想講下Big 4以及紐卡素既比賽......
1) 伯明翰對車路士
就算繼巴塞後令車仔34場以來首次冇波入
大陸網同埋楊先生既喉舌報都唔使咁誇話伯明翰比美巴塞
真正內容應該係祖赫特'煞'車先岩
佢應該係基雲之外近期英超最堅既龍門
如果 keep 到咁既狀態
卡比路應該冇咩理由世界盃唔用佢踢正選
另一方面,車仔冇波入唔止因為阿歷士冇運罰球中楣
中場推進冇咁暢順亦係原因
或多或少同球員既傷疲問題有關
而右路冇左保辛華令邊線陣擊失色唔少
對手亦可以更集中於中路塞死佢地
而車仔近5場已經第4次失分
當佢地冇趁曼聯後防傷兵潮而盡量放甩對手
之後因為非洲國家盃而陣容不陣
曼聯一定唔會同佢地客氣
萬一之後真係俾人地後上捧盃
這段時期既多次失分可能就係當中關鍵
2) 利物浦對狼隊
面對麥卡菲反口幾乎盡出主力既狼隊
利記有主場之利都只係略佔優勢
如果唔係奇雲杜里離門幾碼失機
利記隨時先失波而陷於苦戰
羸波關鍵一定係對手踢少個
狼隊連失兩球睇到都係中後場執位而漏招
由右閘,中堅以及防中都一齊犯錯
另一方面,阿古蘭尼今場首次踢正選既表現不過不失
初步印象傳送成功率好高
相反謝拉特雖然入波打破悶局
不過多次兜口兜面都俾失波
似乎仲要等佢一段時間去克服信心問題
3) 阿仙奴對維拉
之前幾乎殺盡 Big 4 既維拉下半場忽然跌 watt 連輸3球
可能原因應該有3個:
一係兵工廠中場多左法比加斯即刻踢高一皮波
二係維拉上半場搏得太盡
三係維拉比上季更快出現疲態
小弟但願今場波係維拉整季命運既縮影
講波佬講得冇錯
維拉既正選陣容係最少變化
或多或少同球隊冇咁疊馬有關
不過佢講漏左其實維拉係英超用得最多長波既球隊
跑狗踢法根本就唔可能用足成季
柏度夫領軍後為球隊帶來踢少左長波既變化
不過中場幾個年青拍檔既優勢都係來自速度而唔係技術
奧尼爾要徹底降決問題唯有繼續引入唔同類型既攻擊球員
4) 侯城對曼聯
曼聯開始見到後防傷兵潮完結既曙光
而朗尼亦繼續勇態
不過小弟真正想講既係侯城
上季老虎好快就變返做病貓
球員當眾俾菲爾布朗鬧到失晒信心
以及底牌俾人睇穿晒都係原因之一
不過更關鍵既其實係佢地永遠一往直前既踢法
佢地中前場係有幾個唔錯既球員
不過整體都唔算好有攻擊力
更攞命既係佢地冇穩健防守作為球隊既根基
冒死進攻往往為自己造成致命傷
5) 鍚週三對紐卡素
避免主場6連敗既錫週三明顯搏命過紐記
更大鑊既係曉頓居然搵畢特代替辣椒仔
又邊可能搶得羸對手
似乎搵古費里正式移入中路
再用多個正宗右翼會比較上算
紐記陣中最令小弟有好感既就係艾美老味
如果唔係對手既龍門眼明手快
紐記隨時有機會連雞都偷埋
講返今晚對打呲郡場波
有辣椒仔復出既紐記迎戰可能有多達5個主力缺陣既客隊
只要針對對手冇晒一對閘而做好側擊
應該有力打落水狗兼重回正軌
6 comments:
只講睇左既波
阿仙奴贏波
小弟會用有運形容
一路其實無咩明顯優勢
換入法比加斯一搏有效
其實靠既亦只係罰球及反擊
加上經常見到佢地面對面交失波
沙皇雖然有料
不過今場比小弟既感覺
只係強化版蜘蛛俠
當然維拉今場表現亦唔係好
好多時都攻唔入俾人地偷雞
作客尾三球隊
本來諗住應該唔難打
可惜今次輸形勢加贏唔到波
雖然被追成2:2果球小弟認為對面有犯規
不過我地反先果球
艾美奧比其實又係offside在先
講番老味
係英冠真係幾掂
拍希亞活似乎暫時係最佳拍檔
卡路爾後備落場
都算係靈光一閃
同Ranger都係可靠後備殺手
至於彭卡迪同盧雲克蘭斯
似乎無咩表現
當然時間亦唔多
不過前者落場後兩腳浪射
真係浪費左少少
今晚場波
首先緊係要贏波
至於中間
唔想見到畢特.....
To: 舒利亞
1)
小弟同意阿仙奴既發揮唔係特別出色
不過維拉仲大鑊
效率明顯跌晒watt
輸左一球都已經無咩反撲能力
2)
咩係強化版蜘蛛俠?
3)
小弟之前都講過艾美奧比夾希活
係紐記現時最佳前鋒組合
原因係佢兩個都唔埋門一腳比較好之餘
唔獨食兼有比較準繩既二傳能力
4)
卡路爾可以入來入替艾美奧比
兩個都唔見得有搏足90分鐘既體力
而蘭加夠靈活又唔鍚力緊迫對手
搵佢踢突擊牽制對手亦唔錯
5)
彭卡迪以及盧雲卡蘭斯都已經雪到硬晒
之前又養傷多過踢波
不過你唔好對前者咁大期望
條友踢左咁多年波都只係入左大約20球
可想而知論中前場球員既入球能力
佢應該只係好過古迪利斯
而後者當年踢格流都算有料到
佢操返8成水準都應該會幫到紐記唔少
不過曉頓唔多肯用佢又係另一個問題
姐係強化版古迪利斯~_~
p.s.
又失兩分......
仲要佔優下無兩分....
領先優勢一下子無哂....
To: 舒利亞
1)
艾沙維0個晚好多時都係孤掌難鳴
2)
枉小弟天寒地凍捱夜食住餐肉麵撐佢地
仲遷就老豆而聽廣東話廢up旁述
點知都係睇唔到佢地羸波
兩場波倒水唔見4分真係好肉赤
尋晚紐記真係超唔抵
特別係第二球
小弟初頭以為入波仲成個彈起
詳細就等埋利記今晚場波先講
p.s.:
尋晚彼德堡主場殘陣兼傷埋龍門
38分鐘就輸梗4球俾卡迪夫城
都可以堅到追返4球
佢地如果場場都咁韌
就唔使搞到而家咁衰
不過更衰既係場波偏偏冇直播
之前我地都分析過紐記仍然存在既問題,
好似兩翼既進攻組織等一直都解決唔到,
結果話口未完就連和兩場,
雖然兩場波都好似有些少唔抵,
但感覺已經被其實英冠球隊睇穿左紐記既不足,
幸好叫做11場不敗,
同埋領先緊第三名既森林8分,
即係仲有3場波既籌碼係手,
希望星期六既足總盃能WIN啦...
To: sammysir
已經寫左賽後感
'2009-12-30 (1)'
Post a Comment