對於伯明翰對紐卡素場波
sammysir 講得咁有水準
(以小弟認識既紐迷當中,sammysir 應該係最識波既一個)
小弟心生有愧
有幾個 point 要補充返:
1)
未開波見到佢地既排陣
已經估到係 Big Sam 最最好既 4-3-3
但唔明既係基瑾冇理由唔知
紐記班友踢 4-3-3 唔掂
下半場變左另一隊波
原因除左尋日講過紐記班友好搏
同埋伯明翰略為保守左少少之外
另一個原因係0個班原本踢 4-3-3 既人腳
似改踢 4-4-2
2)
十幾年前有睇開紐記既都會知
基瑾好鍾意用 4-4-2 陣式
1個進攻中場再加兩翼傳中
前面兩個射手
其中一個要擅長二傳
只要從這方面去唸
就會明點解基瑾會以尼索比亞換走馬田斯
小弟唔反對用尼索比亞
因為佢想拉開伯明翰既右路防守
concept 上一定冇錯
但就好好好好好好唔贊成馬田斯被收起
(利記作客炒3:0場波見佢咁有球味同埋鬥心
自始佢就係小弟最睇得順眼既紐記球員)
反而 prefer 基瑾換走奧雲
而維度卡就明顯因為有二傳能力而唔使被換走
不過如果有二傳能力,但冇態都可以留低既話
基瑾1月增兵成日食檸檬既時候
其實應該搵舒靈咸幫手
而同舒利亞合作既時候
倒不如搵佢返來踢前鋒
好過搵佢做副手
雖然安迪卡路爾未夠火候
但小弟都同意用佢試下
反正真係冇壞
3)
以巴頓而家既表現
倒不如將謝列美移入中路
小弟個人認為一定會好過而家
4)
荷西安歷基仲要再睇多一段時間
(不過唔知佢於紐記仲有幾多時間......)
今場佢冇爆鑀
好大原因係伯明翰今場既右路冇料到
5)
小弟到而家都依然相信
紐記只需要一場勝仗就可以重上正軌
因為佢地明顯係有士氣同埋鬥心
今場係繼主場和左阿仙奴之後
小弟感覺到佢地最有鬥心既一場
6)
講都講到口臭......
後防依然令小弟勁勁勁勁唔滿意
5 comments:
小弟都覺得sammysir睇波真係幾深入。雖然大家都係紐迷，小弟自問都對足球幾有熱誠。不過好似sammysir咁分析得咁仔細，小弟真係拍馬都追唔上a_a
係度反而想講下奧雲既問題。其實簽基瑾俾個隊長佢做開始，已經覺得基瑾好似咩都以奧雲行先。雖然佢係陣中最有星味既球員，不過好多時我都覺得佢比馬田斯差。反而基瑾下下都話奧雲係最重要。
TO:版主及舒利亞
你地太過獎啦!
論識波同睇波既深入程度,我又怎及得上板主小黑你呢!
我只係對紐記熟悉,對其他球隊就...
上次回了咁大篇,只是因為我同弟弟都是紐迷,一齊睇波論波,先至諗到d野寫,要我用口講就一定講唔到咁多..而我寫賽後感既模式都是學版主的..
其實舒利亞兄在紐記球迷討論區都常常有好多獨到而深入既見解,功力也很強的,只是因為IVOR也是我和版主既FD,因此有機會在上次對米堡場波寫賽後感,我覺得舒利亞兄如果唔介意既話,可以在這裡留底EMAIL ADDRESS給版主,讓版主邀請去寫賽後感,不知這個提議如何?
To: sammysir 同埋舒利亞
客氣說話已經夠多......
講紐卡素既野點夠你地熟
只係以非球迷既身份去睇
睇到既點都有0的唔同
小弟之前搵過舒利亞寫波
佢好似都有興趣
P.S.:
小弟都覺得基瑾有少少偏心奧雲
但奧雲既影響力可能又係
紐迷或者好似小弟既路人甲睇唔到既
興趣就有既，不過都要睇下有無咁既機會。其實紐記好多比賽，小弟都睇唔到。不過版主有需要既係度講底就可以了，因為小弟唔check e-mail的=_=
To: 舒利亞
幾時都有需要
不如你知自己幾時會睇得晒成場波
你就單聲小弟知你會寫
Post a Comment