2009-10-16

今日想講英超……

Big 4仍係前列份子
不過就各有隱憂

當中車路士暫時表現最似樣
肥安掌舵後球隊表現更加四平八穩
而杜奧巴同埋艾辛算係成功擺脫嚴重傷患
就仲好過簽到兩個新球員
而幾個名牌進攻中場雖然冇好搶既表現
但亦幫到球隊提升控球能力
但講到隱憂
佢地現時失球數字雖然全英超最少
不過講真依然時有不穩
而季中既非洲國家盃仲會令肥安幾頭痛
(當然好多同行同病相憐!)

而受到C7離隊以及傷兵問題影響
曼聯攻守表現都走樣
前線奧雲同埋貝碧托夫既表現唔算太令人滿意
前者只於打呲戰做過一剎英雄
後者亦似乎可以再俾多幾錢肉緊踢波
費sir暑假已經講明會靠更加靠中場入波
不過佢地而家似乎過份倚靠傑斯
36歲既佢根本唔可能整季交足功課

後防方面
賓科士打同埋幾個後衛排住隊出錯
雲達沙即將復出就應該可以令費sir放心返少少

阿仙奴就繼續踢佢地既華麗進攻足球
7場入24球兼有咁多炮手就絕對得人驚
當中華美倫頻頻出擊得手
同法比加斯既表現一樣咁搶眼
不過佢地繼續被防線兵源不足同埋唔夠經驗既老問題困擾
爭聯賽(同埋其他盃賽)都係好蝕底

利物浦方面
只係失多車仔6分唔使咁快放棄
不過後防狂輸高波同埋死球就等同自殺
當中加歷查仲係頭號罪人
加上謝拉特狀態平平
解釋上季只輸兩場既佢地
點解而家踢8場已經爆左quota

小弟雖然認為Big 4依然有優勢
不過曼城勢兇夾狼
炮手甚多之餘
泰維斯同埋艾迪巴約等人絕對有料到
就算最終會冇左羅賓奴都唔使驚
而3線既聯繫亦比季初好
唯一既挑剔就只有後防幾件貴價貨仲未培養到默契
同埋曉士既功力始終令人唔放心
而季中再胡亂增兵亦未必對球隊有正面幫助

講實力佢地今季同Big 4相比仲差左少少
但整體實力應在熱刺,維拉同埋愛華頓之上
所以絕對助5望4

熱刺方面
今季成績有改善其實要慶幸好多球員無人問津
令球隊唔使再次因為大換血後季初脫腳
但佢地只係識欺善怕惡就只配爭第6

維拉方面
冇左巴利既影響冇預期咁大
柏度夫同埋薛維表現算係不過不失
反而後防人腳差左
而家雖然只失6球
不過畏高既弱點將令佢地之後付出代價

愛華頓方面
因為尼史葛而出閘脫腳
球隊而家慢慢重回正軌
不過同 level 既對手多左兼有曼城食住
應該好難再次去到第5名

新特蘭今季就忽然升呢
除左左閘不穩外既其餘位置都唔錯
踢法簡單直接之餘分工亦清楚
不過要一下子挑戰前列明顯唔係實際目標
打好基礎之餘再清除瘀血似乎先係布魯士所想

至於其餘9隊實力相差唔遠
英超上季既護級亂局隨時再現

富咸似乎因為要踢歐洲賽而分心
布力般流浪就衰中場唔夠力
不過好彩都有擅長護級既領隊慢慢執

韋斯咸其實踢得唔差
以佢地既人腳同埋蘇拿比下有餘既功力
而家排尾二只係人有三衰

而保頓出閘3連敗後
連續4場不敗之餘仲有8分落袋
表現絕對係大躍進
不過加利麥臣似乎搞唔掂前線死火既問題
講真靠幾個質素一般既中場又可以入到幾多波

韋根搵到馬天尼斯接替布魯士
絕對係針冇兩頭利既例子
中前場用波好睇左
尼索比亞轉去右路仲踢得唔錯
不過原班人腳既防線就穩健不在
側面反映到布魯士佈防既功力
如果繼續每場差唔多失兩球
隨時成為近年最好睇既解班球隊

前線死火既史篤城主場優勢冇上季咁明顯
不過4場作客有3場都袋到1分就算係拉上補下
佢地今季唔似可以再搶到45分之餘
護級壓力亦唔輕

般尼方面表面好似行緊比上季史篤城更勁既舊路
主場4連勝仲創左英超升班馬紀錄
不過佢地羸曼聯同埋愛華頓既比賽都有一定既幸運成份
主場威力唔值得過份高估
更大鑊既係佢地可能半放棄作客賽事
4場全敗之餘兼吞左14隻蛋
所以小弟有理由相信佢地最終要艱苦護級

伯明翰方面
作客奧脫福都夠膽同曼聯鬥攻就知佢地唔係烏龜球隊
不過唔識入波就幾肯攻都死
好彩防守唔太差
只要楊先生唔好搞搞震
麥利殊應該有能力帶領球隊護級

侯城方面
菲臘布朗已經積極增兵
前線雖然總算做到每場入一球
但後防持續不振話咁快就失左20球
足以令佢地降班收場
高層1月未必俾錢菲臘布朗增兵
或而係炒之而後快

而狼隊雖然失波少過老虎
不過一對大水牛中堅排住隊出錯就令人好唔放心
加上麥卡菲教球會向來冇料到
老虎同狼係小弟現時既心水降班膽

最後一隊想講既係破紀錄開季7連敗既樸茅
佢地人腳甩皮甩骨
等到1月先可以再增兵真係好難捱
萬一新老闆艾法拉積兄弟又係空心老倌
樸茅唔似可以搵到第3個新老闆之餘
降班機會亦好高
而保羅赫特而家輸到荒失失
路人甲都睇得出掛名技術顧問既格蘭等緊接手教波