢歐洲賽
前者係因為AC米蘭唔想玻璃腳既佢太辛苦
而後者就明顯唔受犘連奴重用

16)
施比斯基轉投諾域治,再次同路達合作

17)
佐治麥卡菲成功轉投新特蘭

18)
史篤城為左增強中後場既實力
先後引入希堅保咸,辛高,東治同埋 T.Soares

19)
保頓將瑞士中場迪斯馬利外借到拖連奴

20)
愛斯賓奴從安德烈治引入阿根廷後衛柏利查

21)
保羅加歷查被布力般流浪外借到普利茅夫

22)
恩拿同烏甸尼斯續約

23)
雷丁反對愛華頓對史堤芬亨打既出價

24)
自由身既艾比亞被指成為韋斯咸,樸茨茅夫同埋祖雲達斯既增兵對象
當中佢以加盟槌仔幫既機會最大

25)
侯城增兵成功
先爭羸紐記,引入畿內亞後衛薩耶迪
再從格拉斯哥流浪引入射手古臣

26)
泰亞高因為轉會同祖雲達斯既高層不和
竟然將會長基利鎖入廁所

p.s.:
曼城,羅賓奴同埋基瑾
一單比一單令小弟震撼

2008-9-1

總括近3日既新聞.....

1)
他信已將手上既曼城股份賣俾一個阿聯酋財團以套現
日前曾有傳聞指沙地皇室打算向佢買部份股份
但條件係要曼城引入沙地阿拉伯國家隊隊長艾昆達尼
只係最終未有成事

2)
曼城對貝碧托夫超過3000萬鎊既出價已被熱刺接納
而馬里奧高美斯同埋大衛韋拿都被指係佢地既考慮人選
另一方面,卡斯度就可能為左出場機會而接受被外借到哈化柏林

3)
早前消息指熱刺要求曼聯出價3000萬鎊
同埋另加身價約700萬鎊,同時成為侯城增兵對象既費沙甘寶

而熱刺已經先後引入柏夫奴真高同埋哥魯卡
轉會費分別係1380萬鎊同埋850萬鎊
而佢地依然準備向薩拉戈薩收購迪亞高米列圖

4)
紐卡素已從拉科魯尼亞以570萬鎊既價錢引入西班牙射手釋斯高
不過佢既埋門把握只係一般
小弟對紐記今次收購只會抱觀望態度

紐記亦向華倫西亞借用25歲烏拉圭中場 N.干沙利斯
不過落筆既時候借用手續仲未搞掂晒
負責中場領軍既佢可望幫到紐記解決組織力不足既問題
而佢既死球技巧同埋後上埋門都唔錯
未出國搵食前平均3.78場波就有波入

而紐記亦可能問佢地借多個25歲既法國龍門畢達利
因為居爾再次被指將轉投飛燕諾

而辣椒仔就再次被指被紐記以300萬鎊既價錢賣走
今次佢既傳聞目的地係愛華頓
不過可信性唔大
因為佢英國時間星期一朝早都仲有跟大隊練波

5)
紐卡素向奧雲開出一份週薪高達10萬3千鎊既3年合約
而由於佢仲未續約
又有傳聞指佢會被以600萬鎊既賤賣到愛華頓
(又係拖肥糖?!)

6)
芬倫轉投愛斯賓奴
雙方簽約兩年
而禾朗連就被外借到哈化柏林一季

另一方面,利記從保地花高引入18歲巴西射手 V.Flora
有意大利護照既佢唔會被當係外援
而利記亦正式從 MTK Hungaria 買斷匈牙利龍門 Peter Gulacsi

7)
佐羅被指成為韋斯咸既800萬鎊增兵對象
而阿仙奴就被指打算向皇馬借用梅斯達以作替補

8)
國米可望趕得及引入哥利斯馬
消息指佢地以2000萬鎊另加青年球員比利打動波圖放人
不過當中有500萬鎊係 variable

9)
傳聞韋斯咸唔同意古比士利既戰術同埋買賣球員既意見
準備以比歷取代佢

10)
列高巴被指可能以自由身加盟布力般流浪

11)
尼亞拿即將落實以800萬鎊既價錢加盟利物浦
而佢既前隊友沙巴列堤就已經正式轉投曼城
轉會費為460萬鎊

12)
阿根廷奧運隊左閘蒙索已由小保加轉投貝迪斯

13)
朴主永即將轉投戰法甲
佢準備同摩納哥簽約3年

14)
保拿特首次入選英格蘭代表隊

15)
漢堡引入巴西腳拿維斯以作為雲達華治既替補

16)
布烈治已經以220萬鎊既價錢轉投拉素

17)
拿臣被指將會以50萬鎊既價錢加盟愛華頓
不過佢已經作出否認

18)
托利斯要養傷兩個星期

19)
羅賓奴應該趕到轉會市場既尾班車

20)
西布朗為左改善防守
以80萬鎊既價錢從NEC引入瑞典後衛奧臣
佢可以踢左閘或者中堅

而佢地亦從阿爾克瑪爾借用22歲荷蘭中堅當克
身高6呎3吋半既佢既踢法近似史譚
但比史譚更快更靈活
係荷蘭國內其中一個等住上位既中堅
上季紐卡素對阿爾克碼爾賽後
馬田斯仲點名讚佢勁

21)
國米既21歲尼日利亞翼鋒奧賓拿
好可能因為申請工作證失敗而未能以借用身份加盟愛華頓

22)
亨特拉爾表示唔會於轉會 deadline 前離隊

23)
朗斯既阿爾及利亞左閘比夏積以借用身份效力樸茨茅夫一季
樸茅於季尾仲有 option 可以買斷佢

24)
慕遜加柏落實引入米高巴特利
雙方簽約4年

25)
韋斯咸雖然拒絕新特蘭對卡頓高爾既斟酌
但前者就已同意後者對佐治麥卡菲既出價
前者亦可能以500萬鎊既價錢引入保羅費拉拿
又打算向拉素借用高大中堅史坦達杜
而早前黑貓就已落實外借麥沙尼到侯城

26)
史篤城雖然已經加碼至500萬鎊
但依然考能說服卡迪夫城放走列尼
而佢地亦被指可能向利物浦出價400萬鎊買賓納特

27)
紐根特被指可能以300萬鎊既價錢賤賣到韋根

28)
史馬田傳聞將被外借到卡迪夫城

29)
C7表示估計可於9月尾復出

p.s.:
暫時講住咁多
因為太多新聞
忙到pk