幾場波想講......
1) 俄羅斯對德國
德國方面羸波但唔見好有說服力
除左入波外甚少有漂亮組織
如果唔係中距離射門有水準
就更難以威脅對手
而中場截擊唔見得好緊密
後防除左艾達同埋拿姆之外就冇個令人放心
路夫賽後話球員終於可以慶祝
不過佢就似乎要把握時間解決近年困擾球隊既防守問題
俄羅斯最終輸波
只好怨自己冇可靠殺手同埋發雞盲既球證
而佢地近年於主場對強隊既戰續其實只係一般
可能傳媒同埋球迷對英格蘭07年作客輸波印象太深
令佢地既主場威力俾人過份吹捧
仿真草場或多或少影響佢地既發揮
主隊雖然比客隊點都有少少著數
不過亦好多時亦要等到下半場先上力
畢竟於仿真草場踢實戰同練波係兩回事
佢地遲入局既原因仲可能係後備托賓斯基
印象中佢已經唔止一次激活球隊表現
07年主場羸英格蘭同尋晚場波都係咁
佢駁腳同埋助攻之餘
亦有替出擊既右路防守球員補位
簡接令球隊兩邊進攻平衡
咁出色既表現絕對值得踢正選
不過講到尋晚最令人有好印象既就一定係比斯度夫
打右翼既佢有速度又靈活
遇上同類型既拿姆搵唔到食就走去左路屈機
佢於國內被侵犯既次數原來仲多過艾沙維
謝路美保定同埋費特烈治俾佢輕鬆ko絕對正路
2) 烏克蘭對英格蘭
多得里奧費甸南唔追到尾害死格連
烏克蘭14分鐘已經踢多個
就算舒夫真高12碼宴客都有拿薩蘭高入球符碌波補數
整定佢地有運行
不過佢地之後放軟手腳就睇到人扯火
前線美列夫斯基只有一陣虛火
舒夫軍刀仲廢到俾講波佬笑佢係膠刀
加埋禾路連俾賓尼迪斯雪到硬晒
咁既攻力就算入到決賽週後都唔慌可以再次殺入8強
3) 丹麥對瑞典
上年已經批死瑞典長期食老本冇運行
年幾之後佢地果然仲係靠拿臣救國
伊巴謙莫域又繼續孤掌難鳴
除左兩腳詐糊助攻外冇咩佳作可言
死到臨頭就換入馬古斯貝治同埋洛辛堡打亂章用齊4大中鋒
小弟唔係話拿臣冇料
只不過如果拿臣等到對方守衛體力下降先入場靠質素屈機
效果應會比較理想
而丹麥既防守算唔錯
至於決賽週可以行幾遠就要視乎攻力有幾多改善空間
4) 愛爾蘭對意大利
有睇場波既人更加睇淡意大利既同時
亦會明白點解查伯東尼咁有信心愛爾蘭可以靠附加賽去南非
5) 阿根廷對秘魯
主場對榜尾都羸得咁驚險
或多或少要怪老馬或者貝拉度再打亂章
而如果佢地既表現冇大躍進
幾日後作客烏拉圭都好令人擔心
如果佢地最終出到線
仲可能要靠同胞比爾沙帶隊既智利幫手搞掂厄瓜多爾
比爾沙02年手上有超勁人腳都可以教到阿根廷分組賽出局
段估佢自己都估唔到7年幾後可能反彈成為國家既無名英雄
p.s.:
其實近日世青盃同埋英格蘭U-21既比賽同樣有睇頭
巴西踢法整體之餘炮手亦多
而家仲證明踢下風波都掂
貫徹佢地捧世青盃向來唔靠巨星既傳統
不過賽事接連爆冷就令賽事有少少失色
而英格蘭雖然弱陣出擊世青盃仆直
不過U-21就疊馬到得人驚
高舒亞,禾確特,卡路爾,軒斯,米卡李察士,基拔斯,文斯安尼等人個個等住上位
攻力超強之餘只嫌防守鬆散得似中學校隊
2 comments:
俄羅斯輸得都幾唔抵
假如入到決賽週
唔難再有機會創佳績
其實小弟諗
英格蘭會唔會想放水俾烏克蘭
攪死克羅地亞@_@?
估唔到拿臣仍然咁堅
難怪一路仲有傳佢會再次出國
果然仲好有料
小弟真係希望決賽週見到愛爾蘭
始終有杜夫同基雲兩個前紐記球員
而且又係小弟鍾意既
老馬排陣一樣咁亂來
用古迪利斯打右閘
真係攪到小弟O哂咀
對住包尾既秘魯
都要苦戰先贏到
對於秘魯
小弟只想對蘇蘭奴講
enjoy埋你最後一場國際賽吧
p.s.
小弟真係想卡路爾上到位
始終紐記好耐無一位英格蘭一隊前鋒助陣
(唔好講奧雲~_~)
另外
馬古斯貝治轉會後情況如何@_@
To: 舒利亞
1)
俄羅斯既表現唔錯
最終1分都冇真係好唔抵
2)
以陰謀論方面唸
英格蘭真係似報仇
3)
拿臣既表現係堅
不過更堅既係佢幾個月前受膝傷困擾
醫生估佢要抖3個月
操返 top fit 要半年
仲一度傳出佢索性提早掛靴
點知火速康復之餘仲有貨交
4)
小弟寧願見到有球味既愛爾蘭入到決賽週
都唔想見到幾隊名不副實既名牌
5)
搵古迪利斯踢右閘固然離譜
提早收起艾馬亦過份保守
06年阿根廷8強出局
或多或少因為柏卡文提早收起列基美
當時老馬都有份插人保守
估唔到佢而家都犯上同樣錯誤
6)
英格蘭可以開路既前鋒唔多
希斯基年齡唔輕兼傷患多多
比較年輕既艾殊頓就更加玻璃腳
下年世界盃後既主要選擇就只有
哥治,卡頓高爾,比亞堤同埋卡路爾
所以後者應該至少做到邊緣人
7)
馬古斯貝治已經入左5球
算係不過不失
p.s.:
賽後感唔記得講巴林
羸晒形勢都係得個桔
睇住 S.Isa 扭埋空門都射中柱真係激死
Post a Comment