5場波想講......
1) 愛華頓對富咸
兩個領隊唔係鬥法,而係鬥廢
莫耶斯以為用多個箭頭就好進取
點知將費拉尼調走就搞到拖肥糖俾富咸搶左個勢
保拿特仲即刻生猛晒
點知鶴臣仲廢
搵件右閘拜亞特入替踢 keyman 既保拿特
早知佢兩個咁廢
就算轉台睇Do姐跳忘情森巴舞都唔會有損失
2) 車路士對新特蘭
場波踢左52分鐘就5:0
新特蘭既進攻數據仲全部都係零
小弟咁都肯繼續睇落去只係為左3個問題:
一係黑貓最終可唔可以有機會射門?
(答案:靠施斯79分鐘既浪射錄得全場唯一一次攻門
之後仲靠佢而有一次越位記錄
不過角球方面佢地最終都係食白果)
二係杜奧巴既狀態如何?
(答案:5成都冇)
三係有'三肺人'之稱既明尼路係咪真係咁好氣好力
(答案:由於黑(病)貓太廢
明尼路行行企企唔使出功夫
所以冇機會見識佢既驚人運動量)
3) 史篤城對阿仙奴
原來兩個手榴彈就足以將兵工廠移為平地......
出年如果羅先生想再搞外隊訪港
不妨考慮阿仙奴
因為靠迪天奴屈機隨時可以入幾粒
4) 紐卡素對維拉
雙方各踢半場好波
上半場維拉比較佔上風
因為羸速度同埋左路既側擊又幾有威脅
加上紐記唔可以徹底凍結卡維
不過拿臣頭槌中柱,艾邦拉賀大意失機加上基雲既神勇演出
就解釋左點解羸形勢既維拉會羸唔到實際
紐記其實自上半場開始亦已有攻門
不過就唔夠維拉咁有威脅
下半場初段形勢持續
不過馬田斯一腳推大位再射近柱死位既中距離射門為紐記打開記錄之後
就改寫左場波既發展
紐記成隊生猛晒
馬田斯上腳學人車前倒後
同埋畢特既炮彈射球中柱都令紐迷睇得賞心悅目
唔講點唸到紐記原來排緊榜尾
相反維拉就跌晒 watt
講波佬話覺得維拉班波因為疲累而無力反撲
仲話佢地7月就率先開操
所以而家只係11月就已經散散地
但小弟就唔多同意
因為維拉唔係一支老人球隊
冇理由只有4個月貨仔
小弟覺得佢地可能因為比賽前半段將節奏帶得太快
而略羸形勢但反而先落後令佢地泄晒氣
加上奧尼爾落後下既調動失當
令維拉冇本事還拖之餘
之後仲要輸多球
今場可以講係紐卡素近來既代表作
亦係兩個幾月以來第一次唔使失波
加上 Seymour Pierce 方面證實原來仲有兩個買家積極出價
應該會係紐記球迷近來最開心既一日
p.s.:
超人後代一句'以為坐過監既人會改過'串到誠實商人啤一聲
但亦令小弟唸起巴頓
佢老哥近兩場都踢得唔錯
不過尋晚又幾乎同艾邦拉賀講手
真係令人好擔心
5) 熱刺對利物浦
雙方領隊既排陣同埋調動都唔算好
先講哈利列納
熱刺左路側擊力依舊疲弱
只靠狀態回勇既賓特尼唔足以解決問題
而佢下半場用哥魯卡客串左閘亦幾離譜
至於賓尼迪斯
佢既用人令利記於比賽既最後1/3部份失去火力
巴布明顯唔擅長踢正箭頭
而長期將古治固定於右路亦唔係上策
賓尼迪斯埋怨冇運所以輸波
條門框3次阻住利記入波
加歷查又送份厚禮俾哈利列納
一來一回利記由羸幾球變到輸波
所以小弟都同意冇運係輸波既其中一個原因
不過利記因為後段死晒火
熱刺班友先有機會乘勢反撲
講到尾都爭唔落
p.s.:
馬沙早前講過要羸車手總冠軍
技術,穩定性同埋運氣缺一不可
講真同羸聯賽既要求相若
馬沙前晚由天堂跌落地獄既慘痛下場
唔知會唔會令賓尼迪斯(以及其他領隊)有所頓悟
5 comments:
基雲始終都係紐記最重要既一人~無論隊波打成點，佢都會係咁穩陣。
至於前面，馬田斯梅開二度，值得高興~艾美奧比雖然無波入，但係亦起到一定作用，更加令小弟驚喜。古迪利斯照舊搏到盡，又落力又有料，絕對係近年最佳收購。
升番上十四位，總算安心少少。跟住就係要keep住唔好又輸番，慢慢上番去，又或者爭取係足總盃突圍。
另外又想提提利記埸波，睇結果仲以為哈利列納同哈利波特有關係，真係識魔法，帶住隊包尾球隊和完阿仙奴贏埋利記。但係其實兩埸波(特別今埸)，熱刺都處於下風。唔洗輸同贏埋只係對手大意加無運。
To: 舒利亞
1)
施治,拉爾拿,侯活,卡臣同埋基雲
係小弟心目中今季最好既5個龍門
當中只有施治得到一條可以信賴既防線保護佢
利記今季既防線其實有少少走樣
愛華頓,西布朗同埋紐記既防線仲出名差
明顯又係弱隊出好龍門既例子
2)
生果報所講既'奧巴馬'組合果然唔錯
艾美奧比勤力走動
真係有簡接功勞
巴頓助攻助守既級數亦比格夫里高
馬田斯亦踢出今季既代表作
3)
古迪利斯係韋斯仔既代表作
最初以為佢只係一個識扭波既進攻球員
或者係一個無入球能力既真路拿
點知佢咁肯咁勤力走上走落
真係越睇越正
4)
除非佢地學曼城靠體育精神指數
而可以出席歐洲足協盃
否則搏足總盃已經係佢地既最後機會
5)
熱刺仲有幾多問題等住哈利列納去解決
既要搵射手同埋左翼,甚至乎龍門同埋防中
同時亦要繼續執靚條防線
更加要兼顧兩條戰線
板主的所想所感真的完全明白我們一群紐迷的心情,
所以能夠寫出一篇與本人有相同感受的賽後感,佩服!
我有睇曼聯對侯城一場的比賽,
雖然侯城技不如人,
但踢法並不消極
盡力與對手周旋
不斷嘗試去組織攻勢去造波
蔡育瑜話熱刺對阿仙奴場波給了侯城一些啟示
所以在落後4:1情況下都力追至4:3
不過我認為大部分侯城球員已初嘗在英超踢球既興奮同蜜月期
在踢了十多場後
可能已被其他對手睇通睇透
以其有限兵力
我經歷聖誕既魔鬼賽程後
便會無以為繼
不知這種想法是否有點武斷呢?
To: sammysir
1)
小弟只係將心比己
你太過獎小弟
2)
咁多 point 都叫武斷?
小弟對侯城既睇法同你完全一樣
西布朗對侯城既賽後感已經講過
佢地其實板斧唔多
死球 + 突擊 + 基奧雲尼既神來之筆
就係佢地既入波方程式
講真唔使踢左十幾場
9月尾踢左6場已經俾人睇通睇透
不過佢地個勢好
效率同埋士氣都高過對手就已經夠搵食
佢地近兩場對車仔同埋曼聯全失3分
表面睇佢地係即刻現形
不過講真依然踢得算有士氣
只要 keep 住鬥心
之後再對其他球隊仍然有力一拼
小弟都估佢地既銳氣大約只會到聖誕
畢竟佢地後備力量不足
始終會捱唔住
Post a Comment