2009-10-30 (2)

近幾日既部份新聞......

1)
國際足協公佈今年世界足球先生既23人初選名單
當中包括大熱美斯以及上年得主C7

2)
幾段紐卡素既消息......

艾殊利決定擱置賣盤
亦俾曉頓坐正兼簽約到下季尾
佢又話會注資2000萬鎊
不過詳細用途未明

佢亦表示會為球會搵錢
包括搵下季既球衣贊助
同埋考慮將聖占士公園既命名權出售

而有消息指蘇甘保同曉頓會面商討合作既可能性
L.確特以及基加隆亦再次被指可能成為紐記既新中堅

另一方面,負責青訓既 Richard Money 決定跳槽盧頓

3)
近期戰績滑落既皇馬居然俾丙組既艾高干大炒4:0
西班牙傳媒透露柏歷堅尼已有好大既下台壓力
而阿拉干尼斯就係接手既頭號熱門

4)
樸茅由於逾期未俾當年收購格連莊臣以及迪亞拉既分期款項
俾聯賽賽會禁止註冊新球員

5)
英超行政總裁史高達摩亞表示反對些路迪以及格流加入英超

6)
史特加連輸5場令巴布可能於短期內被炒

7)
傳聞菲臘布朗已經離任
仲有賭波公司將佢下台既賠率封盤
侯城就拒絕有關報導
而主席杜芬尋日請辭就難免令人將兩件事扯埋一齊唸

另一方面,侯城有一定財務壓力
如果護級失敗將要籌旗2300萬鎊 balance 返盤數
就算成功護級亦要1600萬鎊

8)
漢尼斯表示拜仁將於1月放走部份球員
德國傳媒估計包括東尼,荷西蘇沙,比連奴,哥列斯同埋利爾
而兩名表現一般既新兵泰摩斯卓克以及鮑祖漢亦可能被放棄

9)
馬勒當拿被踢爆於對烏拉圭既生死戰前
夜蒲溝女兼開房玩通宵

10)
莫拉堤宣佈注資7000萬歐元俾國米
另一方面,大衛辛頓被指成為熱那亞既借用對象

11)
白蘭高宣佈將會離開芝加哥火焰
佢將會去墨西哥乙組球會 Veracruz 養老

12)
班尼斯可能執教盧旺達

13)
羅馬被指打算借用雲尼斯達萊

14)
曼聯被指準備出價4000萬鎊一次過收購韋拿以及大衛施華
華倫西亞方面亦暗示可能會賣走佢兩個

而韋拿已經炒左經理人
消息指佢係想自己出面傾轉會
利物浦亦再次同佢扯上關係

15)
幾段利物浦既消息......

華倫西亞另一筍貨馬達被指成為利記1650萬鎊既增兵對象
而現時俾森多利亞外借到巴里既匈牙利20小將V.高文
就被指成為利記400萬鎊既長線投資
(之前又講到咁窮?!)

而柏斯斯續長約後
賓帥亦打算為拉爾拿以及奧拿里奧提供新約
傳聞前者既人工將由6萬鎊加到9萬5000鎊

另一方面,禾路連唔想長居後備而打算離隊
不過落腳地應該唔會係哈化柏林

16)
由於阿仔帶隊既彼德斯堡唔夠龍門用
費sir將年青門將阿摩斯外借俾佢地1個月

17)
曼聯同埋班士利既球迷於前晚賽事搞事
既襲擊警員
亦有入小食亭搗亂兼偷錢

18)
祖高爾同車路士續約4年
週薪估計約10萬鎊

而車仔被指睇中巴西小將華拿頓

19)
保地花高搵韋利以及高高復出

20)
馬圖斯因為驚競賽會冇錢出糧俾佢而拒絕加盟

21)
伯明翰方面表示冇接觸過侯利亞
而苑志毅只係協助佢地搞大中華足球學校

而由於伯明翰有600萬鎊街數唔清唔楚
所以楊先生決定請人查數

另一方面,佢地被指打算於1月向財困既格流收購基斯保迪

22)
保頓以及些路迪都被指有興趣向烏德勒支引入雲禾夫斯雲高
這名20歲射手曾經入選國家隊B隊

23)
迪雲樸被英國警方控告打傷佢家姐
而警方相信這件事亦係後來這名中堅俾佢家姐男友斬到幾乎殘廢既原因

24)
傳聞愛華頓向哥利斯馬招手

25)
馬龍京治因為傷人以及性侵犯罪名成立而被判監18個月
韋根方面決定即時同佢解約

26)
錫耶納同教練甘柏路解約

27)
軒歷治接手波琴

28)
鶴臣透露拒絕挪威以及瑞典兩地足總既招手

29)
保頓同埋帕爾馬先後證實有球員同埋職員感染豬流感
布力般流浪亦再多一個羅拔斯中招
貝迪斯亦懷疑有多名球員中招

30)
馬體會被指想用1000萬鎊收購梅里達
不過新法比加斯表明唔想離隊

31)
米堡成功借用M.賓特兩個月
而梅連斯以及諾頓亦被指係史特根既增兵人選

32)
班士利既拉沙魯斯被指成為維拉100萬鎊既長線投資
這名可踢前鋒同埋左翼既16歲小將上年已為A隊上陣

p.s.:
傳聞 now 續播英超3季
事實上有線已經重槌bid左歐聯以及世界盃
仲邊有 budget 去爭英超以及西甲

早前小弟曾經聽過另一個傳聞
話 now 已係西甲轉播權既唯一可能買家
不過就仲未就廣告分帳講掂數?!
而上半季肯定唔使旨意有得睇

2009-10-30 (1)

想講下小弟親眼見到既施丹......

星期二晚先收到風施丹落腳半島
心唸佢成個住家男人唔似會去夜蒲
倒不如星期三晚先直接去 1881 Heritage 攞簽名

當晚差唔多6點經過半島見仲有記者聚集
即係施丹都仲未出發
咁倒不如直接半島等佢
不過有記者就remind小弟要小心佢幾個保鑣

之後見到佢因為塞車而索性行去會場
小弟想趁機會搵佢簽名
不過佢就冇任何反應
佢同行既一個友人已經叫最大隻既保鑣攔住小弟
其餘兩個保鑣就盡量阻住記者拍嘢

行去既過程超過5分鐘
小弟先後幾次想攞簽名都係食白果
見到cool爆黑面既佢亦只係曾經同一對女子揮手
如果唔係認得佢個光頭
隨時以為佢先係保鑣,甚至乎係黑社會大佬,甚至殺手

不過佢去到掘金既會場就即刻變臉交足戲
當住一眾高層面前終於識笑之餘
仲竟然忽然同 fans 簽名
包括小弟在內既部份幸運兒當然開心
難為現場保安估佢唔到而手忙腳亂

而由於公關公司一早表明希望施丹撐場既新聞出現於娛樂版
所以問答環節既問題幾乎全部係內定
大家都冇機會聽到佢對皇馬,祖記同埋法國既睇法
反而聽到佢話鍾意飲中國茶以及食北京填鴨
不過記者只求有得交差
當然唔理所謂既'記者提問'有幾悶

之後原來阿 Rain 扮大牌話要休息而唔肯做訪問
而要施丹再答多幾條問題應酬記者
加上陶吉吉就算肯講嘢都冇咩吸引力
相比下60名記者自然好鍾意施丹
睇尋日幾份報紙捧佢插阿 Rain 就知

及後施丹要出席晚宴
小弟同幾個球迷於附近繼續睇熱鬧
吹下水先知原來有兩個球迷當日朝早已經於酒店附近等運到
不過下晝於YMCA附近又係俾施丹施展'NO LOOK''PAST'
(即係眼尾都費事望你咁繼續行)

大家稱讚迪比亞路,謝拉特等人先係真正親民既同時
都同意施丹係近年繼迪西里,哥斯達古達,朗尼同埋艾度之後
最臭串既訪港球星

等到大約10點半終於再見到施丹
不過身邊有保鑣冇高層既情況下
佢又可以做返自己

黑面既佢為左甩身先勉為其難同其中兩個人簽名
佢最大隻既保鑣仲絕到用個身擋住扶手電梯唔俾人行
佢上車後見原來有好多途人同埋記者先忽然揮下手交戲
跟手小弟就睇住佢坐7人車去夜蒲
尋晚先知佢原來朝早已經即刻走人

2009-10-27 (2)

近兩日既新聞......

1)
繼謝拉特被指成為皇馬季尾增兵對象後
利物浦仍有多名球員被傳可能離隊

馬斯真蘭奴拒絕9萬鎊新約
令佢加盟巴塞既機會大增

而曼城被指打算向財困既利記出價7000萬鎊收購托利斯
另一方面,班拿約亦有可能因為套現而被出售

不過以上幾個球員都係賓帥既心頭好
點計都係巴布走先
佢被指將於1月被掛牌

2)
加里安尼表示已經同碧咸以及洛杉磯銀河傾掂數
萬人迷將於1月再次以借用形式加盟AC米蘭

而紅黑兵團亦被指準備同祖雲達斯爭奪雲達不來梅中堅拿度

另一方面,一旦亨特拉爾被放棄
熱刺被指有興趣接收這名荷蘭射手

3)
費sir承認行為不檢既指控
佢將會面臨停賽處分

4)
更正:史坦高域只係同國米續約到2012年
而唔係之前講既2013年

5)
消息指雲加睇中格魯吉亞進攻中場安亞尼迪斯
而祖雲達斯以及AC米蘭亦有意向莫斯科斯巴達羅致這名17歲球員

6)
諾士郡方面玩嘢話合約列明蘇甘保唔可以隨便轉會
這名前英格蘭中堅已經向球會公會尋求協助

另一方面,艾歷臣搵到前副手碧克接手球隊

7)
國米方面否認向丹麥中堅卡查招手

8)
布力般流浪證實有3名球員以及兩名職員感染豬流感
當中包括鄧尼以及森巴

9)
史特根尋日被米杜士堡委任為新領隊
雙方簽約4年

消息指佢打算於1月向些路迪引入舊部屬加利高特維
這名蘇格蘭中堅同時成為般尼既增兵對象

而佢亦視夏德斯菲爾德既史密斯為新龍門人選
這名19歲小將同時亦受到史篤城既垂青

另一方面,愛華頓再次被指打算於1月收購阿當莊臣

10)
迪亞高盧比斯被指成為曼聯1500萬鎊既新龍門人選

11)
卡特活拒絕接手燦美爾而繼續協助曉頓執教紐卡素
而紐記就再次同奧拜仁扯上關係
森遜亦表示有興趣正式轉會加盟
不過卡路爾就被指成為伯明翰既羅致對象

另一方面,Barry Moat 被踢爆出價從來唔高過6000萬鎊
令艾殊利一直都唔能夠同佢達成協議

12)
伯明翰被指想搵侯利亞同埋范志毅加盟
不過唔肯定係搵前者做顧問定係同麥利殊合組雙領隊

13)
麥卡倫同川迪續約到2011年

14)
新特蘭將於1月出價400萬鎊向韋根收購費古路亞

15)
拉莫斯被莫斯科中央陸軍解僱
佢只係帶左隊6個星期

16)
表現奇差既競賽會想搵馬圖斯接手

17)
消息指龍格堡考慮於季尾離開西雅圖海灣者

18)
流浪欠債3億8000萬鎊而俾銀行接管

19)
消息指只要車路士就禁止註冊球員一事上訴成功
就會出價4200萬鎊收購阿古路

而一直被指可能轉投熱刺既祖高爾就表示會留隊

20)
杜威涉嫌打假波
佢已經被上海申花判罰內部停賽
老闆朱駿仲表示會要求佢接受進一步調查
更會對佢作其他處分兼送官究辦

p.s.:
施丹將於聽晚6點出席一個鐘錶品牌既私人開幕派對
出席既仲有 Rain 以及部份本地明星名人
佢今次到港唔會再出席其他公開活動
當中包括 Adidas
所以大家應該唔會見到佢好似碧咸咁教細佬踢波

2009-10-27 (1)

想講星期日晚既兩場大戰

先講雙紅會
4連敗既利記驚喜地技術性擊倒羸曼聯2:0
原因有3個:

先羸排陣
賓尼迪斯今場有幾個部署都好細心

一係用比較靈活既艾加取代史基泰爾

二係兩閘一改識攻唔識守既弱點
專心防守而極少出擊
當中格連莊臣成功凍結傑斯仲令曼聯廢左唔止一半武功

三係將奧拿里奧推前踢左中場協助兩個防中助攻助守
加上向來勤力過新界隻牛既古治
以及攻守自由人既班拿約
令有朗尼以及hea碧輪流墮後幫手控球既曼聯中場好難搵到位進攻
右路既華倫西亞已經係唯一亮點

而利記仲趁曼聯中場佈防差勁已多次搵到埋門機會
年老力衰既史高斯絕對拖低曼聯中場運作既轉數

四係用托利斯踢正選
賓帥賽後解釋王子其實冇狀態捱足90分鐘
佢決定搏一搏用佢踢正選
而唔俾太大壓力年青小將尼哥
當然巴布唔爭氣都令賓帥根本冇選擇可言
而王子利用佢有限既體力好勤力拉邊俾空位中場後上
仲ko埋名大於實既里奧
講表現佢同埋班拿約絕對係最sharp

再羸決心
水浸眼睸既利記已經冇路退
論決心絕對係今季以來最強既一次

三羸運氣
華倫西亞勁射中楣絕對係羸波既其中一個關鍵
而球証方面既部份判決確實放生左利記
不過如果考慮佢整場既執法尺度係可以理解
加歷查禁區連波帶人炒起卡域克
球証見佢都有中波唔肯吹極刑有咩咁奇
至於加歷查拉跌奧雲
小弟都同意應該罰紅牌
不過睇埋維迪於補時既類似情況同樣只係罰黃牌
就會明白這個球証只係好平均咁手鬆
維迪連續3次對利記都見紅就只好怨佢自己唔爭氣

同晚既倫敦打呲亦好吸引
不過兵工廠就令小弟好失望
先羸兩球都可以搞到最尾幾乎輸波就認真爭唔落

小弟都同意雲加鬧班球員近兩場波幼稚兼輕敵
埋門一腳差之餘後防又唔小心
兩場波有羸變和之餘
加埋29次攻門只入3球
偏偏對手4次攻門中框就失左3球

不過小弟認為雲加既用人亦有問題
幾日前歐聯作客已經令班球員散晒
既然作客槌仔幫羸緊兩球
下半場大可換部份後備落場以攻為守
畢竟佢地中前場有太多好球員

而家正選太累
而後備又雪到硬晒
雲加可能要再次付上黑色11月既代價

另一方面,文路尼連續兩場聯賽犯上不必要錯誤
雲加大可考慮趁機會俾艾蒙尼亞重新出任正選
聽落好似好殘忍
但咁先係對球員公平既做法

2009-10-25

近兩日既新聞......

1)
幾段利物浦既消息......

皇馬被指將於季尾出價3000萬收購謝拉特

而利記部份球迷打算於今日開波前
遊行去晏菲路球場向兩個美國老闆示威

另一方面,意大利傳媒爆料利物浦想搵摩連奴接手
但串王已經表明冇可能

2)
艾殊利向傳媒透露 Barry Moat 尋日去左聖占士球場觀戰之餘
亦有同佢商討賣盤

另一方面,紐卡素再次同列斯射碧福特扯上關係

3)
艾歷臣身在意大利遊說文仙尼接手諾士郡

4)
史坦高域同國米續約4年
意味31歲既佢好可能於國米收山

5)
消息指車路士打算借上訴拖延轉會禁制令
於1月引入韋拿,迪馬利亞,希斯基以及韋拉

6)
韋斯咸忽然同卡斯辛奴以及基奧雲高扯上關係
不過成事機會極低

而比哈美以及厄遜就被指成為阿仙奴既增兵對象

7)
英國傳媒指雲加早前派左球探觀察巴洛迪利既表現
報導仲話阿仙奴願意出價2000萬歐元

而兵工廠亦再次同里爾既18歲比利時進攻中場夏薩特扯上關係

另一方面,沙格拿被指成為皇馬既新右閘人選

8)
莫斯科斯巴達被指願意出價1500萬歐元引入泰斯拿

9)
幾段巴塞隆拿既消息......

佩奧爾原則上同意同巴塞續約到2013年
雙方將於幾日內簽約作實
粉碎佢轉投曼城,阿仙奴或者AC米蘭既傳聞

而傳聞一旦耶耶托尼離隊
佢地會出價3000萬歐元(使唔使咁貴?)收購施素高作為替補

另一方面,辛尼特既葡萄牙外援丹尼膝傷長抖後冇左正選
佢被指可能以借用形式加盟巴塞
(咁咪仲難有得踢?)

而亨利亦被傳可能轉投紐約紅牛

10)
樂壇大姑媽決定下年開騷籌旗150萬鎊俾屈福特增兵

11)
馬略卡既22歲西班牙防中蘇亞雷斯被指成為馬體會既增兵對象

12)
拿玻里被指將於季尾再次向費倫天拿收購柏斯哥利
報導如果屬實就意味佢地唔會接收杜辛拿

13)
阿根廷17歲射手 G.Pereira 去左AC米蘭試腳

p.s.:
1)
如果覺得上星期史坦高域既入波好正
明報今日介紹史杜高域一時技癢既發洩就仲正
http://www.youtube.com/watch?v=XQPR43v64e4

2)
反骨仔奧雲講明今晚入波會唔念舊情繼續慶祝
仆佢個街!

2009-10-23

1)
傳聞一旦炒左賓尼迪斯
利物浦高層準備搵杜格利殊出山接手
佢今個暑假回歸球會搞青訓以及出任球會大使

另一方面,棄將賓納特公開批評賓帥既管理手法以及保守戰術

2)
美國富商 R.Kraft 表示仍有興趣入主利物浦

3)
消息指曉頓將於短期內坐正
不過合約只係到季尾

報導亦話佢既合約有1年生約
如果艾殊利下季仍然未賣盤
佢可以同曉頓續約多一季

曉頓既任命其實可能反映肥佬同埋林比亞斯
至少唔會於今季內離開紐卡素

4)
馬體會決定解僱列仙奴
阿拉干尼斯,米高勞特立,史巴利堤,蘇斯達,科里斯等都被傳將會接手

5)
體育審裁法庭證實收到車路士既求助
希望國際足協撤銷唔俾佢地註冊新球員既禁令

6)
伯明翰同禾夫斯堡一對箭頭扯上關係
不過麥利殊已經作出否認
因為迪施高太貴以及加菲迪太老

7)
新特蘭被指考慮於1月向米堡收購阿當莊臣
而佢地既隊長簡拿於暑假時曾經係阿仙奴既收購對象
有報導指雲加仍有興趣引入這名阿爾及利亞防中

8)
彭利拿即將出山重掌南非國家隊

9)
貝迪斯向達文度招手
不過佢既經理人表明佢唔想加盟乙組球會

10)
韋利決定掛靴

11)
傑斯寧既經理人透露這名德國射手將於季尾離隊
拜仁,阿仙奴,AC米蘭同埋祖雲達斯都被指有興趣接貨

12)
比哈美被指成為祖雲達斯既羅致對象

13)
列貝利因為膝傷而要休息1個月
佢將會缺陣兩回合既附加賽

14)
曼聯被指打算出價2800萬鎊收購祖維迪

15)
尋日講過費倫天拿打算於1月再次出價羅致中堅梅魯斯
原來佢地而家身在南美既球探亦準備觀察另外10名球員既表現
當中包括:拉魯斯既進攻中場沙維奧,聖保羅中堅美蘭達,國際隊中場辛祖,
華斯高進攻中場泰斯拿以及山度士射手尼爾馬

2009-10-22 (2)

想講下尋日場波......

多得尋日3點幾搭ck兄搵人買埋飛
先有得見證歷史

場波好多人講黑哨
12碼唔罰同埋強哥究竟有冇越位
本地球迷肯定n年後都仲有人講

小弟覺得12碼唔罰係有道理
因為卡尼祖雖然俾人踢到腳
不過佢之前已經控甩腳兼借勢向對手訓落去

至於12碼就自己睇片
http://www.youtube.com/watch?v=1VtryNNLjDE
http://www.youtube.com/watch?v=_7pdgw3yK_Q
係唔係平排自己唸下

同事甲尋晚坐既位置垂直睇到案發經過
佢就話自己係香港人梗話冇越位
球証係對家既人就梗係死人都話有

不過電光火石之間有邊個一下就睇到
小弟睇左n次都唔肯敢拍心口話有冇越位
偏偏旁証夠吉士話有
如果佢冇異於常人既神眼
就可能當而家審緊案將疑點利益歸於守方
不過更大既可能係佢地4條阿聯酋自己友吹死南華

亞洲足協班友只要用個屎忽唸嘢都唸到要避嫌
居然用齊4個自己友球証就好難令人相信冇黑幕
全場球証判罰方面係有少少偏幫客隊
小弟坐125段客隊後備席廂後面
見客隊教練成日走出教練區最終都冇事亦覺得好奇

講返場波
以波論波客隊明顯比較強
3,10,15,20,33,37唔係下期6合彩既心水號碼
而係人地好波既球員

而佢地既聯賽雖然未開季
但體能唔比南華差
而人地既心理質素明顯好好
頭幾分鐘之後都唔覺佢地緊張
仲恃住人地吹佢地唔脹而經常拖時間
加上人地備戰充足
提早到香港適應之餘
教練仲睇足南華今次亞協盃所有賽事
羅先生所講既專業同人地比仍然有所不及

至於南華輸質素之餘
金領隊亦暴露應變唔夠快既弱點
不過見佢地咁搏就已然收貨

小弟向來唔欣賞羅先生既搞波手法
因為文屎忽之流都俾人當明星咁捧真係好難認同
不過都覺得佢付出咁多錢同埋時間好難得

但話說回頭
只得一隊南華獨大對本地波唔好帶來好影響
唯有寄望巴塞化既土產傑志以及其他球隊都爭氣
他日佢地有機會出戰亞協盃亦會得到同樣掌聲

尋晚場波係輸左
不過可以再次證明香港足球未死
從另一個角度睇本地波點都有賺
希望尋晚對南華既打氣聲
可以同時喚醒波總同埋一眾狗官

2009-10-22 (1)

近兩日既新聞......

1)
利物浦22年內首次4連敗
賓尼迪斯下台既呼聲越來越高
奇連士文仲忽然再次同利記扯上關係

不過其中一個老闆吉列已經開聲撐佢
亦有分析指賓帥餘下既合約總值2000萬鎊
以利記而家既財政狀況根本冇本事炒佢
維拉利爾被傳想搵阿拉干尼斯出山救亡

2)
雲達韋爾被指成為阿仙奴既增兵人選
消息指巴塞隆拿以及馬體會亦想收購這名21歲右閘
阿積士已將佢定價700萬鎊

3)
就基瑾既賠償官司
紐卡素被裁定要負責埋基瑾既官司開支
估計費用高達150萬鎊

另一方面,紐記被指打算於1月引入挪威射手 J.Rudolfsen
這名21歲球員今季已為球會 Mo IL 出賽18場入18球

4)
瑞典足總表示艾歷臣唔係新教練既候選人

5)
班尼斯因為欠稅而被申請破產

6)
米堡決定開除修夫基
主席吉遜表示將於兩日內宣佈新領隊
史特根就係接手既頂頭大熱
其他傳聞人選包括古比士利,谷巴,奧拉利,基瑾,桑拿士同埋舒利亞

不過消息人士指後者對接手米堡興趣唔大
而佢雖然無望於短期內任教紐卡素
不過亦祝福曉頓一切順利

7)
西班牙同埋葡萄牙決定申請合辦2018以及2022世界盃

8)
曼聯被指打算1月引入比利時進攻中場迪科

9)
雲尼亞里承認希望重返英超執教

10)
戴維斯考慮加盟李斯特城

11)
皇馬,巴塞隆拿同埋熱刺都被傳有興趣由國際隊引入辛祖
這名巴西20歲中場身價高達1400萬鎊

12)
米卡李察士再次否認離隊傳聞

13)
消息指祖雲達斯睇中5名巴西年青球員
當中包括曼聯既增兵對象杜格拉斯哥斯達

14)
艾比亞被指可能加盟博洛尼亞
佢早前亦同史浩克04扯上關係

15)
奧高查考慮復出國內聯賽

16)
費倫被指將於1月再次向小保加收購中堅梅魯斯

17)
加里夫巴利被指成為伯明翰既300萬鎊新左閘人選
而佢地同埋布力般都被指有興趣引入希斯基

消息指如果這名英格蘭國腳於1月離隊
維拉將向卡迪夫城收購保夫萊特作為替補

18)
南非足總宣布解僱教練辛坦拿

19)
鍚菲聯同自由身既H.卡馬拉簽約到季尾

20)
博洛尼亞同埋利禾奴都宣佈易帥
前者決定由哥路巴取代柏巴度普路
而哥斯美就落實接手辭退魯多路既後者

21)
國際足協將在年度頒獎禮中增設最佳入球獎項
仲以普斯卡斯命名

22)
瑞士法院宣布梅度暫時唔使向車路士作出任何賠償
直至佢向世界體育仲裁法庭既上訴完結

23)
富咸打算於1月接收李奧曲加

24)
米高莊遜被指成為熱刺600萬鎊既增兵人選

2009-10-20

近幾日既新聞......

1)
歐洲區附加賽抽籤結果:
葡萄牙對波斯尼亞
愛爾蘭對法國
希臘對烏克蘭
俄羅斯對斯洛文尼亞
(前者首回合主場)

2)
英格蘭足總正式控告費sir行為不檢
佢面臨停賽5場
佢可於3/11前就指控作出回應

3)
歐洲足球先生既30人初選名單公佈
意大利同埋德國都冇球員入圍
而有6人入選既巴塞隆拿就成為大户
當中包括大熱美斯

4)
幾日前紐卡素同薩拉戈薩教練馬些連奴扯上關係
實情原來已經準備俾曉頓坐正

5)
一個以韋斯為首既財團被指有興趣出價3000萬鎊收購查爾頓

6)
諾士郡既老闆已經通過聯賽會既人格測驗

7)
伯明翰被指打算出價800萬鎊引入麥基迪

8)
馬模技術總監希斯保治同埋艾爾堡教練漢斯碧克
都被指成為瑞典足總既新教練人選

9)
祖雲達斯被指打算出價2500萬鎊收購基格納

10)
越南,烏茲別克同埋中東多國富豪都被指有興趣出價唔少於200萬歐元
向皇馬借用C7踢表演賽
而皇馬將會同佢各佔5成分帳

11)
禾確特同埋卡達莫同樣受膝傷困擾
分別要休息1個月以及3個月

12)
消息指由於非洲國家盃期間兵源短缺
車路士將會回收迪辛度
不過這名阿根廷年青射手偏向繼續以借用身份留隊

13)
沙灘波球証麥克鍾斯降梧吹英冠

14)
韋根被指將於1月向錫菲聯收購基加隆

2009-10-19

幾場波想講……

1) 科威特競技 vs 南華

主隊表現明顯好得多
件左翼華歷仲真係幾好波
李雙中簡直係一個人肉雪糕筒
南華最終只係輸1:2
就多得主隊埋門一腳唔掂兼防守唔集中
而家南華雖然可以吊住條命
不過如果防線冇改善
俾人又整返個作客入球就真係邊度都唔使去

2) 巴西 vs 加納 (世青盃決賽)

場波係小弟近期睇得最爽既一場
由發雞盲球証過嚴將艾度趕離場
小弟就鋤強扶弱撐加納
睇佢地死守同埋射12碼絕處逢生
叫到小弟把聲都拆埋

加納羸在夠韌
由法定時間到互射12碼都係咁韌
當中龍門艾爾亞同埋串演中堅既巴度就最搶鏡
之前表現騰雞既前者仲忽然上左身

相反森巴兵既表現忽然跌watt
而班友面對對方死守又唔識拉邊
個肥教練仲因為驚D.彭利拿會兩黃一紅而換走佢
變相廢左右路側擊
要到下半場先識換入杜格拉斯哥斯達以及馬干馬基斯加強側擊
唔睇波既都知巴西羸晒技術
不過正如'低能'所講
有天份但唔識發揮都冇用

3) 維拉 vs 車路士

話不可說盡,勢不可去盡,凡事太盡,緣份勢必早盡
小弟想講既其實係肥安
羸完利記後囂到話羸唔到聯賽只係輸自己
而家後防接連發瘟簡直係現眼報

4) 新特蘭 vs 利物浦

焦點一定係入球既合法性
只要對球例有少少認識都知球波有問題
因為個沙灘波影響左比賽之餘仲令拉爾拿失波

不過話說回頭
紅軍一眾防守球員同埋旁証都有責任
因為小弟事後睇左重播
個沙灘波第一次出鏡係1:50於球場範圍外
到佢再次出鏡既時候已經係失波既時候
中間既3分鐘個波唔似係突然移動到龍門口
利記竟然冇人踢走佢之餘
旁証亦竟然睇唔到
又或者睇到都唔通知球証吹停場波

講返場波
利記既表現明顯唔夠黑貓好
賓尼迪斯因為冇左兩大主力同埋留力對里昂既歐聯
排出新陣3-4-3
不過後防中路多左個人唔代表會穩陣
反而分工唔明顯仲大鑊

5) 森林 vs 紐卡素

有主場之利既森林開波已經搶攻
偏偏紐記上半場既表現屎到得人驚
辣椒仔,格夫里同埋路蘭面對麥堅拿等幾個硬朗球員
好多時都搶輸俾人
更冇餘力緊迫好波之人蘇捷維斯基
解釋點解紐記徹底失勢

而雪上加霜既係史堤芬泰萊同埋高路仙尼都因傷缺陣
基辛尼舒韋利要重彈舊調之餘
森遜亦要串演中堅
靈活有速度但輸晒高度同埋路數
自然睇唔掂大勇既布歷史托

下半場紐記既表現有明顯改善
不過依然唔足以扭轉局面
除左路蘭既詐糊外就再冇有威脅攻門

紐記面臨開季以內既首個低潮
費sir以前講過
爭聯賽冠軍既關鍵係睇下邊個領隊有能力將低潮期縮到最短
紐記而家同曉頓商討搵佢坐正絕對有穩定軍心既作用
而現時既考驗亦可以睇下佢有冇料坐正
不過同樣重要既係好似路蘭咁講
艾殊利有俾錢增兵既必要

另一方面,由於一對正選中堅下場仍要養傷
曉頓不妨考慮下新仔哥達
而古迪利斯得到休息後應該可以重返正選
不過向來唔擅射既阿根廷人應該唔好咁多浪射

另一方面,4連勝既森林氣勢應該係而家全英冠最勁
下場對班士利應該有力再下一城
不過如果要雞蛋裡挑骨頭
比利戴維斯或者要為布歷史托既拍檔人選再動下腦筋
因為而家依然好似冇個特別好

2009-10-18

近幾日既新聞......

1)
消息指沙地王子法爾蘇將於短期內注資利物浦

2)
基加高斯同埋安恩胡都因為踢太公波受重創而要休傷半年
消息指AC米蘭準備因為後者受傷而向美國足總索償

3)
消息指艾殊利考慮將紐卡素割價至8000萬鎊

4)
雲加表示雖然蘇甘保而家跟操
但唔代表佢會再次引入英格蘭中堅

而梅里達仲未落實續約
西維爾就成為最新一間同佢扯上關係既西甲球會

5)
馬勒當拿於球隊出線後於電視直播中爆粗鬧傳媒
之後仲於坐車離場既時候
竟然向球迷做出模仿口交既動作

國際足協已經表示會作出調查
消息指佢可能面臨停賽5場既處分
意味佢唔能帶隊出戰決賽週準決賽前既比賽

佢死撐俾人針對之餘
仲話依然有好多人撐佢
不過國內超過8成球迷認為佢應為不當行為接受處分
亦有超過6成人認為阿根廷足總應該同佢解約

6)
泰維斯表示頂唔順傳媒同埋球迷既惡意批評
考慮退出國家隊

7)
法比安奴宣佈將於季尾離隊

8)
曼城以及費倫天拿都被指有興趣引入丹麥中堅卡積亞

9)
漢堡被指將於1月向里奧艾維收購20歲葡萄牙中堅法比奧法利亞

10)
莫迪既挪威中堅連達萊爾透露愛華頓有興趣羅致佢

11)
消息指楊家誠承諾撥款4000萬鎊俾麥利殊增兵
當中收購對象包括占士,厄遜,賓特尼以及希斯基
同時韋根亦打算搵後者重返球隊

12)
比連奴,薩巴尼達同埋芬尼都被指成為祖雲達斯防線既增兵對象

13)
艾馬臣因傷決定同山度士解約

14)
傳聞美國財團 Intermarket Group 計劃出價1億鎊收購韋斯咸

15)
拉樸達同埋米積杜域同樣涉嫌挪用公款
前者被指出公數請自己友飯局
而後者被指於多宗文易落格

16)
布力般流浪被指準備向標準烈治出價400萬歐元收購剛果射手 D.Mbokani

17)
辛頓同新特蘭簽約到季尾
合約另有1年生約

18)
消息指國米將馬干既身價定為4000萬歐元

19)
皇馬被指將於季尾向費倫天拿收購華加斯
而佢地令人意外地同阿當莊臣扯上關係既報導
就似乎係吹水新聞

20)
格蘭未能取得工作證

21)
費倫巴治被指準備收購梅度

22)
車路士就禁買令提出上訴
消息指佢地有信心最終唔會買唔到人
佢地仲將列貝利列為頭號收購對象

23)
幾段AC米蘭既消息......

阿聯酋航空落實下季起始贊助佢地
5年合約總值1億歐元

而佢地被指打算於1月引入巴西年青射手馬干馬基斯

另外,贊古奴夫斯基就決定退出捷克國家隊

24)
施比斯基表示雖然收到來自英格蘭,比利時,法國同埋澳洲既 offer
但最終決定因為家庭理由而掛靴
不過佢就透露仲想於球圈發展

25)
法希姆被指因為衰多口得罪艾法拉積兄弟而將被踢走
佢上季亦因為同樣原因而被趕離曼城

26)
安德烈治被指有興趣向燕豪芬收購巴卡爾

27)
法國,俄羅斯,葡萄牙以及希臘被列為附加賽種籽球隊

p.s.:
賽後感聽日再講

2009-10-16

今日想講英超……

Big 4仍係前列份子
不過就各有隱憂

當中車路士暫時表現最似樣
肥安掌舵後球隊表現更加四平八穩
而杜奧巴同埋艾辛算係成功擺脫嚴重傷患
就仲好過簽到兩個新球員
而幾個名牌進攻中場雖然冇好搶既表現
但亦幫到球隊提升控球能力
但講到隱憂
佢地現時失球數字雖然全英超最少
不過講真依然時有不穩
而季中既非洲國家盃仲會令肥安幾頭痛
(當然好多同行同病相憐!)

而受到C7離隊以及傷兵問題影響
曼聯攻守表現都走樣
前線奧雲同埋貝碧托夫既表現唔算太令人滿意
前者只於打呲戰做過一剎英雄
後者亦似乎可以再俾多幾錢肉緊踢波
費sir暑假已經講明會靠更加靠中場入波
不過佢地而家似乎過份倚靠傑斯
36歲既佢根本唔可能整季交足功課

後防方面
賓科士打同埋幾個後衛排住隊出錯
雲達沙即將復出就應該可以令費sir放心返少少

阿仙奴就繼續踢佢地既華麗進攻足球
7場入24球兼有咁多炮手就絕對得人驚
當中華美倫頻頻出擊得手
同法比加斯既表現一樣咁搶眼
不過佢地繼續被防線兵源不足同埋唔夠經驗既老問題困擾
爭聯賽(同埋其他盃賽)都係好蝕底

利物浦方面
只係失多車仔6分唔使咁快放棄
不過後防狂輸高波同埋死球就等同自殺
當中加歷查仲係頭號罪人
加上謝拉特狀態平平
解釋上季只輸兩場既佢地
點解而家踢8場已經爆左quota

小弟雖然認為Big 4依然有優勢
不過曼城勢兇夾狼
炮手甚多之餘
泰維斯同埋艾迪巴約等人絕對有料到
就算最終會冇左羅賓奴都唔使驚
而3線既聯繫亦比季初好
唯一既挑剔就只有後防幾件貴價貨仲未培養到默契
同埋曉士既功力始終令人唔放心
而季中再胡亂增兵亦未必對球隊有正面幫助

講實力佢地今季同Big 4相比仲差左少少
但整體實力應在熱刺,維拉同埋愛華頓之上
所以絕對助5望4

熱刺方面
今季成績有改善其實要慶幸好多球員無人問津
令球隊唔使再次因為大換血後季初脫腳
但佢地只係識欺善怕惡就只配爭第6

維拉方面
冇左巴利既影響冇預期咁大
柏度夫同埋薛維表現算係不過不失
反而後防人腳差左
而家雖然只失6球
不過畏高既弱點將令佢地之後付出代價

愛華頓方面
因為尼史葛而出閘脫腳
球隊而家慢慢重回正軌
不過同 level 既對手多左兼有曼城食住
應該好難再次去到第5名

新特蘭今季就忽然升呢
除左左閘不穩外既其餘位置都唔錯
踢法簡單直接之餘分工亦清楚
不過要一下子挑戰前列明顯唔係實際目標
打好基礎之餘再清除瘀血似乎先係布魯士所想

至於其餘9隊實力相差唔遠
英超上季既護級亂局隨時再現

富咸似乎因為要踢歐洲賽而分心
布力般流浪就衰中場唔夠力
不過好彩都有擅長護級既領隊慢慢執

韋斯咸其實踢得唔差
以佢地既人腳同埋蘇拿比下有餘既功力
而家排尾二只係人有三衰

而保頓出閘3連敗後
連續4場不敗之餘仲有8分落袋
表現絕對係大躍進
不過加利麥臣似乎搞唔掂前線死火既問題
講真靠幾個質素一般既中場又可以入到幾多波

韋根搵到馬天尼斯接替布魯士
絕對係針冇兩頭利既例子
中前場用波好睇左
尼索比亞轉去右路仲踢得唔錯
不過原班人腳既防線就穩健不在
側面反映到布魯士佈防既功力
如果繼續每場差唔多失兩球
隨時成為近年最好睇既解班球隊

前線死火既史篤城主場優勢冇上季咁明顯
不過4場作客有3場都袋到1分就算係拉上補下
佢地今季唔似可以再搶到45分之餘
護級壓力亦唔輕

般尼方面表面好似行緊比上季史篤城更勁既舊路
主場4連勝仲創左英超升班馬紀錄
不過佢地羸曼聯同埋愛華頓既比賽都有一定既幸運成份
主場威力唔值得過份高估
更大鑊既係佢地可能半放棄作客賽事
4場全敗之餘兼吞左14隻蛋
所以小弟有理由相信佢地最終要艱苦護級

伯明翰方面
作客奧脫福都夠膽同曼聯鬥攻就知佢地唔係烏龜球隊
不過唔識入波就幾肯攻都死
好彩防守唔太差
只要楊先生唔好搞搞震
麥利殊應該有能力帶領球隊護級

侯城方面
菲臘布朗已經積極增兵
前線雖然總算做到每場入一球
但後防持續不振話咁快就失左20球
足以令佢地降班收場
高層1月未必俾錢菲臘布朗增兵
或而係炒之而後快

而狼隊雖然失波少過老虎
不過一對大水牛中堅排住隊出錯就令人好唔放心
加上麥卡菲教球會向來冇料到
老虎同狼係小弟現時既心水降班膽

最後一隊想講既係破紀錄開季7連敗既樸茅
佢地人腳甩皮甩骨
等到1月先可以再增兵真係好難捱
萬一新老闆艾法拉積兄弟又係空心老倌
樸茅唔似可以搵到第3個新老闆之餘
降班機會亦好高
而保羅赫特而家輸到荒失失
路人甲都睇得出掛名技術顧問既格蘭等緊接手教波

2009-10-15 (2)

想講下今朝烏拉圭對阿根廷既生死戰

阿根廷開波已經以守代攻
古利迪斯同埋華朗助守居多
而後者傳球既質素比上場既艾馬差得多
幾次兜口兜面都可以交錯波
真正負責進攻既只有美斯,迪馬利亞同埋希古恩
不過佢地發圍既機會亦唔多
當中美斯好多時都俾馬田卡斯利斯死跟

主攻既烏拉圭都係五十步笑百步
佢地俾壓力搞到嚴重失準
更甚既係攻勢過份集中於中路
簡直係’烏圭’拉龜
最似樣既入波機會都係來自羅美路既解圍失誤
眼前既烏拉圭同當年泰巴里斯執教既AC米蘭同樣不堪入目

成個上半場最令人留下印象既只有犯規次數
(全場更高達53次!)
兩個講波佬唯有狂讀各大洲既分組形勢
最原諒佢地講廢話都應該係今次
同樣慘情既當然仲有負責為半場精華剪片既工作人員

下半場戰情略為可觀
烏拉圭再加重壓力
卡雲尼後備落場踢3箭頭之餘
兩邊攻勢亦比較多
搞到迪馬利亞被迫墮後好似踢多個左閘
而多得同胞比爾沙領軍既智利幫手領先厄瓜多爾
意味阿根廷和波已經足以直接出線
老馬索性以左閘蒙索入替迪馬利亞
之後仲以防中保拉迪入替希古恩
前線只得美斯一個紙板前鋒

老馬既心態於上任差唔多1年內有明顯轉變
由最初有前無後既小型球陣式
到而家9-0-1既消極死守踢法
睇得出佢有幾狼狽
而回想佢以前批評戴維斯既踢法破壞足球比賽
其實只係針唔拮到肉就唔知痛

馬田干沙利斯7分鐘內既兩黃一紅就成為形勢既轉捩點
之後既罰球阿根廷仲憑保拉迪搏大霧入波
烏拉圭已經係強弩之末
只有靠尾段同樣踢少一個既厄瓜多爾敗走聖地牙哥而得以續命

完場後老馬又做返'愛哭既小寶寶'
攬住唔岩 key 既師傅貝拉度喊到阿媽都唔認得
佢於球場艱苦過關後
又要返去會議室再打過仗
究竟趁有個好既下台楷借勢走人定係成功爭權去南非
應該會係近日球壇最惹人注意既花邊新聞

2009-10-15 (1)

近日既新聞......

1)
利物浦被指打算出價150萬鎊收購舊將希斯基

2)
燦美爾被指打算搵科拿出任領隊兼球員

3)
3名德國教練奇連士文,杜姆同埋蘇斯達都被指成為土耳其足總既新教練人選

4)
更正:卡奴同車路士係續約到2012年
而唔係最初版本既2014年
而一直被傳離隊既阿歷士亦決定續約4年

5)
傳聞曼聯將於1月收購占士

6)
諾士郡被指打算以5年1000萬鎊既合約吸引文仙尼加盟
以取代麥柏蘭

另一方面,艾歷臣否認執教北韓或者瑞典既傳聞

7)
楊家誠被指將會俾伯門翰1500萬鎊資金增兵

8)
韋拉證實將於季尾離隊
阿仙奴以及巴黎聖日耳門都係佢可能既落腳地

9)
查斯古特放風想復出為法國踢附加賽

10)
曼城被指準備出價2000萬鎊收購馬干
而如果收購列貝利失敗
佢地會考慮向賓菲加羅致拉美利斯

另一方面,消息指羅賓奴如果爭唔到長期正選
將於1月要求離隊

11)
職業球員工會去信國際足協同埋歐盟
投訴巴塞同美斯續約既年期過長以及違約金過高

12)
哈鍚被指唔準備再做捷克國家隊既替工教練

13)
比利時足總希望國際足協可以阻止費蘭尼於星期六為愛華頓上陣
事緣佢地唔滿意這名中場以剥智慧牙為理由缺陣尋晚對愛沙尼亞既比賽

14)
富咸準備同漢基蘭續約

15)
紐卡素早前打算借用奧拜恩
不過最終因為俾唔起人工而未能成事
另外,佢地近日同一個美國財團扯上關係

16)
托迪表示如果狀態許可而又收到納比既徵召
將會考慮復出國家隊

17)
碧咸將重返AC米蘭

18)
拿臣可能重返些路迪出任教練

19)
西布朗否認會羅致蘇甘保
因為佢地負擔唔起佢既人工

20)
費sir親自寫道歉信去球証聯會

21)
索察既美國射手查理戴維斯於車禍嚴重受傷
同行一個朋友仲傷重不治
佢至少要休息6至12個月
未知會唔會令佢提前結束球員生涯

22)
拿斯尼將於下星期對韋斯咸既比賽復出

23)
盧錫斯古表示由於梅度於大敗俾塞爾維亞賽前夜蒲
於任內都唔會再重召佢

p.s.:
1)
全運會跳水項目被指有內定賽果
小弟好鍾意既馬家軍亦再次被爆於奧運食禁藥
中國體壇真係多醜聞

2)
晏少少有時間再講烏拉圭對阿根廷既比賽

2009-10-13

今日想講英冠形勢......
簡單一個詞語已經足以形容:緊湊

分數咬得超緊
所以千祈唔好過份 focus 排名上既差距

當中暫時以紐卡素表現最對辦
原因應該係球隊鬥心,比較好既穩定性同埋有水準既防線
11埸只失5球絕對抵讚
雖然英冠水準同英超差好遠令紐記失球減少
不過紐記亦至少冇咩犯上低級錯誤
問心覺得佢地有進步既同時
亦認為如果上季有咁既水準應該唔使降班收場

不過曉頓就要留意近兩場主場都只係和波收場
睇上季既利記就知經常羸形勢冇實際會有咩後果

西布朗方面開季唔錯
不過繼續攻強守弱
似乎防中出身既迪馬堤奧幫唔到幾多
而表現亦唔夠平穩
作客大炒米堡5:0之後居然反低潮近3場只得1分
好彩國際賽檔期可以俾迪馬堤奧睇帶搵問題

米堡開鑼之後侯夫同埋端基先俾史篤城挖角真係慘情
替補既聖列加以及卡雷布科蘭級數上亦有距離
而佢地既穩定性以及防守亦唔算太令人滿意
不過佢地既作客成績現時全英冠最好
總算幫補返少少

緊隨其後既有幾隊中型班
卡迪夫城有全英冠最強既火力
多得麥菲爾,韋定咸,J.保夫萊特同埋蘇格蘭國腳 C.Burke 排住隊貢獻助攻
以及查柏 on fire 平均每場入1球
不過佢地既表現唔算太穩定
而入球又太集中於查柏以及入左5球既韋定咸
只要佢兩個俾人睇死
卡迪夫城就好可能即刻死火
不過以佢地而家既表現最終有力保住前6

普雷斯頓就幾靠美羅同埋柏堅
不過整體質素一般
但勝在近5季有4季最少有74分既往績
始終唔可以睇小佢地

另一隊食往績既有鍚菲聯
小弟原本認為只有佢地可以同3隊英超降班馬爭直接升班
不過隨住巴迪堅尼長期停賽
佢地今地失球數字直線上升
向布力般流浪借用既伯恩明顯未夠班
而佢地6場主場賽事和左4場亦好令人失望
當中對手仲只有西布朗一隊強隊
情況如果持續隨時連前6都保唔住

李斯特城而家排第7就比小弟預期好
當中原因應該係球員有幾條輸血管之餘
M.Fryatt第二度踢英冠亦終於有料到
不過萬一這名射手俾對手凍結
甚至俾侯城挖角
狐狸既戰績應該會慢慢回落

布里斯托城就守強攻弱
失9球既同時只係入到唔合格既10球
當中仲有6球係靠美納特
明顯又係一人球隊
而佢地作客仲未開齋就解釋點解主場4勝1和都只係排第8
如果加利莊臣未能改善球隊作客腳軟既弱點
佢地應該會連續兩季爭唔到附加賽席位

黑池就係今季最令小弟意外既英冠球隊
成個8月踢左6場都未輸過
佢地入波同埋助攻都分得好散
最勁既唔係烏爾同埋保爾沙
反而係查理斯阿當入左3球再加兩個助攻
不過佢地近況明顯回落
加上整體人腳一般
最終爭前6未必關佢地事

森林近期終於成功止血兼3連勝
佢地最令人意外既係到而家仲係作客不敗
不過攻守方面既表現始終只係一般
比利戴維斯依然有好多嘢要搞先可以偷雞入前6

高雲地利而家雖然排11
不過只係落後第6既錫菲聯1分
數字上爭前6既機會仍在
但係佢地開季以來既對手比較多係中下游球隊
而冇左隊長史葛丹恩對佢地亦應該有一定影響
所以唔好將佢地既評級定得太高

水晶宮同埋昆士伯流浪現時踢少其他對手1場
所以就算排12以及13亦唔太差
當中前者既失分仲少過錫菲聯1分
形勢不過不失但又係各有問題

前者攻守都有問題
只得4個球員入過波既同時
後防既外圍防守又差到得人驚
失11球竟然有8球係禁區外
球隊亦因犯規於1月只可以借人而唔可以買人

後者最大問題當然係人事問題
比亞托利多數因為F1做馬案被迫放棄球隊
而麥基頓可唔可以教到季尾又係疑問
加上球隊超冇後勁
好多時下半場會突然跌watt

史雲斯方面
佢地同布里斯托城既情況相若
只失9球但入波只係全英冠最少既7球
當中原因應該同冇左史葛蘭特有關
而佢地同上季一樣和波偏多
死守得來既1分山大斬埋有柴
初步睇衰極都唔會降班

而屈福特失波咁多都仲可以排15
就要多謝湯美史勿夫離隊前既貢獻以及希古臣回歸母會
不過舊將麥基回歸帶波應該唔使降班
不過佢地依然唔似可以爭前6

錫週三雖然財力有改善
不過現時人腳仍然普通
比上不足,比下有餘

打呲郡方面就幾令人失望
球隊人腳唔差都搞到咁
只係入得15球未死得人
防守繼續唔掂就大檸樂
由中場佈防開始已經出事
沙維治簡直係英冠版既史高斯
當然到而家客場都未開齋又係 fall out 既原因

唐卡士打就係今季既和波王
11場和8場已經多過上季總和
而佢地主場同客場既表現各走極端
又好多時因為冇後勁而俾對手迫和
蘇利雲平均每場接近6次撲救都冇用

斯肯索普,班士利同埋普利茅夫攻不稅守不穩
今季應該同外界預測一樣要護級中度過
不過而家同佢地難兄難弟既竟然有彼德堡,雷丁以及葉士域治

彼德堡明顯係衰大換血
印象中全英冠換得最狠就係佢地
佢地最大問題係開波唔集中
1/4既失球係開波頭15分鐘發生
而最終2/3都係上半場輸既
試問靠下半場可以追得返幾多

小弟到而家都唔明點解開季前 Sky TV 會貼雷丁羸英冠
佢地因為重組(其實係慳錢!)而先後放走咁多球員
而家連原來既半力都冇
小弟早已明言佢地入到前6都當超額完成
最慘既係佢地昔日既主場威力已經蕩然無存
同葉士域治成為目前英冠冇波羸既主場球隊

另一方面,小弟貼葉士域治有力爭前6就抵自隊3杯道歉
堅尼今次又係衰同球員不和
隊長麥歐尼為首既球員好多都頂唔順堅尼
堅尼成日插班波防守唔集中
不過班波而家係似俾堅尼鬧到冇晒自信
比賽頭尾既15分鐘都係重災區
好難想像有李察胡禮,麥歐尼,羅仙尼亞等英超級數既防守球員
都會搞到而家全英冠失球數字最多
趁而家為時未晚同尾4既雷丁只相差5分
葉士域治倒要認真考慮易帥

p.s.:
下一次應該等1月轉會市場關閉後先再講英冠形勢
因為要考慮埋球員變動

2009-10-12

近兩日既新聞......

1)
曼城被指打算於1月羅致列貝利,耶耶托尼以及班拿約
當中列貝利既傳聞收購價高達6500萬鎊
曼聯亦準備爭奪耶耶托尼
而班拿約就率先透過經理人表示唔會過檔

另一方面,巴塞隆拿被指考慮以現金
再加上佩奧爾以及艾比度打動佢地割愛羅賓奴
巴塞方面冇否認有關報導
而報導話巴塞亦有興趣同時引入高柏尼

2)
除耶耶托尼外,曼聯亦同幾個球員扯上關係
當中包括艾堅菲夫,阿歷士泰斯拿,韋拿同埋阿當莊臣
而拜仁亦都指有興趣引入這名身價1500萬鎊既艾堅菲夫
車路士亦同曼聯一樣派左球探去觀察阿歷士泰斯拿既表現
這名華斯高進攻中場於5場比賽已經入左3球

3)
荷西安歷基同埋辣椒仔都被指成為新特蘭以及保頓既增兵對象
而艾美奧比將於12月復出

4)
上季爭羸卡維既希斯基今季雖然仍有一定既出場機會
不過只得一次正選機會就令佢考慮離隊
以爭取英格蘭既正選席位

5)
皇馬被指將於暑假向阿仙奴
分別出價5000萬鎊同埋1600萬鎊收購法比加斯以及基治
而佢地被指準備同比比續約6年

6)
伯明翰落實由許浩略出任新主席
佢係楊先生旗下泓鋒國際既CEO

7)
保方表示膝傷嚴重
不過將會捱到對國米後先進行手術

8)
AC米蘭被指只肯出價4萬鎊週薪借用碧咸
同萬人迷本身既7萬鎊週薪有明顯距離
令交易可能出現變數

而尹巴士頓再次被指將於下季接手
不過佢既前部屬亨特拉爾就被傳可能等唔到佢
消息指這名荷蘭射手最快將於1月被放棄
而柏夫奴真高就被指成為替補人選

9)
世界盃分組賽即將到尾聲
人事變動亦自然唔少

當中包括泰林向土耳其足總請辭
拿臣表示會退出國家隊
不過比拿美就表態仲想代表威爾斯出賽
軒迪克就表示會於外圍賽完結後決定去留
另一方面,文仙尼就被指成為保加利亞足總既新教練人選

10)
忽然有消息指中國國慶前羸博茨瓦納4:1既友賽涉嫌係假波
對手足總既CEO被指收左7萬美金賄款

11)
卡奴透露同車路士續約到2014年

12)
C7要養傷1個月

13)
保羅赫特再次被指就快冇得撈

p.s.:
1)
費sir同埋賓尼迪斯一齊俾英格蘭足總檢控
25號既雙紅會隨時大家都冇領隊

2)
今日生果報有篇名為'港隊吞蛋 足總混蛋'既稿寫得唔錯:
http://hk.soccer.nextmedia.com/showart.cfm?sec_id=25391&art_id=13302593&iss_id=20091012&cat_id=12048754

2009-10-11

幾場波想講......

1) 俄羅斯對德國

德國方面羸波但唔見好有說服力
除左入波外甚少有漂亮組織
如果唔係中距離射門有水準
就更難以威脅對手
而中場截擊唔見得好緊密
後防除左艾達同埋拿姆之外就冇個令人放心
路夫賽後話球員終於可以慶祝
不過佢就似乎要把握時間解決近年困擾球隊既防守問題

俄羅斯最終輸波
只好怨自己冇可靠殺手同埋發雞盲既球證
而佢地近年於主場對強隊既戰續其實只係一般
可能傳媒同埋球迷對英格蘭07年作客輸波印象太深
令佢地既主場威力俾人過份吹捧

仿真草場或多或少影響佢地既發揮
主隊雖然比客隊點都有少少著數
不過亦好多時亦要等到下半場先上力
畢竟於仿真草場踢實戰同練波係兩回事

佢地遲入局既原因仲可能係後備托賓斯基
印象中佢已經唔止一次激活球隊表現
07年主場羸英格蘭同尋晚場波都係咁
佢駁腳同埋助攻之餘
亦有替出擊既右路防守球員補位
簡接令球隊兩邊進攻平衡
咁出色既表現絕對值得踢正選

不過講到尋晚最令人有好印象既就一定係比斯度夫
打右翼既佢有速度又靈活
遇上同類型既拿姆搵唔到食就走去左路屈機
佢於國內被侵犯既次數原來仲多過艾沙維
謝路美保定同埋費特烈治俾佢輕鬆ko絕對正路

2) 烏克蘭對英格蘭

多得里奧費甸南唔追到尾害死格連
烏克蘭14分鐘已經踢多個
就算舒夫真高12碼宴客都有拿薩蘭高入球符碌波補數
整定佢地有運行
不過佢地之後放軟手腳就睇到人扯火

前線美列夫斯基只有一陣虛火
舒夫軍刀仲廢到俾講波佬笑佢係膠刀
加埋禾路連俾賓尼迪斯雪到硬晒
咁既攻力就算入到決賽週後都唔慌可以再次殺入8強

3) 丹麥對瑞典

上年已經批死瑞典長期食老本冇運行
年幾之後佢地果然仲係靠拿臣救國
伊巴謙莫域又繼續孤掌難鳴
除左兩腳詐糊助攻外冇咩佳作可言
死到臨頭就換入馬古斯貝治同埋洛辛堡打亂章用齊4大中鋒

小弟唔係話拿臣冇料
只不過如果拿臣等到對方守衛體力下降先入場靠質素屈機
效果應會比較理想

而丹麥既防守算唔錯
至於決賽週可以行幾遠就要視乎攻力有幾多改善空間

4) 愛爾蘭對意大利

有睇場波既人更加睇淡意大利既同時
亦會明白點解查伯東尼咁有信心愛爾蘭可以靠附加賽去南非

5) 阿根廷對秘魯

主場對榜尾都羸得咁驚險
或多或少要怪老馬或者貝拉度再打亂章
而如果佢地既表現冇大躍進
幾日後作客烏拉圭都好令人擔心

如果佢地最終出到線
仲可能要靠同胞比爾沙帶隊既智利幫手搞掂厄瓜多爾
比爾沙02年手上有超勁人腳都可以教到阿根廷分組賽出局
段估佢自己都估唔到7年幾後可能反彈成為國家既無名英雄

p.s.:
其實近日世青盃同埋英格蘭U-21既比賽同樣有睇頭

巴西踢法整體之餘炮手亦多
而家仲證明踢下風波都掂
貫徹佢地捧世青盃向來唔靠巨星既傳統
不過賽事接連爆冷就令賽事有少少失色

而英格蘭雖然弱陣出擊世青盃仆直
不過U-21就疊馬到得人驚
高舒亞,禾確特,卡路爾,軒斯,米卡李察士,基拔斯,文斯安尼等人個個等住上位
攻力超強之餘只嫌防守鬆散得似中學校隊

2009-10-10

1)
AC米蘭被指有興趣向阿積士羅致蘇亞雷斯
另一方面,佢地傳出有多名球員可能於季尾被放棄
當中包括:迪達,森保達,奧度,贊古路夫斯基,安祖禾,費華利,
安東連尼,施多夫,波里路,亨特拉爾同埋細哨

2)
紐卡素被指睇中馬模23歲尼日利亞射手 E.Ofere

3)
納比再次被指將於季尾回歸祖雲達斯
佢就回應話仲未決定前途
仲暗示可能會同意大利足總續約

4)
迪施高同埋傑斯寧都被指成為祖雲達斯既新箭頭人選

5)
燦美爾會方見球隊由季前目標升上英冠到而家跌到尾3
終於宣佈開除兩名利記名宿班尼斯以及麥卡迪亞
而彼德泰萊決定向尾2既韋甘比請辭

6)
燕豪芬決定唔同周海濱續約

7)
消息指國米已同華斯高達成協議
17歲巴西進攻中場P.哥天奴將於下季登陸意甲

8)
國際足協又有新搞作
插水球員可能被罰離場10分鐘

9)
薩基向當地傳媒表示明白上季於英超虎頭蛇尾
係因為自己個人操守唔好兼唔適應英國生活
而佢希望可以再次於英超比賽
消息指樸茅可能於1月羅致佢

10)
標準烈治打算同M.祖雲奴域續約
這名塞爾維亞射手之前同華倫西亞以及馬體會扯上關係
前者仲被指視佢為韋拿既替補人選

11)
拖連奴21歲意大利中堅 A.Ogbonna 被指成為阿仙奴同埋曼城既增兵對象
由於佢只係代表過意大利 U-21 代表隊一次
尼日利亞足總一直都想正式徵召佢

12)
熱那亞打算用左閘莫迪斯圖加上500萬歐元
向拿玻里收購哥倫比亞右閘蘇歷加

p.s.:
堂堂勁旅阿根廷居然俾人傳佢地使橫手
安排出名偏幫主隊既球證執法
又話已經俾錢搞掂秘魯
(當然亦有傳聞指烏拉圭同埋哥倫比亞出獎金激勵秘魯!)
真係咩面都冇晒

2009-10-9

近兩日既新聞......

1)
沙地王子旗下既投資公司證實
吉列將飛去中東商討出售手上既5成股權

2)
巴西,德國,意大利,西班牙,英格蘭,法國同埋阿根廷
只要成功殺入決賽週都會成為種子隊

3)
簡拿華路早前因為俾蜜蜂針傷而服用一種名為 Cortisone 既藥物
所以於最近既藥檢測試肥佬

4)
B.高美斯於操練時暈倒

5)
洛杉磯銀河方面透露即將答應再次外借碧咸到AC米蘭
不過就希望盡快落實交易
令碧咸可以集中精神應付美職盟季後賽

而攻力有待加強既AC米蘭同阿祖安奴以及韋尼扯上關係
不過前早已經否認有關報導
而後者似乎較大可能加盟拿玻里
而紅黑兵團亦被指打算從帕爾馬收購柏路斯治既另一半擁有權

另一方面,新上位龍門史杜拉利就得到3年新約

6)
馬勒當拿向傳媒訴苦
佢出聲搵人同曼城講數提早放人但冇人理佢
令佢非常不滿

而佢亦透露早已被削權
貝拉度趁佢去意大利度假兼減肥既時候
點兵同加納踢友誼賽
(即係奧迪加等驚喜全部都唔關佢事?!)

而希古恩於生死戰入選
以及球隊人選大換血
亦被外界猜測可能都係老馬俾人削權既例子

7)
比亞托尼好可能被迫放棄昆士伯流浪班主既身份
事緣佢俾F1裁定造馬案罪名成立
聯賽會有權唔俾佢出任球會領導層既職位

8)
格蘭落實重返樸茅擔任技術總監
而佢幾乎於之前加盟紐約紅牛

9)
柏夫奴真高既經理人放風可能轉投辛尼特
而比基亦表示如果史巴利堤落實接手
佢亦有興趣加盟這間俄羅斯球會

10)
蘇甘保被指已經聯絡有關方面要求特別處理佢既註冊申請
令可能返阿仙奴跟操既佢唔使等到1月先可以復出

消息指佢曾經同迪馬堤奧商討加盟西布朗既可能性
不過意大利忽然有報導指祖雲達斯對佢都有興趣
打算以出場先有人工收既條件同佢簽約幾個月

11)
除蘇甘保外
馬斯查蘭奴都被指成為祖雲達斯既增兵人選

12)
羅馬被指已有多名收購對象
當中包括C.阿祖安奴,柏夫奴真高,班拿約,文仙尼以及R.比安基
當中佢地打算用巴迪斯達同西維爾交換前者

13)
阿積士落實引入南韓18歲前鋒 Hyun-Jun Suk

14)
恩尼斯達即將同巴塞隆拿續約
而蘇保迪就被指成為佢地既羅致對象

15)
辣椒仔被指成為幾間英超球會既羅致對象
不過消息指佢唔準備離隊

16)
卡路士將於12月同費倫巴治約滿
消息指佢全家會搬返去馬德里生活
佢表態希望以自由身重返皇馬

17)
現時以借用形式效力國米既阿拿奧杜域從未得到出場機會
消息指車路士考慮於1月收購佢

18)
梳格斯準備同史篤城續約
粉碎佢加盟利物浦或者曼聯既傳聞

另一方面,由於般尼傷兵唔少兼有球員要向國家隊交人
43歲既領隊奧雲高爾被迫客串對利物浦既預備組賽事
仲踢左72分鐘

19)
幾段曼聯既消息......

終身榮譽主席愛華士公開批評美國老闆加拉沙家族既管理

而佢地早前涉嫌從勒哈弗爾非法挖角一事
最終成功甩身

另外,消息指佢地準備同迪列特以及韋碧克續約3年

另一方面,佢地同祖維迪,馬干以及祖里奧施薩扯上關係
新巴治奧就例牌否認報導
而馬干既經理人表示曼聯對這名巴西右閘好有興趣
不過似係幫這名經常跳草裙舞既球員托價
相反佢同鄉既傳聞就有一定可信性
因為佢老婆(即係大哨踢98世界盃時既勁索女友)暗示老公可能轉會
隨即俾記者跟到曼聯原來就係可能買家

20)
巴里開季後既防守出色
有傳聞雲加已派球探觀察一對中堅邦路治同埋拉奴基亞既表現
22歲既前者擅長踢中堅之餘亦可以串演兩閘
21歲既後者就係熱那亞既借將
曾代表意大利U-21出場8次

另一方面,雲加決定外借加雲賀迪到白禮頓1個月

21)
曉士被指將於1月得到資金買人
曼城被指打算同阿仙奴爭奪佩奧爾
不過佢地既另一目標迪根士文就因為膝傷而要長抖大約3個月

另有報導指佢地打算收購3名新球員
不過又有版本話布力治,薩巴列堤以及米卡李察士可能被放棄

22)
冼拿馬未能於馬體會爭取出場機會
傳聞布力般流浪打算於1月繼06年後再次借用佢

23)
巴勒莫竟然被指有興趣從狼隊引入伊賓斯比歷克

p.s.:
1)
大把球星因為受傷或者停賽而缺陣餘下兩輪分組賽
不過好彩仲有C7負傷救國
以及杜迪克於波蘭兵源不足既情況下重返國家隊

2)
國際足協突然為歐洲區附加賽設立種子制度
白禮達把口雖然話唔驚世界盃冇左C7同埋美斯等大牌球星
其實最驚冇球星既就係佢

而搞事既佢又忽然表示會重新考慮引入鷹眼系統
'重新考慮'即係又係吹水?!

小弟從來都唔懷疑佢既生意頭腦
不過足球運動如果想公平發展兼追上潮流
就似乎要希望佢盡快落台

3)
世界仔奧雲竟然公開表示曼聯係世界上最偉大球會
我頂佢個肺!

4)
香港輸得咁甘......
誰之過?

2009-10-7

1)
利物浦其中一個美元老闆吉列表示
入主以來已經多次撥款俾賓尼迪斯增兵
仲話賓帥應該為球隊出閘脫腳而負責

2)
馬勒當拿表示將於世界盃外圍賽後同阿根廷足總商討去向

3)
費sir既煩惱......

一係無的放矢狂插上場波既球證韋尼
令後者備受困擾而考慮退休
而家費 sir 俾各方狂插
停賽罰款似乎走唔甩

二係龍門問題
雖然雲達沙已參加預備組賽事
不過距離正式復出仍有一段日子
而有消息指費sir上場和波後同賓科士打於更衣室炒大鑊
古斯鍚同埋羅拔施拿兩名後備龍門又先後被傳希望以借用形式離隊

4)
杜奧巴向肥安推薦韋拉
隨即有報導指如果車路士能夠就禁止註冊球員既判罰上訴成功
將於1月羅致這名法國防中韋拉以代替艾幸以及米基爾

5)
消息指一個南非財團有興趣入主紐卡素

6)
艾加表示曾經考慮因為傷患而提前掛靴

7)
楊家誠完成全面收購佰明翰
而消息指前老闆蘇利雲打算用賣盤而收到既2200萬鎊去收購韋斯咸

8)
貝尼斯干尼旗下既傳媒集團打輸官司被重罰6億9000萬鎊
有傳聞指佢可能出售AC米蘭去還債
而阿爾巴尼亞富商泰斯就成為最新一個傳聞買家

9)
祖雲達斯否認打算羅致祖維迪既報導
而佢地被指準備出價300萬鎊向紐卡素收購居爾

10)
阿仙奴被指有興趣收購標準列治中場迪科亞
轉會費為800萬鎊
而伊布爾就被指係巴塞隆拿700萬鎊既羅致對象

11)
艾拉法積兄弟承諾1月增兵
而消息指佢地考慮搵一個更高級數既領隊取代保羅赫特

12)
加利仔暗示於季尾離隊

13)
拿坡里宣布解僱鄧納東尼
而前森多利亞教練馬沙利將會接任這支7戰只得7分既球隊

14)
夏文因為只想於頂級聯賽比賽而拒絕加盟諾士郡
而傳聞艾歷臣將加入董事會
總監一職將由杜維接任

15)
艾斯查達落實第二次執教河床

16)
早前講過布魯士打算踢走部份堅尼既舊部屬
傳聞名單包括佐治麥卡菲,大衛希利以及上場擺老烏既安頓費甸南
另一方面,辛頓去左新特蘭試腳

17)
雷恩右閘洛芬尼被指成為愛華頓既增兵對象
這名法國國腳先後同利物浦,拜仁等球隊扯上關係

18)
英格蘭有兩名年青球員惹上官非
愛華頓既17歲前鋒荷西巴斯達同埋維拉21歲中場奧斯邦尼
分別因涉嫌藏有毒品以及偽鈔同埋搶劫而被捕

2009-10-6

近兩日既新聞......

1)
畢爾包年青射手梅拿恩對華拉度列入波
以16歲289日成為歷來最年輕於西甲入波既球員
消息指利物浦打算於1月收購佢

2)
樸茅證實42日內將第二度易主
而家既老闆係佔球隊9成股份既沙地富商艾法拉積兄弟
而前度老闆艾爾法廉將會保持小股東身分
早前CEO史杜利撲水既500萬鎊亦係來自艾法拉積兄弟

3)
第n+1次有報導指 Barry Moat 出價收購紐卡素
今次既版本話佢已經同巴克萊傾掂數
不過出價唔夠1億鎊

4)
費sir同埋 Big Sam 先後公開批評球證
英格蘭足總可能會開 file 做嘢

5)
諾士郡持續不振
消息指佢地打算搵柏列取代麥柏蘭

6)
國米被指打算提出跳樓價唔多於400萬歐元既價錢收購彭迪夫

另一方面,國米可能一次過失去兩個防中
韋拉被指可能於1月回歸阿仙奴
報導指佢國米願意俾佢於合約既最後18個月以借用形式離隊
不過韋拉既人工就要減到7萬鎊

而蒙達利就因為俾球迷狂插而離隊
消息指自知難以羅致韋拉既熱刺好有興趣接貨

7)
路斯基同埋梅里達將於季尾同阿仙奴約滿
前者表示希望獲得新合約
後者就已經得到雲加提供一份5年新約
不過馬體會就以正選席位吸引佢回流

8)
曼聯被傳有興趣收購迪施高

9)
彭拿路既 M.Aguirregaray 被指成為祖雲達斯既新右閘人選
這名20歲烏拉圭青年軍身價約值500萬歐元

10)
米杜士堡再次同李奧曲加以及奧拜恩扯上關係

11)
由於賓科士打接連出錯
令佢既國家隊席位被占士取代

12)
哈利列納因海外戶口問題而俾英國稅局調查

13)
富咸被指打算出價收購柏夫奴真高
如果失敗就會改為提出借用佢

14)
維拉成為最新一間同蘇甘保扯上關係既球會
而侯城方面就否認打算引入佢

15)
幾段AC米蘭既新聞......

貝尼斯干尼否認出售球會4成股份既報導

而碧咸被指即將再以借用形式加盟

另一方面,細哨可能因為多次於賽前夜蒲而被罰款,甚至減人工

16)
拿玻里方面暗示鄧納東尼隨時俾人炒
而卡坦尼亞總經理盧莫卡奴拒絕轉投這間南部球會

17)
標準烈治打算羅致自由身既韋托特

18)
消息指布魯士打算踢走部份以前由堅尼引入既球員

19)
巴黎聖日耳門打算於季尾搵查斯古特加盟

20)
史當頓接手達靈頓

21)
曼城被指打算向愛華頓羅致奧士文

22)
傳聞卡維嫌出場機會不足而考慮離隊
報導指保頓,新特蘭同埋侯城都有興趣接貨

2009-10-5

3場波想講......

1) 曼聯對新特蘭

4個入波都源於錯誤
場波講真緊張刺激但唔高水準
貝碧托夫既金球已經係全場亮點

今場波失分費sir賴球證補時唔足
不過最應該負責任既其實係佢自己
完全收起傑斯叔等如唔同自己買保險
如果唔係安頓費甸南補時失失慌送禮已經冇晒3分
佢賽前勁讚中場好多好選擇
但事實擺在眼前係傑斯叔近期一個人既貢獻
已經多過晒其餘中場

佢老人家又透露夏格維斯復出後
將係球隊處理死球既首選
但睇怕佢復出後既負擔應該唔止咁少
不過佢重創後仲有幾多貨就好成疑問
而佢之後捱得幾耐又係另一個問題

2) 國米對烏甸尼斯

史尼達加上史坦高域,馬干以及一對等波餵既箭頭
已經等如球隊生波既所有攻力
但問題係前者可以同咁既後防補到幾多鑊

3) 車路士對利物浦

利記冇個位置羸到車仔
仲有咩好講

拉爾拿冇大犯錯
不過相對於希拉里奧就難免稍為被比下去
向來畏高既後者連高波都冇甩手甩腳
要選今季最令人驚喜既後備龍門應該都係佢
費sir一定好羨慕肥安

而西班牙人既隊友又唔爭氣
一條防線果然搞唔掂杜奧巴之餘
佢地同埋幾個中場亦睇唔實後上既球員
之前已經響左幾次警號都仲未識驚
輸波都要買一送一就令人好扯火

中前場方面
多左馬斯查蘭奴係有返個似樣既防中
不過拍住半個廢人盧卡斯利華
爭唔羸對手幾個唔 top fit,但有質素既中場都好正路

謝拉特又持續態沉
冇咩料到之餘仲令對手既艾辛仲有餘力抽空助攻
古治又好多時要有大佬發圍先可以產生化學作用
某程度上佢都算係一支太陽能電筒
而尼亞拿受傷患困擾根本唔足以踢正選
加上前線既托利斯就算冇波在腳都俾人睇得好緊
中前場死晒火就只有靠斬高波俾隊手練頭槌
亦令車仔早已立於不敗之地

展望之後既比賽
賓帥可能要變動幾個位置
首先加歷查同埋恩梳亞既正選席位值得商榷
中場冇左沙比艾朗素既然咁唔掂
阿古蘭尼亦係未能救近火既遠水
就不如要求態沉既謝拉特做好防守先再唸進攻

而班拿約今場落場後其實幫到利記好多
賓尼迪斯於球隊落後先肯放佢入場
可能係考慮佢既體力問題
不過更大可能係後知後覺
用得佢更加盡可能會幫到球隊

p.s.:
好想睇皇馬同埋祖記點解於聯賽首次輸波
偏偏都冇得睇

2009-10-4

1)
有消息指如果AC米蘭今晚對阿特蘭大失分
李安納度將要立即下台
尹巴士頓之前已經否認會接手
而哥斯達古達,加里,迪里奧羅斯同埋馬沙利都被傳係接手人選

另一方面,細哨再次被踢爆夜蒲
佢被傳媒發現上星期一去夜總會玩通頂
時間正係球隊爆冷輸俾蘇黎世既前兩晚

2)
意大利傳媒指費倫天拿將於1月羅致彭迪夫
消息指利物浦亦打算出價700萬歐元收購這名馬其頓射手
而利記亦被傳有興趣收購祖維迪
皇馬,曼聯以及車路士亦被指視佢為既增兵對象

3)
巴頓既傷患比最初預測嚴重
佢應該要休息4個月

4)
標準烈治既17歲巴西前鋒 R.Fermoselle
可能於1月轉投阿仙奴
而早前同佢地扯上關係既20歲摩納哥剛果中堅 C.Mongongu
就被指成為巴塞隆拿以及AC米蘭既增兵對象

5)
玻利維亞國腳罷踢事件最終平息

6)
迪比亞路養傷5個星期

7)
韋拉同埋蘇亞素都被指為左爭取出場機會而將於1月離開國米
前者第n次同阿仙奴以及熱刺扯上關係
而拿玻里以及羅馬就被指有興趣接收後者

另一方面,佢地同AC米蘭都被指打算於1月向帕爾馬收購馬列加
曼聯亦一度被指有興趣羅致這名肯雅防中

8)
迪馬利亞同賓菲加續約至2015年
粉碎佢打算離隊加盟大球會既傳聞

9)
史巴利堤承認可能接手辛尼特

10)
曼城被指將向甘美奧收購19歲巴西中堅M.費蘭迪斯

11)
前法蘭克福教練 F.Funkel 落實接手哈化柏林
雙方簽約1年

12)
拿玻里被指打算搵祖雲達斯高層蒙達利過檔出任總經理

13)
熱刺前線於轉會市場重開後可能唔夠人用
事緣些路迪再次被指將於1月收購羅比堅尼
而柏夫奴真高暗示會為左出場機會而離隊

14)
J.羅拔臣因為上年楂車撞死人而被判入獄兩年8個月
而錫菲聯可能引入27歲法國自由身射手 V.Pericard 作為替補

15)
消息指羅渣士準備為雷丁進一步裁員
包括史葛戴維斯,J.傑利, D.Mooney, J.Tabb 以及 M.安當尼奧都會被放棄

p.s.:
1)
NBA來季將即時重播既使用權
擴大到個波出左界後既控球權同埋24秒進攻時限
不過足球方面就近乎原地踏步
要引入科技怕且要等到白禮達收皮

2)
記得今晚11:00睇肥安迎'賓'

2009-10-3

1)
紐卡素被判賠償200萬鎊俾基瑾
這個好可能係合約訂明既分手費

而基瑾辭職一事既詳情亦曝光
事緣當時既兩名高層韋斯同埋林比亞斯
要求基瑾同意引入 I.干沙利斯
以同一個熟識南美足球既經理人打好關係
不過佢對這名巴拉圭中場近乎冇認識而決定拒絕這個要求
最終導致佢出走紐記

另一方面,佢既索賞金額原來高達2500萬鎊
當中大約860萬鎊係佢合約餘下日子所能賺到既錢
而佢另以名譽受損而要求賠償1650萬鎊
這名金額係假如上年件事冇發生佢一直做到65歲所能賺既錢

2)
樸茅CEO史托利爆料這間英超球會原來財政上水深火熱

油王老闆早前應承放水5000萬鎊
如果未能於15/10前注資當中既30%(即係1500萬鎊)
球會將會好唔掂

而佢幾經辛苦先借到杯水車薪500萬鎊
球員先可以收返9月既人工
不過10月既人工亦會事先聲明要拖到油王注資後先有得出

另一方面,球隊欠落唔少街數
當中有300萬鎊佣金可以暫時拖住先
全因油王同兩個相關既經紀有一定交情

3)
哈利列納既離隊賠率忽然升溫
令人懷疑佢可能即將離隊
不過佢老人家它已經作出否認

4)
尹巴士頓既經理人否認這名前荷蘭射手會接手AC米蘭

p.s.:
1)
里約熱內盧成功申辦2016年奧運
假如巴西未能於倫敦奧運羸得足球金牌
唔通真係要返主場先識羸?

2)
中秋節快樂!

2009-10-2

近幾日既新聞......

1)
幾段利物浦既消息......

利記方面證實搵緊財團注資
早前傳聞沙地王子法素想出價3億鎊收購5成股份
早前曾有消息指赫基斯反對出售股份

而可能忽然富貴既利記就被指考慮成事後出價4900萬歐元收購韋拿
佢地亦被指打算於1月向畢爾包收購查維馬天尼斯
不過曼城亦對這名贖身費高達3000萬歐元既中場好有興趣

另一方面,謝拉特透露掛靴後可能出任領隊

2)
卡達菲被指有興趣入主AC米蘭

3)
多個教練被傳地位不保
當中包括李安納度,辛格同埋史高拉利
AC米蘭方面已經否認搵尹巴士頓接手
但亦有傳聞指紅黑兵團唔炒人只係因為李安納度既人工夠平
而森伯連尼亦聲稱唔會炒辛格

大菲就唔憂俾人炒
事緣佢既年薪係世界最高既1300萬歐元
解散賠償應該屬於天文數字

不過球圈始終有不幸者
法夫爾因為哈化柏林於德甲連輸6場而被炒
青年軍教練海寧暫時頂替佢
而德國傳媒指馬圖斯為新教練既大熱人選

另一方面,拿玻里既技術總監馬里奴就成為球隊出閘脫腳既代罪羔羊
而家鍚耶納既總監辛斯就被傳係繼任人選
鄧納東尼雖然暫時保住飯碗
不過有傳聞球會想搵文仙尼取代佢

4)
楊家誠表示最快可於13/10完成收購伯明翰
仲話已經同當地政府磋商起一個可容納5萬5000人既新球場

5)
幾段紐卡素既消息......

基瑾既賠償官司被指最快於今日有結果
而巴頓因傷要休息8個星期
另一方面,西布朗既科突迪瓦中堅美迪就忽然同紐卡素扯上關係

6)
艾迪巴約因為行為不檢被英格蘭足總罰款25000鎊
不過停賽兩場既處分可以緩刑執行

而英格蘭足總就早前既球迷暴動
正式落 charge 控告韋斯咸以及米禾爾

7)
玻利維亞球員聯盟為左迫使當地足總認真改善聯賽既管理
宣布所有職業球員都會集體退出國家隊
令玻利維亞之後對巴西以及秘魯既世界盃外圍賽
好可能焗住起用青年軍應戰

8)
洛賓既十字韌帶傷勢冇預期咁嚴重
休息時間由雲高爾透露既3個月修正為1個月

另一方面,東尼罷踢預備組令佢同雲高爾既關係更差

9)
麥亞里士打落實加盟樸茨茅夫
出任保羅赫特既副手

10)
樸茅爆出拖糧消息
油王老闆就表示會於今日出糧
同係有中東背景既球會諾士郡亦傳出負面消息
佢地既球員被傳向職業球員協會投訴贏波獎金俾球會 hold 住

難怪米高波爾拒絕加盟諾士郡
佢可能選擇加盟加拉塔沙雷或者樸茅(咪又係死?!)

而諾士郡繼續增兵
打算向伯明翰借用麥舒菲爾到季尾

11)
C7被指向曼聯推薦母會士砵亭既龍門魯爾柏迪斯奧
而費sir就透露奧雲可於兩星期內復出

12)
米堡被指打算借用李奧曲加
再於1月以500萬鎊買斷佢
阿仙奴同埋富咸亦被指對這名小國腳有一定興趣
而愛華頓就被指睇中佢地既阿當莊臣

另一方面,修夫基表示雖然俾人狂插
但依然唔打算辭職

13)
亨利透露希望將來同雲加再次合作

14)
戴倫特被指可能於1月以借用形式加盟AC米蘭

15)
尼爾成為最新一個俾人打劫既利物浦市球星

16)
拉素再次被指考慮接收雲達華治

17)
侯城被指考慮引入蘇甘保

18)
加利卡希爾,安頓費甸南同埋厄遜都被指成為熱刺既新中堅人選
曼聯,阿仙奴,祖雲達斯同埋AC米蘭都曾經同前者扯上關係
不過保頓方面表明唔會放人

19)
迪奧夫被指早前球隊輸俾愛華頓後
於更衣室同隊長尼爾遜互毆
佢亦涉嫌於這場聯賽以種族歧視既字眼侮辱一個執波仔

20)
一旦韋拿離隊
華倫西亞被指會向標準列治收購M.祖雲奴域作為替補

21)
打呲郡打算向阿仙奴借用賀迪

22)
高雲地利成為最新一間同禾基斯扯上關係既英冠球會

p.s.:
小弟前晚有事見證唔到南華打入亞協盃4強
雖然唔鍾意羅先生既搞波手法
不過小弟下次應該唔會錯過佢地對科威特SC既4強賽事
畢竟本地波好耐都未試過咁好氣氛

2009-10-1

想講幾場歐聯......

1) 魯賓卡山對國米

國米繼續於歐聯死火
表面睇係因為有好多時間踢少個人
不過就算巴洛迪利未俾人趕出場
佢地既演出都唔似一隊有力爭歐聯既球隊
話魯賓卡山值得袋晒3分都唔過份

另一方面,盧斯奧係識用波兼助攻力好強
不過佢前兩季於拜仁既防守表現已開始走下坡
而家要靠森美爾同佢包底
就整定成為國米防線既最大漏洞

2)費倫天拿對利物浦

開波前已經睇死愛隊一對大笨象中堅睇唔住祖維迪
睇埋出賽名單知奧利里奧再次串演防中
個心仲死左8成
佢對上一次正選落場踢防中
已經係3年幾前主場俾兵工廠大炒6:3既聯賽盃賽事
到開波後發覺連謝拉特都沉晒就整定等死

成個上半場既表現絕對係07-08年作客波圖之後最差既歐聯演出
到下半場人地縮返後先搵到機會埋門
整體演出真係令小弟好失望
只有希望佢地可以於幾日內谷底反彈作客史丹福橋

3) 中央陸軍對比錫達斯

前者返到主場即刻回勇
咁高既效率之後迎戰曼聯同埋禾堡都應該有力一鬥
連續兩場都入靚波既迪薩哥夫仲好 sharp
轉投西歐大球會應該只係時間既問題

門口狗比鍚達斯既水準比上場對曼聯差左起碼一半
佢地要到主隊羸左兩球稍為放軟手腳先有機會還拖
不過搓到補時先入局就抵佢地輸

4) 曼聯對禾夫斯堡

曼聯苦戰羸波
整體演出唔算好突出
後C7時年就繼續靠傑斯叔撐場
佢老人家近況順到罰球省中人都有得入
認真吹佢唔脹
咁短時間內追平亦係曼聯反勝既轉捩點
而佢之後於禁區 set 好炮台俾卡域克撞射
就係近期另一個熟口熟面既助攻
而曼聯近3場波入8球有7球同佢有關
小弟唔可能唔收起早前對佢既懷疑

另一方面,奧雲只係踢左一陣就再次因傷收皮
入替佢既貝碧托夫除左兩腳後踭又咩邊腳好波
朗尼又好多時俾人圍死
費sir暑假已經講明今季既新戰術要靠中場後上入波
卡域克今場算係一個好示範
史高斯,安達臣,費查等人亦已經先後開齋
表面睇係有好多炮手
不過現時冇一個特別可靠亦係佢地既隱憂
當然更大既隱憂就係出場時間唔少既傑斯叔仲可以交幾多貨

5) 皇馬對馬賽

皇馬羸3:0真係羸得少
佢地下半場表現有明顯改善既同時
或多或少亦要多謝球證值得商榷既12碼判決
這個判罰仲令有迪亞華兩黃一紅離場既馬賽徹底收皮

銀河艦隊羸晒名氣
西甲仲羸到唔識停
不過睇佢地兩場歐聯只覺見面不如聞名
佢地頭25分鐘既表現平平無奇之餘
而如果唔係有卡斯拿斯4度將尼安既攻門拒於門外
佢地隨時陷於苦戰

6) AC米蘭對蘇黎世

只睇精華發覺輸波或者係因為冇運
不過小弟始終好嬲佢地既總理老闆
條老淫虫掛住同0靚模開波多過自己隊波
AC米蘭唔易主一定冇運行

p.s.:
聽日先講近幾日既新聞......