1)
紐卡素解僱麥達莫同埋預備組教練 Sadler
佢兩個被炒或多或少同基瑾有關
紐記有咁多 staff 同埋球員撐基瑾
即管睇班高層可以炒得幾多個
而迪甘斯,莫耶斯同埋普耶等人就繼續被傳會接手紐記既爛攤子
當中前者被傳既原因同普耶一樣
佢又係被認為同韋斯關係唔錯
所以可能會願意接手而又可以同韋斯和平共處
而泰連亦同紐卡素扯上關係
不過小弟就唔多信
因為佢兩個出左名幾我行我素
唔似可以同紐記既高層好好合作
2)
謝拉特唔可以趕及對曼聯復出領軍
3)
莫斯科斯巴達方面透露米高勞特立將於兩日內落實接手
4)
列高巴轉投希臘球會彭尼安奧斯
雙方簽約兩年
5)
前米堡射手祖比決定加盟卡塔爾球會 Al Kharaitiyat
而前國米射手卡隆就加盟阿聯酋球會 Al Shabab
p.s.:
近日於香港既最大件事一定係立法會選舉
唔知係唔係小弟中左足球毒太深
睇見某0的政黨同埋某0的參選人
竟然由佢地聯想到球圈某0的人同埋事......
a) 保皇黨
佢地仍舊係立法會第一大黨
有勁多鐵票
除左因為有好多親中人仕想搵著數
所以好出力幫手之外
保皇黨本身亦好肯做門面功夫
仲識派餅仔俾公公婆婆去討好佢地
小弟經常都質疑
咁叻親中撐政府對特區政府既表現可以有咩幫助?
從佢地小弟就聯想到近日既法國隊
經過歐國盃決賽週既差劣表現後
當全世界都等緊杜明尼治俾人怒炒
點知亨利,列貝利,韋拉同埋艾夫蘭等人齊齊保皇
法國足總最終出人意表唔搵杜明尼治祭旗
當中一定同班友仔出晒面保皇有關
不過杜明尼治有得留低
咪只會俾佢繼續搞死法國隊
前晚輸俾奧地利就係一個好例子
唔知而家亨利唔妥條防線之餘
有冇為兩個幾月前出聲保皇而揼心口呢?
b) 自由黨
對於佢地地區參選全軍覆沒
除左長毛之外
小弟亦係另一個好開心既人
佢班友仔
掛為民服務既羊頭
賣官商鉤結既狗肉
靠佢地做野真係蛇都死
旨意佢地推介你飲飲食食就應該怕且得
佢地0的咁既人
識得為民憂心咩
對佢地有著數既野佢
佢地先似會肯俾心機去做足200分
至於其他事務
似乎遠遠及唔上出海攬女飲紅酒咁重要
(小弟既意思係指吃喝玩樂,小弟都知佢地有女黨員)
星期六晚知道艾殊利同3個損友豪飲0個單野
小弟就即刻聯想到田氏兄弟
艾殊利條肥野
紐記水深火熱佢都仲有心情去豪劈
個格係咪同田雞兄弟一樣咁衰?
佢地唯一既分別可能係
田雞兄弟未必豪到一晚俾3萬鎊做 tips
c) 劉千石
佢既出局又係大快人心
佢條友出左名議會出席率最低
但人工就同其他人一樣咁多
佢就令小弟唸起當年執教紐記既古烈治
當年佢出左名每個星期踢完聯賽後即返荷蘭 relax 下
但跟住多數話要請多日假
即係好多時星期六,或者日踢完英超
佢要到下個星期二,甚至乎星期三先肯蒲頭
但人工依舊收足
出來做野
如果條友做到野既
好似當年奇連士文經常遙遠控制德國隊都交到貨既
有時偷懶都唔會有人同佢計數計到咁盡
但偏偏劉千石同古烈治一樣
都只係名氣大,但功績平平既人
就抵佢最終冇得留低啦
5 comments:
下面果篇聯想令我有共鳴
的確係佳作
繼續努力!
如果真的有財團收購紐卡素絕對是件好事
有競爭才有進步但我最想是收購亨利
還是習慣在英超看到他 當然回阿仙奴就發達b
夠吉士咪炒哂成隊紐記囉，自己落埸踢啦艾殊利。
謝拉特無得出，利記對man u真係唔太樂觀。
其實小弟一路都認為列高巴當年如果肯去第隊既話，佢一定唔會攪到今日咁。係國米佢有幾何係主力?
小弟住呢面，簡直係保皇黨既天下。劉江華團隊攞到成十萬幾票，連第二位既陳克勤都入埋立法會。雖然我唔係好識呢方面既野，不過都知道得班係又保唔係又保既議員，根本無用。
睇自由黨次次辯論都被人串到無聲出，都知佢地無運行=.="
劉千石我反而佩服，咩都唔做，連公佈結果都唔去聽，好野。
咁長毛毓民又係邊個呢?
To: ck
謝!
To: 奀V
短期內亨利唔多可能重返英超
To: 舒利亞
1)
冇謝拉特
亦多數冇托利斯
對曼聯真係超難踢
2)
列高巴錯在留戀國米俾既高人工
而浪費晒光陰
3)
劉千石都遇左收皮啦
唔去聽又有幾好野?
To: 死佬
摩連奴可能係球壇毓民
因為佢夠晒牙尖咀利
亦算係有料之人
至於泰維斯就可能係英超長毛
唔係話佢會為隊友請命
而係佢有把濃密秀髮之餘
佢有時既行徑又會好似立法會長毛咁失控
早幾日佢先發完癲
阿根廷仲幾乎俾佢害死
Post a Comment