4場波想講......
1) 阿仙奴對曼聯
星期五有同事問起小弟對場波既睇法
小弟劈頭第一句就話兵工廠未必可以羸
但就一定冇得輸
因為佢地已經無路可退
如果今場6分波既賽事有咩閃失
不但益左死對頭曼聯
更大鑊既係佢地會比利記同埋車仔失多9分
聯賽幾乎肯定玩完
不過當時小弟對兵工廠既羸波機會都有所保留
畢竟佢地前面冇殺手,後面冇防守
而有半隊都係傷兵就更加令小弟睇淡佢地既羸波機會
有細心睇場波既都會發現
阿仙奴當日無論前線同埋後防都仍有不足
賓特拿多次失機就令小弟更加寄望伊度亞度既復出
又或者卡路士韋拿可以早日上位
而龍門加上4名後衛依舊偶有失誤
特別以基治為甚
佢上下半場各一次既失誤都冇出事講真都幾有運
阿仙奴比曼聯有更強既鬥心
雲加用迪亞比踢多個中場既神來之筆
加上拿斯尼既神勇表現
就解釋左點解佢地有咁多問題都依然可以擊敗表現略為失準既曼聯
而家士氣大振既阿仙奴比車仔同埋利記只係失多6分
加上首循環仲未對以上兩隊
爭聯賽仲未絕望
不過如果佢地既防線繼續爆鑊
隨時未到聖誕就已經脫離爭標行列
而近年 Big 4 對決既羸家多數可以羸埋聯賽
不過曼聯現時只得1和2負既成績
雖然全部都係作客賽事
但就已令佢地既衛冕路途變得好艱辛
2) 利物浦對西布朗
羅比堅尼聯賽終於開齋兼起孖
加上托利斯可以復出
絕對令利迷飲得杯落
不過利記部份球員既疲態就值得賓尼迪斯留意
3) 曼城對熱刺
曼城既輸波罪人固然係費蘭迪斯同埋鄧尼
兩條友爆鑊都絕對唔令小弟意外
攔截功夫未到家既費蘭迪斯代替高賓尼踢防中
面對熱刺技術型既中場就只有等住出事
而鄧尼自06-07年球季令人眼前一亮之後
近兩季既表現就一如以往咁唔穩陣
轉身慢同埋解圍出錯令佢成為防線上既毒瘤
4) 富咸對紐卡素
主隊上半場乘勢搶攻
紐記防線雖然冇左因傷缺陣既史堤芬泰萊
但初段都仲頂得住
直至替工卡卡巴解圍失誤益左安德魯莊遜為主隊先開記錄
落後下既紐記嘗試反撲
不過佢地面對富咸人多好辦事既防線
未能從中路突破同埋沉底之餘
兩邊三閘線斬高波又過唔到漢基蘭
結果成個上半場既有威脅攻門
就只得馬田斯兩腳中距離射門
同埋杜夫把握對手失誤既中柱波
下半場紐記改變進攻模式
依舊兩邊傳中
不過改為傳地波同埋中腰波
專攻漢基蘭既死穴
結果憑艾美奧比於一次門前混戰有運下為紐記返平
之後紐記把握對手保拿特同埋梅菲補位不足既弱點
繼上半場後再先後靠巴頓同埋畢特兩次中距離射門去考驗舒華沙
正當紐記既士氣同埋形勢都轉盛
卡卡巴既失誤就令紐記一盆冷水照頭淋
安德魯莊熟把握這名巴西老將轉身慢既弱點而輕易擺脫佢
補位既高路仙尼情急下將佢踢跌
12碼俾梅菲操刀又邊有得救
落後下既紐記嘗試再度反撲
不過決心明顯唔及第一次落後咁強
而富咸又唔俾紐記有空位發揮
最衰既係堅尼亞搵奧雲入替古迪利斯
破壞球隊既結構平衡
廢左紐記既左路攻勢
而冇態既奧雲亦浪費左追平既黃金機會
卡卡巴固然係頭號罪人
但紐記仲有幾方面要留意
首先畢特今場波於防守方面幾近隱形
保拿特幾次後上攻門
回防既都係巴頓
入波既簡接功勞已經係畢特今場波既最大既貢獻
巴頓加上格夫里可能先係紐記既最佳防中組合
而今場波古迪利斯同埋杜夫既發揮明顯只係一般
其中一個原因係兩閘既支援不足
特別係荷西安歷基
如果佢既後上助攻可以更加徹底
既可以疊瓦式助攻
亦可以分散對方防守球員既注意力
令蜘蛛人可以推大位搵食
而前線多左奧雲
3個射手點樣配合又係問題
最後要提既係堅尼亞
佢火爆原本唔係問題
不過唔識控制自己就好有問題
球12碼冇野好爭議
而家口多多即係等住坐波監
英格蘭足總對好有江湖地位既費 sir 都唔手軟
何況對佢?
3 comments:
的確，我地踢得唔好。上半埸失波後我地好積極想追成平手，但係打得真係幾混亂，好多時都係求其斬上去，而古迪利斯今埸表現普通，一來睇到佢有少少累，二來佢同安歷基默契幾差，成日兩個一齊上到人地後埸，跟手面對面交失波俾人反擊。
艾美奧比又幸運入波，不過其實佢拍馬田斯真係唔錯，上半埸曾經有一次佢用頭set俾馬田斯施射，僅僅出界。宜家都係用佢兩個，千其唔好出番奧雲。
阿仙奴對曼聯，埸波雖然幾激烈，不過某程度係因為兩隊後防都有幾多失誤，特別係加利仔。而曼聯雖然有唔少機會，但係艾蒙尼亞早段一個接回傳球失誤外，到佢傷出前都一直幾穩陣。加上下半埸失波後C朗把握唔到既黃金機會，結果尾段追番球都無用。
p.s.果位拉菲爾達施華好似幾有料，入果球仲有一定功架。
(1)講番紐記場波,
我都唔明堅尼亞為何唔換入謝列美,古費爾or尼索比亞等人去代替畢特及蜘蛛人,
如換入前兩人,
佢地起碼可以在分波及造波上幫到手,
畢特又同巴頓調左位,攪到d傳波冇哂尺寸
中場防守又做得唔好,
卡卡巴既失誤其實都係佢地間接造成
如果今場用番巴斯桑治,可能會好d都唔定
真的很可惜
又重回護級區
總之希望下場返回主場可以痛定思痛啦!
(2)利物浦今屆既踢法真的很紮實
有d似以前摩連奴教車仔時既feel
(3)我最覺得莫名其妙的其實就是westham
佢地最後10分鐘突然崩潰負1:3
場波本來都只是55波
不過就westham就浪費左好多機會
中後場又係好鬆散
俾人追平就立刻謝哂!
真的不可思議
難道蘇拿帶隊既蜜月期真的只得幾場咁短暫??
To: 舒利亞 & sammysir
1)
巴頓同埋畢特既分工有問題
同埋畢特走漏左對手後上既中場
都係靠巴頓同佢補鑊
2)
其實小弟最想巴斯桑踢左閘
3)
韋斯咸突然跌 watt 係好令人意外
不過小弟覺得侯城又輸波亦好奇
佢地踢得幾好
不過可能早前透支晒0的運氣
今場中楣又中柱
謝斯基連倫又打到上身
最佳領隊獎項真係好邪......
Post a Comment