幾場波想講……
1) 科威特競技 vs 南華
主隊表現明顯好得多
件左翼華歷仲真係幾好波
李雙中簡直係一個人肉雪糕筒
南華最終只係輸1:2
就多得主隊埋門一腳唔掂兼防守唔集中
而家南華雖然可以吊住條命
不過如果防線冇改善
俾人又整返個作客入球就真係邊度都唔使去
2) 巴西 vs 加納 (世青盃決賽)
場波係小弟近期睇得最爽既一場
由發雞盲球証過嚴將艾度趕離場
小弟就鋤強扶弱撐加納
睇佢地死守同埋射12碼絕處逢生
叫到小弟把聲都拆埋
加納羸在夠韌
由法定時間到互射12碼都係咁韌
當中龍門艾爾亞同埋串演中堅既巴度就最搶鏡
之前表現騰雞既前者仲忽然上左身
相反森巴兵既表現忽然跌watt
而班友面對對方死守又唔識拉邊
個肥教練仲因為驚D.彭利拿會兩黃一紅而換走佢
變相廢左右路側擊
要到下半場先識換入杜格拉斯哥斯達以及馬干馬基斯加強側擊
唔睇波既都知巴西羸晒技術
不過正如'低能'所講
有天份但唔識發揮都冇用
3) 維拉 vs 車路士
話不可說盡,勢不可去盡,凡事太盡,緣份勢必早盡
小弟想講既其實係肥安
羸完利記後囂到話羸唔到聯賽只係輸自己
而家後防接連發瘟簡直係現眼報
4) 新特蘭 vs 利物浦
焦點一定係入球既合法性
只要對球例有少少認識都知球波有問題
因為個沙灘波影響左比賽之餘仲令拉爾拿失波
不過話說回頭
紅軍一眾防守球員同埋旁証都有責任
因為小弟事後睇左重播
個沙灘波第一次出鏡係1:50於球場範圍外
到佢再次出鏡既時候已經係失波既時候
中間既3分鐘個波唔似係突然移動到龍門口
利記竟然冇人踢走佢之餘
旁証亦竟然睇唔到
又或者睇到都唔通知球証吹停場波
講返場波
利記既表現明顯唔夠黑貓好
賓尼迪斯因為冇左兩大主力同埋留力對里昂既歐聯
排出新陣3-4-3
不過後防中路多左個人唔代表會穩陣
反而分工唔明顯仲大鑊
5) 森林 vs 紐卡素
有主場之利既森林開波已經搶攻
偏偏紐記上半場既表現屎到得人驚
辣椒仔,格夫里同埋路蘭面對麥堅拿等幾個硬朗球員
好多時都搶輸俾人
更冇餘力緊迫好波之人蘇捷維斯基
解釋點解紐記徹底失勢
而雪上加霜既係史堤芬泰萊同埋高路仙尼都因傷缺陣
基辛尼舒韋利要重彈舊調之餘
森遜亦要串演中堅
靈活有速度但輸晒高度同埋路數
自然睇唔掂大勇既布歷史托
下半場紐記既表現有明顯改善
不過依然唔足以扭轉局面
除左路蘭既詐糊外就再冇有威脅攻門
紐記面臨開季以內既首個低潮
費sir以前講過
爭聯賽冠軍既關鍵係睇下邊個領隊有能力將低潮期縮到最短
紐記而家同曉頓商討搵佢坐正絕對有穩定軍心既作用
而現時既考驗亦可以睇下佢有冇料坐正
不過同樣重要既係好似路蘭咁講
艾殊利有俾錢增兵既必要
另一方面,由於一對正選中堅下場仍要養傷
曉頓不妨考慮下新仔哥達
而古迪利斯得到休息後應該可以重返正選
不過向來唔擅射既阿根廷人應該唔好咁多浪射
另一方面,4連勝既森林氣勢應該係而家全英冠最勁
下場對班士利應該有力再下一城
不過如果要雞蛋裡挑骨頭
比利戴維斯或者要為布歷史托既拍檔人選再動下腦筋
因為而家依然好似冇個特別好
3 comments:
小弟深信大球場能夠助南華入決賽
施治真係一段時間就發一次瘟
有問題就一定
不過既然網主話利記表現亦唔好
其實都唔抵爭
只係輸左比較唔抵
今年四強輪流失分
唔知話實力接近定係佢地已經趺watt
表現唔夠人好
輸都正常
路蘭果球雖然有爭議性
不過成場波既表現
都唔值得贏
一分都要偷笑
最後輸波只能話係正常
今晚再次作客
只能望球隊回復番水準
先求不敗
(1)該晚可算是英超英冠adidas既黑色星期六,好多adidas贊助既球隊都失分,車仔,利記,紐記,米堡都輸波,打比郡就和波....
其實排陣冇大問題,因為某些位置唔夠人...只是球員發揮唔到,作客表現失準..
一對中堅犯左一次錯,森遜走左出來,後防空左,咁就失左球..不過其實兩個借將第一次拍檔,唔算太差了...
上半場真係被森林既快攻打亂左比賽節奏..
nolan上半場好似隱左型,
smith就因太快取黃牌而踢得比較靜..不過佢控球分波仍然有功架...
盧雲同古費里踢得唔好,好似冇左翼..特別是盧雲,佢真係唔適合踢翼..同埋簽番佢,踢左幾場又唔見有表現,仲係冇咩狀態...
古費里d傳波又係幫唔到進攻時既推進..
中前場仍然犯了上季既錯誤,唔識推進及組織..
蜘蛛人又係死去..雖然有拚勁,但佢d浪射又真係...
下半場其實可以換入謝列美..起碼佢傳波分波唔見得差...
nolan果球是否越位,就見仁見智了..
今場未能和波同進攻瓣數太少有關..
幾個前鋒都只適合踢後備...
我覺得ranger如果唔係剛病好,踢正選會幾好,佢頂波起跳時間較卡路爾好,控波亦較穩,佢同卡路爾拍檔,希活後備可能好d...
總之這三場波起碼唔見左5分,冇左個榜首優勢..好可惜..
而家球會財困,班主只想賣盤唔肯注資,請領隊又要錢,同埋唔知邊個是合適..而家球隊內部咁太平同穩定,暫時用住曉頓都冇壞..
只希望d傷兵快些好番,借將可以續用至季尾..同埋1月再借多一至兩人啦..
(2)利記冇左謝拉特同托利斯.真係立竿見影,久攻不下..可惜
(3)維拉vs車仔場波其實都好好睇
車仔都攻得好勁..
不過只懂中路入楔.
撕破唔到人地密麻麻既中路
得覺得車仔既兵源好似都唔係好夠.
幸好佢地d主力叫做健康..
傷兵唔算太多
所以暫時仲可以踢到個form
不過幾場輸波都係老鼠拉龜
To: 舒利亞 & sammysir
1)
而家大約得返5000飛
靠主場入決賽?
如果改善到防守就應該得......
2)
施治其實自完美既第一季之後
就簡中會發瘟
3)
sammysir 心水真係清!
4)
計表現
利記同埋紐記都抵死
5)
小弟都同意紐記排陣冇問題
因為限米煮限飯
不過小弟會馬後炮話值得俾哥達試下
因為森遜真係好唔岩踢中堅
6)
小弟覺得紐記輸中場
主因係麥堅拿好搶得
不過辣椒仔兩分鐘就攞黃牌都係原因
7)
紐記現時人腳
小弟 prefer 希活同埋卡路爾既組合
不過前者既態度唔多好
8)
似乎會係曉頓坐正
9)
之前只覺得紐記要搵多個左路球員
而家發覺如果曉頓唔敢用新仔哥達
或者謝列美已經老到唔可以再踢中堅
紐記有必要搵多個中堅
10)
紐記雖然近4場失左10分
不過英冠咁激烈
仲有大把機會追
11)
而家既利記
問題又點止咁少?
Post a Comment