想講下尋日場波......
多得尋日3點幾搭ck兄搵人買埋飛
先有得見證歷史
場波好多人講黑哨
12碼唔罰同埋強哥究竟有冇越位
本地球迷肯定n年後都仲有人講
小弟覺得12碼唔罰係有道理
因為卡尼祖雖然俾人踢到腳
不過佢之前已經控甩腳兼借勢向對手訓落去
至於12碼就自己睇片
http://www.youtube.com/watch?v=1VtryNNLjDE
http://www.youtube.com/watch?v=_7pdgw3yK_Q
係唔係平排自己唸下
同事甲尋晚坐既位置垂直睇到案發經過
佢就話自己係香港人梗話冇越位
球証係對家既人就梗係死人都話有
不過電光火石之間有邊個一下就睇到
小弟睇左n次都唔肯敢拍心口話有冇越位
偏偏旁証夠吉士話有
如果佢冇異於常人既神眼
就可能當而家審緊案將疑點利益歸於守方
不過更大既可能係佢地4條阿聯酋自己友吹死南華
亞洲足協班友只要用個屎忽唸嘢都唸到要避嫌
居然用齊4個自己友球証就好難令人相信冇黑幕
全場球証判罰方面係有少少偏幫客隊
小弟坐125段客隊後備席廂後面
見客隊教練成日走出教練區最終都冇事亦覺得好奇
講返場波
以波論波客隊明顯比較強
3,10,15,20,33,37唔係下期6合彩既心水號碼
而係人地好波既球員
而佢地既聯賽雖然未開季
但體能唔比南華差
而人地既心理質素明顯好好
頭幾分鐘之後都唔覺佢地緊張
仲恃住人地吹佢地唔脹而經常拖時間
加上人地備戰充足
提早到香港適應之餘
教練仲睇足南華今次亞協盃所有賽事
羅先生所講既專業同人地比仍然有所不及
至於南華輸質素之餘
金領隊亦暴露應變唔夠快既弱點
不過見佢地咁搏就已然收貨
小弟向來唔欣賞羅先生既搞波手法
因為文屎忽之流都俾人當明星咁捧真係好難認同
不過都覺得佢付出咁多錢同埋時間好難得
但話說回頭
只得一隊南華獨大對本地波唔好帶來好影響
唯有寄望巴塞化既土產傑志以及其他球隊都爭氣
他日佢地有機會出戰亞協盃亦會得到同樣掌聲
尋晚場波係輸左
不過可以再次證明香港足球未死
從另一個角度睇本地波點都有賺
希望尋晚對南華既打氣聲
可以同時喚醒波總同埋一眾狗官
Subscribe to:
Post Comments (Atom)
4 comments:
十二碼果球小弟未睇
不過吹越位果球
小弟幾乎肯定係旁證錯
睇住強哥係望住對面包越位果條33號友來郁
當然小弟都認為客隊實力的確較強
睇住南華攞住個波攻極都好難攻到去禁區
人地三兩下就搓開哂
就知咩事
小弟奇怪既係
點解南華唔揀T史高斯入三個外援名單入面
點都好過用雷文......
不過小弟同意網主所講
經過琴晚
香港足球證明到俾人睇係未死
期望下年南華捲土重來
始終南華於今年亞協盃
幾乎可以話八強開始先有少少難度
最後答案係無offside
去片
http://www.youtube.com/watch?v=fV9Z3G_EGxo
To: 舒利亞
1)
段片係睇過既片當中最正既
2)
基本上係人都傾向認為冇越位
不過都係招積最中肯!
今日生果報引述招積既 comment:
「李海強很大機會是與對方守衞平排，而非越位；但我認為球、旁證若有懷疑該球是否越位，利益也應歸於攻方（南華）；賽後在網上翻看了不少該球的定鏡及慢鏡重播，惟角度欠佳，始終未能準確判斷。」
'始終未能準確判斷'......
3)
T.史高斯因為停賽而缺陣
4)
雷文今場波已經有改善
不過小弟信佢最終會冇得留低
有人寫左句幾中肯的話
兩隊球衣球褲都係紅白色
裁判誤判都冇辦法
雖然話南華係主場
但如果對手冇第二隻色
主隊讓下都冇所謂啦
Post a Comment