想趁機會講下領隊(或者教練)買賣球員既話事權
基瑾,古比士利,甚至乎摩連奴,祖爾等領隊
全部都因為咁而曾經同高層炒大鑊
當中原因係現時某些英超同埋意甲球會過份分工
將買賣球員既工作交由技術總監同埋總裁等職位去全權負責
德甲就普遍由經理一職去負責買人
其實領隊(或者教練)唔參與買人
係可以減輕佢地既 workload
令佢地可以專心教波
絕對係好事
不過當某些高層獨斷獨行
同領隊(或者教練)甚少(甚至於冇)溝通就去買球員
就好可能出現領隊(或者教練)冇岩用既球員可用
又點可能要求佢地交到好成績
試問一個要參加烹調比賽既廚師
如果偏偏冇得話事買咩野材料
你話幾唔 make sense 呀?
最佳例子就係摩連奴
佢之前教車仔
其中一樣最唔滿意既就係
技術總監晏尼臣買人返來之前從來唔問佢意見
晏尼臣未加盟之前
摩連奴如願搵到杜奧巴,保羅費拉拿同埋卡華路等人
晏尼臣加盟後
唔計老闆既心頭好舒夫真高同埋波歷克
摩佬仲要收埋接收埋阿歷斯等眼中釘
摩佬當年仲搵人剪輯左一隻 DVD 送俾晏尼臣
內容全部係阿歷斯歷來踢燕豪芬既出醜片段
可想而知摩佬有幾嬲
而家犘佬去左國米
佢落 order 話要文仙尼,哥利斯馬同埋林柏特
技術總監白蘭卡就先後引入前二者
(雖然老闆莫拉堤曾經出過聲話哥利斯馬太貴)
林柏特最後關頭改變初衷
摩佬話要改搵蒙達利
白蘭卡又即刻同佢搵到蒙達利
示範左教練同技術總監可以既點樣去完美配合
而家基瑾同埋古比士利買人未必有得睇貨版
悉斯高,干沙里斯,比哈美同埋迪米捷利等人
睇落唔多似係佢地既心頭好掛
而韋斯同埋簡路卡蘭尼(紐記同埋槌仔幫既技術總監)
仲衰到連賣球員都唔理領隊意見
甚至乎暗地進行
奧雲同埋巴頓如果岩價可能已經被賣走
安頓費甸南同埋麥卡尼就傾好左價錢
古比士利先知咩事
俾你係0個兩位領隊都一定扯火啦
有傳聞指基瑾而家一哭二鬧三上吊
其實係想 fight 到負責球員買賣既團隊要受佢 fully control
但小弟既意見係
如果有一個肯同領隊(或者教練)好好溝通,又做到野既技術總監
其實已經好足夠
你睇摩連奴而家仲使咩為買人而同高層搏火
只要佢學埋點樣擦靚老闆對鞋
(當然都要幾年內羸返至少一次歐聯啦)
未來幾年隨時係佢執教生涯比較寫意既日子
2 comments:
基瑾最後終於都係走，無計，唔會對佢失望。因為佢根本無實權，我都曾經諗過佢有無機會留係度，諗完又諗都覺得佢多數走。始終一個領隊竟然連主力差d被賣都唔知，走真係唔怪得佢。宜家只係希望唔好係韋斯坐正，唔係我地隨時英冠見。
其實基瑾係當地真係幾德高望重，呢幾日都有球迷去球會示威。我諗隊中一定有好多球員不滿。
To: 舒利亞
1)
韋斯教波係有料既
如果佢加埋普耶都應該係幾有能力既組合
不過佢而家犯眾憎
幾有料都唔使旨意會有運行
2)
紐記分化既局面一定會出現
問題係會有幾嚴重
韋斯搵返來既西班牙兵應該會埋自己堆
而其他球員睇來亦會各自埋堆
最慘既係巴頓
之前有基瑾睇住佢
佢於隊中都唔受歡迎
何況而家大靠山都走埋?
3)
小弟只係希望班球員唔好玩分化
就算艾殊利蠢到咁既時勢都用韋斯坐正....
球員有不滿係正常
不過佢地係職業球員
應該有專業操守
4)
其實韋斯係有少少無辜
因為請佢既係艾殊利
佢去到紐記當然要聽艾殊利既 order
所以成件事最抵俾人插既應該係艾殊利
Post a Comment