馬勒當拿踢波既年代打正一代天才既選號
根本唔使憂心防守
因為其他人一早已經同佢搞掂晒
但當年連續兩次世界盃決賽對德國
佢應該知道對手只要有好戰術同埋防守既紀律性
一樣可以對佢地構成威脅,甚至羸埋佢地
佢口中既最強對手馬圖斯正係代表人物
鄧加就同馬圖斯一樣這類防守機器
以破壞對手攻勢為己任
94年當老馬衰吸毒連累球隊提早下馬
鄧加就成為巴西一搔24年之癢既無名英雄
彭利拿起用雙防中先做好防守
令球隊立於不敗之地
羅馬里奧同埋白必圖演出固然夢幻
不過私底下好應該請鄧加晚飯宵夜
雙方球員年代既踢法對佢地日後領軍影響好大
鄧加領軍之後
雖然巴西曾經有一段時間唔識入波
亦曾於京奧俾阿根廷大炒3球
不過用左幾年時間建立
而家既巴西雖然個別位置略有隱憂
但防守實力已經堪稱近十幾年來最強
以森巴兵團既天份
只要佢地做好防守真係幾得人驚
老馬又如何呢?
佢既執教經驗只得一間地區球會 Textil Mandiyú 同埋競賽會
仲要係十幾年前既事
近年足球更重整體戰術同埋體力
佢偏偏反其道過份起用天才球員
可以講佢同現今球壇嚴重脫節
幻想未來,現實殘酷應該係佢既寫照
從尋日場波睇到
就算美斯可以拉開森巴防線
人地補位咁快根本好難搵食
佢自己以前踢波既年代都有華丹奴同埋肯尼基亞等人負責做殺手
而家睇住對手踢9-0-1都唔肯用巴勒莫或者利辛度盧比斯去屈機
唔知仲以為佢打緊機
後防仲火滾
以前令老馬無後顧之憂既盧基利,布朗同埋巴迪斯達等人
全部經驗同埋實力兼備
但老馬輸過俾玻利維亞大大鑊仲唔識驚
將對巴西既大戰都當係防線既迎新大會
今場波之前
龍門安祖查同埋中堅奧達文迪分別只得兩頂同埋一頂喼帽
另一中堅杜明基斯同埋36歲後備 R.Schiavi 仲要係零經驗
後備既柏柏同埋後備龍門卡列素已算係經驗比較多既新仔
原來代表次數亦只係4次以及11次
另一方面,後防連簡單既死球同埋直線都應付唔到
水準低得令人失望
心理學家話咬手指係冇安全感既表現
所以老馬起勢咁咬都唔難理解
如果早知阿根廷條防線咁易搞
鄧加徵召迪天奴或者搵羅馬里奧復出都可能夠殺有餘
不過話說回頭
小弟一直認為以貝拉度為首既教練團可以協助老馬
但點解佢依然可以犯上咁多低等錯誤
究竟係佢唔聽人講
定係軍師唔肯過料俾佢
又係令人難以理解
當森巴足球甘願放棄華麗以換取成績
球王領軍既阿根廷偏偏既唔好睇又唔好食
就算唔係佢地既球迷都難免覺得失落
3 comments:
羅匡里奧係邊個??
我都好同意你既睇法
不過老馬唔止衰用新人
仲衰用老野
連Veron都可以搵佢番黎
聽講基斯普都話自己有機會番國家隊
中衛既問題就係幾嚴重
點解唔用經驗豐富D的Coloccini同Burdisso呢?
下一場如果輸埋,明年真係睇唔到阿根廷了
應該係羅馬里奧??
坦白講，高洛仙尼雖然係紐記表現唔多掂
不過小弟認為
佢同貝迪素總比果兩件無經驗既正選好
阿根廷唔係無人用
而係老馬唔識用
得個名係無用
無料點都係無料
好似卡卡講
出年無左阿根廷
真係好似差咁d野
如果真係出局
小弟真係想睇下老馬會唔會由阿根廷英雄
變成阿根廷罪人
不過老實講
假如老馬仍然唔醒覺
就算俾佢地入到決賽週
都只會係到南非一遊
To: wtssoccer & 舒利亞
1)
小弟覺得用人應該唔睇年齡
小弟都唔贊成用華朗
不過原因唔係因為佢老
而係佢踢唔返於學生隊既水準
而老馬如果用華朗
就不如搵列基美講數搵佢出山
因為人地細佬追過佢個女就針對人
明顯公私不分
2)
基斯普如果可以於熱那亞重拾狀態
小弟又唔介意佢重返國家隊
因為始終覺得迪亞高米列圖只係球會級射手
阿根廷近年亦冇一個特別好既射手
3)
貝迪素同埋迪米捷利斯受傷患困擾
高路仙尼就因為於紐卡素打到跌晒watt
不過唔用森美爾就真係令小弟失望
4)
哥倫比亞同埋厄瓜多爾唔爭氣
中北美洲既哥斯達黎加又未成氣候
阿根廷應該跌跌碰碰去到南非
不過如果佢仲唔肯聽人講
阿根廷既前途都幾令人擔心
當然老馬肯唔肯或者有冇機會教到出年
又係另一個問題
p.s.:
小弟真係想打'羅馬里奧'
打速成打得太快出事
已改,謝!
Post a Comment